!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СДСМ најави пријава против Јакимовски поради кршење на Изборниот законик


Скопје, 13 септември, 2017 - 18:00 (META) 

Социјалдемократскиот сојуз на Македонија денеска најави дека ќе поднесе „соодветна пријава“ против градоначалникот на општина Карпош, Стевчо Јакимовски, поради кршење на Изборниот законик со поставувањето камен-темелник за нова градинка во општината.

„Откако СДСМ вчера ги обелодени лошите услови во градинката „Мајски цвет“ и беше обелоденето дека Стевчо Јакимовски со години ги лажеше граѓаните и им ветуваше изградба на нова градинка во населбата Бардовци, продолжената рака на Никола Груевски и градоначалник во заминување, денеска побрза да удри камен-темелник на новата градинка „Аврам Писевски“ во оваа населба“, велат од СДСМ.

Според партијата, ваквите активности на Јакимовски се спротивни на членот 8-а од Изборниот законик.

„Јакимовски нема да успее да ги прикрие штетите што им ги нанесе на граѓаните со неговото неодговорно, расипничко и коруптивно владеење со општина Карпош“, порачуваат од СДСМ.


И во Карпош ќе има референдум за населувањето мигранти


Скопје, 5 септември, 2017 - 17:41 (META) 

Советот на Општина Карпош денеска на 73. седница едногласно ја прифати предлог-одлуката за распишување на референдум на локално ниво, на кој жителите на општината ќе се изјаснат во врска со населувањето мигранти на територија на Општина Карпош.

Во согласност со одлуката, локалниот референдум ќе го спроведе Општинската изборна комисија на Карпош и општинските избирачки одбори.

Советниците, исто така, утврдиле дека не постојат услови за спроведување на одлуката на Министерството за труд и социјална политика, според која се воведува двосменско работење во градинките. Со одлука на Советот, градинките во Карпош ќе продолжат да работат според старото работно време, односно до 18 часот.

Градоначалникот на Карпош, Стевчо Јакимовски, оцени дека идејата е добра, но дека потребно е да се направат суштински измени за таа да профункционира, односно да се вработи дополнителен стручен и технички кадар, а Општината да обезбеди поголеми финансиски средства за да ги покрие дополнителните трошоци.


Попис на зеленилото и негова заштита, вети Богоев во Карпош


Скопје, 4 септември, 2017 - 16:14 (META) 

Додека граѓаните на Карпош дишат опасен воздух кој и не е доволно испитан, локалната власт, предводена од Стефчо Јакимовски и од ВМРО-ДПМНЕ, со години го игнорира овој огромен проблем во општината, изјави денеска пратеникот на СДСМ, Стефан Богоев, и кандидат за градоначалник на општината.

– Граѓаните на Карпош се оставени сами на себе да се борат против загадувањето и сами да ги лоцираат и да ги пријавуваат загадувачите, без никаква помош од локалната власт. Состојбата со енормното загадување е алармантна. Загадениот воздух без исклучок е закана по здравјето на сите граѓани што живеат и работат на територијата на општината. Затоа, по победата на изборите, планираме попис на целото зеленило на територија на општина Карпош и негова заштита, изградба на нови паркови и зелени површини секаде каде што е изводливо, како и иницијатива за формирање на еко-полиција во соработка со извршната власт – рече Богоев.

Според кандидатот за градоначалник, на овој начин ќе се заштити и ќе се унапреди постојното зеленило и ќе се лоцираат и ќе се казнат загадувачите.


Пратеникот Стефан Богоев ќе биде кандидат за градоначалник на СДСМ во Карпош


Скопје, 2 септември, 2017 - 16:02 (META) 

Пратеникот Стефан Богоев и претседателот на Социјалдемократска младина на Македонија официјално ќе биде кандидат за градоначалник во општина Карпош на претстојните локални избори.

Веста за кандидатурата на Богоев, на социјалната мрежа „Фејсбук“, ја сподели потпретседателот на СДММ, Дарко Каевски, кој неодамна беше назначен за в.д. директор на Агенцијата за млади и спорт.

„Промените во Карпош одамна се на повидок. Промените во Карпош се реалност што се случува секојдневно. Карпош конечно ќе блесне во оној сјај како што заслужува затоа што другарот Стефан Богоев од 15 октомври ќе ја преземе палката на општината! Карпошани повеќе не треба да се грижат за иднината на својата општина“, напиша Каевски.


