Замениците-министри од Алијансата за Албанците ги депонираа оставките во Владата


Скопје, 28 декември, 2017 - 17:51 (META) 

Функционерите на Алијансата за Албанците денеска и официјално ги депонираа оставките во Владата.

– Тројца заменици-министри и државниот секретар во Министерството за правда денеска поднесоа оставките во владината архива, а се очекува од своите функции да се повлечат и уште осум директори, што значи вкупно 12 или 13 функционери кои ќе поднесат оставка од водечки позиции – рече Елми Азири од Алијансата за Албанците за телевизијата „Алсат-М“.

Оставки поднесоа замениците-министри за надворешни работи, за транспорт и врски и за труд и социјална политика, Арта Точи, Ремзи Мемеди и Елми Азири, како и државниот секретар во Министерството за правда Зулфи Адили, три дена откако претседателот на партијата Зијадин Села ги повика на ваков чекор.


Собранието ги констатираше оставките на членовите на ДИК


Скопје, 25 декември, 2017 - 16:06 (META) 

Спикерот на Собранието, Талат Џафери денеска на пленарна седница констатираше дека им престанува мандатот на членовите на ДИК откако тие си поднесоа оставки.

Тој не соопшти кога и како ќе продолжи постапката за избор на нови членови на ДИК.

Нивните оставки следуваа по притисок на јавноста откако американскиот амбасадор Џес Бејли обелодени дека на затворена седница членовите одлучиле да си поделат бонуси за спроведување на локалните избори.

Во рок од три дена Талат Џафери ќе треба да ги извести партиите да предложат нови членови на Комисијата, а доколку тие не дадат свој предлог, членовите ги предлага собраниската комисија за прашања на избори и именувања.

Новите осум членови треба да бидат изгласани со двотретинско мнозинство.

Оставки поднесоа претседателот Александар Чичаковски, потпретседателот Реџеп Прекопуца и експертот Атанас Урумов како и партиските членови – Игор Милев и Виолета Дума предложени од СДСМ, Сашо Срцев и Силвана Бонева од ВМРО-ДПМНЕ и Субхи Јакупи од ДУИ. Само Ермира Асани Салија, од редовите на БЕСА не поднесе оставка.


Шесте оставки ДИК ги доставила до Собранието, Срцев и Бонева ќе ги однесат сами


Скопје, 12 декември, 2017 - 15:43 (META) 

Шесте оставки на членовите на Државната изборна комисија (ДИК) поднесени вчера и денеска, односно тие на претседателот Александар Чичаковски, потпретседателот Реџеп Прекопуца, Атанас Урумов, Виолета Дума, Игор Милев и Субхи Јакупи се веќе доставени во архивата на Собранието, дознава „Мета“ од извори во ДИК.

Според информацијата што ја добивме, членовите на ДИК предложени од ВМРО-ДПМНЕ, Силвана Бонева и Сашо Срцев, најавиле дека самите ќе ги достават оставките до Собранието, за разлика од нивните колеги .

Сè до моментот кога Собранието ќе ги констатира оставките, ДИК ќе продолжи да работи според своите ингеренции.


Заев ги поздрави и ги оцени како морален чин оставките на членовите на ДИК


Скопје, 11 декември, 2017 - 16:16 (META) 

Премиерот Зоран Заев ја поздрави одлуката на членовите на Државната изборна комисија да ги вратат парите од бонусите, како и оставките на дел од нив, кои ги оцени како морален чин.

– Се работи за исклучителни професионалци кои имаа сериозна улога во едно сериозно време и ја завршија професионално. Одлуката што ја донесоа знам дека е законска, но, веројатно е неетичка и неморална. Јас го поздравувам чинот што го поднесоа сите, а тоа е враќање на парите назад во буџетот, а истовремено поднесоа и лична одговорност како морален чекор, веројатно заради критиките од јавноста – рече Заев.

Премиерот додаде дека истовремено тие испратиле и сериозна порака на морално и етичко однесување, по реакциите на јавноста, заради, како што рече, нетранспаретноста на одлуката што ја донесоа и заради тоа што претходно не ја информираа јавноста дека ќе го искористат членот 19 од Изборниот законик што им овозможува дополнителни надоместоци.

Оставки од функции денеска си поднесоа претседателот на ДИК, Александар Чичаковски и членовите на Комисијата од СДСМ, Виолета Дума и Игор Милев.


Чичаковски и членовите на ДИК си поднесоа оставки на функциите


Скопје, 11 декември, 2017 - 13:29 (META) 

Претседателот на Државната изборна комисија (ДИК), Александар Чичаковски, за државната новинска агенција МИА потврдил дека си поднел оставка на функцијата.

