Николовски: Деновиве ќе биде исплатена дополнителната субвенција за лозарството


Скопје, 16 април, 2018 - 16:27 (META) 

Министерот за земјоделство, шумарство и водостопанство, Љупчо Николовски на денешниот состанок со винарските визби, на кој учествуваше и директорот на Агенцијата за финансиска поддршка во земјоделството и руралниот развој, Николче Бабовски, порача дека лани се исплатени сите обврски и субвенции за лозарите и винарските визби, а наскоро треба да стартува и исплатата на дополнителната субвенција од по два денари.

– Лани се исплатија сите заостанати обврски и кон лозарите и кон винарските визби. Оваа година сме насочени кон навремена исплата кон лозарите и кон визбите, тогаш кога им се потребни. Овие денови ќе биде исплатена и дополнителната поддршка од 2 денари од минатата година, и тоа се уште 140 милиони денари плус субвенции за лозарите – рече министерот Николовски.

Тој нагласи дека пред почетокот на новата производствена реколта, се исплатени над 600 милиони денари субвенции за одржување на лозови насади за лозарите и за винарниците кои имаат сопствени насади.

Во годинешната Програма за финансиска поддршка во земјоделството за 20 отсто се зголемени субвенциите за одржување на лозови насади за оние кои имаат од 1 до 10 хектари , односно наместо 40.000 ќе добијат 48.000 денари по хектар, а дополнителна субвенција од 12.000 денари по хектар ќе добијат оние кои ќе извршат реконструкција на лозовите насади, за промена на асортиментот, што е важно за следење на светските трендови и за зголемување на конкурентноста. Дополнително, 30 отсто повисока субвенција ќе добијат оние земјоделци ќе преминат во попрофитабилна гранка, на пример од полјоделство во лозарство, овоштарство и градинарство.


Тренов: Откупувачите на зелка купуваат само од тие што не протестираа


Скопје, 12 април, 2018 - 14:11 (META) 

Иако претставници на министерството и владата се фалат дека експресно го решиле проблемот со откупувачите и производителите на зелка, и договориле цената да се движи од 20-25 денари по килограм, состојбата е поинаква. Откупот е драстично намален, а воопшто не се откупува од производители што минатата седмица протестираа, обвини Ромео Тренов на прес-конференција во седиштето на ВМРО-ДПМНЕ.

– Забележано е драстично намалување на количините на откупената зелка, иако откупувачите до вчера декларативно ја држеа цената од 20 денари. Откупните пунктови ги држат повеќе затворени отколку отворени. Истите откупувачи имаат добиено целосни инструкции да не откупуваат зелка од лицата кои протестираа минатата недела заради ниските цени, така што се случува дискриминација на лице место, и производителите се делат на подобни и неподобни согласно правилата на неспособната влада – рече Тренов.

Тој вели дека одредени откупувачи се обидуваат да ја исплаќаат зелката со репроматеријали наместо со пари, и со тоа да ги намалат откупните цени.

– И покрај ветувањата на неспособната влада дека цената ќе се движи од 20-25 денари во моментот на ова обраќање цените на откупот изнесуваат 15 денари по килограм, со тенденција на понатамошен драстичен пад. Во одредени региони на полињата има и до 70 отсто од засеаната зелка, па производителите се соочени истите количини да презреат и да им пропаднат, заради слабиот откуп последниве денови – обвинува Тренов.


Поништен конкурсот за откуп на класични композиции за 2017 година


Скопје, 29 март, 2018 - 16:54 (META) 

Министерството за култура соопшти дека конкурсот за откуп на класични композиции за 2017 година, објавен на 6 април минатата година, се поништува поради административни пропусти во неговото спроведување. Конкурсот ќе биде повторен.

Министерството ќе поведе соодветни дисциплински постапки за службите задолжени за спроведување на конкурсот, за да се утврди одговорноста за направените пропусти.

Според соопштението, објавените резултати на 18 јануари годинава на официјалната веб-страница не биле тоа, туку само предлози на комисијата, кои не биле одобрени од министерот.


