!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Отруени две кучиња во Карпош 4, отров оставен во куќарка за куче во Аеродром


Скопје, 11 декември, 2017 - 13:32 (META) 

Два случаи на отруени кучиња и на оставен отров за куче се регистрирани во Скопје во изминатово деноноќие, извести МВР.

Вчера во 23.15 часот во полициската станица Карпош било пријавено дека на улицата Разловечко востание во Карпош 4, пред станбена зграда, биле пронајдени две отруени кучиња.

Денеска во 8.45 часот било пријавено дека на подрачјето на булеварот Јане Сандански во населбата Аеродром непознато лице оставило отров во куќарка за куче.


Богдановиќ повика граѓаните да пријавуваат обиди за труење животни


Скопје, 10 декември, 2017 - 20:10 (META) 

Градоначалникот на општина Центар, Саша Богдановиќ денеска ги повика граѓаните граѓаните доколку забележат расфрлен отров во централното градско подрачје веднаш да се јават на телефонските броеви: 070 424685 на Емилија Поповска и 075 437068 на Јулија Малахова.

Граѓаните треба да пријават и напуштени домашни миленичиња.

Богдановиќ побарал од командирот на Полициската станица Центар да се зајакнат полициските контроли за да се спречат обиди за труење на животните.

Во Скопје во изминативе три дена имаше неколку случаи на отруени улични животни, по случајот од петокот, кога напуштен ротвајлер изгриза десетина луѓе.


Адвокатката на Праљак не знае како тој дошол до отровот


Хаг, 30 ноември, 2017 - 20:35 (META) 

Адвокатката на поранешниот хрватски генерал Слободан Праљак, кој вчера си го одзеде животот пиејќи отров за време на изрекувањето на второстепената одлука во Хашкиот трибунал, денеска за ХРТ изјави дека не знае како нејзиниот клиент дошол до отровот и како и го внел во судницата. Таа изјави и дека не видела кога тој го испил отровот.

Адвокатката Ника Пинтер за хрватската државна телевизија вели дека со Праљак разговарала само телефонски пред да го види во судницата.

Праљак го испи отровот, од кој почина неколку часа подоцна, веднаш откако судијата на жалбениот совет на Хашкиот трибунал соопшти дека советот ја потврдува првостепенета пресуда од 20 години за воени злосторства за време на војната во Босна и Херцеговина во 1990-тите години.

Пинтер изјави дека безбедноста во судот е многу строга и дека „не гледа како ова можело да се случи“.

Таа вели дека обвинетите се внесуваат во судот преку посебен влез и се држат одвоени едни од други, додавајќи дека безбедноста е, исто така, многу строга и во затворскиот дел на трибуналот.

Пинтер, како што објави ХРТ, синоќа била испрашана од холандската полиција околу тоа дали знае што испил Праљак и како дошол до отровот.


Почина Слободан Праљак откако испи отров во судницата во Хаг


Хаг, 29 ноември, 2017 - 15:46 (META) 

Слободан Праљак, генерал на војската на босанските Хрвати во војната во БИХ во 1990-тите, почина неколку часа откако во судницата на Меѓународниот трибунал испи отров од шишенце, јавија хрватските медиуми.

Праљак е познат како командантот осомничен за уривањето на стариот мост над Неретва во Мостар, кој сега е обновен.

При изрекувањето на пресудата, 72-годишниот Праљак, во еден момент ја зафрли главата наназад и испи нешто од мало шишенце. Веднаш потоа кажа дека испил отров.

– Судии, јас не сум воен криминалец. Со презир ја отфрлам оваа пресуда – рече Праљак, откако денеска беше потврдена пресудата против него од 2013 година, со која Меѓународниот трибунал за воени злосторства во поранешна Југославија му одреди 20 години затвор.

По инцидентот, рочиштето беше прекинато и Праљак беше префрлен во болница во Хаг, каде што, според хрватските медиуми, починал по неколку часа.

Претходно, Жалбениот совет на Хашкиот трибунал потврди казна од 25 години затвор за Јадранко Прлиќ, како и 20 години затвор за Бруно Соиќ за воени злосторства.


Европа да ги отфрли сепаратизмот и национализмот, порача Јункер од Шпанија


Саламанка, 9 ноември, 2017 - 19:16 (META) 

Претседателот на Европската комисија, Жан Клод Јункер денеска ја повика Европа да се спротивстави на сепаратизмот во време кога иницијативата за незaвисноста на Каталанија длабоко ја подели Шпанија, јавуваат светските агенции.

– Национализмот е отров кој ја спречува Европа да функционира обединето – рекол Јункер во својот говор на универзитетот во шпанскиот град Саламанка, каде денеска му била врачена награда.

Тој додал дека на ситуацијата „не може да се гледа со скрстени раце“ и дека е против „сепаратизмот која ја слабее Европа и дополнително ги проширува постоечките пукнатини“.

Шпанскиот премиер, Маријано Рахој, кој го придружувал Јункер во Саламанка, му се заблагодарил на претседателот на ЕК за поддршката во вакви тешки времиња.

– Јункер ги поддржува потезите на шпанската влада, нашиот устав и правосуден систем – изјавил Рахој.


Германската полиција трага по маж кој става отров во храната во продавниците


Берлин, 28 септември, 2017 - 18:32 (META) 

Непознат маж ставал отровна супстанца во храна, вклучувајќи и храна за бебиња која се продава во супермаркетите во Германија, за да изнуди повеќе од еден милион евра, соопшти денеска германската полиција.

