Ископот во Вардар за гасоводот, ќе биде вратен во првобитната состојба


Скопје, 28 септември, 2018 - 16:08 (META) 

Штом ќе завршат градежните активности, местото во Вардар каде што се врши ископот за поставување на гасоводните цевки ќе биде вратено во првобитната состојба, велат од Општина Карпош за „Мета“.

Жителите на Карпош 4 и Влае се жалат дека во тој дел на градот Вардар е ископан, а градилиштето е несоодветно обезбедено, односно опасно за движење.

– Претставници од Одделението за комунална инфраструктура при Општина Карпош излегоа на терен, со цел да се информираат за активностите во однос на изведбата на гасоводот и нивното времетраење иако станува збор за проект кој се спроведува на централно ниво – велат од Општина Карпош за „Мета“.

Раководителот на Инспекторатот за животна средина на Град Скопје, Мирослав Богдановски потврди дека ископот на Вардар се врши за поставување на гасоводна инфраструктура од страна на претпријатието „ГА-МА“.

– Од она што е наша надлежност како Град Скопје утврдивме дека „ГА-МА“ ги поседува сите одобренија за градба, како и водостопанска согласност – изјави Богдановски за „Мета“.

Во однос на реакцијата на граѓаните дека местото е несоодветно обезбедено и заградено, Богдановски вели дека на терен треба да излезе градежна инспекција на Општина Карпош и да утврди дали е тоа така.


Нова кривична пријава за Стевчо Јакимовски за преселените општински бараки


Скопје, 23 август, 2018 - 12:21 (META) 

Управата за финансиска полиција до Основното јавно обвинителство Скопје поднело кривична пријава против Стевчо Јакимовски, поранешен градоначалник на Општина Карпош и уште две лица од градежни фирми, товарејќи ги за бесправно градење.

Пријавите се поднесени поради демонтажа на две од старите општински бараки и нивно повторно поставување во дворот на основното училиште „Лазо Трповски“ во 2012 и 2013 година.

Според пријавата, Стевчо Јакимовски како тогашен градоначалник и инвеститор на работите во име на Општина Карпош ги поставил бараките спротивно на Законот за градење и без одобрение за градење и соодветна архитектонско-урбанистичка документација. Отпосле поднел барање за легализација кое го потпишал, но бараките не потпаѓале под законот за постапување со бесправно изградени објекти, оти биле изградени по неговото стапување на сила.

Второпријавениот Ј.К., инженер од „Карапанчевски Компани“ до Скопје, кој бил ангажиран од Општина Карпош, а за надзорот над демонтажата и повторната изградба на бараките потпишал градежен дневник, градежна книга и времена ситуација, иако не било издадено одобрение за градење.

Третопријавениот А.М., како одговорно лице во фирмата Алкопроект од Тетово, која ги изведувала демонтажата и повторната монтажа, дозволил да се изведуваат работите без одобрение за градење, соопшти Финансиска полиција.

Таа на 8 август поднесе кривична пријава за злоупотреба на службената положба и овластување за Јакимовски поради три спроведени јавни набавки во текот на мандатот како градоначалник на Општина Карпош.


Кривични пријави за Јакимовски и четиримина поранешни соработници


Скопје, 8 август, 2018 - 15:02 (META) 

Кривична пријава за злоупотреба на службената положба и овластување доби лидерот на ГРОМ, Стевчо Јакимовски, поради три спроведени јавни набавки во текот на мандатот како градоначалник на Општина Карпош, поднесе денеска Управата за финансиска полиција, откако вчера се вршеа претреси во неговите куќи. Покрај пријавата за него, до Основното јавно обвинителство за гонење на организиран криминал и корупција се поднесени кривични пријави и против уште четири лица, раководители на сектори или одделенија во Општина Карпош.

Вкупните штети на општинскиот буџет за кои се товарат петмината е 36,6 милиони денари (595.685 евра).

Финансиска полиција го товари Јакимовски дека како градоначалник во 2012 и 2013 година спровел две постапки за јавни набавки со фирмата „Алконпроект“ од Тетово, иако фирмата не доставила банкарски гаранции за навремено и квалитетно извршување на договорот. Во прашање е изградба на новиот општински објект. Тој не го раскинал договорот и не ја активирал банкарската гаранција на понуда, туку му дозволил на изведувачот да почне да работи, а потоа поради неквалитетно и ненавремено извршување на работите, ги раскинал договорите, со што на изведувачот „Алконпроект“ од Тетово му овозможил да стекне противправна корист од 911.166 денари, на штета на буџетот на Општина Карпош, велат од Управата за финансиска полиција.

Исто така, Јакимовски дозволил фирмата да почне со градежни активности иако не било издадено одобрение за градење, без решение за локациски услови и архитектонско-урбанистички или идеен проект, како и без изработен изведбен проект. Како што велат од УФП, Јакимовски усно давал инструкции за реализација на некои позиции надвор од техничката спецификација за објектот кој треба да биде општинско седишто, а со тоа на буџетот на Општина Карпош му нанел штета од 32,8 милиони денари.

