Вучиќ демантира: Уште не сум добил орден од Путин


Белград, 31 октомври, 2018 - 15:31 (META) 

Два дена откако голем број српски медиуми блиски до актуелната власт објавија помпезно дека рускиот претседател Владимир Путин го одликувал својот српски колега Александар Вучиќ со орденот „Свети Александар Невски“, кој не бил доделен на ниту еден друг српски државник по Никола Пашиќ, се дозна дека тоа не е вистина.

Имено, рускиот претседател на потпишал таков указ, а информацијата за одликувањето ја демантираше и претседателот на Србија, кој рече дека не добил таков орден, но и дека постои можност тоа да се случи.

Одговарајќи на прашања на новинарите, Вучиќ денеска рече дека сè уште не добил орден од Путин, но дека е горд на таквата можност, како и дека тоа за него би било огромна сатисфакција.

Весникот „Вечерње новости“, потоа „Информер“ и други медиуми блиски до власта објавија на 29 октомври дека рускиот претседател донел указ за одликување на Вучиќ, истакнувајќи дека „одлуката на лидерот на најголемата држава на светот тоа признание да му го додели на Вучиќ најдобро говори за односот на рускиот лидер кон шефот на српската држава“.

Исто така медиумите наведуваа дека Путин би можел да му го врачи орденот на Вучиќ на 15 јануари следната година во текот на посетата на Србија, чии детали уште се дефинираат.

За наводниот орден Вучиќ зборуваше и во вчера објавеното интервју за српската верзија на руската новинска агенција „Спутњик“. На прашањето како гледа на гестот на рускиот претседател да му додели орден „што не се дава често и многу значи“, Вучиќ одговори дека „бил многу горд кога слушнал за таа можност“.

– Да бидам искрен, уште целосно не верувам, макар што од официјална позиција добив потврда дека е можно да го  добијам орденот „Александар Невски“. Ќе ја чекам средината на јануари кога претседателот Путин доаѓа во Србија – вели Вучиќ.


Франција ќе ја одликува Шекеринска со орден за заслуги


Скопје, 30 мај, 2018 - 10:22 (META) 

Заменик претседателката на Владата и министерка за одбрана Радмила Шекеринска ќе биде одликувана со орден „Командант на Националниот ред за заслуги на Франција“. Високото одликување во име на претседателот на Франција, на министерката Шекеринска ќе и биде врачено од министерката Женевјев Дариесек, државен секретар на Вооружените сили на Франција, утревечер, на прием во резиденцијата на Франција во Скопје.

Орденот „Командант на Националниот ред за заслуги на Франција“ се доделува за истакнати граѓански заслуги, а воспоставен е во 1963 година од Генералот Де Гол.

Шекеринска го добива ова признание поради нејзиниот особен придонес кон развојот на односите меѓу Македонија и Франција, како и поради нејзината посветеност на промовирањето на европските граѓански вредности во Македонија.

„Одликувањето е признание за талентот, вредностите и исклучителната храброст на министерката Шекеринска“, потенцираат од амбасадата на Франција, и потсетуваат дека за време на мандатот на Шекеринска како заменик на претседателот на владата задолжен за европски интеграции, во 2005-та, Македонија од Европскиот совет го доби статусот земја – кандидат за членство во ЕУ, што претставуваше голем чекор за Македонија и позитивен сигнал за другите земји од југоисточна Европа.

„Ова одликување за мене е голема чест и мотив да продолжам по патот кој го одбрав – да и служам на мојата земја со сиот личен и професионален капацитет, сето свое знаење и енергија да ги употребам во борбата за она во што верувам – слобода, демократија, еднаквост, правда, напредок. Мојата цел е да придонесам колку што можам во зацврствувањето на европските вредности во мојата држава, Република Македонија, како рамноправна членка на НАТО и ЕУ, во име и за подобар живот на граѓаните. Припаѓам на влада која ја врати земјата на европската и евроатлантската патека, ве уверувам дека патот на интеграцијата успешно ќе го изодиме“, рече министерката во пресрет на свеченоста на одликувањето.

Шекеринска е прв политичар од Македонија што од Република Франција добива признание од овој ранг.

Орденот Командант на Националниот ред за заслуги на Франција на министерката Шекеринска ќе и биде врачен утревечер во 20 часот, на прием организиран во нејзина чест во резиденцијата на Франција во Скопје.


Франција ќе ја одликува директорката на Академијата за судии и јавни обвинители


Скопје, 19 мај, 2017 - 17:54 (META) 

Амбасадорот на Франција во Македонија, Кристијан Тимоние, во име на претседателот на Република Франција, в понеделник ќе ја одликува директорката на Академијата за судии и јавни обвинители, Анета Арнаудовска со орден Витез на Националниот ред за заслуги, соопштија денеска од француската амбасада.

