Медицинските струки се виза за работа во странство за младите од Источниот регион


Штип, 4 септември, 2018 - 16:59 (META) 

На последниот ден од уписите на универзитетот „Гоце Делчев“ од Штип, се повтори сликата од уписите во средните училишта. Пополнети се речиси сите места на факултетите со медицинските струки. Според последните бројки до 15 часот се пријавиле 389 завршени ученици.

– Се очекува и во вториот уписен рок да има голем интерес за Факултетот за медицински науки, од студенти од Медицинскиот факултет од Скопје, кои ќе конкурираат на некои од слободните места од студиските програми – изјави Кире Барбареев, проректор за настава.

На првиот уписен рок се пријавиле 1.600 завршени средношколци. Од нив 120 се студенти од Турција, Бугарија и Србија. Покрај за медицинските науки, интерес има и за Информатика, Економскиот, Филолошкиот и Правниот факултет.

Идентична слика е и во средните училишта во Штип. Целосно пополнети се паралелките во прва година на Средното медицинско училиште „Јане Сандански“, каде се запишани 238 ученици од Штип и регионот.

Остантите три средни училишта побараа дозвола од Општина Штип да формираат паралелки со помал број од законски дозволениот минимум од 25 ученици, поради помалиот број на запишани во прва година.

Интересот за медицинските струки не е случаен. Отворена е можноста за работа во странство, особено на завршените лекари со лиценца и медицинските сестри. Германија е најчесто земјата каде заминуваат, за што покрај основното познавање на германскиот јазик, се заминува и со бугарски пасош. Во источниот дел на Македонија активни се агенции кои се специјализирани при посредувањето во наоѓање работа по германските болници.

Последиците од масовното заминување на медицински кадар од Истокот, најдобро се рефлектира во Клиничката болница во Штип, која има потреба од најмалку 100 нови работувања од средношколски кадар.


Штипската опозиција обвинува дека граѓанските пари завршија во партиски џебови


Штип, 4 септември, 2018 - 10:17 (META) 

Поделбата на близу милион денари од буџетот на Општината Штип на седум граѓански организации, ги спротивстави ВМРО-ДПМНЕ и СДСМ. Опозициската ВМРО-ДПМНЕ обвини дека пари добила организација чиј претседател беше кандидат за советник од листата на СДСМ на последните локални избори, а две од седумтте организации – добитници, имаат исто лице во управувачката структура.

Со одлука на Советот на Општината Штип, за прв пат ќе се финасираат седум проекти на граѓански организации и фондации, со цел локален економски развој. На Општината и требаше половина година за да одлучи кому да ги додели средствата, додека неофицијално се говореше за лобирања и притисоци. Поради тоа, имаше и неофицијална најава дека повикот за финансирање ќе биде поништен.

Повикот беше распишан на први март годинава, по методологија утврдена од Општината. На последната седница на Советот во петокот, мнозинството и официјално ја прифати одлуката за оваа поделба од Комисија составена од претставници на Општината и граѓанскиот сектор.

Љубе Здравков од ВМРО-ДПМНЕ побара отчет за начинот на кој е одлучувано кои проекти да бидат прифатени и праша дали добија само тие организации што ги застапуваат ставовите на СДСМ.

– Дали е во ред да се доделуваат средства на лице кое беше на советничката листа на СДС, лице кое веќе неколку пати во текот на годината има добиено средства од Општина Штип за настани кои се слабо посетени, а Советот на Општина Штип нема увид во начинот на трошење на тие средства и лице кое преку група на граѓани остварува свои лични интереси? И дали при доделување на средства на две организации, нема судир на интереси на едно лице, кое во едната организација е претседател, а во другата организација, заедно со целото семејство е во Основачко собрание? – рече Здравков на прес-конференција.

Пари од општинскиот буџет доби „Македонски Егеј“, на чие чело стои Јордан Тунев. Тој на последните локални избори беше дел од советничката листа на СДСМ , што резултираше со протест на членовите на Здружението, кои тврдеа дека се против неговата кандидатура за советник.

Реплицираше на говорница советничката од СДСМ Маријана Рогожарска, според која, првичната одлука за доделување на средства за граѓанските организации не е на Советот, ниту градоначалникот, туку на формираната Комисија, во која членуваат и надворешни лица.

