Ќе се формира координативно тело за борба против загадувањето во Општина Аеродром


Скопје, 15 декември, 2017 - 11:56 (META) 

Градоначалникот на Општина Аеродром, Златко Марин на вчерашната средба со заменик-министерот за животна средина Јани Макрадули договорил формирање координативно тело за борба против загадувањето, во кое би учествувале сите скопски општини, Град Скопје и Министерството за заштита на животна средина и просторно планирање.

Соработката почнува во рамките на проектот „Пријави загадувач“, со цел да се опфатат сите правни субјекти, за кои се надлежни различни институции.

Општина Аеродром е надлежна за правните субјекти кои се задолжени со елаборати за животна средина, за правни субјекти со Б интегрирана дозвола е надлежен Град Скопје, а за индустриски капацитети/производни погони кои поседуваат А-интегрирана дозвола е надлежно Министерството за животна средина и просторно планирање.

„Се надеваме дека Координативното тело ќе овозможи ефикасни и навремени интервенции за сите правни субјекти и дека преку оваа соработка ќе успееме да воспоставиме и интегрирана база на загадувачи, кои сите служби ќе можат редовно да ги следат и регулираат“, велат од Општина Аеродром.

Како мерка против загадувањето Општина Аеродром воведе двосменско работење на комуналните инспектори, кои се достапни секој ден од 08.30 до 22 часот на телефонскиот број ‎075 316 515.


Kомуналните инспектори во Аеродром ќе работат во две смени


Скопје, 28 ноември, 2017 - 12:37 (META) 

Од утре комуналните инспектори на Општина Аеродром ќе работат во две смени, секој ден од 8.30 до 22.30 часот, вклучувајќи ги и викендите, информираат од локалната самоуправа. .

Како дел од проектот „Пријави загадувач“ за почист воздух во општината, ќе биде ангажирана целата инспекциска служба, односно осум комунални инспектори и четири комунални редари, а активирана е телефонска линија за пријавување загадувачи, ‎075/316-515.

Од Општината велат дека двосменското работење на инспекторите е по барање на граѓаните за поголема ефикасност на инспекциските служби.

„Целта на акцијата „Пријави загадувач“ е што побргу да се детектираат и соодветно да се регулираат загадувачите на територијата на Општина Аеродром. Ги охрабруваме граѓаните активно да учествуваат и редовно да пријавуваат загадувачи на општинските инспекциски служби“, велат од Општината.


Општина Аеродром ќе донира 300.000 денари за лицата со аутизам од здружението „Во мојот свет“


Скопје, 8 ноември, 2017 - 10:42 (META) 

Општина Аеродром ќе донира 300.000 денари финансиска поддршка за Здружението на граѓани за третман на лица со аутизам, АДХД и Аспергеров синдром – „Во мојот свет“, за вработување на две лица во втора смена.

На средбата, претставници на Здружението „Во мојот свет“ го информирале градоначалникот на Општината, Златко Марин, дека имаат потреба и од простории, по што Марин им ветил дека ќе им помогне и за тој проблем.

Здружението „Во мојот свет“ веќе соработува со градинките и со училиштата од Општина Аеродром во сферата на едукација на кадри, а Марин им ветил дека Општината ќе продолжи да се залага за уште поуспешна соработка и ќе нуди постојана поддршка.

– Ветувавме целосна поддршка и инклузија на лицата со попреченост и почнавме веднаш со работа во таа насока. Очекувам уште многу заеднички корисни проекти, заради максимална инклузија за секој граѓанин – изјави Марин.


Буџетот за животна средина на Општина Аеродром ќе се зголеми за 20 пати


Скопје, 7 ноември, 2017 - 9:58 (META) 

Со новиот буџет, Општина Аеродром ќе издвои околу 300.000 евра за реализација на конкретни мерки за почист воздух, односно 20 пати повеќе од досегашните средства на годишно ниво за заштита на животната средина, информираше градоначалникот Златко Марин, на средба со претставниците на граѓански организации.

„Дел од претставниците на граѓанските здруженија, кои присуствуваа на средбата, предложија неколку мерки што би дале резултати на краток рок во соработка со Градот Скопје, Министерството за животна средина и со другите надлежни институции, меѓу кои се инсталирање филтри на оџаците на индивидуалните куќи, искористување на сончевата енергија, подобрување на условите за користење јавен превоз, користење нова генерација катализатори за моторни возила, кои ја намалуваат емисијата на штетни материи, зголемување на ефикасноста на инспекциските служби, како и зголемување на јавната свест“, велат од Општина Аеродром.

