!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

САД се повлекуваат од УНЕСКО


Вашингтон, 12 октомври, 2017 - 15:47 (META) 

САД донеле одлука да се повлечат од УНЕСКО, соопшти американскиот Стејт департмент.

Како што јавуваат американските медиуми, за одлуката на официјален Вашингтон е известена и генералната директорка на УНЕСКО, Ирина Богова.

„Одлуката не беше лесно донесена и ја изразува загриженоста на САД за состојбата во организацијата, за потребата за реформа, особено на антиизраелскиот однос на организацијата“, стои во соопштението.

Одлуката е донесена поради тензиите околу Палестина, поточно поради резолуцијата што ја донесе УНЕСКО, а која Вашингтон ја смета за антиизраелска.

САД ќе ја напушти светската организација за заштита на историското и на културното наследство на 31 декември.


Иран да престане да ги финансира терористите, порача Трамп од Тел Авив


Тел Авив, 22 мај, 2017 - 15:44 (META) 

Американскиот претседател Доналд Трамп за време на посетата на Израел изјави дека Иран мора да престане да поддржува „терористи и милиции“ и дека никогаш не смее да поседува нуклеарно оружје.

– Најважно е дека САД и Израел можат во еден глас да објават дека на Иран никогаш не смее да му биде овозможено да поседува нуклеарно оружје – никогаш – и да престане со смртоносното финансирање, тренирање и опремување терористи и милиции – изјави Трамп во заедничкото обраќање со израелскиот претседател Реувен Равлин.

Трамп пристигна во дводневна посета на Израел од Саудиска Арабија, каде ќе има „ретка шанса“ да донесе мир на Блискиот Исток, односно да се обиде да ги деблокира мировните преговори меѓу Израелците и Палестинците.

Говорејќи со израелските претставници, веднаш по слетувањето на аеродромот во Тел Авив, Трамп истакна дека сака да ја „реафирмира нераскинливата врска“ помеѓу САД и Израел.

– Сега мора да работиме заедно да ја изградиме иднината каде нациите од регионот ќе живеат во мир. Пред нас е ретка можност да донесеме стабилност и мир во регионот – рече Трамп, додавајќи дека тоа може да се постигне само со заедничко дејствување.


САД директно го предупредиле Израел за дејствијата на Западен Брег


Тел Авив, 6 март, 2017 - 13:48 (META) 

САД го известиле Израел дека наметнувањето на израелскиот суверенитет на Западниот Брег ќе воведе криза во односите со администрацијата на американскиот претседател Доналд Трамп, соопшти денеска израелскиот министер за одбрана Авигдор Либерман.

– Добивме директна порака, не индиректна и не навестување од САД. Наметнувањето на суверенитет во Јудеја и во Самарија ќе значи непосредна криза во односите со новата администрација – рече Либерман.

Јудеја и Самарија се библиски термини за Западниот Брег.

Либерман реагираше на интервјуто на пратеникот Мики Захар од партијата на премиерот Бенјамин Нетанјаху, во кое тој ја отфрла идејата за палестинска држава и се залага за „решение со една држава“, во која Палестинците би имале израелско државјанство.


Абас бара поддршка за формирање палестинска држава


Женева, 27 февруари, 2017 - 15:44 (META) 

Палестинскиот претседател Махмуд Абас денеска апелираше до меѓународната заедница при решавањето на судирот со Израел да го поддржат формирањето на независна палестинска држава.

Во својот говор пред Советот за човекови права на ОН во Женева, Абас ги повика земјите кои веруваат во решавање на проблемот „да застанат во одбрана на тоа решение“ и да ја признаат државата Палестина.

– Решението мора да биде заштитено од секој обид за повлекување или еднострано запоставување – рече Абас.

Тој го осуди населувањето на окупираните територии и усвојувањето закони во Израел кои со ретроградно дејство легализираат илјадници домови на еврејски доселеници на Западниот Брег и нелегалното подигнување населби на приватно земјиште на Палестинците.

Палестинскиот лидер рече дека законот ја „легитимира кражбата на окупираната палестинска земја“.


Сè помали се изгледите за мир на Блискиот Исток, оцени Бан Ки-мун


Њујорк, 30 ноември, 2016 - 12:15 (META) 

Генералниот секретар на обединетите нации, Бан Ки-мун, рече дека меѓународната заедница мора јасно да каже дека и понатаму е посветена на мировните преговори меѓу Израел и Палестинците, затоа што изгледите за мир „можат да се лизнат од раце“.

Бан, чиј десетгодишен мандат завршува за еден месец, синоќа издаде соопштение во пресрет на состанокот на Генералното собрание на ОН, кое го сочинуваат 193 земји, по повод Меѓународниот ден на солидарноста со палестинскиот народ.