– Изборот го направи Комисијата, по методологија што беше презентирана од страна на лицата, кои го доставија до Советот барањето за финансирање на проекти од Општината и Советот ја усвои истата. Ако бевте на комисии ќе знаевте дека изборот не го вршат само лица од Општината , туку и надворешни членови, од кои секој посебно бодираше – рече Рогожарска која е претседател на Комисијатаза финансирање и буџет.

За начинот на избор на проекти објасни и членот на комисијата за избор, Никола Илиев, според кого, рангирањето се извршило според бодовите на секој член од оваа комисија.

Советниците на ВМРО-ДПМНЕ останаа на искажаните сомневања и гласаа против оваа одлука. Сепак, мнозинството одлучи да додели пари на проекти на „Македонски Егеј“, „Гласен Текстилец“, „Виножито“, „Организација на жени“, „Бизнис информативен и консултантски центар“, и „Черења“.

Досегашните локални гарнитури парите за граѓанските проекти не ги доделуваа, со образложение дека нема квалитетни идеи, без при тоа, да распишат повик за финансирање.


Фазлиу и претставници на 11 општини во Брисел на состанок на Комитетот на регионите


Брисел, 4 мај, 2018 - 10:53 (META) 

Министерот за локална самоуправа Сухејл Фазлиу, градоначалникот на Штип, Благој Бочварски и претставници на уште 10 општини од Македонија се во Брисел на состанок на Заедничкиот консултативен комитет меѓу Република Македонија и Комитетот на регионите на ЕУ.

Фазлиу на 14-тиот состанок на Заедничкиот консултативен комитет вчера, се заблагодари на Европската Комисија (ЕК) за силната поддршка во спроведувањето на реформите за интеграција на Македонија во ЕУ, како и за препораката до Советот на ЕУ да донесе одлука за почнување пристапни преговори со Република Македонија.

-Децентрализацијата на власта е приоритет на Владата на Република Македонија. Во Извештајот на ЕК е нотиран напредок поврзан со испораката на јавни локални услуги што се финансираат со блок дотации, вклучувајќи го зголемувањето на буџетските трансфери за општините за оваа година за 6,4%, како и зголемените средства за поттикнување на рамномерен регионален развој – рече тој.

Фазлиу истакна дека основниот плански документ на македонската влада за натамошен развој на локалната самоуправа, Програмата за оддржлив локален развој и децентрализација се ревидира, а паралелно се финализираат и активностите за изработка на нов Акциски план за периодот 2018-2020, преку меѓуресорска консултација и во соработка со ЗЕЛС.

На состанокот говореше и градоначалникот на општина Штип Благој Бочварски, кој е копретседавач на комитетот.

Тој истакна дека сега е вистинскиот момент да продолжат започнатите реформи и на централно и на локално ниво.

-Соочени сме со значајни предизвици како што е децентрализацијата и соодветното финансирање на општините, искористувањето на европските фондови и развивањето на локалната демократија – рече Бочварски.

Денеска членовите на Заедничкиот консултативен комитет ќе учествуваат на тематската пленарна седница „Денот на проширување”, на која е најавено обраќање на еврокомесарот за проширување Јоханес Хан, како и на претседателот на Европскиот комитет на региони, Карл-Хејнз Ламберц.


Бочварски: Ветените капитални проекти планирам да ги спроведам


Штип, 26 април, 2018 - 10:27 (META) 

Благој Бочварски, градоначалникот на Штип,  во интервјуто на „Вистиномер“ направено во рамките на проектот „До отчетни општини преку активни граѓани“, спроведуван од Фондацијата „Метаморфозис“, а поддржан од американската непрофитна фондација NED (National Endowment for Democracy), вели дека нема да се откаже од проектот за брана на Отиња, едно од неговите најголемите ветувања.

Оваа брана со децении беше ветувана и од многу негови претходници, но за разлика од нив, Бочварски вели дека нема намера да се откаже од реализацијата на овој проект што е многу битен за штипјани.

– Кога гледате дека не сум се откажал од браната на Отиња, од која се откажале многу градоначалници пред мене, тогаш треба да им биде јасно на сите дека нема да се откажам од ниту еден крупен проект којшто е важен за граѓаните на Штип – вели Бочварски во интервјуто што го направи Весна Коловска.

