!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Сопругот осомничен за убиството на битолчанката


Битола, 14 март, 2017 - 12:58 (META) 

Полицијата поднесе кривична пријава за вчерашното убиство на битолчанката Е.М.Д., за кое е осомничен нејзиниот сопруг. Според Јавното обвинителство, осомничениот ја убил сопругата удирајќи ја со дрвено сукало по главата.

Основното јавно обвинителство Битола до надлежниот суд доставило предлог на осомничниот да му биде одредена мерка притвор.

„Предлог е доставен поради основан сомнеж дека осомничениот на 13 март 2017 година, поради претходно нарушени меѓусебни односи, во дневната соба од заедничкиот дом, вршејќи семејно насилство, ја лишил од живот оштетената – неговата сопруга Е.М.Д. од Битола. Осомничениот со дрвено сукало ја удирал по главата оштетената, нанесувајќи ѝ повеќе повреди, од што таа починала“, стои во соопштението на Јавното обвинителство.

Оттаму додаваат дека постапката по кривичната пријава е во тек.


Судот му одреди притвор и издаде потерница по Сеад Кочан


Скопје, 9 март, 2017 - 21:46 (META) 

Кривичниот совет на Основниот суд Скопје ја прифати жалбата на Специјалното јавно обвинителство и му одреди притвор на бизнисменот Сеад Кочан, кој е еден од тројцата осомничени во случајот „Труст“ на СЈО, потврдија за „Мета“ од судот.

Од судот велат дека е издадена и потерница по Кочан.

Кривичниот совет на судот го прифатил образложението на жалбата на СЈО, односно дека ако се брани од слобода Кочан може да избега, да влијае на сведоци или да уништи докази повразни со случајот.

Одбраната на Кочан има право на жалба на одлуката на Кривичниот совет до Апелацискиот суд, но тоа не го одложува спроведувањето на мерката притвор, кое на сила стапува веднаш.

СЈО поднесе жалба до Кривичниот совет, откако судијата на претходна постапка го одби нивното барање на сопственикот на „Трансмет“ и на телевизија „Нова“ да му биде одредена мерка притвор.

Специјалното јавно обвинителство во вторникот минатата недела ја отвори истрагата под име „Труст“, во која три физички лица и фирмите „Трансмет“ од Скопје, „Силекс“ од Кратово и „Вато“ од Студеничани“ се товарат дека со фалсификувана документација добиле тендер од ЕЛЕМ, вреден 17.235.772 евра.


Уапсен осомничениот за убиството на 67-годишната жена во Охрид


Куманово, 22 февруари, 2017 - 10:57 (META) 

Разбојникот  кој завчера изврши убиство на 67-годишна жена во Охрид е уапсен во Куманово, во координирана акција на полицијата и на обвинителството.

Како што соопштуваат од Јавното обвинителство, осомничениот бил со потекло од Куманово, а во моментот на разбојништвото и на убиството живеел во истата станбена зграда со жртвата и се познавал со неа. По разбојништвото, тој заминал за Куманово и, како што велат од обвинителството, имал намера да побегне од земјава.

– Лицето е лишено од слобода и по наредба на надлежен јавен обвинител во тек се дејства за понатамошно расветлување на кривично-правниот настан – стои во соопштението од обвинителството.


Цимерот на бездомникот од Битола е осомничен за неговото убиство


Битола, 28 јануари, 2017 - 13:31 (META) 

СВР Битола поднесе кривична пријава против П.А. (53) од Битола, поради постоење основан сомнеж дека извршил убиство.

Настанот се случил во текот на ноќта помеѓу 24 и 25 јануари, во неутврдено време, при што пријавениот со употреба на физичка сила и тврди предмети, на свиреп и подмолен начин, му нанел повеќе повреди по целото тело и на тој начин го лишил од живот С.Д. (48) од Битола, со кого заедно живеел во иста куќа на улицата 4 Ноември во Битола.

Пријавениот, со намера да го прикрие ова свирепо убиство, во времето околу 5.50 часот на 25 јануари, се упатил во соседната куќа, барајќи помош, кажувајќи дека непознати лица ги нападнале додека спиеле, по што истиот е хоспитализиран во Клиничка болница во Битола, поради укажување медицинска помош, заради повредите за кои изјавил дека настанале при тој напад.