Јакимовски ја задолжил Општина Карпош за 10,5 милиони евра, обвини СДСМ


Скопје, 18 март, 2017 - 13:48 (META) 

Градоначалникот на општина Карпош, Стевчо Јакимовски, и „неговите соработници од ВМРО-ДПМНЕ“ ја задолжиле Општината за 10,5 милиони евра, обвинија денеска од општинската организација на СДСМ во Карпош.

Од СДСМ велат дека официјалните извештаи на Општината и завршните сметки покажуваат дека само во 2016 година долгот се искачил за нови 5 милиони евра.

– Непознато е каде отидоа овие пари, кога изминатата година не е изграден ниту еден објект од интерес на граѓаните. Но, затоа, само за ставката „репрезентација“, Јакимовски потрошил 140.000 евра во 2015 и во 2016 година, односно по околу 20.000 денари дневно за гозби и за ручеци од џебот на граѓаните – изјави денеска на прес-конференција претседателот на општинската организација на СДСМ во Карпош, Душко Весковски.

Весковски истакна дека од планираните 300 милиони денари за улици и за патишта, потрошени биле само 68 милиони денари, поради што жителите на Карпош имаат „раскопани и непроодни улици и тротоари, кои служат само за паркирање автомобили“. Тој порача дека по новата реформска влада, доаѓа и нова локална власт во општина Карпош.


СДСМ: Јакимовски ќе се соочи со својот политички крај исто како Груевски


Скопје, 12 февруари, 2017 - 16:04 (META) 

Стевчо Јакимовски ќе се соочи со својот политички крај, исто како што тоа му се случи на неговиот ментор Никола Груевски, се вели во реакцијата на СДСМ на интервјуто на градоначалникот на општина Карпош за „Радио Слободна Европа“.

Од СДСМ велат дека на парламентарните избори на 11 декември граѓаните на Карпош кажале што мислат за работата на Јакимовски и на ВМРО-ДПМНЕ и го казниле „нивното криминално владеење во општината“.

„Граѓаните не сакаат тендер политичари. Не сакаат некој како Јакимовски да продолжи да прави масакр на зеленилата во општина Карпош и да гради непотребни објекти за лично богатање и коалициски бизниси, додека нивното здравје се нарушува поради огромното загадување на воздухот. Граѓаните избраа промени, сакаат нови одговорни политичари и квалитетен живот“, стои во соопштението на СДСМ.


Јакимовски: Загадувањето во Карпош доаѓа од другите општини


Скопје, 12 февруари, 2017 - 11:47 (META) 

Загадувањето во општина Карпош претежно доаѓа од другите – соседни општини, каде што домаќинствата користат дрва, ќумур или друг начин на греење, вели градоначалникот на Општина Карпош, Стевчо Јакимовски, во неделното интервју за „Радио Слободна Европа“.

„Загадувањето не е проблем на една општина во Скопје. Загадувањето е проблем од Шар Планина па се до Дервенската клисура. Значи мерки мора да се преземаат интегрално, а не дава резултат ако ние преземаме само парцијални мерки. Ако една општина недоволно презема мерки тоа си има влијание врз атмосферата во друга општина…Како што покажуваат анализите, сериозни загадувачи претставуваат домаќинствата, особено во зимскиот период. Но, морам да кажам дека тие загадувања се многу помалку од Општина Карпош, многу повеќе доаѓаат од другите соседни општини каде што се користи дрва, ќумур и друг начин на греење…Може да замислите дека 19 отсто од загадувањето во Општина Карпош доаѓа од индустријата која ја нема. Ние имаме мали трговски единици, мали сервиси и претежно трговија…Морам да кажам и дека ПМ-честичките и она што значи градежна прашина претежно доаѓа од Цементарата во Генерал Јанковиќ, како и загадувањето од домаќинствата од другите општини“, вели Јакимовски во интервјуто.

Тој ги отфрла обвинувањата дека во Карпош се случува градежна експанзија на сметка на зелените површини и дека тоа е една од причините за загадувањето.

„Тоа воопшто не е точно. Во Општина Карпош за осум години вкупно се изградени 23 станбени згради од 4 до 10 ката. Во исто време во Општина Аеродром се изградени 130 згради“, вели Јакимовски.