Во моментот се работи на ревизија на стариот проект и со изработка на студија, а Општината очекува добивање на градежна дозвола и почеток на градежните работи. Сепак, градоначалникот на Штип не прецизира рокови за конкретна реализација.

Втора од капиталните инвестиции што ги вети Бочварски во изборната кампања беше гасификација со инсталација во должина од 20 километри, за што преку јавна набавка веќе е избрана компанија за проектирање. Од 2019 година се очекува почеток на работите на терен.

Бочварски нагласува дека од почетокот на неговиот мандат Општина Штип работи транспарентно и е достапен за новинарите и граѓанските организации. Одлуките на градоначалникот и на Советот на Општината се објавуваат во Службениот гласник, а на општинската веб-страница е објавена структурата на вработените, без новите раководители, и податоци за контакт со службите.

Прашан зошто не се објавуваат неговите трошења, тој вели дека тоа е така затоа што нема таква алатка за општините.

Во однос на реализацијата на тоа што вети дека ќе го прави, тука се почетокот на работите на детската градинка во населбата Сењак,  првата којашто се гради по триесет години во Штип. Обезбедени се 45 отсто од парите од Бирото за рамномерен регионален развој и 55 отсто од Буџетот на Општина Штип.

Засега не се почнати проектот за изградба на жичара до тврдината Исарот и спортско – рекреативниот центар во Суитлакот. За жичарата, според објаснувањето на градоначалникот, се бара соодветна компанија за проектирање, која може да изработи ваков специфичен проект.

Спортско – рекреативниот центар, во кој е вклучен Аква парк во еден дел ќе зависи од плановите на приватен инвеститор, кој има купено парцели за ваква намена. Бочварски вели дека е во разговори со инвеститорите, по што ќе се знае како понатаму со овој проект, но, извесно е дека Суитлакот ќе остане зелена зона и зона за спорт и рекреација.


Во Општина Штип утре прскање од земја против комарци


Штип, 25 април, 2018 - 11:03 (META) 

Општина Штип соопшти дека утре на територијата на општината ќе се изврши прскање од земја против комарци.

Зафатот ќе се врши од 9 до 14 часот, а средството против ларви од комарци ќе се распркува секаде каде што има застојани води на територијата на градот и на други локации на територијата на општината.

Во случај на ветер или дожд, дезинсекцијата ќе се изврши во првиот следен ден во кој ќе има поволни услови за тоа.


Бочварски прогласи победа во Штип со 1.700 гласа повеќе од Захариев


Штип, 29 октомври, 2017 - 21:29 (META) 

Кандидатот за градоначалник на Штип, Благој Бочварски, вечерва прогласи победа по вториот круг од локалните избори.

Според Бочварски, разликата меѓу него и кандидатот на ВМРО-ДПМНЕ, Илчо Захариев, била 1.700 гласа.

Бочварски истакна дека промената се должи на тоа што граѓаните по првиот круг ја почувствувале слободата и одлучиле масовно да излезат. Тој истакна дека локалната власт во заминување вршела притисоци, но дека народот уште поостро одговорил на таквите притисоци со масовно излегување и со гласање за СДСМ.

Бочварски рече дека веднаш по примопредавањето на власта ќе почне со реализација на сите крупни проекти, како што е гасификацијата на општината, а за кои, како што рече, очекува помош и поддршка од централната власта.

– Убеден сум дека Штип ќе биде центар на Македонија и дека ќе се реализираат многу проекти со кои штипјани ќе се гордеат – рече Бочварски.

Победа во вториот круг од локалните избори прогласи и кандидатот на СДСМ за градоначалник на Пробиштип, Драган Анастасов, кој освоил проголем број гласови од кандидатот на ВМРО-ДПМНЕ, Тони Тоневски.


Заев ја потврди коалицијата со ВМРО – Народна партија во Штип за вториот круг од изборите


Штип, 21 октомври, 2017 - 15:41 (META) 

Кандидатот за градоначалник на Штип од СДСМ, Благој Бочварски, во вториот круг од локалните избори, што ќе се одржи на 29 октомври, ќе ја има поддршката од ВМРО – Народна партија, потврди лидерот на СДСМ и премиер, Зоран Заев, за време на денешната посета на Штип, во рамките на кампањата за вториот круг од изборите.