Од Општината нагласуваат дека ќе ги земат предвид сите предложени мерки од граѓанските организации и ќе подготват конкретен краткорочен план, кој ќе биде достапен на јавноста, а во меѓувреме ќе работат на трајно решавање на загадувањето.


Општина Аеродром го раскина договорот со Самсоненко за изградба на тениски игралишта


Скопје, 3 ноември, 2017 - 15:48 (META) 

Општина Аеродром соопшти дека ќе го раскине договорот за изградба на тениски игралишта, кој претходната гарнитура го потпишала со компанијата „Тенис парк“, во сопственост на Сергеј Самсоненко.

Како што стои во соопштението за јавноста, договорот не бил во интерес на граѓаните зашто предвидувал Општината и Градот Скопје целосно да го ослободат инвеститорот од плаќање комуналии, а притоа граѓаните да добијат многу мали бенефиции за користење на игралиштата.

„Според договорот, граѓаните би можеле бесплатно да користат само едно игралиште и тоа во ограничено време, додека комуналиите од кои се ослободува инвеститорот се во висина од еден милион евра. Инвеститорот го добива земјиштето на користење 35 години. Ваквиот договор не е во интерес на жителите, туку, пред сè, во интерес на инвеститорот, а неговото раскинување е со заемен договор на двете страни“, порачуваат од Општина Аеродром.

Одлука за што ќе се користи земјиштето, ќе биде донесена наскоро, велат од Општината.


Марин: Ќе бараме одговарност за градежната мафија во Аеродром


Скопје, 8 април, 2017 - 15:00 (META) 

Ќе има преиспитување и одговорност за спорниот ДУП И10 во Општина Аеродром, порача денеска на прес-конференција Златко Марин, претседател на општинската организација на СДСМ од Аеродром.

Тој вели дека во Општина Аеродром деталниот урбанистички план бил изгласан тајно и без дебата „и со него за криминални бизнис-интереси, Ивица Коневски и ВМРО-ДПМНЕ го уништуваат воздухот и здравјето на граѓаните“. Марин презентираше документи за тоа дека паркот кај Мајчин дом ќе биде уништен за да може фирма на Орце Камчев да гради деветкатница.

– Ова е доказот дека Орце Камчев стои зад „Масив констракшн“, фирмата што ќе гради објекти кај Мајчин дом. Како што може да се види во овие документи, „Масив констракшн“ е во сопственост на „Европа комерц ДООЕЛ Кочани“ и „Архи ДОО“, која, пак, е сопственост на „Ексико“ и на „Орка холдинг АД Скопје“. „Ексико“, пак, е фирмата чиј управител е Тодор Мирчевски, човек кој управува со сите фирми на Камчев. Фирми кои преку „Ексико“ изнесуваат милиони евра од македонскиот буџет преку тендери и субвенции во приватни оф-шор сметки. Криминалните шеми на Коневски, ВМРО-ДПМНЕ и на градежната мафија се заплеткани и сложени, но нивната цел е јасна – полнење на приватни џебови и сметки и туркање на Аеродром во еколошка катастрофа, со ДУП кој ќе го спречи струењето на воздухот од Вардар, ќе го уништи зеленилото и уште повеќе ќе го загади воздухот. Здравјето и животот на граѓаните мора да биде поважно од неброените фирми и банкарски оф-шор сметки! – рече Марин.


Еко-акција во општина Аеродром за собирање на опасен отпад


Скопје, 15 февруари, 2017 - 10:18 (META) 

Општина Аеродром во соработка со Друштвото за управување со отпад „Нула отпад“, в сабота, во периодот од 12 до 14 часот, ќе реализира еко-акција за собирање електронски и електричен отпад, во урбаната заедница „Лисиче“.

Еко-акцијата ќе се одржи кај старата продавница на „Славија“ во трговскиот центар, каде граѓаните од населбата Лисиче можат да се ослободат од опасниот отпад од домаќинствата.

