!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Директорот на ФБИ ги отфрли нападите на Трамп


Вашингтон, 7 декември, 2017 - 21:00 (META) 

Директорот на американското Федерално истражно биро (ФБИ), Кристофер Реј, ги отфрли нападите на претседателот на САД, Доналд Трамп, наведувајќи дека „нема пофина институција од ФБИ“, јавуваат светските агенции.

Реј денеска сведочеше пред правосудниот совет на Претставничкиот дом на САД, додека демократите и републиканците се расправаа околу важноста на нападите на Трамп упатени кон федералната полиција.

Пред неколку дена американскиот претседател преку серија објави на „Твитер“ го нападна ФБИ, тврдејќи дека тоа е пристрасна институција чија репутација е „најлоша во историјата“ и го повика Реј да ја „исчисти куќата“.

– Можам да ви кажам дека ФБИ, онака како што јас го гледам, се десетици илјади агенти, аналитичари и работници кои се убиваат од работа за да бидат Американците безбедни – рече Реј, кој е на чело на ФБИ четири месеци.


Уставен суд ја отфрли иницијативата за оспорување на законот за хонорарци


Скопје, 21 октомври, 2015 - 14:24 (META) 

Уставниот суд ја отфрли иницијативата со коjа се оспорија законските решенија за плаќање задолжителни придонеси за хонорарците бидејќи оспорените одредби повеќе не важат.

Претставката до Уставен суд беше поднесена од 7.000 граѓани, за утврдување на неуставност на пакетот закони со кои се регулира плаќањето придонеси за хонорарците.

Владата, пак, законот за придонеси за хонорарци го укина во јули.

Со неговото стапување на сила од 1 јануари 2015 година, беше предвидено хонорарците да плаќаат околу 35 проценти за пензиско и за здравствено осигурување од остварениот приход врз основа на договор на дело, авторски договор или друг вид договор со кој се остварува надоместок.

Голем број здруженија, организации и граѓани протестираа против овој закон и незадоволството го изразија на улица.