„Како директор на Академијата за судии и јавни обвинители, г-ѓата Арнаудовска постојано се залагаше во последните десет години за развој на соработката помеѓу Франција и Македонија во областа на обуката на судиите и на јавните обвинители, како клучна за зајакнување на владеењето на правото преку примена на европски стандарди од доменот на кривичното, на граѓанското право и на индивидуалните слободи. Со својата компетентност и непристрасност, г-ѓа Арнаудовска, поддржувајќи ја обуката на судиите и јавните обвинители преку постојана соработка со Националната школа за судии и јавни обвинители на Бордо, даде свој придонес за развојот на односите со Франција, како и за иднината на европската интеграција на земјата“, стои во соопштението.

Инаку, орденот за Национални заслуги на Франција, воспоставен во 1963 година од страна на генералот Жарл Де Гол, е едно од најпрестижните француски одликувања. Со него се наградуваат воени или цивилни лица, Французи или странци, коишто имаат особени заслуги за Република Франција. Одликувањето се доделува со указ на претседателот на Франција.


Писателот Луан Старова одликуван со францускиот орден „Офицер на Легијата на честа“


Скопје, 12 април, 2017 - 10:24 (META) 

Амбасадорот на Република Франција, Кристијан Tимоние, во име на претседателот на Франција, го одликува писателот Луан Старова со орден „Офицер од редот на Легијата на честа“.

Академик и писател, универзитетски професор по француска и компаративна книжевност и прв амбасадор на Република Македонија во Париз, Луан Старова го добива ова значајно француско одликување за неговиот голем придонес во развојот на односите помеѓу двете земји.

Амбасадорот Старова одржува блиски контакти со многу писатели, поети и француски мислители на нашето време, како Едгар Морен, Морис Дрион, Робер Мале, Анри Мешоник, Андре Френо и други, придонесувајќи на тој начин за подобро да се разбере регионот на Балканот во клучните години од последната деценија на 20 век.

Националниот ред на Легијата на честа го воспоставил Наполеон Бонапарта во 1802 година. Ова одликување се доделува за заслуга на личности кои имале исклучителен придонес за промоцијата на Франција и на вредностите што таа ги застапува и ги претставува во светот.


Франција ќе ја одликува Илинка Митрева


Скопје, 3 април, 2017 - 13:56 (META) 

Амбасадорот на Франција во Македонија, Кристијан Tимоние, во име на претседателот на Република Франција, Франсоа Оланд, ќе ја одликува професорката по француска книжевност на Филолошкиот факултет во Скопје и поранешна министерка за надворешни работи на земјава, Илинка Митрева, со орден „Офицер на Националниот ред за заслуги“.

„Госпоѓата Илинка Митрева, професор по француска книжевност на Филолошкиот факултет во Скопје и поранешен министер за надворешни работи, го добива ова значајно француско одликување за нејзините особени заслуги во развојот на односите меѓу Македонија и Франција, во приближувањето на францускиот јазик и книжевност кон младите генерации. Високо се вреднува и нејзиниот ангажман во промовирањето на франкофонијата и на европските вредности во Македонија“, стои во соопштението од Амбасадата на Франција во Македонија.

„Орденот за Национални заслуги на Франција“, воспоставен во 1963 година од страна на генералот Шарл де Гол, е едно од најпрестижните француски одликувања. Со него се наградуваат воени или цивилни лица, Французи или странци, кои имаат особени заслуги за Република Франција. Одликувањето се доделува со указ на претседателот на државата.

Инаку, Илинка Митрева во периодот од 1994 до 2001 година беше пратеник во Собранието на Република Македонија. Беше министер за надворешни работи во широката владина коалиција за време на воениот конфликт во 2001 година. По победата на СДСМ на парламентарните избори во 2002 година, Митрева повторно беше назначена на функцијата шеф на македонската дипломатија, која ја извршуваше до август 2006 година.


Иванов: Благодарение на разузнавањето, државниот врв носи одлуки добри за граѓаните


Скопје, 24 март, 2017 - 20:26 (META) 

Благодарение на издржаните анализи на Агенцијата за разузнавање и на истражувања на податоците и на информациите, државниот врв може да носи одлуки за доброто на граѓаните и на државата, рече претседателот Ѓорге Иванов, во обраќањето на свеченоста, по повод одбележувањето на 20-годишнината од формирањето на Агенцијата за разузнавање и доделувањето на орденот „Илинден 1903 година“.

– Агенцијата постојано нè информира за процесите што генерираат закани по националната безбедност и потрајните и витални вредности. Со тоа Агенцијата ни помага да носиме одлуки во насока на воспоставување стабилно безбедносно опкружување и одржлив развој на долгорочен план. Во овие 20 години, Агенцијата помогна да избегнеме многу погрешни одлуки, но и полесно да ги пребродиме најголемите премрежиња со кои сме се соочиле како држава – рече Иванов.

Според Иванов, недоволното присуство на Европската Унија придонело кон ретроградни процеси и додаде дека сме сведоци на отворено мешање во внатрешните работи на државата.

– Благодарение на разузнавачко-безбедносен систем, чиј важен дел е Агенцијата за разузнавање, Македонија успева да се соочи и да ги менаџира сите предизвици – изјави Иванов.