Откупната цена на тутунот достигна 214,8 денари за килограм


Скопје, 17 јануари, 2018 - 13:26 (META) 

Откупот на тутун е во завршна фаза и се очекува да заврши до крајот на месецот, а просечната откупна цена на тутунот од реколтата 2017 достигна 214,8 денари за килограм, соопшти Министерството за земјоделство, шумарство и водостопанство (МЗШВ).

Според податоците од Државниот инспекторат за земјоделство досега се откупени повеќе од 21,5 милиони килограми тутун во вредност од близу 60 милиони евра. Тутунот годинава е со добар квалитет, кај компаниите има интерес за откуп и засега нема пријавено проблеми во однос на проценката на класите, велат од Министерството, појаснувајќи и дека од Македонија во просек годишно се извезува тутун во вредност од 100 милиони евра.


Николовски во Кавадарци вети дополнителни субвенции за лозарите


Кавадарци, 9 септември, 2017 - 19:59 (META) 

Mинистерот за земјоделство, шумарство и водостопанство, Љупчо Николовски, денеска соопшти дека на првата наредна седница Владата ќе донесе одлука за дополнителни директни плаќања за произведено и предадено грозје во домашните винарски визби.

Тој беше во Кавадарци на традиционалната манифестација во чест на грозјето и виното „Тиквешки гроздобер“.

– Висината на субвенцијата ќе биде определена на самата седница на Влада. Со оваа мерка ќе бидат опфатени сите земјоделски стопанства што до 15 септември пријавуваат површини за лозје и кои произведеното и предадено грозје ќе го дадат во домашните винарски визби – рече Николовски.

Како што рече, според податоците од Државниот инспекторат за земјоделство, заклучно со 5 септември откупени се околу 16 милиони килограми грозје, од кои најголемиот дел се од сортите вранец и смедеревка.

– Би сакал да им порачам на лозарите дека грозјето од годинешната реколта ќе биде целосно откупено од винарските визби, а исплатата за откупеното грозје ќе се реализира според законските одредби и прописи. Државниот инспекторат за земјоделство ги зајакнува контролите на откупните пунктови на грозје за да нема манипулации со откупните цени – рече министерот за земјоделство.

Порача дека уште во првите 100 дена на новата влада се зголемени субвенциите за одржување на лозови насади за 10 отсто по хектар, како и дека за одржување на површини со лозови насади по Програмата за 2016 година се исплатени 8,7 милиони евра, а за вкупно 13 винарски визби за откупено грозје се исплатени субвенции од 700.000 евра.


СДСМ: Покрај субвенции, договорен е и поголем откуп на лубеници


Скопје, 19 јули, 2017 - 17:56 (META) 

Владата предводена од СДСМ активно работи на надминување на проблемите, преку мерки што ќе ја стабилизираат цената на лубениците и ќе ги санираат штетите на производителите на бостан, се вели во реакцијата на СДСМ, на прес-конференцијата на Ванчо Костадиновски од ВМРО-ДПМНЕ.

Во соопштението се додава дека ВМРО-ДПМНЕ 11 години манипулирала со земјоделците, а субвенциите и другите мерки за помош ги злоупотребувала за да врши притисок, поткуп и уцени врз вистинските земјоделци.

„Проблемот со откупот на лубеници, како и другите напластени проблеми, се решава интензивно и во содејство со земјоделците и со откупувачите. Покрај дополнителните субвенции од два денари за секој продаден килограм, договорен е и поголем откуп на лубеници, кој веќе се остварува“, велат од СДСМ.


Костадиновски: Земјоделците летово ќе заработат четирипати помалку од откупот на лубеници отколку лани


Скопје, 19 јули, 2017 - 16:11 (META) 

Соочени со една од најтешките години, производителите на лубеници цел месец бараат поддршка од владата на СДС и од министерот за земјоделство, шумарство и водостопанство, Љупчо Николовски, за решавање на огромниот проблем поврзан со откупот и со исклучително ниската откупна цена на лубениците, изјави денеска на прес-конференција Ванчо Костадиновски од ВМРО-ДПМНЕ.

Тој додаде дека нема откуп, а дека власта на СДСМ донела мерка за поддршка поврзана со откуп.

