!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Четири лица загинаа во пад на грчки воен хеликоптер кај Лариса


Атина, 19 април, 2017 - 13:25 (META) 

Четири воени лица загинаа, a една жена е тешко повредена во воен хеликоптер кој денеска се урна во област близу грчкиот град Лариса. Хеликоптерот летал од Лариса кон Кожани, кога се изгубил од радарот нешто пред 8 часот, во близина на областа Еласонас.

Центарот за справување со кризи почнал потрага по хеликоптерот еден час подоцна. Грчките спасувачки екипи ги нашле остатоците од хеликоптерот, четворицата загинати воени лица и една жена офицер со тешки телесни повреди, која веднаш е префрлена во воената болница во Солун.

Според информациите од Генерал-штабот на грчката армија, хеликоптерот извршувал планиран лет за контрола на северната граница на Грција, односно границата со Македонија и со Албанија, за проверка на безбедноста во пограничните региони. Овие летови, според весникот „Етнос“, редовно ги одржувале три лица од екипажот на хеликоптерот.

Во тек е истрагата за утврдување на причините за падот на хеликоптерот. Информациите од армијата се дека леталото било проверено и целосно исправно.

Пораки за сочуство до семејствата на загинатите испратија грчкиот претседател, Прокопис Павлопулос, премиерот Алексис Ципрас и лидерите на сите големи грчки политички партии, а министерот за одбрана, Панос Каменос, прогласи тридневна жалост во армијата.


Македонија за една година падна 24 места на индексот на корупција


Скопје, 25 јануари, 2017 - 13:42 (META) 

Македонија за една година падна 24 места подолу на глобалниот индекс на перцепција на корупцијата (ИПК) на „Транспаренси интернешнел“ (ТИ) и на мерењето за 2016 година е на 90. место, додека на индексот за 2015 година била на 66. позиција.

Тоа е и најголемиот пад што земјава го забележила почнувајќи од 2012 година, кога е воведена сегашната методологија на рангирање за ИПК.

Падот од 24 позиции на листата на 176 држави и територии од целиот свет за нивото на перцепција на корупцијата во јавниот сектор, според д-р Слаѓана Тасева, претседател на „Транспаренси интернешнел – Македонија“, се должи на политиката на клиентелизам и интереси спроведувана од Владата на Република Македонија, со што е создаден систем на заробена држава која ја оневозможува борбата со корупцијата и ги штити корумпираните.

– Владата на Република Македониjа, која повеќе години водеше политика заснована на клиентелизам и на интереси, не само што ги занемаруваше сите укажувања за ескалација на проблемот со корупцијата, туку со воспоставувањето на системот на заробена држава го оневозможи работењето на институциите задолжени за борба против корупцијата. На овој начин се создаде силно изразен систем на заштита на корумпираните и систем во кој наспроти правото, владеат интереси – вели Тасева.

Индекс корупција 2016 - прес на Транспаренси интернешнл Македонија 25012017

Индексот го презентираше Дона Димов, истражувач на Транспаренси Интернешнл – Македонија

„Транспаренси интернешнел – Македонија“, која денеска го презентираше ИПК за 2016 година, подготви и ранг-листа за регионот, кој ги опфаќа земјите на поранешната територија на СФРЈ плус Бугарија, на кој Македонија е претпоследна. Полоша е состојбата само во Косово, кое е на 95. место, додека Босна и Херцеговина е 7 места повисоко од нас  – на 83. позиција.

Но, состојбата не е алармантна само во поглед на регионот. Со ИПК за 2016 година, Македонија е 9. на листата на земји со најголем пад на рангот, односно имаме ист пад, од 24 места, со Суринам, а полошо поминале Тајланд, Белорусија, Мексико, Тринидад и Тобаго…

За една година, Македонија во поглед на поените според кои се врши рангирањето, бележи пад од пет поени, односно ако во 2015 година добила 42 поени, за една година оценката е намалена и во 2016 година добила 37 поени.

– Резултатот заснован на седум нови истражувања, укажува на тоа дека корупцијата е согледана како сериозен проблем за развој на економијата, за владеење на правото, за странски инвестиции и за стабилна демократија. Тоа создава недоворба на граѓаните во капацитетите на државата и во институциите. Недопирливоста на одговорните за корупција е секојдневие кое треба да се искорени, а синџирот на корумпираност во високите ешалони на сите власти да се прекине. Тоа е одговорност на претседателот на државата, на новоизбраните пратеници, на тие што ќе формираат влада, на вработените во институциите и во судството. Тоа е одговорност и на граѓаните, кои ги охрабрувам да ѝ се спротистават и да ја оневозможат корупцијата во име на иднината – порачува претседателка на „Транспаренси интернешнел – Македонија“.