Иванов со орден ќе ја одликува Агенцијата за разузнавање


Скопје, 24 март, 2017 - 11:46 (META) 

Претседателот на државата, Ѓорге Иванов, со орден ќе ја одликува Агенцијата за разузнавање (АР), соопштуваат во кабинетот на Иванов.

Свеченоста по повод одликувањето е закажана за вечерва во Македонскиот народен театар (МНТ).­

Од кабинетот на претседателот соопштуваат дека Агенцијата за разузнавање се одликува по повод 20 години од основањето, а особено за нејзината дејност, како еден од основните сегменти на разузнавачко-безбедносниот систем на државата, во зачувувањето и во зајакнувањето на суверениетот, независноста и на територијалниот интегритет на Република Македонија.


Путин постхумно го одликуваше Чуркин


Москва, 21 февруари, 2017 - 16:02 (META) 

Рускиот претседател Владимир Путин постхумно го одликуваше Виталиј Чуркин, амбасадор на Русија во Обединетите нации, со „Орден на храброста“ поради неговата „несебичност, цврстина и голем професионализам“.

Во соопштението што Кремљ доцна синоќа го објави, Путин рекол дека смртта на Чуркин е ненадоместлива загуба за руската надворешна политика.

Чуркин ненадејно почина синоќа во Њујорк. За амбасадор во ОН беше поставен во 2008 година.


Доктор Илија Џонов, добитник на орденот „Свети Никола“


Штип, 17 декември, 2015 - 12:58 (META) 

За особен придонес за афирмација на Штип, неврологот Илија Џонов е добитник на највисокото општинско признание по повод патрониот празник на Штип, Свети Никола. Орденот на доктор Џонов, инаку штипјанец по потекло, ќе му биде доделено вечерва на свечената седница, како што стои во објавата „за искрен и континуиран ангажман и за придонес во афирмација на здравството“.

Вечерва ќе бидат доделени и признанија на осуммина штипјани – бизнисмените Мите Николов, Ванчо Богдов и Сашко Миладинов, како и на Лазо Спасов, Марија Максимова, Блаже Китанов и на Александар Југов.

Орденот и признанијата ќе бидат доделени во Соборниот храм „Свети Никола“, каде пригодно, во чест на празникот, ќе настапат Дивна Љубојевиќ и групата „Мелоди“ од Србија, кои се познати по црковната музика.

Со ордени „Свети Никола“ досега се закитиле премиерот Никола Груевски, доктор Сашко Кедев, г.г Стефан, владиката Иларион, Срѓан Керим и доктор Методи Чепреганов.


Престижен француски орден за Гордана Јосифова-Неделковска


Скопје, 21 ноември, 2015 - 13:39 (META) 

Музичкиот селектор на фестивалот „Охридско лето“, Гордана Јосифова-Неделковска, е одликувана со престижниот орден на Република Франција, „Витез од редот на уметности и на книжевноста“.

Одликувањето синоќа на свеченост во француската резиденција ѝ го врачи амбасадорката на Франција, Лоренс Оер, која го истакна нејзиниот придонес во ширењето на француската култура и на уметноста, односно нејзините достигнувања во промоцијата на уметноста во Македонија, промоција на македонската уметност надвор од земјата и во поддршка на промоцијата на француската култура во Македонија.

– Француската влада сака да ѝ оддаде признание на г-ѓа Јосифова-Неделковска, особено во областа на уметноста и збогатувањето на вредностите во делот на културата. Со ова одликување Франција сака да ѝ покаже колку ја почитува нејзината работа и придонесот во промоцијата на француската култура – рече француската амбасадорка Лоренс Оер.

Одликувањето „Витез на уметноста и на книжевноста“, што го доделува француското Министерство за култура и комуникации, спаѓа во четирите најважни одликувања во Франција. Се доделува од 1957 година и е едно од најпрестижните одликувања во оваа сфера. Одликувањето се доделува секоја година и го добиваат заслужни професионалци во Франција и исклучителни личности надвор од Франција. Во минатото одликувањето се доделувало само на француски државјани, а во поново време членови на Редот на уметноста можат да бидат и странски државјани, а некои од нив се и Кејт Бланшет, Џорџ Клуни, Шакира, Роберт Редфорд, Пол Остер и други.

– Особена чест ми претставува тоа што моите долгогодишни заложби и постигнати резултати биле препознаени и вреднувани од Министерството за култура на Република Франција, а по иницијатива на амбасадорката на Република Франција во Македонија, нејзината екселенција Лоренс Оер. Да се доживее ова, е повеќе од привилегија, дадена можност за што сум бескрајно благодарна, но истовремено ова ми дава толку возвишено чувство, што го чувствувам и доживувам како подарок од Бога. Ова признание ме прави бескрајно среќна, но уште повеќе ме задолжува во моите понатамошни вложувања – рече Јосифова-Неделковска.

Најпрестижниот фестивал кај нас, „Охридско лето“, во рамките на фестивалската програма во соработка со француската амбасада и Францускиот културен центар од Скопје, како и „Охридска банка АД Скопје – Сосиете женерал груп“, традиционално организира „Француска вечер“ со концерти на врвните уметници од Франција.