Бејли, Герет, Пломп, Османи и граѓани собираа ѓубре на кејот на Вардар


Скопје, 26 април, 2018 - 16:17 (META) 

Холандскиот амбасадор Ваутер Пломп, амбасадорот на Велика Британија Чарлс Герет и американскиот амбасадор Џес Бејли, заедно со вицепремиерот Бујар Османи денеска на кејот на Вардар зад Луна паркот го чистеа расфрланиот смет во еко акцијата, која трета година по ред ја организира амбасадата на Кралството Холандија заедно со „Пивара“ и „Пакомак“.

Ова е трета по ред волонтерска еко-акција што ја организираат „Пивара“, „Пакомак“ и Амбасадата на Холандија. Во претходните две акции беа исчистени брегот и водите на езерото Матка, како и кејот на реката Вардар, на кој и годинава се собираше целокупниот сув отпад. Годинешната акција е воедно и дел од активностите за одбележување на Денот на Кралот – националниот празник на Холандија.

– Се радувам што оваа година имавме можност да го одбележиме нашиот голем национален празник и со ваква акција. Го споивме убавото со корисното и уште еднаш се обидовме да го дадеме својот придонес за намалување на загадувањето кое е голем проблем за луѓето и за природата. Единствен ефикасен начин за трајно надминување на овој проблем е повеќе работа, посветеност и соработка меѓу јавниот сектор, компаниите и граѓаните. Со нашиот денешен ангажман сакаме да покажеме дека секој од нас може да даде личен пример за другите и да го поттикне решавањето на кој било проблем – истакна холандскиот амбасадор.

Целокупната логистичка поддршка за соодветен транспорт, селектирање и рециклирање на собраниот отпад ја обезбеди „Пакомак“.


Секој жител на Македонија лани создал по 379 килограми отпад


Скопје, 23 април, 2018 - 10:30 (META) 

Лани во Македонија е собран комунален отпад од 635.875 тони, а количеството на вкупно создаден комунален отпад изнесува 786.881 тони, објави Државниот завод за статистика. Годишното количество, пак, на создаден комунален отпад по жител во 2017 година изнесува 379 килограми, што е за 1,3 отсто помалку од истото количество во 2016 година.

Споредено со 2016 година, вкупното количество на собран комунален отпад во 2017 година бележи зголемување од 4,2 отсто.

Најголемо количество на собран комунален отпад е забележано во скопскиот регион – 164.246 тони или 25,8 отсто од вкупното собрано количество во Македонија.

Од вкупното количество на собран комунален отпад, 527.700 тони или 83 проценти се собрани од домаќинствата, а останатите 17 проценти од правни и физички лица (комерцијален отпад).

Според видовите на отпад, најголемо количество на собран отпад е измешан комунален отпад, 554.280 тони или 87,2 отсто, а најмало количество отпад од гума, 1.007 тони или 0,2 отсто од вкупното количество собран комунален отпад.

Најголемото количество на собран комунален отпад, односно 99,4 проценти се отстранува на депонија.


Анѓушев: Ќе се отворат четири регионални депонии за собирање и преработка на отпад


Скопје, 23 март, 2018 - 12:11 (META) 

Владата ќе има регионален пристап кон еколошкиот проблем и затоа ќе отвориме четири регионални депонии за собирање и преработка на отпад, најави денеска вицепремиерот за економски прашања, Кочо Анѓушев на обраќањето на конференцијата „Загаденоста на воздухот и нерегулирани депонии“, во организација на Балканската асоцијација за животна средина (БЕНА).

„Треба да се определиме за похрабри чекори кон решавање на проблемите со животната средина.Прв ваков чекор е да се реши проблемот со дивите, но и со организираните депонии на смет во државата.Втор чекор е решавање на проблемот со отпадните води кои треба да се соберат во организиран канализационен систем и да бидат прочистени пред да се пуштат во природните води.Средствата кои беа планирани за изградба на карго-аеродром во близина на Штип, околу 40 милиони евра, за кој нема финаниска исплатливост, ќе гледаме да ги пренамениме токму за овој проект“, рече Анѓушев.


