!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Австрија ќе го тужи „Ербас“ поради корупција при набавка на воени авиони


Виена, 16 февруари, 2017 - 12:08 (META) 

Австриското Министерство за одбрана ќе поднесе тужба, против европскиот производител на авиони „Ербас“, поради корупција при набавката на борбени авиони „Јурофајтерџ“.

Имено, „Ербас“ лажно ја зголемил цената во договорот од 2003 година кога Виена планирала да набави 15 борбени авиони.

Работната група при ресорното министесрство во 2012 детално го проверила договорот и тврдењата поврзани за корупција, како и дали е оштетена Австрија.

Врз основа на извештајот, Министерството за одбрана најави тужба и бара отштета од повеќе милиони евра.


Судиите некритички одредуваат притвор бидејќи е ефтин


Скопје, 15 февруари, 2017 - 16:24 (META) 

Македонските судови имаат унифицирана тарифа или сума за тоа колку чини еден ден поминат во притвор, а која се движи од 2.500 до 3.500 денари (40 – 50 евра), беше истакнато на денешната презентација на истражувањето на „Неосновано притворени – правни и буџетски импликации“, што се одржа во ЕУ-Инфоцентарот во Скопје.

„Сознанието дека ‘цената’ за ограничување на слободата во Република Македонија е многу ниска и дека судиите во граѓанските судови имаат етаблирана практика за досудување мали и незначителни износи за надомест на штета, негативно се одразува врз судиите во кривичната постапка некритички да определуваат мерка притвор“, е заклучок на професорите од Правниот факултет Јустинијан Први во Скопје, Гордана Бужаровска, Ванчо Узунов, Неда Здравева и Бобан Мисоски кои се автори на истражувањето, кое финансиски е поддржано од холандската амбасада во земјава.

Истражувањето се однесува на периодот 2011 – 2015 година и според податоците во овој период 138 македонски граѓани биле неосновано притворени, а подоцна против нив не било покренато обвинение или биле ослободени по жалби во судските постапки.

Исражувањето покажува дека од буџетот на државата за материјална штета поради неосновано притворање судовите досудиле надомест од 3,8 милиони денари, што е само 45 отсто од вкупната сума што била баран од граѓаните. За нематеријална штета биле побарани 65,5 милиони денари, а досуден е износ за штета од 15,5 милиони денари, односно 23, 6 отсто од вкупната сума, додека за надоместоци за трошоци на постапките побарувањата изнесувале 2,1 милион денари, а вкупниот досуден износ за трошоци изнесувал 1,8 милиони денари.

„Податоците покажуваат дека вкупните трошоци за надомест на штета на неосновано притворените лица изнесувале 28.999.395 денари, односно околу 470.000 евра. Во таа смисла, ако тој износ се смета за апроксимативен и за периодот 2011-2015 година, во кој имало 138 неосновано притворени лица со вкупен број од 10.316 притворенички денови, произлегува дека просечниот вкупен надомест на штета по притворенички ден изнесува околу 2.800 денари. Или, просечно по неосновано притворено лице, вкупниот надомест на штета изнесува околу 210.000 денари“, беше истакнато на денешната презентација на истражувањето.

Професорката Бужаровска истакна дека податоците покажуваат дека судовите во 90 отсто од случаите ги прифаќале барањата на јавните обвинителства за одредување на мерката притвор. Обвинителствата пак кон предлозите најчесто ги доставувале доказите што ги добивале од МВР.

Според податоците од јавните обвинителства, во периодот 2011-2015 година, близу 6.700 обвинети лица не биле прогласени за виновни. Од нив за 1.700 обвинети лица судот донел ослободителни пресуди, а за близу 3.000 лица судот го одбил обвинението.

Амбасадорот на Холандија, Ваутер Пломп, кој ја отвори презентацијата, истакна дека заштитата на човековите права е приоритет на Холандија и дека таа како пријател на Македонија известира многу во овие сфери во земјава. Тој истакна дека еден од главните проблеми, кој е нотиран од Европскиот суд за човекови права во Стразбур, е должината на времетрањето на притворот, кој во Македонија е значително повисок во споредба со ЕУ и Холандија.

– Холандија е долгорочен пријател на Македонија и на македонската влада во процесот на сите реформи кои што се потребни за членството на земјата во Европската Унија – рече амбасадорот Пломп.


Со предлог-ребалансот на буџетот дефицитот се зголемува од 3,6 на 4 проценти од БДП


Скопје, 20 август, 2016 - 17:51 (META) 

Предлог-ребалансот на буџетот кој го најави премиерот Емил Димитриев е доставен до Собранието. Во него Владата бара дополнителни 36,4 милиони евра кои треба да се искористат за санирање на штетите во поплавените подрачја.

Со новиот ребаланс на буџетот, дефицитот ќе се зголеми од 3,6 на 4 проценти од бруто-домашниот производ (БДП) и од 344,4 милиони евра се зголемува на 375,9 милиони евра.