Тој наведе дека поради настаните од последната година, вклучувајќи ги и двата неуспешни обида во преговорите за договор и вооружените судири, Палестинците и Израелците се фрустрирани и разочарани.

„Тоа им даде сила на радикалите и ги ослабна умерените на двете страни. Тоа што ги прави работите уште полоши е опасниот вакуум во меѓународната заедница затоа што кризите во другите места го одвлекуваат вниманието на светските лидери“, рече Бан.

Палестинците сакаат да основаат независна држава на Западниот Брег и во Појасот Газа, со источен Ерусалим како главен град на државата. Израел ги освои овие територии во шестдневната војна во 1967 година и на Западниот Брег и во анектираниот источен Ерусалим сега живеат околу 600.000 еврејски населеници.


Спречен бомбашки напад во Ерусалим


Ерусалим, 17 јули, 2016 - 12:45 (META) 

Еден 20-годишен Палестинец е уапсен на железничка станица во централниот дел на Ерусалим. Како што јавуваат израелските медиуми, кај него била најдена торба со експлозив.

Полицијата соопшти дека Палестинецот бил испрашуван од чуварите кои рекле дека им предизвикал сомневања кога се обидел да влезе во возот. Додека го испрашувале, тој им признал дека носи експлозив.

Специјални единици на полицијата пристигнале на станицата и пронашле повеќе бомби во неговата торба. Поради инцидентот, запрен е железничкиот сообраќај на таа линија.

Во бранот насилство кој трае десет месеци, убиени се 34 Израелци и двајца американски туристи, поголемиот дел од нив во палестински напади со ножеви. Во тој период загинале повеќе од 200 Палестинци.


Израел привремено го забрани влезот за сите Палестинци на нејзина територија


Ерусалим, 10 јуни, 2016 - 11:37 (META) 

Израелската војска денеска соопшти дека привремено им го забранува влезот на сите Палестинци во Израел, со што ги заостри мерките што властите ги воведоа откако вооружени напаѓачи завчера вечерта убија четири лица во Тел Авив.

Портпаролката на израелската војска, пренесуваат светските агенции, изјавила дека во согласност со владините директиви и со проценката на моменталната ситуација, од денеска премините од Појасот Газа, Јудеа и во Самарија ќе бидат отворени за Палестинците само во случај на потреба од медицинска и од хуманитарна помош.

Забраната за влез во Израел, според информациите, ќе биде на сила до недела на полноќ.

Израел вчера соопшти дека ги суспендирал дозволите за влез на нејзина територија за 83.000 Палестинци за време на светиот муслимански месец Рамазан, по пукањето во Тел Авив.

Во нападот, кој, како што е соопштено, го извеле Палестинци, беа убиени четири лица, а седум беа ранети.

Шефот на полицијата во Тел Авив, Моше Едри, изјави дека двајцата напаѓачи се членови на исто семејство од палестинското село Јата, во близина на Хеброн на Западниот Брег, кој беше жариште на неодамнешниот бран насилства.


Израелската војска изврши напади во Појасот Газа


Тел Авив, 6 мај, 2016 - 13:18 (META) 

Израелската војска утринава нападнала цели на југот на Појасот Газа од воздух и со артилериски оган, јавуваат израелските медиуми.

Тоа е четврти напад од воздух од средата, кога директен судар меѓу Хамас, кој владее со Газа, и израелските сили, изби првпат од 50-дневната војна во 2014 година.

Израелскиот премиер Бенјамин Нетанјаху денеска свика итен состанок на безбедносниот кабинет за да се дискутира за ескалацијата на насилствата.

Една 54-годишна Палестинка загинала, а уште тројца се повредени во вчерашните израелски воздушни напади.


Израелската војска убила двајца Палестинци


Хеброн, 24 март, 2016 - 12:28 (META) 

Израелската војска убила двајца Палестинци кои со нож полесно раниле еден војник. Инцидентот се случи на контролен пункт кај Хеброн.

Поради празник, Израел ги засили безбедносните мерки во Хеброн и го затвори Западниот Брег. Од тие причини илјадници Палестинци не можат да стигнат на работа.

Во бранот насилства, од октомври 2015 година, убиени се 190 Палестинци и 28 Израелци.


Израелската војска уби тројца палестински напаѓачи


Тел Авив, 14 март, 2016 - 10:50 (META) 

Израелските војници денеска убиле тројца палестински напаѓачи, кои претходно раните четири војници во два напад во рок од 30 минути, на двата краја на еврејската населба Кирјат Арба, на Западниот брег, јавуваат израелските медиуми.

Војската соопшти дека двајцата Палестинци отвориле оган на пешаци на автобуска станица на крајот на населбата и полесно раниле еден војник. Подоцна напаѓачите се убиени.

Нешто подоцна еден Палестинец со автомобил налетал на воено возило, во одговор на претходен напад, ранувајќи тројца војници. Напаѓачот подоцна е убиен.