Николовски: Деновиве ќе биде исплатена дополнителната субвенција за лозарството


Скопје, 16 април, 2018 - 16:27 (META) 

Министерот за земјоделство, шумарство и водостопанство, Љупчо Николовски на денешниот состанок со винарските визби, на кој учествуваше и директорот на Агенцијата за финансиска поддршка во земјоделството и руралниот развој, Николче Бабовски, порача дека лани се исплатени сите обврски и субвенции за лозарите и винарските визби, а наскоро треба да стартува и исплатата на дополнителната субвенција од по два денари.

– Лани се исплатија сите заостанати обврски и кон лозарите и кон винарските визби. Оваа година сме насочени кон навремена исплата кон лозарите и кон визбите, тогаш кога им се потребни. Овие денови ќе биде исплатена и дополнителната поддршка од 2 денари од минатата година, и тоа се уште 140 милиони денари плус субвенции за лозарите – рече министерот Николовски.

Тој нагласи дека пред почетокот на новата производствена реколта, се исплатени над 600 милиони денари субвенции за одржување на лозови насади за лозарите и за винарниците кои имаат сопствени насади.

Во годинешната Програма за финансиска поддршка во земјоделството за 20 отсто се зголемени субвенциите за одржување на лозови насади за оние кои имаат од 1 до 10 хектари , односно наместо 40.000 ќе добијат 48.000 денари по хектар, а дополнителна субвенција од 12.000 денари по хектар ќе добијат оние кои ќе извршат реконструкција на лозовите насади, за промена на асортиментот, што е важно за следење на светските трендови и за зголемување на конкурентноста. Дополнително, 30 отсто повисока субвенција ќе добијат оние земјоделци ќе преминат во попрофитабилна гранка, на пример од полјоделство во лозарство, овоштарство и градинарство.


Министерството за финансии го отплати заемот од „Дојче банк“


Скопје, 5 јули, 2017 - 14:22 (META) 

Министерството за финансии соопшти дека денеска во целост го отплатило заемот од „Дојче банк“ од 2012 година, во висина од 77,3 милиони евра. Со оваа исплата, јавниот долг ќе се намали за 0,7 процентни поени од домашниот бруто-производ, се вели во соопштението.

„Заемот беше со каматна стапка од 6,4 проценти и беше наменет за финансирање на буџетскиот дефицит и за рефинансирање на обврските што достасуваат врз основа на редовна отплата на државниот долг. За таа цел, од буџетот на Република Македонија исплатени се 75 милиони евра наменети за отплата на главнина и 2,3 милиони евра за отплата на камата“, нагласува министерството, појаснувајќи дека вратените пари се речиси трипати повеќе од вчерашното задолжување на Министерството за финансии преку домашната обврзница, кое е со просечна стапка од 2,25 отсто.


Хипотекарните кредити во Шведска лимитирани на 105 години


Стокхол, 24 март, 2016 - 13:49 (META) 

Шведскиот парламент го усвои законот со кој рокот на хипотекарни кредити се ограничува на 105 години, со што се настојува скандинавската нација да ги сопре високите цени на недвижности и да се намали нивото на долг по домаќинство.

Како што пишува „Франс прес“, порано во оваа земја не постоеше законско ограничување за должината на траење на хипотеката, така што станбените кредити на многу Швеѓани ги отплаќаа нивните внуци.

Ваквата практика е развиена во рамките на стратегијата за борба против високите цени на недвижности, бидејќи пролонгирањето на роковите значи пониска месечна рата за отплата.

Шведските регулатори пресметале дека во 2013 година просечниот рок на хипотека во таа земја бил 140 години.

Порастот на цената на станбените недвижности резултираше со тоа шведските домаќинства да се меѓу најзадолжените во Европа.


Пад на девизните резерви од 67 милиони евра


Скопје, 8 февруари, 2016 - 13:23 (META) 

Девизните бруто-резерви на крајот од третото тримесечје на 2015 година изнесуваше 2.187,4 милиони евра, што претставува пад од 67,5 милиони евра во однос на претходниот квартал, соопшти Народната банка во најновиот квартален извештај.

– Намалувањето на девизните резерви во најголем дел се должи на трансакциите за сметка на државата, како резултат на остварените високи отплати врз основа на обврски кон странство, а во значително помал дел како резултат на интервенциите на НБРМ, односно остварената нето-продажба на девизи на девизниот пазар во текот на 2015 година. Во 2015 година беше остварена предвремена отплата на кредитната линија за претпазливост кон ММФ, како и редовната отплата на првата еврообврзница издадена во 2005 година, наспроти издавањето на четвртата еврообврзница, што на нето-основа предизвика одливи од девизните резерви – соопшти НБРМ.


Грција враќа 6,8 милијарди евра од долгот


Атина, 20 јули, 2015 - 12:07 (META) 

Грчката влада утринава дала налог за отплата на 6,8 милијарди евра од долгот кон кредиторите, соопшти министерството за финансии.

Станува збор за пари кои Грција им ги должи на Европската централна банка, Меѓународниот монетарен фонд и на Централната банка на Грција. ЕЦБ ќе добие 4,2 милијарди евра, а ММФ 2,05 милијарди, кои се заостанатата рата што требаше да биде исплатена до 30 јуни. Грција, исто така, ќе ѝ исплати 500 милиони евра на Централната банка за добиениот заем.

Грчките банки денеска, по три недели, повторно се отворени, а на сила и понатаму остануваат мерките за контрола на капиталот, кои имаат цел да ги спречат прекумерното подигнување пари и економски колапс. Берзата во Атина и понатаму е затворена.

Ова се први знаци на стабилизација, но разговорите за третиот пакет финансиска помош за Грција доправ треба да почнат. Германската канцеларка Ангела Меркел рече дека исплатата на помошта ќе почне откако Атина ќе ги исполни условите.