!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Тринаесет мигранти од Ирак откриени во камион на граничниот премин Богородица


Гевгелија, 22 октомври, 2017 - 14:46 (META) 

Полициска екипа и службеници на Царинската управа синоќа, околу 20.45 часот, на граничниот премин Богородица, при контрола на камион со бугарски регистарски ознаки, управуван од 45-годишен грчки државјанин, откриле група од 13 мигранти од Ирак, соопшти денеска Министерството за внатрешни работи.

Мигрантите, како што информира МВР, биле пронајдени во специјално направен бункер во предниот дел на приколката, веднаш зад кабината на возилото.

Регионалниот центар за гранични работи Југ при МВР до Основното јавно обвинителство за гонење организиран криминал поднел кривична пријава против грчкиот државјанин С.А., поради сомневање дека криумчарел мигранти.


Возило со 14 мигранти откриено кај селото Удово


Валандово, 9 октомври, 2017 - 13:31 (META) 

Полициска екипа од Валандово вчера на бензинската пумпа кај селото Удово, пронашла автомобил, марка „ауди а6“ со скопски регистарски ознаки, во кое имало 14 мигранти од Пакистан, информира МВР.

По извршениот увид, автомобилот и мигрантите биле преземени од екипа од полициската станица од граничниот премин Богородица, а за случајот бил известен јавен обвинител. По негова наредба, возилото било задржано во полициската станица на преминот Богородица, а мигрантите биле однесени во Прифатниот центар за странци во Скопје.

Инаку, како што информираат од МВР, регистарските таблички на возилото биле од товарно возило „застава“.

Се преземаат мерки за целосно расчистување на случајот, велат од полицијата.


Романската гранична полиција открила 111 мигранти во камион


Букурешт, 22 април, 2017 - 16:55 (META) 

Романската гранична полиција открила 111 мигранти, кои биле сокриени во приколка од камион, и ги спречила да ја напуштат земјата и да се упатат кон Западна Европа, јавуваат агенциите.

Полицијата ја открила групата мигранти, меѓу кои имало и деца, на романско-унгарската граница, вчера вечерта. Мигрантите биле со потекло од Ирак, Сирија, Иран, Авганистан, Пакистан и од Индија.

Возачот, инаку романски државјанин, кој е осомничен за соучество, на полицијата ѝ рекол дека не знаел дека има сокриени лица во камионот.

Полицијата соопштила дека мигрантите имале намера да стигнат до шенгенската зона, во која е можно преминување на границата без запирање.


Притворен српски државјанин фатен во шверц на 47 мигранти кај Демир Капија


Неготино, 25 август, 2016 - 14:14 (META) 

Полициска екипа вчераутро во товарно возило, на автопатот Удово – Неготино, кај тунелите кај Демир Капија, открила 47 мигранти од Сирија, Пакистан и од Авганистан, информираше денеска МВР.

Според полицијата, вчера околу 7.30 часот полициските службеници дале знак за запирање на автомобил марка „голф“ со скопски регистарски ознаки и на товарно возило „ивеко“, исто така со скопски таблички, кои не застанале на знакот и продлжиле со движењето.

„Голфот“ по кратко време се исклучил по патот кон Демир Капија, а товарното возило продолжило уште 500 метри, по што застанало, а возачот излегол и се обидел да побегне. Сепак, по кратко време тој бил приведен, а полицијата утврдила дека станува збор за 38-годишен српски државјанин, со иницијали Н.С.

По прегледот на возилото, во него полицијата затекнала 47 мигранти од Сирија, Пакистан и од Авганистан.

Српскиот државјанин и мигрантите биле приведени и задржани во полициската станица во Неготино за понатамошна постапка.

Од МВР информираат дека регионалниот центар за гранични работи Југ против српскиот државјанин поднел кривична пријава за криумчарење мигранти, а судија на претходна постапка на српскиот државјанин му одредил притвор од 30 дена.

Јавното обвинителство неодамна информираше дека во случаите на шверц на мигранти како извршители сè почество се јавуваат српски државјани. Тие, според Обвинителството, го користат екот на туристичката сезона и транзитот на голем број туристи од Србија кон Грција за да ги прикријат своите криминални активности.


Откриени 40 мигранти од Сирија во камион на патот Штип – Кочани


Штип/Неготино, 19 август, 2016 - 14:43 (META) 

Полициска екипа синоќа, околу 23.30 часот, во камион кој се движел на патот Штип – Кочани открила 40 мигранти со потекло од Сирија, информираше денеска МВР.

Полицајците го забележале камионот кај местото Штипска петља, и му дале знак да застане, но возачот продолжил, а по околу еден километар, го запрел возилото и побегнал.

„При контрола во товарното возило биле пронајдени 40 лица, мигранти од Сирија, меѓу кои повеќето биле деца“, велат од МВР.

Мигрантите биле однесени во полициската станица за безбедност на патниот сообраќај во Штип, а денеска треба да бидат префрлени во Прифатниот центар во Гевгелија.

Во меѓувреме полицијата презема мерки за пронаоѓање на возачот и за целосно расчистување на случајот.