„На Николовски и на Владата на СДС воопшто не им е грижа што и тие мали количества лубеници се откупуваат за понижувачка цена од два денари, која во споредба со цената лани, кога откупот беше по седум и осум денари, е за четирипати помала“, вели Костадиновски.

Тој додаде дека тие земјоделци што лани за својот труд заработиле 4.000 евра, оваа година ќе заработат само 1.000 евра.

„Бараме Владата да донесе одлука за дополнителна финансиска поддршка за производителите на лубеници во вредност од 10.000 денари за декар и таа да се однесува за сите производители на лубеници во земјава. Дополнително бараме сите производители на лубеници да бидат ослободени од закупнина на државно земјоделско земјиште и од надоместок за наводнување“, додаде Костадиновски.


Пемова: Да престане увозот на праски и да се зголемат субвенциите


Скопје, 20 јуни, 2017 - 16:32 (META) 

Доделувањето 6 денари за еден килограм праски предадени кај откупувачите во суштина значи никаква поддршка зашто откуп воопшто нема, а кога нема откуп, тоа значи дека земјоделците не предаваат праски за да добијат дополнителна поддршка, порача на прес-конференција во седиштето на ВМРО-ДПМНЕ пратеничката Весна Пемова.

Таа реагираше на денешната најава на министерот за земјоделство Љупчо Николовски, кој посочи дека се размислува за воведување поддршка од 6 денари за еден килограм предадени праски, за да се помогне на производителите на кои не им се откупува родот.

Пемова побара Владата веднаш да спроведе четири мерки.

Според неа, неопходно е зголемување за 50 отсто на субвенциите за одржување на овошните насади за годинава, но и државата да се вклучи во пронаоѓањето нови пазари, како и да се заштити македонското производство од нелојалната конкуренција.

– Додека македонските праски скапуваат, имаме информации дека се увезуваат преку 1.200 тони евтини праски од соседството. Државата итно да се вклучи во заштита на македонските земјоделски производи – рече Пемова.

Таа побара Владата итно да спроведе и мерки за целосно обесштетување на овоштарите.


ВМРО-ДПМНЕ бара итна владина седница за обесштетување на овоштарите


Скопје, 16 јуни, 2017 - 15:23 (META) 

„Министерот на СДС, Љупчо Николовски, со денови се крие и ги одбегнува овоштарите кои се соочуваат со реални проблеми. Николовски го нема да се појави во Росоман каде што состојбата со производството на праски е алармантна, исто како и со речиси целокупното овоштарство во Македонија“, обвини денеска Ромео Тренов на прес-конференција во седиштето на ВМРО-ДПМНЕ.

– Владата на СДС покажа колку не го цени земјоделството и трудот на земјоделците. Владата на СДС покажа дека е глува на апелите за помош кои доаѓаа директно од земјоделците и од нивните здруженија. Оттука бараме министерот за земјоделство Љупчо Николовски да побара итна и вонредна владина седница со точка на дневен ред – стопроцентно обесштетување на овоштарите чиј род настрада од временските непогоди и дополнителна поддршка за да може да ја преживеат годината – рече Тренов.


ВМРО-ДПМНЕ: Поради несериозноста на власта, страдаат земјоделците


Скопје, 15 јуни, 2017 - 10:08 (META) 

Опозициската ВМРО-ДПМНЕ во своето утринско соопштение денеска ѝ порача на власта дека мора да преземе итни мерки поради проблемот со откупот на праските, за кои откупувачите плаќаат 20 денари за еден килограм. Минатата година, како што велат од опозициската партија, откупната цена била 35 денари, а откупувачите плаќале и по 50 денари за еден килограм праски од прва класа.

„СДС ја има одговорноста да се грижи за земјоделството и не смее поради несериозниот пристап да страда основна гранка за егзистенција на многу семејства во државата. Земјоделците се соочуваат со сериозен проблем со откупот на праски и ситуацијата е алармантна. Додека Министерството за земјоделство беше раководено од коалицијата предводена од ВМРО-ДПМНЕ, во 2016 година за разликата од производствената до продажната цена на некои земјоделски култури се исплаќаа надоместоци што ги покриваа трошоците од временските непогоди кои им штетеа на производите“, порачува ВМРО-ДПМНЕ.