!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Џолев даде заклетва и стана претседател на Основниот суд во Скопје


Скопје, 10 ноември, 2017 - 11:37 (META) 

Новиозибраниот претседател на Основниот суд Скопје 1 Иван Џолев денеска даде свечена изјава пред членовите на Судскиот совет, со што и официјално стапи на функцијата.

Судскиот совет пред два дена со 11 гласа „за“ и два „против“, го избра Џолев за претседател на Основниот суд Скопје 1.

Џолев е судијата кој неодамна изјави дека поранешниот претседател на судот, Владимир Панчевски, вршел притисок по изречена судска пресуда. Џолев на Панчевски му поднесе кривична пријава, а за ова негово обвинување расправаа и Советот за утврдување на факти и Судскиот совет.

Џолев доаѓа на местото на доскорашниот в.д. претседател на Кривичен суд Стојанче Рибарев кој, поднесе оставка поради лични причини.


Иван Џолев е избран за нов претседател на Кривичниот суд


Скопје, 8 ноември, 2017 - 11:48 (META) 

Со 11 гласа „за“ и два „против“, Судскиот совет го избра судијата Иван Џолев за претседател на Основниот суд Скопје 1.

Помеѓу другите кандидати за претседател на судот беа претходниот претседател Владимир Панчевски, Ивица Стефановски, Верка Петковска, Осман Шабани, Ѓоко Ристов и Весна Димишкова.

Судијата Оља Ристова ја повлекла кандидатурата за претседател на скопскиот Кривичен суд, информираа на седницата на Судскиот совет.

Претходно беше констатирана оставката на в.д. претседателот на скопскиот Кривичен суд, Стојанче Рибарев, кој, како што беше речено на седницата, оставката ја поднел поради здравствени причини, односно хируршка интервенција.

Џолев е судијата кој неодамна изјави дека поранешниот претседател на судот, Владимир Панчевски, вршел притисок по изречена судска пресуда. Џолев на Панчевски му поднесе кривична пријава, а за ова негово обвинување расправаа и Советот за утврдување на факти и Судскиот совет.


Протестот за „Диво Насеље“ мирен, се скандираше „УЧК“


Скопје, 5 ноември, 2017 - 14:54 (META) 

Со скандирања, во кои главно се слушале „УЧК“, под силно полициско обезбедување, заврши протестот против пресудите за „Диво Насеље“. Нема забележани инциденти.

Во толпата што тргна од плоштадот Скендер-бег и се упати кон Основен суд Скопје 1, каде беше изречена пресудата за обвинетите, се слушаа скандирања, од кои предничеше „УЧК“. Иако првично беше најавено дека ќе се оди и до Собранието на Република Македонија, тоа не се случи, туку од плоштадот, поворката се упати кон судот.

Протестот беше поддржан од семејствата на обвинетите, кои на плоштадот Скендер-бег се обратија пред помала група поддржувачи. Толпата беше под силно полициско обезбедување.


Протест за „Диво Насеље“ дeнеска пред Кривичен суд во Скопје


Скопје, 5 ноември, 2017 - 10:39 (META) 

На потегот од плоштадот Скендер-бег до Основен суд Скопје 1, денеска со почеток од 13 часот, ќе се одржи протест против судската пресуда за случајот „Диво Насеље“.

Протестот го организира Здружението за албанска култура, коe вчера го пријави настанот во полициската станица Бит-пазар.

Во повикот за протестот што го пренесоа дел од медиумите е наведено дека треба да присуствуваат сите граѓани кои сметаат дека „изживувањето и самоволието на судот во изрекување на казните се уште еден пример за неправедна правда и за двојни аршини од страна на судот“.

Претходно, на социјалните мрежи се договараше учеството, а според тоа, се очекуваат и демонстранти од Косово и од Албанија, кои го најавуваа своето учество.

„Нашето учество само ќе укаже на тоа колку сите сме за соживот, без маски и агенди“, велат организаторите.


Најави за масовен протест пред Кривичен суд поради пресудите за „Диво Насеље“


Скопје, 4 ноември, 2017 - 12:03 (META) 

Медиумите на албански јазик најавуваат дека утре пред Основниот суд Скопје 1 (Кривичен суд), ќе се случат протести на коишто ќе биде изразено незадоволство од пресудата изречена во случајот „Диво Насеље“.

„Некои невладини организации и граѓански иницијативи организираат протест против казните со кои судот во Скопје ги осуди осудените лица во случајот „Диво Насеље“ во Куманово. Протестите ќе почнат во недела, со почеток во 13 часот“, објави албанскиот портал „Телеграф“.

Протестите ќе почнат од плоштадот Скендер-бег и ќе завршат пред Основниот суд Скопје 1, се вели во соопштението на невладините организации, кое е испратено до албанските медиуми.