Околу причините за оставката, Чичаковски навел дека тоа е негов личен чин.

Инаку, оставката на Чичаковски доаѓа откако во јавноста беше обелоденето дека членовите на ДИК си зеле високи бонуси за последните изборни циклуси, а беше почната и интернет-петиција со која се бараат оставки од деветмината членови на ДИК, која ја потпишаа над 5.000 лица.

И членовите на ДИК, Виолета Дума и Игор Милев, кои беа претставници на СДСМ во Комисијата за дел од медиумите потврдиле дека поднеле оставки на своите функции.

Мандатот на овој состав на ДИК истекува во 2020 година. Чичаковски е прв човек на ДИК од редот на експертите од 2015 година по постигнувањето на Договорот од Пржино.


Интернет-петиција за оставка од членовите на ДИК поради бонусите


Скопје, 7 декември, 2017 - 20:46 (META) 

Повеќе од 1.600 граѓани досега се потпишале на интернет-петицијата со која се бара оставка од членовите на Државната изборна комисија поради бонусите што си ги доделиле без да ја информираат јавноста.

„Бараме оставка на деветте членови на Државната изборна комисија (ДИК) поради неетичко однесување и кршење на принципите за работа, објавени на веб-страницата на ДИК, кои меѓу другото гласат: ‘Постојано вршиме самоевалуирање затоа што сакаме постојано да ја унапредуваме нашата работа и секој нареден изборен циклус да биде подобар од претходниот. Притоа ја зголемуваме ефикасноста, ја спроведуваме работата со помалку напор и ја зголемуваме ефективноста со што ги намалуваме трошоците за својата работа’“, се вели во петицијата.

Во неа се наведува дека платите на деветтемина членови на ДИК се движат меѓу 60.000 и 70.000 денари и дека во изминатите 18 месеци членовите на Комисијата трипати си доделиле вкупно 12 надоместоци за кои не ја информирале јавноста.

Случајот со бонусите на ДИК во јавноста го откри амбасадорот на САД во земјава, Џес Бејли, кој во вторникот неделава изјави оти слушнал дека членовите на Државната изборна комисија зад затворени врати едногласно си изгласале да добијат четири дополнителни плати по завршувањето на локалните избори во октомври годинава.

Еден ден подоцна ДИК одржа седница на која членовите рекоа дека одлуката за исплата на надоместоци била донесена во согласност со Изборниот законик и со правилникот за работа, но поради притисокот од јавноста решија бонусите да ги донираат или да ги вратат во буџетот.


Советниците од ВМРО-ДПМНЕ во Општина Вевчани поднесоа колективна оставка


Струга, 2 декември, 2017 - 15:50 (META) 

Советниците од ВМРО-ДПМНЕ денеска поднесоа колективна оставка од своите функции во Советот на Општина Вевчани, во знак на протест против, како што велат, „политиката и начинот на владеењето на СДСМ, како и во знак на поддршка на нивниот сопартиец во Собранието, Крсто Мукоски.“

– Во знак на револт и протест од начинот на владеење на оваа гарнитура предводена од СДСМ, како и последните политички хајки што ги спроведуваат врз невини граѓани и во знак на солидарност со сите жртви на овој тоталитарен режим, денеска како советници поднесуваме неотповикливи оставки и ги враќаме мандатите што ги добивме од граѓаните на Општина Вевчани – изјави советникот на ВМРО-ДПМНЕ од Вевчани, Јовица Лешоски.

ВМРО-ДПМНЕ има четири советнички места во општинскиот совет и сите четворица советници ќе ја бојкотираат неговата работа.


Укината титулата национален уметник, прифатени оставките на Мизо и на Грозданов


Скопје, 26 јули, 2017 - 11:29 (META) 

Владата на вчерашната 16. седница ги прифатила оставките на директорот на Дирекцијата на технолошки индустриски развојни зони, Виктор Мизо, како и на Цветко Грозданов, генералниот директор на АД за стопанисување со станбен и деловен простор, информираше владината прес-служба.

Разрешени се и Муедин Кахвеџи, директор на Педагошка служба, Весна Хорватовиќ од должноста директор на Бирото за развој на образованието и Костадин Богданов од должноста директор – владин агент на Бирото за застапување на Република Македонија пред Европскиот суд за човекови права, а на негово место како в.д. директор поставена е Драгица Џонова.

За директорка на Институтот за македонски јазик „Крсте Мисирков“ – Скопје, избрана е Елена Јованова-Грујовска, научен советник.