„Под електронски отпад се подразбира статични и лаптоп компјутери, тастатури, глувчиња, кабли, звучници, слушалки, домашни телефони и мобилни телефони, МП3 плеери, монитори, телевизори, дигитални камери и видео-камери, принтери, скенери, факс-машини и стерео системи, додека под електричен отпад се подразбира шпорети, машини за перење облека и садови, греалки и грејни тела, микробранова печка, машина за правење леб, апарат за кафе, други апарати од домаќинство, како и клима-уреди“, стои во соопштението на Општина Аеродром.

Од Општината додаваат дека во ноември и во декември минатата година на истата еко-акција за собирање електронски и електричен отпад, биле собрани вкупно 1.907 килограми опасен отпад.


Речиси две третини од општинскиот буџет на Аеродром за плати и за дотации


Скопје, 7 декември, 2016 - 13:30 (META) 

На вчерашната 59. седница на Советот на Општина Аеродром, беше донесен буџетот за 2017 година, кој изнесува околу 18 милиони евра и е сличен на годинешниот, се вели во соопштението на Општината.

Од него, 11 милиони евра се предвидени за дотации и за плати во основните училишта и во градинките и за општинската администрација. Остатокот, односно седум милиони евра, се планира за реализација на проекти и тоа едната половина за довршување на почнатите проекти во 2016 година, а другата половина на средствата за нови проекти предвидени за 2017 година.

„Буџетот за 2017 година се базира врз реалните приходи што ги очекува Општината. Ние сме една од ретките општини во Република Македонија што не се задолжени ниту денар и што ги сервисира редовно своите обврски врз основа на своите приходи, а не на кредити за реализација на проекти“, изјави градоначалникот на Општина Аеродром, Ивица Коневски.

Меѓу покрупните проекти опфатени во буџетот за реализација во 2017 година се изградба на нова детска градинка во Ново Лисиче, како и реализација на инфраструктурни објекти како изградба на комунална инфраструктура и асфалтирање на улици.


ЕЛЕМ го поништи тендерот за „Рајска градина“ во општина Аеродром


Скопје, 27 октомври, 2016 - 18:14 (META) 

Државната компанија „Електрани на Македонија“ (ЕЛЕМ) го поништи тендерот за избор на фирма за изградба на проектот „Рајска градина“ во општината Аеродром.

Денеска на интернет-страницата на електронскиот систем за јавни набавки беше објавено известување дека јавната набавка е поништена, а во образложението како прачина за нејзиното поништување е наведено дека „се поднесени прифатливи понуди кои не можат да се споредат поради различниот пристап во техничките или финансиските понуди“.

Засега нема информации дали и кога ќе се објави нов тендер за реализација на проектот „Рајска градина“.

„Јавната постапка за избор на изведувач за изградба на Рајски парк е поништена поради процедурални причини. АД „Електрани на Македонија“ нема финансиски импликации кон други субјекти повразни со овој предмет, а низ органите на компанијата дополнително ќе се одлучува за понатамошните активности и за идниот статус на проектот“, велат од ЕЛЕМ, пренесува „Телма“.

Идејата за изградба на рајска градина во општината Аеродром, која треба да се простира на површина од 15 хектари и ќе чини 14 милиони евра, во 2012 година ја најави тогашниот премиер и актуелен лидер на ВМРО-ДПМНЕ, Никола Груевски. Идејното решение, кое го изработи фирмата „Архитектоника“, беше избрано од Општина Аеродром, а ЕЛЕМ во март годинава доби задача да го спроведе тендерот за избор на фирма што ќе го гради паркот.

Рајската градина, според проектот, треба да има декоративни елементи во стилот неокласицизам, павилјон, летниковец, статуи и скулптури во фонтани.

Проектот „Рајска градина“ предизвика реакции кај опозицијата и граѓанските организации кои бараа тој веднаш да биде запрен.


Мали „мајки терези“ собирале пари за децата од поплавените подрачја!


Скопје, 16 септември, 2016 - 16:53 (META) 

Мали деца од општината Аеродром облечени како Мајка Тереза собирале пари за училишен прибор за децата од поплавените подрачја во Скопје.

Настанот се одржал пред Спомен куќата на Мајка Тереза, по повод нејзиното прогласување за светица, како и по повод Светскиот ден на милосрдието.

На фотографиите кои Општината Аеродром денеска ги објави на својата интернет страница се гледа дека децата и воспитувачките се облечени како Мајка Тереза, наредени во круг, а пред нив бела лента на која граѓаните оставале ситни пари.

Овие фотографии на социјалните мрежи предизвикаа низа реакции.