На местото на настанот увид извршил јавен обвинител од Битола, како и увидна екипа од СВР Битола. Од увидот, од извршените вештачења, како и од разговорите со повеќе лица, вклучително и со пријавениот, констатирано е основано сомневање дека П.А. е сторител на кривичното дело.


Царината спречила шверц на 18 килограми марихуана, сокриена во плинска боца


Куманово, 26 јануари, 2017 - 13:49 (META) 

Царинските екипи на граничниот премин Табановце вчера спречиле обид за шверц на 18 килограми марихуана, што била сокриена во плинска боца.

Како што информираат од Царинската управа, вчера, околу 6 часот, на граничниот премин за излез од Македонија било пријавено возило, со албански регистарски таблички, а управувано од И.Ш., државјанин на Албанија. Возилото било селектирано за детална контрола и при прегледот на багажникот била пронајдена плинска боца, во која биле сокриени 15 вакумирани пакетчиња облепени со проѕирна леплива лента, наполети со марихуана со вкупна тежина од околу 18 килограми.

Во предистражната постапка, што ја спровеле инспекторите на одделението за истраги на Царинската управа, било утврдено дека осомничениот ја набавил марихуаната во Албанија и требало да ја прошверцува до Германија.

„Против сторителот, Царинската управа поднесе кривична пријава за неовластено производство и пуштање во промет на наркотични дроги, психотропни супстанции и прекурсори до надлежното јавно обвинителство, а судијата на претходна постапка му изрече мерка притвор во траење од 30 дена“, стои во соопштението на Царината.

Оттаму додаваат дека во текот на декември, царинските екипи во соработка со Министерството за внатрешни работи заплениле 70 килограми марихуана, сокриена во ПВЦ-прозорци.


Австрија: Уапсено едно лице осомничено за планирање на терористички напад во Виена


Виена, 21 јануари, 2017 - 10:33 (META) 

Австриската полиција вчера уапсила едно лице, осомничено дека подготвувало терористички напад во главниот град на земјата, Виена, соопшти полицијата, јавуваат светските медиуми.

Министерот за внатрешни работи на Австрија, Волфганг Соботка, изјави дека станува збор за 18-годишен мигрант, кој имал австриско државјанство. Тој додал дека има индиции дека осомничениот планирал да го изврши нападот од радикално-исламистички мотиви.

Осомничениот бил уапсен, откако специјалните полициски сили извршиле претрес во стан во Виена, а по добиени информации од странски разузнавачки служби.

Соботка изјавил дека момчето било надгледувано неколку дена.

„Нашите полициски сили успеаја за кратко време да го уапсат осомничениот и да превенираат потенцијален терористички напад во главниот град Виена“, изјавил Соботка, пренесува „Би-би-си“.

Во тек е истрага која треба да утврди дали осомничениот е поврзан со некоја исламистичка група.

Полицијата издала предупредување до граѓаните да бидат внимателни на јавните места.


Поднесено обвинение за убиството на четиригодишното дете во Куманово


Скопје, 23 декември, 2016 - 16:09 (META) 

Основното јавно обвинителство Куманово поднело обвинителен акт против Б.И., осомничен за прегазувањето на четиригодишно дете, кое се случи на 25 јуни годинава кај кумановската болница. Како што соопшти денеска Јавното обвинителство, осомничениот се товари за убиство, според член 123 од Кривичниот законик.

Во врска со случајот, поднесено е обвинение против уште три други лица за насилство.

„На 25 јуни годинава, додека Б.И. заедно со неговата девојка чекале ред во здравствениот дом во Куманово, тој се скарал со родителот на четиригодишното момче за непочитување ред за прием во установата. Расправијата продолжила надвор од Здравствениот дом, кога членови на семејството на момчето ги нападнале Б.И. и неговиот брат. Обвинетиот со својот автомобил марка „мерцедес“ се обидел да ги прегази мајката, таткото и четиригодишното дете, кое од здобиените повреди почина“, стои во соопштението од Јавното обвинителство.


