„Исцелител“ на Ѓорче Ставрески е македонскиот кандидат за Оскар


Скопје, 19 септември, 2018 - 12:44 (META) 

Филмот „Исцелител“ во режија на Ѓорче Ставрески, ќе биде национален кандидат на Република Македонија за наградата „Оскар за најдобар филм од неанглиско говорно подрачје” за 2019 година, соопшти денеска Друштвото на филмски работници.

Одлуката, која е прифатена и одобрена од Американската Академија за подвижни слики,  ја донесе комисја во состав: во состав: Игор Иванов – режисер и претседател на ДФРМ, Ирена Ристиќ – актер, Амернис Нокшиќи – актер, Горан Трајкоски – композитор, Игор Тошевски – ликовен уметник и сценограф, Даријан Пејовски – режисер и Наум Доксевски – кинематографер.

Во конкуренција за кандидатурата беа и филмовите: „Враќање“ во режија на Кастриот Абдили, „Година на мајмунот“ во режија на Владимир Блажевски, „Незаборавна пролет во заборавено село“ во режија на Куштрим Бектеши, и „Здивот на ангелот“ во режија на Јани Бојаџи, се вели во соопштението од Друштвото на филмски работници на Македонија.


Прв „Оскар“ за Леонардо ди Каприо, „Спотлајт“ најдобар филм


Лос Анџелес, 29 февруари, 2016 - 10:04 (META) 

Леонардо ди Каприо освои „Оскар“ за најдобра машка улога во филмот „Повратник“, а „Спотлајт“ беше прогласен за најдобар филм на синоќешното 88. доделување на наградите на Американската филмска академија.

Наградата за најдобра женска улога ѝ припадна на Бри Ларсон за улогата на Џој во „Соба“. За најдобра споредна машка ролја награден беше Марк Рајленс за улогата во трилерот на Стивен Спилберг „Мост на шпиони“, а со најдобра споредна женска улога се закити Алисија Викандер за своето остварување во „Девојката од Данска“.

За најдобар режисер, награда доби Алехандро Гонзалес Инариту за „Повратник“, а за најдобро оригинално сценарио награда доби филмот „Спотлајт“. Статуетката „Оскар“ за најдобро адаптирано сценарио отиде кај „Големиот кусок“.

Лејди Гага настапи на сцената со песната „Till it happens to you“, а неа ја најави американскиот потпретседател Џозеф Бајден.

На сцената настапуваше и Сем Смит со песната „Writing’s on the wall“ од филмот „Спектра“, која доби „Оскар“ за најдобра песна. Енио Мориконе доби „Оскар“ за најдобра музика за филмот „Омразената осумка“.

„Лудиот Макс“ доби дури шест статуетки „Оскар“, за најдобра костумографија, најдобра сценографија, најдобра маска, најдобра монтажа, најдобра монтажа на звук и за најдобар микс на звук.

Филмот „Ексмашина“ доби „Оскар“ за најдобри визуелни ефекти, „Во мојата глава“ за најдобар долгометражен анимиран филм, а „Приказна за мечката“ за најдобар краток анимиран филм. „Ејми“ е најдобар документарен филм, „Девојката на реката: Цената на збогувањето“ е најдобар краток документарен филм, а „Синот на Саул“ ја доби наградата за најдобар филм од странско говорно подрачје.


„Брдмен“ ги освои главните награди „Оскар“


Лос Анџелес, 23 февруари, 2015 - 10:40 (META) 

„Брдмен“ ги понесе четирите најголеми награди на годинешните награди „Оскар“. Филмот, во кој главната улога ја толкува Мајкл Китон, ги победи „Американски снајперист“, „Момчештво“, „Гранд хотел Будимпешта“, „Игра на имитација“, „Селма“, „Теорија за сè“ и „Whiplash“ во категоријата најдобар филм, додека Алехандро Гонзалез Ињариту беше прогласен за најдобар режисер.

– Можеби следната година Академијата ќе воведе некој закон за имиграција. Двајца Мексиканци едно по друго, тоа е, веројатно, малку сомнително – рече Ињариту, алудирајќи на Алфонсо Куарон, кој минатата година ја понесе наградата за филмот „Гравитација“.

Филмот победи и во категориите оригинално сценарио и најдобра кинематографија, освојувајќи ист број нагрди како и „Гранд хотел Будимпешта“.

Комедијата на Вес Андерсон, во која играат Ралф Фајнс и Тони Револори, ги доби признанијата за дизајн на костуми, шминка и фризура, музика и за продукција.

Еди Редмејн освои уште една награда за најдобар актер за портретирањето на Стивен Хокинс во „Теорија за сè“, која ја посвети на борбата против амиотрофична латерална склероза (АЛС), додека Џулијан Мур за својата изведба на лице со Алцхајмерова болест во „Сè уште Алис“ ја освои втората награда „Оскар“ за најдобра актерка.

„Whiplash“ ги освои наградите за најдобра монтажа, звук и за најдобра споредна машка улога за Ј.К. Симонс.

Патриција Аркет му помогна на „Момчештво“ да ја освои наградата за најдобра споредна женска улога. Филмовите „Игра на имитација“ „Екипа за 6“, „Ида“, „Граѓанин Четири“, „Жешка линија за кризи: Ветеран прес 1“, „Селма“, „Американски снајперист“, „Интерстелар“, „Гозба“ и „Телефонски повик“ освоија по една награда Оскар“.


„Брдмен“ и „Гранд хотел Будимпешта“ со најмногу номинации за „Оскар“


Лос Анџелес, 15 јануари, 2015 - 17:24 (META) 

„Американски снајперист“, „Момчештво“, „Брдмен“, „Гранд хотел Будимпешта“, „Игра на имитирање“, „Теоријата за сè“, „Удар со камшик“ и „Селма“ се номинациите за најдобар филм за 87. издание на церемонијата за доделување на наградите „Оскар“.

„Брдмен“ и „Гранд хотел Будимпешта“ имаат најмногу, по девет номинации, а по нив следува „Игра на имитирање“ со осум номинации.

За најдобар режисир номинирани се Алехандро Гонзалес за „Брдмен“, Ричард Линклетер за „Момчештво“, Мортен Тилдум за „Игра на имитирање“, Вес Андерсон за „Гранд хотел Будимпешта“ и Бенет Милер за „Фокскечер“.

Во категоријата најдобра актерка, номинирани се Мерион Котиар за „Два дена, една ноќ“, Фелисити Џонс за „Теоријата за сè“, Џулијан Мур за „Сè уште Алис“, Риси Витерспун за „Дива“ и Розамунд Пајк за „Исчезната“.

За најдобар актер номинирани се Стив Карел за „Фокскечер“, Бредли Купер за „Американски снајперист“, Бенедикт Камбербач за „Игра на имитација“, Мајкл Китон за „Брдмен“ и Еди Редмејн за „Теоријата за сè“.

Сите номинации може да ги погледнете тука.