Во соопштението се наведува дека, лицето испратило електронска пошта до полицијата откако ставило голема количина на отров во производи во супермаркетите на југот на Германија. Лицето се заканувало дека тоа ќе го направи и во други супермаркети низ државата, но и низ Европа.

Полицијата изјавила дека овие закани ги сфаќа сериозно, додавајќи дека за сега не бил пријавен ниту еден случај на труење. Властите смируваат дека нема причина за паника, но ги предупредија потрошувачите да обрнат внимание на амбалажите на производите.

Полицијата пронашла храна за бебиња во која била ставен етилен гликол, безбојна течност без мирис кој се користи за производство на антифриз, кој при конзумација може да биде смртоносен.

Властите најавија зголемена контрола на храната во продавниците.


Министерство за здравство: Од отровот за кучиња може да страдаат и деца


Скопје, 11 април, 2017 - 10:07 (META) 

Министерството за здравство апелира да не се фрла отров за кучиња затоа што тој може да биде исклучително опасен и по здравјето на луѓето.

„Апелираме на поголема свесност и совесност зашто злоупотребата на овие материи директно го загрозува и здравјето на децата, кои лесно може да дојдат во допир со фрлените отрови на јавни површини. Според стручните лица во областа, за оваа намена најчесто се користат пестициди или други опасни и токсични хемикалии, кои во директен допир со човекот може да предизвикаат и фатални последици, а дури и вдишувањето вакви хемикалии може да создаде трајни последици по респираторниот систем“, велат од Министерството за здравство.

Оттаму апелираат дека лицата одговорни за предизвикување смртен исход со вакви дејства, може кривично да одговараат во согласност со законите во Република Македонија.


Протест против масовното труење кучиња во Скопје


Скопје, 9 април, 2017 - 17:20 (META) 

Неколку стотици активисти за правата на животните денеска напладне протестираа на плоштадот Македонија против труењето кучиња во Скопје во последните неколку седмици и реагираат што нема реакција од властите за непочитување на законите за заштита на животните и за слободната продажба на отров.

Од плоштадот, демонстрантите, од кои многумина со своите миленици, се упатија кон Собранието на Република Македонија, каде истурија сода бикарбона, симболичен гест, со кој сакаа да алармираат за фрлањето отров за бездомните животни. Потоа поворката се упати кон седиштето на Град Скопје во Градскио парк.


Лидерот на ИД во тешка состојба откако бил отруен


Багдад, 3 октомври, 2016 - 18:23 (META) 

Лидерот на Исламска држава, Абу Бакр ал Багдади, бил отруен заедно со тројца други команданти на таа терористичка организација, во северната ирачка провинција Ниневех. Ова го објавија локалните ирачки медиуми, повикувајќи се на анонимни извори.

– Разузнавачките информации покажуваат дека лидерот на ИД, Ал Багдади, и уште тројца команданти јаделе храна која содржела отрови – изјавил анонимен извор, а пренесе ирачката новинска агенција МНА.

Изворот изјавил дека тројцата милитанти биле тешко отруени и дека биле превезени на непозната локација каде што се наоѓаат под строг надзор.

Исламска држава, наводно, уапсила поголем број луѓе во таа област во обид да го пронајде одговорниот.

Ал Багдади постојано менува локации во Ирак и во Сирија за да избегне воздушни напади и само блискиот круг на луѓе околу него знае каде се движи.


„Арсена“: Гевгелиската вода, покрај арсен, содржи и ванадиум


Гевгелија, 11 јули, 2016 - 11:31 (META) 

Анализата на примерок од водата за пиење од гевгелискиот водовод, земен на 16 јуни годинава, покажала присуство на енормно количество на арсен во водата, штетно за здравјето на човекот, информираат од граѓанската иницијатива „Арсена“.

Анализата што ја извршила меѓународна лабораторија, како што додаваат од „Арсена“, покрај арсен, покажала и присуство на тешкиот метал ванадиум во водата од гевгелискиот водовод.

„Само пред еден месец концентрацијата на арсен беше 21,3 микрограми на еден литар вода, а сега е 19,7 микрограми што е и понатаму за 97 отсто повисоко од здравствено пропишаните норми за употреба на водата од страна на човекот. По одбивањето на Институтот за јавно здравје на Република Македонија да прави анализи на водата во Гевгелија со образложение дека знаеле за проблемот и дека сите институции биле известени, откако увидовме дека речиси четири години не се презема ништо за заштита на граѓаните, со анализите од меѓународни лаборатории го потврдуваме постоењето на проблемот со арсенот во водата и неговото континуирано присуство и изложеност на граѓаните на еден од најотровните елементи на земјата – арсенот. Ванадиумот е нешто сосема ново за нас“, велат од граѓанската иницијатива „Арсена“.

arsena voda analiza

Од граѓанската иницијатива велат дека резултатите од анализата повторно го наметнуваат прашањето за филтрирање и за деарсенификација на водата.

Според пресметките на референта компанија, која соработува со хемискиот институт при Универзитетот „Аристотел“ во Солун, системот за деарсенификација и за филтрирање на водите од сите четири бунари кај селото Моин во Гевгелија би чинел 1,17 милиони евра, а не 8 милиони евра како што во 2014 година најавуваше градоначалникот на Гевгелија, Иван Франгов, велат од „Арсена“, поради што го отфрлил овој проект како прескап за реализација.

„Нови бунари за водоснабдување на Гевгелија не се копаат, а деарсенификаторот лажно се претставува како енормно скап проект. Има ли свест, граѓанска или политичка совест и чувство на одговорност кај оваа власт која и понатаму молчешкум и без проектно решение остава граѓаните да се трујат со вода небезбедна за нивното здравје“, велат од Арсена.