На годинашната листа, Данска и Нов Зеланд со 90 поени се на првото место, а по нив следат Финска (89) и Шведска (88). Иако ниту една земја не е без корупција, државите кои се на врвот делат карактеристики како отворена влада, слобода на медиумите, граѓански слободи и независни судски системи, велат од ТИ, појаснувајќи дека годинава поголем е бројот на земји што паднале на листата, отколку на тие што се искачиле.

Индексот на перцепција на корупцијата претставува збир на податоци од голем број различни извори кои ги претставуваат перцепциите на бизнисмените и на експертите во однос на нивото на корупција во јавниот сектор во земјите. При рангирањето на Македонија, обработувани се податоците од извештаите што ТИ ги добила од фондацијата „Бертелсман ТИ“, Светскиот економски форум, Светскиот проект за правда РОЛ, „Интелиџенс јунит“ на „Економист“, „Глобал инсајт“, „Фридом хаус“ и проектот „Веритис оф демокраси“.


Извлечено телото на пилотот на рускиот авион кој се урна во Црно Море


Сочи, 26 декември, 2016 - 19:21 (META) 

Нуркачите го извлекоа на површина телото на Роман Волков, пилотот на авионот „ту-154“, кој вчера падна во Црно Море две минути по полетувањето, при што загинаа 92 лица.

Според извори од местото на акцијата, нуркачите што учествувале во операцијата за извлекување на телата на жртвите и на деловите на авионот, пронашле уште едно тело, а кога го извлекле на површина, врз основа на униформата заклучиле дека се работи за Волков.

Истиот извор наведува дека претходно на површина извлечени биле уште 70 посмртни остатоци на жртвите на несреќата.

Во Москва утринава пристигна првиот авион со телата на загинатите и почна процесот на нивна идентификација.


Телата на жртвите од падот на рускиот авион ги бараат 27 бродови


Сочи, 25 декември, 2016 - 14:35 (META) 

Руското министерство за одбрана соопшти дека 27 бродови и чамци, како и повеќе од 3.000 луѓе и 100 нуркачи ги бараат телата на жртвите од авионската несреќа која се случи во близина на Сочи.

„Вкупно 27 бродови и чамци, 37 возачи, четири хеликоптери и дронови, како и подморница ја пребаруваат областа во која се урна рускиот воен авион“, се наведува во соопштението.

Авионот на руското министерство за одбрана „ту-154“ се урна во Црно Море во близина на Сочи, непосредно по полетувањето за Сирија, при што загинаа 93 лица.

Сè уште се истражуваат причините за несреќата.


Понеделник ќе биде ден на жалост во Русија, соопшти Путин


Москва, 25 декември, 2016 - 12:55 (META) 

Рускиот претседател Владимир Путин го прогласи понеделник за ден на жалост поради падот на рускиот авион на министерството за одбрана, во кој загинаа 92 лица. Авионот падна во Црното Море во близина на Сочи, две минути по полетувањето.

– Утре ќе биде ден на национална жалост во Русија – им рече Путин на новинарите.

Рускиот претседател претходно изрази сочувство до семејствата на загинатите и му наложи на премиерот Димитри Медведев да застане на чело на државната комисија што ќе го истражува падот на авионот.

Премиерот Медведев соопшти дека Русија детално ќе ги истражи сите околности поврзани со падот на авионот.

– Оваа страшна трагедија однесе животи на луѓе кои беа енергични и имаа планови. Помеѓу загинатите има новинари, војници и музичари на познатиот „Ансамбл Александров“. Тие летаа во Сирија во мировна мисија на добрата волја – соопшти Медведев.

Рускиот премиер наведе дека сите погодени од оваа трагедија ќе примат неопходна помош и им испрати сочувство на семејствата на жртвите.

Портпаролот на руското министерство за одбрана, Игор Конашенков, соопшти дека кон падот на авионот се упатиле четири бродови, пет хеликоптери и неколку дронови.


Во падот на рускиот авион загинаа хористите од „Ансамбл Александров“


Сочи, 25 декември, 2016 - 10:46 (META) 

Руското министерство за одбрана ја објави листата на патници на авионот „ту-154“ кој со 92 патници и членови на екипажот се урна во Црното Море откако од Сочи полета кон Сирија.

Во леталото имало 64 членови на официјалниот воен хор на руските вооружени сили „Ансамбл Александров“, кој требало во руската воена база Хмеимин да учествува во прославата за Нова година. Во авионот се наоѓала и извршната директорка на хуманитарниот фонд „Праведна помош“, Јелисавета Глинка.

Воените истражувачи на истражувачкиот комитет на Русија отворија кривична истрага, а портпаролот на Кремљ, Димитриј Песков, истакна дека претседателот на Русија, Владимир Путин, ги добил информациите за падот на авионот и дека е навремено брифиран за ситуацијата.