Во врска со актуелните политички случувања, градоначалникот на Карпош вели дека доколку СДСМ формира влада, нема да биде испочитувана волјата на граѓаните и тоа ќе „предизвика сериозни проблеми“, кризата нема да се реши, туку „дополнително ќе се продлабочи“.

Тој потврдува дека планира повторно да се кандидира за градоначалник на Карпош на претстојните локални избори кои треба да се одржат во првата половина на мај, а дали тоа ќе биде во коалиција со ВМРО-ДПМНЕ вели дека за тоа ќе одлучат органите на неговата партија – ГРОМ.


БЕГ: Нормализирана испораката на топлинска енергија, но уште се работи на дефектот


Скопје, 12 јануари, 2017 - 18:30 (META) 

Eкипите на „Балкан енерџи“ вечерва ја нормализирале испораката на топлинска енергија за потрошувачите во централното градско подрачје и во делови од општина Карпош, но сè уште работат на целосно санирање на дефектот, соопштија вечерва од компанијата.

Оттаму велат дека потрошувачите од овие делови на Скопје постепено, во текот на вечерта, добиваат нормална испорака на топлинска енергија.

„Имајќи предвид дека се работи за поголем дефект на топлинската мрежа, екипите на „Балкан енерџи“ ќе останат на терен и во текот на ноќта и ќе работат на целосно отстранување на дефектот за да се обезбеди редовно и стабилно снабдување во системот на топлинска енергија“, стои во соопштението на „Балкан енерџи“ во кое се додава дека за дополнителни информации потрошувачите можат да се обратат во центарот за грижа на потрошувачи на телефонот (02) 3076 200.

Поради дефект (губење на вода) во дел од толинската мрежа, денеска попладне беше прекината испораката на топлинска енергија за дел од потрошувачите во централното градско подрачје и во делови од општина Карпош.


Општина Карпош: Јакимовски еклатантно мислеше на земјотреси и тогаш кога ги немаше


Скопје, 14 септември, 2016 - 17:00 (META) 

„За разлика од градоначалниците на СДСМ, градоначалникот на Општина Карпош, Стевчо Јакимовски, кој според Вас го нема сега околу земјотресите, го имаше еклатантно пред четири години. Тој помисли тогаш на земјотресите, кога воопшто и немаше ваква сеизмичка активност. Општина Карпош е единствената локална самоуправа во државава која согласно законот има комплетна опрема и екипа за заштита и спасување: Таа располага со три шатори во кои можат да се сместат 60 лица, 60 кревети, исто толку душеци, кебиња, чаршафи и перници“, стои во реакцијата на Општина Карпош на текстот Земјотресите ги исплашија: Каде исчезнаа Тодоров, Груевски, Трајановски и Јакимовски?.

Во текстот на реакцијата се вели и: „Убаво би било, да ги прашате градоначалниците Заев и Дамјановски, бидејќи се три мандати градоначалници, дали располагаат со ваква опрема во своите општини, а Жерновски нема потреба да го прашувате, бидејќи тој е новајлија во градоначалничката функција“.

Интегралниот текст од реакцијата на Општина Карпош може да го прочитате тука.


„Марш за зелен Карпош“ утре во 18 часот, пред „Сити мол“


Скопје, 13 јуни, 2016 - 15:57 (META) 

Граѓаните од иницијативите „Ние сме Карпош 4“ и „Зелено Тафталиџе“ утре, во 18 часот, ќе организираат „Марш за зелен Карпош“, со кој ќе ја блокираат крстосницата кај „Скопје сити мол“ за да укажат на, како што велат, самоволието на локалната самоуправа на општина Карпош, која нетранспарентно и со негрижа се обидува да интервенира во урбанистичкиот план.

По блокирањето на крстосницата, ќе се упатат кон паркот на улица Букурешка, каде ќе се одржи отворена дискусија.

Жителите на Карпош бараат од градоначалникот на општина Карпош и од Советот на Општината да ги стопираат новите детални урбанистички планови, да ја спречат реализацијата на планот кој предвидува на местото на паркот на Букурешка да се изгради зграда, како и граѓаните да бидат интегрирани во одлуките што влијаат на нивните секојдневни животи.