Парите од Владата нема да ги деблокираат сите општини?


Берово, 3 декември, 2018 - 13:44 (META) 

Донесувањето на законот со кој се обезбедуваат околу 50 милиони евра владини пари за општините, во блокираните општини донесе надеж дека конечно ќе успеат да се ослободат долговите таложени со години, но и прашања дали ќе успеат во тоа. Четири од 11 општини во Источна Македонија – Делчево, Берово, Зрновци и Пехчево се уште работат со блокирани сметки и определен месечен лимит.

Општина Берово е првата општина која објави јавен повик со кој ги повикува доверителите да ги пријават побарувањата. Во преговорите ќе бараат отпис од каматите и 15 отсто од долгот. Фирмите-доверители што ќе го прифатат тоа, според одредбите од законот, ќе имаат предност во склучувањето на договорите.

Меѓутоа, уште во старт наишле на првични проблеми. Главниот доверител на Општина Берово е АДГ „Пелагонија“ од Скопје во стечај, кому општината му должи половина милион евра. Тоа е и половина од вкупниот долг. Градоначалникот Звонко Пекевски вели дека преговорите ќе треба да ги води не со еден, туку со повеќе субјекти, кои се во Одборот на доверители на АДГ „Пелагонија“.

-Преговорите сè уште не сме ги почнале официјално, но имаме сложена работа, бидејќи во прашање се интересите на повеќе компании во Одборот на доверители на „Пелагонија“ – вели Пекевски.

Берово ќе добие 47,8 милиони денари од Буџетот.

Некои од градоначалниците на општините веќе имале првични неофицијални разговори, меѓутоа наишле на различни реакции. Сметаат дека перспективите во тие преговори ќе зависат од тоа дали компаниите сакаат итно и по секоја цена да ги наплатат долговите. Има и такви компании, велат градоначалниците,  кои не сакаат да се откажат од ништо што им следува  со закон. Дел од нив имаат и извршни решенија од суд.

Општина Пехчево деновиве ќе објави повик до доверителите. Најголемиот доверител е компанијата „Конти хидропласт“, која работела на изградба на водовод.

– Сè уште не сме разговарале со оваа компанија, но имаме и други доверители, кои очекуваме да се пријават на повикот. Парите од државниот буџет може да бидат основа за деблокада на сметката, но има уште да се враќа, бидејќи претходните градоначалници прекумерно ја здолжиле општината – изјави Драган Тренчовски, градоначалник на Општина Пехчево, која добива 62,4 милиони денари од државниот буџет.

Законот за финансиска поддршка на општините што беше донесен на крајот на октомври, наиде на различни реакции. Задолжителните и блокирани општини сметаат дека финансиската помош е добредојдена, бидејќи и по една година, новите градоначалници не успеаваат да ги одблокираат сметките.

Дел од општините кои се во подобра финансиска кондиција се на став дека со законот, централната власт упатува порака на толеранција на расипништвото и непочитување на правото.

Министерот за финансии Драган Тевдовски, законот го оправда со зборовите „општините знаат дека нема втор пат да има ваква мерка“.


Поради штрајк на комуналците, приматели на социјална помош ги чистат улиците во Берово


Берово, 7 април, 2016 - 18:53 (META) 

Поради штрајкот на вработените во Јавното комунално претпријатие „Услуга“ во Берово поради неисплатени плати, кој трае веќе една недела, сметот во градот го чистат приматели на социјална помош.

Дел од примателите на социјална помош велат дека се ангажирани за чистење на улиците по налог на градоначалникот на Берово, Драги Наџински, бидејќи имаат долгови за вода и за смет.

Еден од десетината ангажирани лица изјави дека градоначалникот, наводно, им рекол дека ќе им ја укине социјалната помош ако не го чистат градот.

Градоначалникот Наџински уште на 1 април, кога почна штрајкот на комуналците, најави дека тие што имаат повеќе неплатени сметки, долгот можат да го намират со чистење и со метење на беровските улици.