Неколку часа претходно, полициски службеници забележале двајца мигранти како скокаат од воз и бегаат кај железничката станица во селото Дуброво, на пругата Гевгелија – Скопје.

„Товарниот воз бил управуван од З.М. (51) од Скопје и Ѓ.Г. (53) од Скопје. Од преземени мерки било утврдено дека со машиновозачот претходно било договорено во возот да качи мигранти за одредена сума на пари и мобилен телефон“, стои во информацијата на МВР за случајот.

Двајцата македонски дражвјани и мигрантите биле уапсени и доведени во полициската станица во Неготино. Од МВР велат дека полицијата презема мерки за целосно расчистување на случајот.


Во возило пронајдени 12 мигранти од Сирија, од нив осум деца


Кавадарци, 25 јули, 2016 - 12:56 (META) 

Вчераутро, околу 9 часот, полициска екипа на локалниот пат Кавадарци – Конопиште, во возило, марка „рено еспејс“, со скопски регистарски ознаки, пронашле 12 илегални мигранти со потекло од Сирија, информираат од МВР.

Според полициските информации, од мигрантите четворица биле возрасни лица, додека другите осум биле деца.

Мигрантите биле приведени, а според МВР, шестмина од нив ќе бидат задржани во Прифатниот центар за странци, а другите ќе бидат вратени во Грција, од каде нелегално влегле во земјава.

Возачот успеал да им побегне на полицајците и во тек се мерки за негово пронаоѓање.


Кичевец се обидел да прошверцува 22 златници на „Александар Велики“


Скопје, 14 јули, 2016 - 13:28 (META) 

Царински тим на скопскиот аеродром „Александар Велики“, вчера попладне, во багажот на македонски државјанин, кој пристигнал од Рим, открил 22 златници вредни 12.000 американски долари, соопштија денеска од Царинската управа.

Како што информираат оттаму, станува збор за кичевецот Н.Р., кој, иако се упатил кон зелениот канал, каде минуваат патници кои немаат што да пријават, цариниците сепак го селектирале за детална контрола.

„При контрола на личниот багаж, во патна торба, помеѓу личните предмети завиткани во хартиена кеса, царинските инспектори од Одделението за оперативни работи пронајдоа 22 златници со вкупна тежина од 307 грама. Вкупната вредност на златниците, според пронајдената фактура, изнесува 11.645 американски долари или околу 647.578 денари“, стои во соопштението на Царината.

Оттаму додаваат дека златниците биле привремено задржани, а против кичевецот ќе биде поднесена соодветна кривична пријава.


Откриени 39 мигранти во напуштено комби во Куманово


Куманово, 2 јуни, 2016 - 14:55 (META) 

Полициска патрола вчераутро во населбата Доброшане, Кумановско, во напуштено комби пронашла 39 мигранти, од кои 21 биле малолетници, информираат од МВР.

Како што информираат оттаму, вчера околу 3 часот, сообраќајна патрола на кумановската полиција, кај обиколницата Куманово – Свети Николе, забележала товарно возило, марка „форд транзит“ со струмички регистарски ознаки, кое било придружувано од две возила, марка „ауди а3“ и „ауди а6“.

Откако возачите на двата автомобили и нивните двајца сопатници биле приведени, друга полициска патрола, во населбата Доброшане го нашла и товарното возило, кое било напуштено. Во него биле затекнати мигрантите, кои не поседувале никаков документ за идентификација.

По наредба на јавен обвинител, тројца од мигрантите се сместени во Прифатниот центар за странци во Скопје, додека другите биле однесени во Транзитниот центар во Гевгелија, од каде ќе бидат вратени во Грција.


Во „лада нива“ откриени 12 мигранти, возачот побегнал


Гевгелија, 26 мај, 2016 - 14:04 (META) 

Полициска патрола синоќа, околу 23.50 часот, на регионалниот пат Гевгелија – Смрдлива вода во возило, марка „лада нива“ пронашла 12 мигранти кои илегално влегле на територијата на државата.

Според МВР, при контролата на возилото, кое било без регистарски ознаки, полицајците откриле 11 мигранти од Сирија и еден од Ирак, додека возачот успеал да побегне.

При прегледот на возилото, биле откриени гевгелиски регистарски таблички, сопственост на Ѓ.Ѓ. од селото Стојаково. Возилото и мигрантите биле предадени на полициската станица за граничен надзор „Гевгелија“ за натамошна постапка.


Во камион откриени 31 мигрант, возачот во бегство


Гевгелија, 25 мај, 2016 - 13:27 (META) 

Регионалниот центар за гранични работи „Југ“ поднел кривична пријава против 21-годишниот Д.И. од Велес, осомничен за криумчарење на мигранти, информираат од МВР.

Според полицијата, завчера мешовит патролен тип на автопатот меѓу селата Прдејци и Смоквица, забележал товарно возило марка „рено“, чиј возач, при обидот на полицајците да извршат контрола, успеал да побегне.

При прегледот на товарното возило, полицајците откриле 31 мигрант, кои нелегално влегле од Грција во земјава. Од нив 28 биле со потекло од Пакистан, а тројца биле индиски државјани.