Снежана Калеска-Ванчева седна во пратеничката фотелја на Петар Атанасов


Скопје, 29 август, 2018 - 15:52 (META) 

Собранието го верификува мандатот на пратеничката Снежана Калеска – Ванчева од СДСМ, која доаѓа на местото на пратеникот Петар Атанасов.

Атанасов на 23 овој месец поднесе оставка на функцијата, која денеска беше констатирана. Се очекува тој да биде избран за заменик-министер за образование и наука.

Претседателот на Државната изборна комисија (ДИК) Оливер Деркоски изјави дека го известиле наредниот кандидат, Снежана Калеска-Ванчева од листата на кандидати за пратеници за ИЕ 1 од СДСМ и коалиција. Во законскиот рок Калеска-Ванчева ја известила Државната изборна комисија дека го прифаќа мандатот за пратеник во Собранието по што и е издадено уверение.

На седницата не беа присутни пратениците на опозициската ВМРО-ДПМНЕ.


Борис Џонсон поднесе оставка


Лондон, 9 јули, 2018 - 16:49 (META) 

Борис Џонсон денеска даде оставка од функцијата министер за надворешни работи на Велика Британија, а премиерката Тереза Меј му ја прифати.

Џонсон е вториот министер што денеска ѝ откажа верност на Меј – утрово министерот за Брегзит, Дејвид Дејвис, исто така поднесе оставка.

Заминувањето на Џонсон беше соопштено непосредно обраќањето на Меј пред Парламентот за нејзиниот нов план за Брегзит што разгневи многу пратеници од редовите на ториевците.

Од Даунинг Стрит 10 соопштија дека му се благодарат на Џонсон за досегашната работа и дека неговата замена ќе биде соопштена наскоро.


Заев: Ќе поднесам оставка ако референдумот не успее


Скопје, 26 јуни, 2018 - 9:52 (META) 

Премиерот Зоран Заев во интервју на телевизијата „1тв“ изјави дека е сигурен дека референдумот за договорот со Грција ќе успее, но доколку не се случи тоа ќе поднесе оставка.

– Ќе си заминам ако не успее референдумот во Македонија, но многу сум сигурен дека ќе успее. Очекувам огромна поддршка од граѓаните и сериозни проценти на поддршка, 77 до 85 отсто, согласно на тоа колкави се процентите на граѓаните кои се изјасниле дали се за ЕУ и НАТО – рече Заев.

Според неговите зборови, граѓаните немаат што да бираат, бидејќи Македонија нема алтернатива, туку само треба да потврдат дека сакаат нивната земја да биде членка на ЕУ и НАТО.

– Убеден сум дека граѓаните ќе донесат одлука за европска иднина, за себе и за другите генерации. Одлуката е едноставна, патот за ЕУ и НАТО е еднонасочен – вели премиерот.

Заев додаде дека во владејачката коалиција се уште не размислувале за формулацијата на референдумското прашање, но истакна дека ќе биде поврзано со одлуката за името и со ЕУ и НАТО.


Џезаир Шакири – Хоџа ќе добие надомест за ангажманот, нема постапка за друга функција


Скопје, 14 мај, 2018 - 10:47 (META) 

Шаќири ќе добие износ во пропорционален сооднос со траењето на неговиот договор, појасни Миле Бошњаковски, портпарол на Владата на прашањето од „Мета“ дали на Џезаир Шакири, алиас Командант Хоџа, ќе му биде исплатен надомест, односно плата за неговиот ангажман во Владата.

Од Владата пред една седмица потврдија дека поранешниот командант на ОНА  и човекот што важеше за „господар“ на Танушевци, и неколкупати по воениот конфликт во 2001 година даваше милитантни и радикалистички изјави, бил ангажиран како специјален советник на премиерот Зоран Заев како надворешен соработник од областа на внатрешната безбедност и борба против радикализмот. За тоа беше предвидена плата од 36.000 денари.

Но во петокот првин Заев, а потоа и Шакири, соопштија дека специјалниот советник ќе се повлече од функцијата поради бурните реакции во јавноста.

Од Владата ни одговорија и дека „во моментот не постои постапка за доделување на друга функција“.


Шакири: Се повлекувам за да не трпи Македонија на патот кон ЕУ и НАТО


Скопје, 11 мај, 2018 - 13:22 (META) 

Џезаир Шаќири, поранешен командант на ОНА, кој веќе неколку дена се наоѓа во центарот на вниманието на македонската јавност откако стана надворешен соработник на премиерот Зоран Заев за борба против радикализмот, денеска по најавата од Заев, во изјава за државната новинска агенција МИА, потврди дека ја напушта функцијата.

– Причината за тоа лежи во фактот дека медиумите во Македонија кренаа преголема врева за ова назначување. Единствениот политичар во Македонија што ми укажал некаква шанса е премиерот Зоран Заев и тој единствено ја има мојата почит. Не сакам заради ова Македонија да трпи на својот пат за ЕУ и НАТО. Ако мислеа дека ми е до тие пари, се лажат. Еве им ги назад, не ми се потребни – изјави Шакири за МИА.


Заев: Џезаир Шакири-Хоџа се повлекува од местото советник на премиерот


Скопје, 11 мај, 2018 - 12:07 (META) 

Премиерот Зоран Заев денеска во Охрид изјави дека контактирал со Џезаир Шакири, познат како Командант Хоџа кој му кажал дека бара сам да се откаже од советничката позиција во премиерскиот кабинет, јави Телма.

