!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ЗНМ: Менаџментот на МПМ, наместо да ја реши кризата, се пресметува со новинарите


Скопје, 21 април, 2017 - 13:10 (META) 

Здружението на новинарите на Македонија (ЗНМ) денеска изрази загриженост поради опасноста „Медиа принт Македонија“ (МПМ), која поседува четири весници, еден магазин и еден интернет-портал, да оди под стечај.

ОД ЗНМ велат дека намерата на сопствениците и на менаџерите на МПМ не е да ја решат кризата во компанијата, туку полека да ги згаснат весниците преку постојано отпуштање на новинарите, што, како што нагласуваат од Здружението, не претставува само кршење на работничките права на новинарите, туку е и удар врз слободата на медиумите.

„Обидите за преземање на дел од вработените во новата сестринска фирма преку огласи, претставуваат понижување за новинарите и опасност за отпушање на неподобните. Менаџментот нема храброст да признае дека неуспехот на компанијата е негов неуспех. Наместо да ги отстранат причините што ја произведоа кризата, тие брутално се пресметуваат со новинарите“, стои во соопштението на ЗНМ.

Оттаму велат дека драстичното намалување на тиражите на весниците и на приходите од огласи се случило поради „погрешните политики на менаџментот на компанијата, кои преку послушни уредници некритички ги поддржуваа политиките на владејачката партија ВМРО-ДПМНЕ“.

„Тивкото пропаѓање на МПМ е најдобар пример дека партискиот печат во Македонија нема иднина. Само слободното и професионалното новинарство може да создаде самоодржливи медиуми, кои одговорно ќе ја одиграат својата улога во демократијата, да ги информираат граѓаните и да ја контролираат власта“, нагласуваат од ЗНМ.

Здружението се солидаризира со Самостојниот синдикат на новинари и медиумски работници (ССНМ) во неговите барања да се почне дијалог помеѓу синдикатот и менаџментот на МПМ заради наоѓање одржливо решение во интерес на сите.


Во Турција затворени стотина медиуми


Анкара, 28 јули, 2016 - 11:31 (META) 

Турските власти затворија 130 медиумски куќи, вклучувајќи три новински агенции, 16 телевизиски станици, 23 радио-станици и 45 дневни весници.

Во војската отпуштени се вкупно 726 официри и 1.684 војници, а двајца турски генерали од висок ранг поднесоа оставка.

Двајцата турски генерали од висок ранг денеска поднесоа оставка по масовното отпуштање во војската, јавува „Си-ен-ен Турк“.

Како што се наведува, станува збор за генерали на копнените сили со четири ѕвезди.

Официјално објаснување зошто поднеле оставка засега нема.

Турските власти вчера соопштија дека се отпуштени повеќе од 2.400 припадниците на војската.


ССНМ и ЗНМ чекаат средба во „Телма“ за да изреагираат


Скопје, 26 мај, 2016 - 13:28 (META) 

Самостојниот синдикат на новинари и медиумски работници (ССНМ) се уште нема никаква официјална информација за отпуштањето на новинари во телевизијата „Телма“.

Од ССНМ велат дека не биле консултирани за одлуката со која за технолошки вишок се прогласени 12 новинари и најавуваат средба со директорот и главен уредник на телевизијата Атанас Кировски.

Неофицијално, Синдикатот ќе бара на овие луѓе да им биде понудено друго работно место во телевизијата за да може, како што велат, нивниот капацитет да се искористи во „Телма“.

За реакција го побаравме и Насер Селмани, претседател на Здружението на новинарите на Македонија, но на неговиот телефон се јави ќерка му која ни рече дека татко и е зафатен и дека ќе не побара подоцна.

 


СДСМ: Менаџментот на телевизија „Телма“ да ја преиспита својата одлука


Скопје, 26 мај, 2016 - 11:34 (META) 

Социјалдемократскиот сојуз на Македонија со голема загриженост ја прими веста дека 12 вработени во телевизија „Телма“ се прогласени за технолошки вишок, со одлука на менаџментот на овој медиум – се вели во соопштението на СДСМ.

Понатаму се додава дека „менаџментот на телевизијата, како раководство на угледен, релевантен и респектабилен медиум, треба да се произнесе и во детали да ја објасни причината за оваа одлука.“

Особено што станува збор за професионални новинари докажани во својата долгогодишна работа.

– Го повикуваме раководниот тим на телевизија „Телма“ да ја преиспита својата одлука и да ги разгледа сите можности што им стојат на располагање, да се донесе соодветно решение кое ќе биде во интерес на новинарите, во согласност со заштитата на нивните законски права и обврски – се додава во соопштението.

Решение, кое според нив, нема да се одрази на квалитетот на програмските содржини на телевизијата и медиум којшто ужува углед помеѓу граѓаните.


„Би-Би-Си“ ќе отпушти 1.000 вработени


Лондон, 2 јули, 2015 - 16:21 (META) 

„Би-Би-Си“ денеска најави дека ќе отпушти околу 1.000 вработени заради намалување на буџетот за 150 милиони фунти. Буџетот на британскиот сервис е скратен поради намалениот број луѓе кои плаќаат претплата за телевизија.

Падот на претплатата е последица од тоа што сè поголем број домаќинства гледаат телевизиски програми преку интернет, јавува британскиот јавен сервис.

Поголемиот дел од отпуштањата ќе бидат од менаџментот и од логистичките одделенија.
Со оваа мерка се очекува британскиот јавен сервис да заштеди речиси 50 милиони фунти.

„Би-Би-Си“ има повеќе од 16.672 вработени.


Најголемата европска банка ќе отпушти 25.000 вработени


Лондон, 9 јуни, 2015 - 13:29 (META) 

Најголемата европска банка, „Хонгконг-Шангај банкарска корпорација“(HSBC), планира да отпушти 25.000 луѓе од своите филијали во светот, во обид да ги намали трошоците и да ја поедностави работата.

Ова би значело намалување на бројот на работниците за речиси 10 проценти, бидејќи во моментов работат 266.000.

Во Велика Британија, каде за банкарската корпорација работат 48.000 луѓе, ќе бидат отпуштени 8.000 во секторите малопродажба и инвестициски банкарски операции, пренесува „Би-Би-Си“.

Банката планира да ги продаде сите експозитури во Турција и во Бразил.


„Кока-кола“ ќе отпушти 1.800 вработени


Атланта, 9 јануари, 2015 - 15:06 (META) 

Производителот на безалкохолни пијалоци „Кока-кола“ најави дека во наредните неколку месеци ќе укине од 1.600 до 1.800 работни места во своите претставништва во светот, односно еден процент од целокупниот број вработени. Ова ќе биде дел од процесот на намалување на трошоците на компанијата. Со оваа мерка, компанијата се надева дека ќе скрати трошоци од три милијарди долари.
„Кока-кола“ веќе почнала да ги извества своите вработени во седиштата низ САД. Компанијата има вкупно 130.600 работници низ светот.
Претходните големи отпуштања, „Кока-кола“ ги имаше во 2000 година, кога компанијата отпушти 5.200 работници во повеќе од 200 земји.