Предлог-ребалансот на буџетот вчера го најави премиерот Емил Димитриев со цел целосно да се обесштетат граѓаните од поплавените подрачја, а дел од парите ќе се обезбедат од кредити.

Од опозицијата реагираа на оваа изјава на Димитриев и бараат парите за изградба на панорамско тркало и „Рајска градина“ да се пренасочат за помош на поплавените.


СДСМ: За исплата на штетите нема потреба од нови задолжувања


Скопје, 19 август, 2016 - 17:17 (META) 

Доказ за неспособноста на оваа влада е признанието дека за најавените 33 милиони евра за отштета за поплавените граѓани, дополнително планираат да земат нов кредит од меѓународни институции, се вели во соопштението на СДСМ.

– И покрај тоа што пред помалку од еден месец незаконски издадоа еврообврзница од 450 милиони евра, денеска самите признаа дека не се во состојба од тие средства да одвојат само седум проценти и да ги наменат за санирање на штетите од поплавите – се вели во соопштението на СДСМ.

Од таму предлагаат, 20 милиони евра од четвртата еврообврзница, што беа наменети за бегалската криза да се пренаменат за санирање на штетите од поплавите.

– Истовреме Владата под итно да се откаже од 15 милиони евра најавени за рајската градина во општина Аеродром и од 18 милиони евра за панорамското тркало. Со пренамената на средствата од кој било од овие два проекта, заедно со средствата од четвртата еврообврзница, нема да има потреба од никакво дополнително задолжување. Елементарните потреби и проблеми на граѓаните на Македонија мора да бидат ставени како приоритет пред изградбата на тркала и градини – велат од СДСМ.

Тие бараат што побрзо да започне исплатата на штетите на настраданите од поплавите, под еднакви услови за сите граѓани, без партиски списоци и без никакви дополнителни кредити.


Турција подготвена да ѝ плати отштета на Русија за соборениот воен авион


Анкара, 28 јуни, 2016 - 10:44 (META) 

Откако Турција ѝ се извини на Русија за соборувањето воен авион во ноември мината година, најави и дека ќе го исполни и второто барање на Москва и ќе плати отштета за авионот.

Турскиот премиер Бинали Јулдирим за турската телевизија ТРТ потврдил дека Анкара ќе ја плати отштетата за соборениот авион од типот „сухој су-24“ и најавил дека наскоро ќе се нормализираат односите со Русија.

Дмитриј Песков, портпаролот на рускиот претседател Владимир Путин, претходно соопшти дека турскиот претседател Реџеп Таип Ердоган испратил писмо до својот руски колега, во кое се извинил за иницидентот и изразил сочуство за загинувањето на еден од пилотите.

„Содржината на писмото е јасна. Ние го изразивме нашето жалење и, ако е потребно, ќе ја платиме и отштетата. Двете земји сакаат нормализирање на односите. Мислам дека работите одат кон подобро“, рекол Јилдирим за ТРТ, додавајќи дека Турција во Русија гледа стратешки партнер.


Роднините на полицајците убиени во Диво Насеље се појавија во судницата


Скопје, 10 март, 2016 - 15:06 (META) 

Роднини на осумтемина полицајци што беа убиени во борбите во кумановско Диво Насеље на 9 и на 10 мај минатата година, денеска се појавија на рочиштето од судскиот процес.

За висината на отштетата што ќе ја побараат во граѓанска парница, тие ќе се изјаснат дополнително преку своите законски застапници.

Роднините, меѓу кои сопругите и татковците на убиените полицајци, не можеа да ги сокријат емоциите.

На една од нив, по завршувањето на рочиштето ѝ се слоши, поради што беше повикана е екипа на итна медицинска помош.

Роднините не учестуваа во денешниот главен претрес. Еден од нив сакаше да постави прашање во судницата, но не му беше дозволено од судијката Верка Петковска, која образложи дека тој не е пријавен како правен застапник на оштетените и во оваа фаза од постапката нема право да се обраќа во судот.

На денешното рочиштето сведочеа двајца сведоци, Арнад Сејдиу и Сабит Сејдиу, кои се син и татко и кои имаат куќа во Диво Насеље.

Синот рече дека се познава со тројца од обвинетите, кои се негови соседи, но дека пред настаните од 9 и од 10 мај поминувал малку време во населбата бидејќи ја подготвувал новата продавница.

„Кога се вратив околу 22.30 ноќта на 8 мај, забележав дека е многу тивко и мирно, што е невообичаено, но си помислив дека тоа е така бидејќи луѓето немаат пари, не стигнала платата, па немаат зошто да излегуваат“, рече Арнад Сејдиу, пренесува „Академик.мк“.

Тој утрото на 9 мај бил разбуден од пукотници и забалежал многу полиција околу неговата куќа. Заедно со четворица негови работници кои биле во куќата, биле земени од полицијата и однесени во полициската станица каде биле задржани 27 часа.