– Прерано е што било да се каже, претседателот чека сликата да биде целосна – рече Песков, кој додаде дека рускиот министер за одбрана, Серфеј Шојгу, е на постојана телефонска врска со Путин.

Засега е пронајдено тело на една од жртвите, како и документи на новинар од рускиот „Канал 1“.

Портпаролот на руското министерство за одбрана, Игор Конашенков, изјави дека во авионот имало осум членови на екипажот и 84 патници. Освен музичарите, помеѓу патниците имало војници и новинари.

Руската воена телевизија „Звезда“ соопшти дека помеѓу новинарите имало тројца нивни колеги, а дека тројца од новинарите се од „Канал 1“.


Руски воен авион со 92 патника падна во Црно Море


Сочи, 25 декември, 2016 - 9:35 (META) 

Руски воен авион со 92 патника и членови на екипажот се урна на пат од Сочи кон Сирија, пренесуваат руските медиуми.

Истражниот комитет на Русија веднаш отвори кривична истрага за трагедијата, а портпаролката Светлана Петренко вели дека нема информација за бројот на загинатите или преживеаните.

Таа наведе дека кривична истрага е отворено поради „кршење на правилата на летачката безбедност или подготовката за нив“. Наведено е дека запленети се документи и се испрашуваат лицата кои го подготвувале авионот за лет.

Авионот исчезнал од радарот околу 5 часот и 40 минути по московско време, кратко по полетувањето од Сочи.

Дел од руските медиуми наведуваат дека спасувачките екипи ги лоцирале остатоците од леталото на околу 1,5 километар од брегот, на длабочина од 50 до 70 метри.

Најголемиот дел од патниците биле музичари на рускиот воен хор кои тргнале во руската база Хмеимин каде требало да учествуваат во прославата за Нова година. Со нив биле и девет претставници на медиумите, шест војници и осум членови на екипажот.


Почина стјуардесата што го преживеа падот на авионот на ЈАТ


Белград, 24 декември, 2016 - 13:16 (META) 

Стјуардесата на некогашната авиокомпанија ЈАТ, Весна Вуловиќ, позната по тоа што беше единствената што го преживеа падот на авионот над тогашната Шехословачка, почина во Белград на 67-годишна возраст.

Како што пренесоа локалните медиуми, таа починала пред неколку дена, но нејзините пријатели го пронашле телото вчера, во нејзиниот стан во Белград.

Весна Вуловиќ е запишана во Гинисовата книга на рекорди како единствена личност што преживеала пад без падобран од 10.160 метри.

Несреќата се случи во 1972 година, а Вуловиќ ја преживеа експлозијата затоа што била врзана за седиште на опашката на авионот ДС-9, која заедно со тоалетите паднала на снег.

По целосното закрепнување на фрактурата на черепот, скршениците на двете нозе и на три пршлени, таа продолжи да работи во ЈАТ.


Се урна „боинг 727“ во Богота, еден патник го преживеа падот


Богота, 21 декември, 2016 - 11:02 (META) 

Во падот на товарниот авион „боинг 727“ во Колумбија, загинаа пет членови на екипажот, а едно лице е тешко повредено, соопшти колумбиската цивилна авијација.

„Пет членови на екипажот загинаа, а шестиот член е тешко повреден и веднаш е префрлен во најблиската болница“, наведе авијацијата.

Авионот кој полетал од местото Пуерто Карено кон Богота, се урнал неколку минути по полетувањето. Во авионот биле само членовите на екипажот.

Причината за несреќата сè уште не е позната.


Најмалку 160 лица загинаа при уривање на покрив на црква во Нигерија


Ујо, 11 декември, 2016 - 13:18 (META) 

Најмалку 160 лица загинаа кога покров на една црква на југот во Нигерија се урна врз верниците, соопштија денеска властите. Се очекува бројот на загинати да се зголеми.

Црквата која се урнала во градот Ујо, во нигериската сојузна држава Аква Иба, била во изградба, а работниците се брзале да ја дозавршат изградбата за да биде готова за церемонијата на која основачот на црквата, Акан Викс, требало да биде прогласен за бискуп.

Во моментот на падот на металната конструкција, во црквата се наоѓале повеќе од стотина верници, меѓу кои и Викс, како и еден владин претставник, кои останале неповредени.

За причините за несреќата ќе биде поведена истрага, за да се утврди дали се испочитувани стандардите при градење на објектот.

Уривањето згради во Нигерија се случува многу често, поради корупција при склучување на договорите за градење, користење на нестандардни материјали, како и поткуп на инспекторите кои вршат надзор.