Втората работа за која го товари Финансиска полиција е за изградба на плоштад во Жданец, односно спровел постапка за јавна набавка иако фирмата „ДГПТУ СМ Компани ДОО“, Свети Николе, не доставила банкарска гаранција за квалитетно и навремено извршување на работите, сепак Јакимовски го потпишал договорот на 12 април 2016 година. Со тоа Јакимовски овозможил на оваа фирма да ја заврши работата, но со тоа остварила противправна корист од 2,8 милиони денари буџетот на Општина Карпош.

Пријави добија и М.Д., раководител на секторот за јавни набавки во Општина Карпош, оти во двете погоре наведени јавни набавки за изградбата на објектот на местото на старата општина и за скверот во Жданец не предложил наплата на банкарската гаранција за понуда, туку ги пуштил во понатамошна постапка.

Н.Н., претседател на Комисијата за јавна набавка на Општина Карпош, како и С.М., член на таа комисија, и А.С., заменик-член на комисијата се товарат за случајот со плоштадот во Жданец, односно ја прифатиле понудата на фирмата од Свети Николе, иако таа не доставила сертификат за вградените материјали, а со тоа овозможиле фирмата да стекне корист на штета на Општина Карпош во износ од 2,8 милиони денари.


Стевчо Јакимовски приведен, чека распит пред судија


Скопје, 8 август, 2018 - 9:31 (META) 

Поранешниот градоначалник на Општина Карпош, Стевчо Јакимовски, синоќа половина час пред полноќ, е приведен и се наоѓа во една од полициските станици во Скопје. До крајот на денот се очекува да биде изведен пред судија на претходна постапка.

Според Виктор Цветковски, адвокат на поранешниот градоначалник, ова е атак врз политичкиот ангажман на Стевчо Јакимовски.

Финансиската полиција вчера влезе во неколку станбени објекти на семејството Јакимовски, барајќи документи за одредени случаи. Засега од таму нема официјални информации.


Општина Карпош ќе ги запре градежните активности и ќе субвенционира маски


Скопје, 15 декември, 2017 - 15:16 (META) 

Градоначалникот на Општина Карпош, Стефан Богоев најави дека ќе се запрат сите градежните активности кои произлегуваат од работењето на општината и се однесуваат на тековно одржување на улиците, тротоарите и слични градежни зафати кои ги реализира oпштината, поради загадениот воздух.

– Во контекст на ова, бараме сите приватни инвеститори и изведувачи да го следат примерот на Општина Карпош и да запрат со градежни активности во моментите кога загадувањето е на највисоко ниво – додаде Богоев.

Тој најави дека ќе продолжат и редовните контроли, инспекции на градилиштата, со цел, да се спречи узурпирање на јавните површини и предизвикување на дополнителна нечистотија и загадување.

Богоев најави дека општината ќе започне процедура за итна набавка на прочистувачи на воздух за сите градинки и училишта на територијата на општината. Истовреме, ги повика сите инвеститори и општествено одговорни компании да донираат прочистувачи на воздух и заштитни маски за граѓаните или, пак, да донираат финансиски средства на наменската сметка на општината.

Градоначалникот на Општина Карпош исто така најави дека следната недела ќе биде свикана вонредна седница на Советот на општина Карпош на која тој ќе предложи донесување одлука за субвенционирање на заштитни маски за целни групи на граѓани. Тој ги повика граѓаните да пријавуваат загадувачи на отворената телефонска линија.

Општина Карпош е една од најзагадените скопски општини, каде што, вредноста на ПМ-10 честичките е неколку пати над максимално дозволената граница.


Општина Карпош отвори телефонска линија за пријавување несовесни граѓани што загадуваат


Скопје, 24 ноември, 2017 - 11:54 (META) 

Општина Карпош отвори телефонска линија за пријавување несовесно палење смет, гуми, кабли, пластика и друг токсичен материјал кој ја загадува животната средина.

„За да дејствуваме превентивно против загадувањето на животната средина, ве молиме да ги пријавите несовесните граѓани кои палат смет, гуми, кабли, пластика и друг токсичен отпад“, велат од Општина Карпош.

Граѓаните може да пријавуваат нерегуларности секој ден, во текот на 24 часа, на телефонскиот број 078 257 640 или на 192.


Богоев и Макрадули договориле дополнителни мерки против загадувањето во Карпош


Скопје, 22 ноември, 2017 - 18:32 (META) 

Градоначалникот на општина Карпош, Стефан Богоев, денеска имал средба со заменик-министерот за животна средина и просторно планирање, Јани Макрадули, и со директорот на Државниот инспекторат за животна средина, Мирослав Богдановски, на која било разговарано за дополнителни мерки за намалување на загадувањето на воздухот во оваа општина.

Како што се наведува во соопштението на Општина Карпош, на средбата биле утврдени задачи кои треба да се реализираат во претстојниот период.