Владата одлучила за членови на надзорниот одбор на Македонска банка за поддршка на развојот да ги именува Никола Поповски, Веланд Рамадани, Кирил Колемишевски и Софче Јовановска, по добиена согласност од гувернерот на Народна банка.

Владата на седницата го усвоила и предлогот за измена и за дополнување на Законот за култура по скратена постапка за да се заштити буџетот од штетни менаџерски договори на раководни лица во културните институции.

Според информацијата споделена на владината седница, менаџерските договори направиле штета на буџетот од неколку милијарди денари.

На седницата се усвоил и предлогот за престанување на важењето на Законот за националниот уметник на Република Македонија, а на барање на Министерството за култура, Државниот завод за ревизија ќе изврши вонредна ревизија во министерството.

Владата на седницата одлучила да се врати постапката за стекнување лиценца за лектори, прекината во 2013 година, а дала и согласност да се поддржи Општина Чаир да се довршат работите за плоштадот Скендер-бег со средства од буџетот за 2018 година.


Еди Рама ќе ги објави замениците на четворицата министри што дадоа оставки


Тирана, 13 март, 2017 - 10:14 (META) 

Почнувајќи од денеска, албанскиот премиер Еди Рама ќе назначи нови министри на местото на четворицата од неговата влада што дадоа оставки. Рама вели дека оставките се само поради тоа „да им се дозволи на изборните координатори да се фокусираат со свежи сили на изборната кампања“.

Оставки вчера дадоа Бленди Клоси, министер за социјална заштита, Бледи Кучи, министер за локална самоуправа, Саимир Тахири, министер за внатрешни работи, и Илир Беќај, министер за здравство. Тие се и изборни координатори на Социјалистичката партија во некои од клучните области.

Рама ги пофали досегашните министри, припишувајќи ги оставките на партиските потреби, а не на притисоците од опозицијата или од клучниот коалиционен партнер во владата, партијата Социјално движење за интеграција.

Претседателот на опозициската Демократска партија, Љуљзим Баша, кој постојано го напаѓаше досегашниот министер за внатрешни работи за поврзаност со трговијата со марихуана, и постојано бараше формирање техничка влада, вчера искоментира дека ваквите потези на Рама нема да го разубедат.


Двете години политичка криза ја стопија владата на Никола Груевски


Скопје, 14 јуни, 2016 - 17:05 (META) 

Министерот за финансии и вицепремиер Зоран Ставрески денеска си поднесе оставка на функцијата.

Ставрески е петтиот министер од најблиското опкружување на поранешниот премиер Никола Груевски и од неговата влада, кој во овие две години, колку што трае политичката криза, си поднел оставка на функцијата во владата.

Досега, покрај Ставрески, оставки си поднесоа премиерот Никола Груевски, поранешната министерка за внатрешни работи, Гордана Јанкулоска, ексминистерот за транспорт и врски, Миле Јанакиески, и Иво Ивановски, кој беше министер за информатичко општество и администрација.

Иако не беше дел од владиниот кабинет, меѓу оставките што силно одекнаа во јавноста беше и онаа на поранешниот прв човек на Упрвата за безбедност и контраразузнавање (УБК), Сашо Мијалков.

Освен Ивановски, сите други беа главни актери во прислушуваните разговори што минатата година ги објави лидерот на СДСМ, Зоран Заев. Груевски, Јанкулоска, Ставрески и Мијалков во моментов се дел од осомничените во истражните и во предистражните постапки што ги води Специјалното јавно обвинителство.

Од минатиот состав на владата ги нема ни поранешните министри од ДУИ кои си заминаа по мини-реконструкцијата што си ја направи партијата на Ахмети.

Хронологија на оставките на Груевски и на неговите најблиски и најекспонирани соработници.

12 мај 2015 – Оставки си поднесоа Гордана Јанкулоска, Сашо Мијалков и Миле Јанакиески. Нивните оставки се случија само два дена по настаните во Диво Насеље, Кумановско.

15 септември 2015 – Оставка си поднесе министерот за инофрматичко општество и администрација, Иво Ивановски. Тој замина во Софија, каде стана дел од тимот на компанијата сопственост на мексиканскиот телекомукациски магнат Карлос Слим.

15 јануари 2016 – Премиерот Никола Груевски со писмо до претседателот на Собранието, Трајко Вељаноски, си поднесе оставка на функцијата. Ова беше дел од Договорот од Пржино, според кој 100 дена пред изборите Груевски требаше да поднесе оставка.

14 јуни 2016 – Министерот за финансии и вицепремиер Зоран Ставрески си поднесе оставка поради здравствени причини.