Град Скопје во изминатиот месец изрекол четири казни за палење отпад


Скопје, 9 јануари, 2018 - 14:33 (META) 

Во текот на изминатиот месец екипите на Град Скопје по извршената контрола изрекле четири казни за палење отпад, од две им биле изречени на физички лица, а две на правни лица, информираат од градската администрација.

„Градот Скопје во текот на 2017 година има одобрено 500 елаборати и извршено 94 контроли за периодот ноември-декември, односно се извршени контроли на сите фирми коишто имаат емисии во воздухот при производниот процесот и не се евидентирани неправилности при нивното работење“, се вели во соопштението.


Општина Карпош отвори телефонска линија за пријавување несовесни граѓани што загадуваат


Скопје, 24 ноември, 2017 - 11:54 (META) 

Општина Карпош отвори телефонска линија за пријавување несовесно палење смет, гуми, кабли, пластика и друг токсичен материјал кој ја загадува животната средина.

„За да дејствуваме превентивно против загадувањето на животната средина, ве молиме да ги пријавите несовесните граѓани кои палат смет, гуми, кабли, пластика и друг токсичен отпад“, велат од Општина Карпош.

Граѓаните може да пријавуваат нерегуларности секој ден, во текот на 24 часа, на телефонскиот број 078 257 640 или на 192.


Отпадот од тетовската депонија ќе се дислоцира во Дрисла или во Русино


Тетово, 21 август, 2017 - 15:41 (META) 

Отпадот од депонијата во Тетово ќе се дислоцира и ќе биде складиран во скопската депонија Дрисла или во депонијата Русино.

Дислоцирањето на отпадот ќе го врши фирмата „Голец Транс“, која, како што соопштија денеска од Владата, е избрана на тендер, кој завршил во петокот, минатата недела.

Фирмата, заедно со Јавното комунално претпријатие „Тетово“ со дислокација на отпадот почнува денеска.

Од Владата информираат дека, согласно одлуката на 17. седница завршена е постапката за решавање на проблемот и со депонијата во Струга, од каде отпадот ќе се транспортира во депонија „што ќе ја договори општинското комунално претпријатие, а сегашната дива депонија ќе започне да се затрупува и ќе биде спроведено нејзино култивирање соодветно на неопходните еколошки стандарди“.


Нема ни „ф“ од фабриката што од отпадот во Дрисла требаше да произведува струја


Скопје, 19 јуни, 2017 - 11:15 (META) 

Сè уште нема ништо од изградбата на фабрика во Дрисла која од отпадот ќе произведува струја, а требаше да биде готова до 2018 година. Имено, инвестициските активности на италијанската компанија „ФЦЛ Амбиенте“, која во 2013 година го доби меѓународниот тендер за расчистување на депонијата Дрисла, требаше да се заокружат со изградбата на оваа фабрика, која требаше да биде готова за пет години.

Во Дрисла нема ниту нова печка за уништување медицински отпад, а нема ни фабрика за уништување индустриски отпад, што беше и ветување од новиот концесионер за преработка на отпадот.

Директорот на Дрисла, Горан Ангелов, во една пригода изјави дека отпадот се третира безмалку на ист начин како и пред депонијата да добие концесионер.

Во рамки на модернизацијата, на депонијата веќе требаше да се почне и со селекција на хартија, стакло, пластика и на метал од комуналниот отпад.

Истражувањето на БИРН покажа дека „ФЦЛ Амбиенте“ немала никакво искуство на ова поле и била формирана само неколку дена пред крајниот рок за доставување понуди на тендерот.

И покрај недостиг од искуство, оваа компанија беше избрана наместо светски водечки фирми, германската „Шолц АГ“ и австриската „АСА Интернешнел“. Откако го изгубија тендерот, тие најавија тужба за „ФЦЛ Амбиенте“.

Денеска и ЛДП обвини дека оваа странска компанија, иако ветила инвестиции од 72 милиони евра, досега не инвестирала ниту едно евро.