Богоев нагласил дека локалната самоуправа ќе продолжи со секојдневните контроли и дежурствата на инспекторите, додавајќи дека во изминатиот период биле санкционирани повеќе потпалувачи на секундарен отпад, што е еден од најчестите загадувачи на воздухот.

Заменик-министерот за животна средина, Макрадули, истакнал дека Министерството за животна средина и просторно планирање ќе спроведе детална анализа и лоцирање на објектите кои загадуваат на територијата на општина Карпош.

Во соопштението се наведува дека Општина Карпош ќе продолжи со чистење на дивите депонии, како и со оградување и со осветлување на исчистените места за да не се повтори загадувањето, а најавени се и нови, специјализирани контејнери за селектирање отпад.


Општина Карпош испрати инспекции на поголемите градилишта


Скопје, 30 октомври, 2017 - 15:41 (META) 

Општина Карпош испратила инспекции на сите поголеми градилишта на нејзина територијата.

„Станува збор за редовни контроли кои секојдневно ќе ги вршат градежните и комуналните инспектори од Општината, на сите поголеми градежни објекти што со нивната реализација создаваат проблеми во секојдневната комуникација на граѓаните, било со отежнат сообраќај по коловозите, лош пристап и движење за пешаците или со создавање прав и шут во непосредна близина на други станбени објекти“, соопштија од Општина Карпош.

Во соопштението објавено на веб-страницата на Општината се вели дека целта на инспекцискиот надзор е да се констатира и да се увиди колку инвеститорите, односно изведувачите на градежните зафати ги почитуваат процедурите и правилата за градба и притоа внимаваат на заштитата на околината околу објектот.


Јакимовски: Полицијата насилно упадна, од Општината собиравме лични работи


Скопје, 17 октомври, 2017 - 16:48 (META) 

Досегашниот градоначалник на општина Карпош, Стевчо Јакимовски, денеска на прес-конференција обвини дека полицијата „под водство на режимот на Зоран Заев“ насилно упаднала во Општина Карпош додека неговите колеги пакувале лични работи.

Тој рече дека некој им јавил на вработените во Општината дека денеска ќе се случи примопредавањето на градоначалничката функција и дека затоа тие пакувале работи од кабинетот на Јакимовски.

– Јас таму имам лични предмети на мое име и нормално дека треба да се одвои што е на Општината, а што е на лично име, како документи и фотографии, бидејќи во оваа Општина јас сум бил осум и пол години. Ние денеска можевме да ја видиме ефикасноста на нашата полиција под водство на режимот на Зоран Заев и можевме да се увериме како тие изминативе два дена не можат да ги најдат и не направиле разговор со тие што сакаа да нè колат вечерта на изборите, ама денеска ефикасно дојдоа, вклучувајќи и „алфи“, и забранија влез во Општината за потоа да дојдат инспектори од стопански криминал и да констатираат дека ние раздвојуваме што е лично, а што општинско и ништо повеќе од тоа. Луѓето се насмеаја и си заминаа – изјави Јакимовски.

Поранешниот градоначалник нагласи дека сите документи што се важни за локалната самоуправа се наоѓаат во архивата и додаде дека Општината има електронска архива.

Настанот го потврдија и од Министерството за внатрешни работи, од каде истакнаа дека добиле дојава дека се изнесуваат документи од Општината.

„Врз основа на допрен глас дека од просториите на Општина Карпош се изнесува документација на Општината, од страна на полициски службеници од СВР Скопје е излезено на местото на настанот, при што е констатирано дека во моментот на проверката не се изнесува никаква документација. Од извршениот разговор со градоначалникот Стевчо Јакимовски, утврдено е дека тој се подготвувал за изнесување на личните предмети од сопствениот кабинет заради подготвување за примопредавање на функцијата“, велат од МВР.


СДСМ најави пријава против Јакимовски поради кршење на Изборниот законик


Скопје, 13 септември, 2017 - 18:00 (META) 

Социјалдемократскиот сојуз на Македонија денеска најави дека ќе поднесе „соодветна пријава“ против градоначалникот на општина Карпош, Стевчо Јакимовски, поради кршење на Изборниот законик со поставувањето камен-темелник за нова градинка во општината.

„Откако СДСМ вчера ги обелодени лошите услови во градинката „Мајски цвет“ и беше обелоденето дека Стевчо Јакимовски со години ги лажеше граѓаните и им ветуваше изградба на нова градинка во населбата Бардовци, продолжената рака на Никола Груевски и градоначалник во заминување, денеска побрза да удри камен-темелник на новата градинка „Аврам Писевски“ во оваа населба“, велат од СДСМ.

Според партијата, ваквите активности на Јакимовски се спротивни на членот 8-а од Изборниот законик.

„Јакимовски нема да успее да ги прикрие штетите што им ги нанесе на граѓаните со неговото неодговорно, расипничко и коруптивно владеење со општина Карпош“, порачуваат од СДСМ.