Наговиот татко, Сабед Сејдиу, рече дека викедот на 9 и на 1о мај бил во селото Ранковце, каде имал куќа, а за пуконтниците во Диво Насеље дознал од неговата ќерка, која вознемирена му се јавила на телефон и му кажала што се случува.

 


Ќе заработат ли сопствениците на земјиште од експресниот пат Штип – Кочани?


Штип, 19 февруари, 2016 - 16:32 (META) 

На денешната јавна расправа во Штип за експресниот пат Штип – Кочани, сопствениците на имоти дознаа дека ќе останат без дел од нивите. И без оглед дали ќе се спогодат за цената што ќе им ја понуди државата, земјиштето им се одзема по сила на законот бидејќи се работи за проект од јавен интерес.

Доколку не се договорат за цената што ќе им ја понуди државата, последна станица е судот, но тоа не го спречува градењето на патот и работите непречено ќе се одвиваат.

„Нè враќаат во 1947 година, кога земјиштето во социјалистичка Југославија им беше одземено на земјоделците и доделно на државата“, реагираа дел од присутните сопственици.

Други очекуваа да слушнат колку пари ќе добијат за нивите. Дали од нивите кај Сарчиево, Балван и кај Три Чешми ќе заработат како сопствениците што ги дадоа нивите за изградба на аеродромот кај Свети Николе.

Претставници на Агенцијата за државни патишта и проектантот на трасата објаснија дека експресниот пат ќе минува паралалено со посточекиот пат Штип – Кочани, откако ја напуштиле претходната траса по реакцијата на Општината Чешиново – Облешево дека експресниот пат ќе минува низ неколку села, каде и досега имаше неславни рекорди на човечки жртви од сообраќајќи.

На приватните сопственици ќе им биде понудена спогодба со државата откако проценители ќе ја одредат цената. Присутните сопственици, главно повозрасни луѓе, не добија одговор колку ќе добијат за своите парцели.

Еден од аргументите на присутните беше дека парите за нивите ќе ги потрошат, дека треба да се размислува од што потоа ќе живеат. Тогаш падна и предлог за промена на трасата на патот.

„По целата траса на патот погоре со поместување од два-три километри има слободно земјиште што не се обработува. Тоа е државно земјиште и ќе избегнеме и спогодби и судови. Оставете нè да си ја обработуваме земјата“, предложи еден од помладите сопственици, кој, како што рече, потрошил години за да го добие земјиштето, а патот поминува среде неговата плантажа од 95 декари лозје.

Бошко Целаков од проектантскиот тим на „Чакар и партнерс“ објасни дека првата делница од 14,3 километри ќе поминува низ државно и приватно земјиште и го опфаќа просторот од Технолошката зона во Штип (ТИРЗ) до населбата Ванчо Прке.

„Патот ќе биде широк 11,4 метри за во иднина да прерасне во авотпатско решение. Ќе опфати од 450 до 500 хектари од кои две третини се државно земјиште и една третина приватно земјиште“, изјави Целаков.

Оваа прва делница од 14,3 километри ќе чини од 28 до 30 милиони евра, за што Македонија веќе доби кредит од Европската банка за обнова и развој (ЕБРД). Во иднина овој екпресен пат треба да прерасне во автопатско решение кое ќе се поврзе со патот Штип – Миладиновци.


Исплатени се 17,2 милиони денари отштета за поплавите


Скопје, 12 декември, 2015 - 17:03 (META) 

Исплатени се 17,2 милиони денари отштета за поплавите на 364 лица во Струмица, Могила и во Гази Баба.

Како што соопшти Министерството за финасии, заедно со претходно исплатените средства, досега се исплатени вкупно 331.691.754 денари на 3.225 оштетени лица од поплавите што се случија годинава.

 


Исплатени се 2,3 милиони денари отштета за невремето


Скопје, 2 октомври, 2015 - 15:34 (META) 

Исплатени се 2,3 милиони денари отштета на 105 лица од Радовиш, Охрид и од Кратово, региони кои беа зафатени со временски непогоди, информираат од Министерството за финансии.

Денеска, исто така, се исплатени 1,9 милиони денари субвенции на сточари за одбележани грла говеда.


Исплатена отштета од 29,9 милиони денари на поплавените од струмичкиот регион


Скопје, 15 септември, 2015 - 13:03 (META) 

Владата денеска ги исплати парите за отштета од поплавите во Струмица. На 394 лица им се исплатени 29,9 милиони денари, соопшти Министерството за финансии.

Исто така, исплатени се 527.000 денари на граѓаните во Градско и 489.000 денари на граѓаните од Чешиново-Облешево.

Досега се исплатени вкупно 144,24 милиони денари на 2.218 оштетени од поплавите кои се случија годинава. Отштета е исплатена и на граѓаните од Могила, Новаци, Демир Хисар, Битола, Босилово, Кривогаштани, Велес, Пробиштип и од Штип.

Исплатата на отштетата од поплавите ќе продолжи.