Ситуацијата со отпадот во Македонија е очајна, предупредува „Ајде Македонија“


Скопје, 22 април, 2017 - 12:10 (META) 

Македонија се наоѓа во очајна состојба во справувањето со отпадот и со можностите кои постојат доколку поинаку се постапува со него, предупредуваат од Асоцијацијата за чиста животна средина „Ајде Македонија“, а по повод 22 Април – Денот на планетата Земја.

„Ситуацијата со управувањето со отпадот во Република Македонија се карактеризира пред сè како супстандардна и неефикасна, а системот е попречен од сериозни организациски и технички недостатоци. Тоа резултира со различни дисфункционални системи на национално и на општинско ниво и со негативни ефекти врз животната средина и здравјето на луѓето“, стои во соопштението на „Ајде Македонија“.

Оттаму велат дека околу 99 отсто од комуналниот отпад во Македонија се депонира, со што се пропушта можноста за зачувување на животната средина, отворање на нови работни места, поефтини суровини за индустријата и приходи за државата во облик на даноци.

„Затоа, ние бараме имплементирање на правилата кои веќе ги имаме утврдено во нашето законодавство, а тоа се стандардите наведени во Директивата за отпад. Тие се засновани на хиерархијата во управувањето со отпадот, односно да се работи на спречување на создавањето на отпадот, а доколку ова е невозможно, отпадот да се селектира, реупотреби, рециклира, компостира или да се добие биоенергија“, велат од Асоцијацијата.

Според „Ајде Македонија“, во земјава има 54 комунални депонии и стотици нелегални или „диви“ депонии, од кои 16 се со висок ризик по животната средина, потоа 16 со среден и 19 со низок ризик. Дополнително, во Македонија има 16 стари еколошки загадени индустриски локалитети кои претставуваат сериозен ризик за луѓето што живеат во нивна близина.

Од Асоцијацијата апелираат што побргу да се најде политичка волја за решавање на овој проблем.


Новата дива депонија на влезот од Тетово, наместо да биде остранета, се проширува


Тетово, 4 април, 2017 - 13:39 (META) 

Новата дива депонија на надвозникот на влезот од Тетово сè уште не е отстранета. Купиштата ѓубре на оваа локација се таложат веќе неколку недели, а дел од жителите на тетовската населба Деребој, ја оградија дивата депонија, која се наоѓа во близина на нивните домови. Јавното комунално претпријатие Тетово на оваа депонија го истура и претовара сметот на отворено без никакви стандарди.

Граѓаните велат дека проблемот со депонијата сега е уште поголем.

– Сега ѓубрето се доближува до нашите домови, мириса лошо, се наближува летото и еколошката катастрофа ќе биде уште поголема – вели жителка на Тетово.

Од Јавното комунално претпријатие Тетово, минатиот месец рекоа дека ќе го исчистат ѓубрето, кое потоа ќе се претовара во посебни контејнери надвор од градот, се додека не се изгради современа претоварна станица каде ќе се рециклира отпадот, но ветувањето не се оствари.

И денеска над надвозникот имаше илјадници тони отпад.


Илјадници тони отпад се истураат и се депонираат на нова локација во Тетово


Тетово, 17 март, 2017 - 15:08 (META) 

Големи количества отпад деновиве се истурени над надвозникот на влезот од Тетово. Оваа локација сега Јавното комунално претпријатие Тетово ја користи за претовар на сметот, откако жители од тетовската населба Деребој блокираа дел од дивата депонија и кажаа дека нема да дозволат на оваа локација да се претовара и да се истура ѓубре. Сега планините од отпад се поблиску до домовите на тетовци, кои остро реагираа на ваквата нова состојба.

– Ова е катастрофа! Не можевме прозорец да отвориме од дивата депонија, а сега ѓубрето полека почна да ни влегува и во домовите. Не ни останува ништо друго освен да се отселиме од градов – изјави жител на Тетово.

Од Јавното комунално претпријатие Тетово велат дека се преземаат мерки и дека најдоцна од наредниот месец тетовскиот отпад ќе почне да се претовара по сите стандарди надвор од градот. Според претпријатието, пред да се транспортира сметот во скопската депонија Дрисла, ќе се истура и ќе се претовара во специјални контејнери.

Вакви ветувања се дадени повеќепати, но на терен проблемот со комуналниот смет сè уште не е решен.