Демонстрантите ќе бараат меѓународна истрага и ревизија на случајот кој според нив е уште една неправда кон Албанците во Македонија. Покрај за „Диво Насеље“ се бара слобода и за други осудени Албанци за случаите „Монструм“, „Бродец“ и други.


Денеска пресуда за „Дивo Насеље“


Скопје, 2 ноември, 2017 - 9:43 (META) 

Скопскиот Кривичен суд денеска во 10.30 часот треба да ја соопшти пресудата за настаните во кумановската населба Диво Насеље во мај 2015 година, во кои загинаа осум припадници на македонските безбедносни сили.

Пресудата за овој случај требаше да биде донесена на 17 октомври, но беше одложена поради локалните избори на барање на МВР.

Обвинителството бара доживотен затвор за сите 37 обвинети за тероризам и за терористичка организација. Адвокатите на обвинетите, пак, бараат ослободителни пресуди бидејќи, според нив, има недостиг од докази за стореното кривично дело.

На 9 и на 10 мај 2015 година, во кумановската населба Диво Насеље вооружена група се судри со безбедносните сили. Во престрелката загинаа осум полицајци од специјалните и од посебните единици на МВР, додека четириесетина беа тешко повредени. Убиени беа и десет лица од вооружената група.

Поради безбедносните мерки, ќе има пренасочувања на сообраќајот во близина на Основен суд Скопје 1.


Итната седница на Судскиот совет за оставката на Рибарев – следната недела


Скопје, 27 октомври, 2017 - 12:00 (META) 

Судскиот совет сè уште не ја закажал итната седница по оставката на в.д. претседателот на Основниот суд Скопје 1, Стојанче Рибарев, а како што изјави претседателот на Советот, Зоран Караџовски, таа најверојатно нема да биде одржана денеска и ќе биде закажана од понеделник.

Во врска со тоа какво ќе биде решението на Судскиот совет околу изборот на шеф на Кривичниот суд во Скопје, односно дали ќе се оди на избор на претседател или повторно ќе постави вршител на должност, Караџовски вели дека според законот, и двете опции се отворени.

Судскиот совет на 20 јули распиша нов оглас за избор на претседател на скопскиот кривичен суд, откако претходниот пропадна.

– Опциите се да поминат изборите и да се одреди разумен датум за избор на претседател на судот или, пак, да се оди повторно на поставување в.д. претседател, што е, исто така, според закон – ни изјави Караџовски.

Инаку, во меѓувреме, со Основниот суд Скопје 1 раководи судијката Дијана Груевска-Илиевска, која го заменува Рибарев.

Тој, како што соопшти Судскиот совет, оставката ја поднел завчера. Пет дена претходно, тој испратил известување до Советот дека од истиот ден, односно 20 октомври, е на боледување и дека ќе го заменува судијката Дијана Груевска-Илиевска.

Оставката на Рибарев доаѓа во период кога најголемиот и најважниот суд е во фокусот на јавноста поради ревизијата што ја спроведува комисија на Министерството за правда, поради индициите за злоупореби на автоматизираниот систем за управување со судските предмети (АКМИС). Актуелни се и обвиненијата што ги поднесе СЈО, за кои се очекува наскоро да почне судската постапка, но во тек е и постапката за екстрадиција на поранешните началници на УБК, Горан Грујовски и Никола Бошковски, што ја води Министерството за правда, а Кривичниот суд треба да ги подготви списите за случаите што се водат против нив.

Дел од медиумите шпекулираат дека Рибарев, наводно, поднел оставка бидејќи не можел да ги истрпи притисоците, кои, како што пишува „Дојче веле“, повикувајќи се на судски извори, доаѓале „однадвор – од лица засегнати со истрагите на СЈО, но и од нивни експоненти внатре, во судот“. Засега нема потврда или демант од Рибарев. Тој во известувањето што го доставил до Судскиот совет навел дека оставката ја поднесува од лични причини.

Основниот суд Скопје 1 веќе речиси една година нема претседател, откако на почетокот на декември минатата година му истече мандатот на Владимир Панчевски, кој во изминатиот период е мета на обвинувања за лошите состојби во судот, а неодамна во неговата канцеларија и во неговиот дом СЈО изврши претрес во врска со предистражна постапка што ја води ова обвинителство.


Четворицата обвинети го признаа грабежот во НЛБ, но не открија каде се парите


Скопје, 19 октомври, 2017 - 16:08 (META) 

Четворицата обвинети за милионскиот грабеж во НЛБ, на денешното рочиште во Основниот суд Скопје 1 го признале кривичното дело, но не откриле што сториле со украдените пари, соопшти Јавното обвинителство.

„Тие се изјаснија за виновни, односно дека со умисла и во повеќе временски поврзани дејства, искористувајќи ја својата работна позиција и познавање на процесите на работата во банката, противправно присвоиле парични средства во значителен износ од 400.000 швајцарски франци и 375.000 евра. На 10 април 2017 извршиле кражба и на 2 милиони швајцарски франци и 270.000 евра. Иако ги признале во целост наводите од обвинителниот акт, обвинетите не откриле што сториле со украдените парични средства“, стои во соопштението.