– Она што е новина во вториот дел од изборите, е тоа што ние сме засилени со ВМРО – Народна партија. Коалицијата е потврдена на централно ниво, заедно стоиме во таа коалиција. Јас верувам дека дополнителната поддршка од граѓаните, симпатизери, поддржувачи на ВМРО – Народна партија, ќе ја зголемат разликата (во гласови), што сакаме да ја направиме во вториот изборен круг, гледајќи напред кон перспективите што доаѓаат и за Штип и за целиот наш Источен Регион – изјави Заев.

Тој истакна оти е убеден дека коалицијата предводена од СДСМ ќе победи во Штип и дека „конечно промените ќе бидат заокружени“ и во оваа општина.

– Јас сум убеден дека граѓаните веќе знаат како да го дадат својот глас. Имаме одличен кандидат, неговата програма е одлична и се вклопува со програмата на Владата. Локалната и централната власт заедно, можат да реализираат крупни проекти во Штип. Браната што мораме да ја направиме е еден од покрупните проекти, гасификацијата на Штип, затворениот базен и инфраструктурните проекти што се наброени во програмата на Благој Бочварски ќе бидат реалност – рече Заев.


Захариев: Владини повереници се можно решение ако дојде до блокада на општините


Штип, 9 мај, 2017 - 16:56 (META) 

Градоначалникот на општина Штип, Илчо Захариев, во пресрет на утрешната седница на Уставниот суд на која треба да се одлучува по иницијативите за продолжување на мандатот на градоначалниците, денеска изјави дека доколу уставните судии ја отфрлат иницијативата, решение на проблемот со функционирањето на општините по 15 мај, може да биде назначување на владини повереници, што, според него, би било во рамките на законот.

– Ние, како градоналници, не смееме да ја напуштиме општината по 15 мај, затоа што мораме да му ја оставиме општината на некој што ќе ја раководи. Битно е деновиве да се донесе одлука. Две решенија се можни: Владата да назначи повереници на кои ќе им ја предадеме општината до наредните избори и, втората варијанта, Собранието на Република Македонија да донесе законски измени за продолжување на актуелната локална власт до распишување на локалните избори – изјави Захариев.

И другите општини се во исчекување на решение со кое ќе се избегне блокадата на локалните власти. Загрижена е и општинската администрација, која последните години неколкукратно се зголеми. Илјадници административци стравуваат за своите плати, за чија исплата, доколку нешто не се промени, ќе нема кој да потпише.

Извесно е дека ќе нема и кој да ги потпишува документите што им се потребни на граѓаните.


Штип остана без две избирачки места поради недоволен број гласачи


Штип, 22 ноември, 2016 - 17:41 (META) 

Наместо на 80 избирачки места, на предвремените парламентарни избори на 11 декември гласачите во општина Штип ќе гласаат на 78.

Избришани се гласачките места во селата Сушево и Судиќ, бидејќи не ги исполнуваат законските услови за најмалку десет гласачи во едно избирачко место.

– Според Изборниот законик, во едно избирачко место мора да има повеќе од 10 гласачи, а бидејќи станува збор за мал број на гласачи, избирачкото место во Судиќ и избирачкото место во Сушево повеќе не постојат – вели Сенка Андреева, претседателка на општинската изборна комисија од Штип.

Жителите на овие две села ќе гласаат во најблиските избирачки места.


Учениците од плачковичките села ќе тргнат на училиште


Штип, 14 октомври, 2016 - 12:48 (META) 

Еден и пол месец по почетокот на учебната година, дваесетина ученици од подплачковичките села во Карбинско ќе тргнат на училиште. Општината Штип ја исполнила својата законска обврска и им обезбедила превоз на учениците.

Родителите неодамна реагираа, исплашени од казните што можат да им следат поради тоа што децата не посетуваат настава.

Општина Штип склучи договор за превоз на учениците од подплачковичките села со фирмата „Изет комерц“ од село Кучица.

„Во согласност со договорот, тие ќе ги превезуваат учениците од неколку села до Општина Штип по цена од 360 денари од ученик“, соопштија од Општината.

Оттаму пресметале дека месечно од општинскиот буџет ќе се одлеваат по 72.000 денари за овие дваесетина ученици, кои настава посетуваат во штипските средни училишта.

Со законските измени, средното образование е задолжително, а општините треба да обезбедат бесплатен превоз.