Обвинителството го истражува вчерашното убиство во Велес


Велес, 6 декември, 2016 - 10:33 (META) 

Основното јавно обвинителство Велес го истражува убиство што вчера околу 14 часот се случило во местото Којник, кај Велес, кога вооружен маж дошол во куќата на сега починатото лице и веднаш почнал да пука во него.

Како што соопштија денеска од Јавното обвинителство, жртвата, во обид да му избега на сторителот, излегла од куќата и дошла до улицата, каде осомничениот уште еднаш го вперил пиштолот кон неа, со намера повторно да пука.

„Во тој момент, по пријава на соседите, дошла полицијата која го лишила од слобода осомничениот, а на сега починатиот му е дадена медицинска помош, но, поради сериозноста на повредите, настапила смрт“, стои во соопштението на Јавното обвинителство.

Надлежен јавен обвинител заедно со екипи на МВР извршил увид на местото, по кој издал наредба за обдукција на телото на жртвата, за вештачење траги од местото, на брисеви од крвта и на оружјето со кое било извршено убиството.

На предлог на јавниот обвинител, Основниот суд во Велес на осомничениот му одредил притвор од 30 дена.

„Основното јавно обвинителство Велес продолжува со дејствата во насока на расветлување на настанот“, додаваат од обвинителството, кое треба да ги утврди причините и мотивите за убиството.


Запленети 2,7 килограми марихуана на граничниот премин Ќафасан


Струга, 10 октомври, 2016 - 15:00 (META) 

Царински екипи вчера, на граничниот премин Ќафасан на македонско-албанската граница, заплениле 2,7 килограми марихуана, сокриена во автомобил со македонски регистарски ознаки, што го управувал 34-годишниот Е.М., соопшти денеска Царинска управа.

Во автомобилот, според царината, биле пронајдени 12 најлонски пакетчиња со марихуана, сокриени на повеќе места во возилото.

„Во багажниот простор под резервната гума, пронајдени се четири најлонски пакетчиња, наполнети со тревкаста материја со зеленкаста боја и со карактеристичен мирис. При понатамошниот преглед, во кој беше користено и царинско куче за откривање наркотици, беа пронајдени уште осум најлонски пакетчиња со иста содржина, во багажниот простор во внатрешниот дел на левото задно крило, во делот за вентилација во предниот дел од моторот и во просторот над предната светилка која се наоѓа на покривот од возилото. Тестерот за наркотици покажа дека се работи за наркотично средство – канабис сатива. Вкупната тежина на откриената дрога изнесува околу 2 килограми и 688 грама“, стои во соопштението од Цариската управа.

Осомничениот бил веднаш уапсен и предаден на инспекторите од одделението за истраги. Во предистражната постапка, според царината, било утврдено дека осомничениот ја купил марихуната во Елбасан за 500 евра.

„По комлетирање на сите докази, Царинската управа против сторителот ќе поднесе кривична пријава за неовластено производство и пуштање во промет на наркотични дроги, психотропни супстанции и прекурсори до надлежното јавно обвинителство, а сторителот ќе биде предаден на надлежен судија на претходна постапка“, додаваат од царината.


Притворен жител на селото Алдинци, осомничен за убиство на брата си


Крушево, 10 октомври, 2016 - 12:13 (META) 

Судија на претходна постапка на барање на јавен обвинител му одреди 30 дена притвор на жител на крушевското село Алдинци, осомничен за убиство на својот и брат и за обид за убиство на 14-годишно дете, кои се случиле викендов.

Осомничениот, како што соопштија денеска од обвинителството, го убил својот брат во нивната семејна куќа. Тој го нападнал брата си со рачка од секрира, а потоа продолжил да го удира по главата со метална цевка, додека не го усмртил.

„По извршеното убиство, осомничениот се упатил кон куќа во непосредна близина, каде што со истата метална водоводна цевка се обидел да лиши од живот едно 14-годишно дете, но притоа бил спречен од соседите кои го фатиле. Детето со телесни повреди е пренесено во болницата во Прилеп, каде му е укажана лекарска помош и се наоѓа надвор од животна опасност. Судијата на претходна постапка го прифати предлогот од надлежниот јавен обвинител и на осомничениот му определи притвор во траење од 30 дена“, стои во соопштението од јавното обвинителство.