По признавањето на вината, судијата закажал рочиште на 27 октомври, на кое ќе бидат изнесени завршните зборови.

За кривичните дела, тешка кражба и затајување, за кое се товарат обвинетите, предвидена е затворска казна од три до 10 години, односно од една до 10 години.

Надлежниот обвинител, кој го води предметот, до судот доставил и обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума на пари. Тие се товарат за несовесно работење во службата.

Постапката против овие четири лица продолжува одвоено.


Пресудата за „Диво Насеље“ одложена за почетокот на следниот месец


Скопје, 13 октомври, 2017 - 17:08 (META) 

Поради презафатеноста на МВР со обезбедување на локалните избори, изрекувањето на пресудата за случајот „Диво Насеље“ е одложено за 2 ноември, соопшти Основен суд Скопје 1 на својата веб-страница.

Судот вели дека поради големиот број полициски службеници ангажирани за обезбедување на локалните избори и за обезбедување на делегации од странство во Република Македонија, судското рочиште за „Диво Насеље за 17 октомври се одложува за 2 ноември.

Истовремено е презакажано и рочиштето за изрекување на пресудата за обвинетиот Сулејман Осман, кому се суди за терористички напади. За него судот одлуката требаше да ја соопшти в четврток, но поради барањето на МВР, пресудата е презакажана за 3 ноември.


Панчевски: Со претресот на СЈО настапи целосен мрак за правдата во Македонија


Скопје, 9 октомври, 2017 - 16:25 (META) 

Судијата Владимир Панчевски денеска обвини дека во четвртокот минатата недела настапил „целосен мрак за правдата во Македонија“ со, како што вели, „незаконитиот и брутален претрес“ што врз него го извршиле Специјалното јавно обвинителство и истражители на Министерството за внатрешни работи.

Панчевски, во интервју за „Алсат-М“, тврди дека не бил извршен претрес во простории во Кривичниот суд во Скопје, туку станувало збор за личен претрес врз него. Тој ја оспорува и наредбата за претрес, издадена од гевгелискиот суд, и вели дека стварната надлежност за постапување против него ја има Основниот суд Скопје 1, а доколку имало потреба од „конспиративност“, постапката во ваков случај ја одредува Апелацискиот суд Скопје.

– Од канцеларијата на в.д. претседателот на судот, бев спроведен во канцеларијата каде ја извршувам судската функција, без да ми се објасни зошто ми е ограничена слободата и сум спроведен на друго место да ми се врши претрес. Насилно ми одзедоа мобилни телефони. Женско лице, инспектор, односно припадник на истражителите на МВР, ми ги одзеде (телефоните) од џебовите на панталоните иако според сите стандарди, меѓународни, домашни и секакви, женско лице не врши претрес на машко лице, додека двајца инспектори ми ги држеа раширени рацете – вели Панчевски, кој во интервјуто за себе зборува во трето лице.

Тој тврди дека за време на претресот во судот имало вооружени лица и полицајци насекаде.

– Незаконитата процедура на крај заврши со кражба на клуч, што се гледа од снимката од видеонадзорот што го доставив до медиумите. Снимката е таа, може да ме распнат, да ме судат и да ме осудат. Панчевски е со чиста совест за сè досега, како претседател на Основниот суд Скопје 1 и како судија во тој суд. Сум постапувал секогаш чесно, во согласност со закон и никако поинаку – вели судијата.

Прашан дали ги предупредил обвинителите на СЈО дека има видеонадзор и околу законитоста на снимањето, Панчевски вели дека тој не бил должен да предупредува за тоа дали има видеонадзор и дека тој бил поставен поради здравствената состојба на неговата мајка, која починала пред 20 дена.

– Го прегледав видеонадзорот бидејќи кога требаше да го заклучам станот, по завршувањето на претресот, го немаше клучот. Знаејќи го начинот на работење на СЈО како судија во Основниот суд Скопје 1 и сите незаконитости за кои сум кажувал претходно во мои изјави, што писмени што усни до медиумите и до јавноста, се посомневав дека можеби некој го зел. Од кои причини го зеле клучот не знам. Генерално, морам да кажам дека се плашам за личниот живот повеќе, со овој мрак на правдата. Не е битно дали ќе водат постапки за Панчевски, Панчевски е веќе осуден и лежи казна затвор во нечија глава. Тие ќе ги реализираат своите намери и слободно можат да ги реализираат, јас сум со чиста совест и не се плашам – вели Панчевски.

Тој тврди дека никогаш не местел предмети, а шпекулациите за постоење на двоен АКМИС, преку кој тој ги следел предметите од дома, ги оценува како „параноидни халуцинации за некакво сценарио во нечија глава“.