– Шакири ми кажа дека денеска ќе соопшти дека ќе се повлече од позицијата поради реакциите во јавноста. Тој вели дека и него му пречат реакциите и ќе се повлече затоа што си ја сака државата –  Заев.

Во понеделникот владата официјално потврди дека Џезаир Шакири, познат и како командант Хоџа е поставен за надворешен советник на премиерот Заев за областа на внатрешна безбедност и радикализам. Определената плата за него беше 36.000 денари.


Бошњаковски: Оставката на Саљији нема да влијае на реформите на правосудството


Скопје, 21 март, 2018 - 11:48 (META) 

Судската власт е независна и таква треба да остане, а на реформите на правосудството оставката на сега веќе поранешниот министер за правда Билен Саљији нема да влијае, бидејќи во ниту еден момент ништо нема да биде закочено, рече владиниот портпарол Миле Бошњаковски на денешната прес-конференција во Владата, одговарајќи на новинарско прашање дали вчерашната оставка што ја поднесе Саљији ќе има влијание врз реформите на правосудството.

Бошњаковски нагласи дека оставката на Саљији, како што тој самиот кажа е „негов личен чин, бидејќи чувствува морална одговорност за губење на довербата во однос на одредени делови на реформите на правосудствотои за малиот Алмир“.

Бошњаковски не коментираше дали оставката на Саљији ќе ја забрза реконструкцијата на Владата што ја најави премиерот Заев.

На новинарско прашање Бошњаковски рече дека Зконот за употреба на јазиците „ќе биде испратен до Венецијанската комисија веднаш кога ќе биде објавен во Службен весник“.


Министерот Саљији си даде оставка поради малиот Алмир


Скопје, 21 март, 2018 - 8:36 (META) 

Министерот за правда Билен Саљији синоќа во Владата на конференција за медиуми соопшти дека си поднесува неотповиклива оставка, поради, како што рече,морални причини и разнишаната доверба во судството во врска со случајот на малиот Алмир, кој пред две години беше прегазен во Куманово.

– Довербата во судството почна да се враќа преку случаите „Сопот“ и „Монструм“, но сепак во овие моменти чувствувам дека оваа доверба е разнишана во јавноста, но и кај мене лично, поради одлуката од пред неколку дена републичкиот јавен обвинител да го преквалификува обвинението во случајот на малиот Алмир. Оваа одлука беше оспорена од четирите јавни обвинители. Како прв човек на Министерството за правда поради оваа разнишана доверба чувствувам морална обврска да поднесам оставка од функцијата министер, не како акт на неуспех или притисок, туку како акт за кој се надева ќе биде во правец на подигнување на свеста и вниманието на институциите и целото општество за бескомпромисни реформи на правосудството – образложи Саљији.

Според некои медиуми на македонски јазик, кои се повикуваат на партиски извори, оставката не била по волја на Саљији, туку тоа го побарал премиерот Зоран Заев.

Билен Саљији функцијата ја вршеше од крајот на мај минатата година кога и беше избрана владата на коалицијата СДСМ-ДУИ-Алијанса за Албанците под раководство на лидерот на СДСМ, Зоран Заев.


Словенечкиот премиер Миро Церар поднесе оставка


Љубљана, 15 март, 2018 - 12:59 (META) 

Словенечкиот премиер, Миро Церар објави дека поднел оставка пред парламентот. Церар соопшти дека се повлекува по одлуката на Врховниот суд да се поништи резултатот од септемврискиот референдум, со кој, беше одобрен железничкиот проект вреден една милијарда евра, најголемиот инвестициски проект на неговата влада.

Референдумот го поддржа владиниот план за изградба на пруга во должина од 27 километри од пристаништето Копер до границата со Италија.

Оставката на Церар се случува само три месеци пред парламентарните избори најавени за јуни. Засега е нејасно дали оставката на Церар ќе го забрза распишувањето на изборите.

Владината коалиција која ја презеде власта во септември 2014 година, ги вклучува партијата на Церар, како и Социјалдемократите и партијата на пензионерите Десус.


ОМД бара импичмент за Џафери, оставка на Заев и на владата и предвремени избори


Вашингтон, 15 март, 2018 - 9:46 (META) 

Обединета македонска дијаспора (ОМД) преку соопштение до медиумите информираше дека најостро го осудува „неуставното и собраниското отстапување од деловникот“ при донесување на законот за јазици и ги повика политичките субјекти кои се произнесоа против Законот за употреба на јазиците, да поднесат собраниска иницијатива за импичмент на и така, како што велат, незаконски избраниот претседател на Собранието, Талат Џафери.

ОМД информира дека од вчера, 14 март, ги прекинува сите комуникации со сегашната Влада и бара импичмент на Талат Џафери и колективна оставка на владата и владината коалиција

Според ОМД, премиерот Зоран Заев и владата повеќе немаат интегритет и ингеренции да ја водат државата бидејќи наместо да ја извадат државата од политичка криза, од дијаспората сметаат дека ја втурнале во подлабока. Од ОМД бараат итна оставка на премиерот и на владата на Република Македонија, како и распишување на предвремени парламентарни избори.

„Ја поздравуваме реакцијата на претседателот Ѓорѓе Иванов, да не го потпишува овој закон, и го повикуваме да ги искористи сите средства во одбрана на македонските национални интереси. Го повикуваме македонскиот народ во државата да го искористи своето демократско право на мирен протест како начин за искажување на незадоволство кон политиките на Владата и Парламентот. Го повикуваме Уставниот суд во најкраток можен рок да се произнесе по основ законот за употреба на јазиците“, велат од ОМД.