Новиот „компјутер за секое дете“ да оди во фази и со добра инфраструктура, велат експертите


Скопје, 6 декември, 2018 - 9:55 (META) 

Проектот за набавка на нови компјутери во училиштата и дигитализацијата на наставата, мора убаво да се осмисли пред да се изведе, советува проф. д-р Миле Јованов, претседател на Здружението на информатичари и Раководител на Институтот за интелигентни системи при Факултетот за информатички науки и компјутерско инжинерство (ФИНКИ). Ова следи по објавата на „Мета“ за најавата на заменик-министерот за образование и наука Петар Атанасов, дека државата планира да реализира нов проект „Компјутер за секое дете“ во македонските училишта.

– Прв приоритет е да се набават компјутери во основните и во средните училишта за опремување на кабинетите за наставата по информатика. Тие кабинети се разликуваат од сите останати кабинети. Ако другите користат технологија во наставата, во кабинетите по информатика имаме настава за технологијата и тука мора да има разлика во тоа како треба да изгледа таа училница во однос на стандардната – вели Јованов.

Според него, купување компјутери е проект кој бара многу сериозна инфраструктура.

Jovanov

– Минатата влада купи компјутери кои во некои училишта не можеа веднаш да ги вклучат оти беше слаба струјата, доводот до училиштата не беше доволен, па се копаше дополнително. Проблемот со пристап до Интернет во училиштата до ден денес не е добро решен. И не е едноставно да се реши затоа што имаме разлики во регионалниот развој. Во некое село има оптика, во некое едвај може да има некаков сателитски достап. Некаде може да го обезбеди телекомуникациски провајдер, некаде кабелски провајдер. Треба да се реши тоа, мора да има добар Интернет ако сакаме да имаме квалитетна настава со компјутери. Треба да има компјутери во училиштата, или подобро – во секоја училница, кои ќе служат како локални сервери за да се складираат содржини кои потоа учениците локално ќе може да ги повлекуваат за време на час. Пред да се купи компјутер, треба да се купи проектор за секоја училница. Регуларен проектор или комбинација (интерактивна табла) или пак, поголеми смарт телевизори, кои не се многу скапи. Треба да се размисли како ќе се комбинира училишната табла и проекторот односно телевизорот, значи мора просторот да се реши. Ако наставникот може да проектира и презентира работи, тоа значително ќе го подигне образовниот процес – додава Јованов.

komputer-za-sekoe-dete

Најважен дел, според професорот е одржливоста на проектот.

– Кој ќе набавува делови, кој ќе врши поправки кој ќе менува делови тековно, ова се прашања кои се клучни. Компјутерската опрема се расипува и тоа е нормално, но како ќе се организира грижата за опремата е важно. Би требало да се упростат тендерските процедури за набавка на делови на пример, бидејќи додека заврши една таква процедура, може да помине цело полугодие – вели професорот.

Според него, после набавката на опрема за кабинетите по информатика, треба да набави опрема за проектирање и преносни или фиксирани компјутери во секоја училница за наставниците кои ќе бидат поврзани на интернет, а потоа би можело да се оди со набавка на опрема за по неколку специјализирани училници за компјутеризирана настава (кои на пример, професорите по различни предмети би ги користеле наизменично, на пример би влегувале еднаш неделно или еднаш во две недели).

Сите претходно наведени опции или фази во компјутеризацијата, вели тој, ќе бидат поевтини, полесно одржливи и со огромен импакт во образованието, наспроти директно генерално купување на компјутери за секој ученик.


И со зголемен буџет, на АРМ ќе и треба најмалку една деценија да се доопреми


Скопје, 30 октомври, 2018 - 10:31 (META) 

На АРМ ќе и требаат најмалку четири години за со најавените буџети, кои ќе се зголемуваат, да го купи само минималниот неопходен број на оклопни транспортери, а најмалку една деценија за да ја купи сета потребна опрема, покажуваат пресметките направени врз основа на постоечката формација на АРМ и проекциите на Министерството за финансии во Фискалната стратегија за 2019-2021 година.

Владата на седница на 25 септември ја прифати информацијата за планирање на опремувањето и модернизацијата на армијата на Република Македонија во предлог-буџетот на Министерството за одбрана за периодот 2019 – 2021 година.

„Приоритет во опремувањето и модернизацијата имаат декларираните сили за НАТО/ПзМ (Партнерство за мир) активности прифатени во рамките на НАТО Процесот на планирање и преглед (PARP), вклучително и Лесната пешадиска баталјонска група како најголема декларирана борбена единица со која Република Македонија придонесува во НАТО базенот на сили“, соопшти Владата.

По овој документ, Министерството за одбрана треба да почне да планира повеќе пари за опремување во буџетот за следната година, кој се подготвува. За опремување треба да бидат наменети 20 отсто од парите за одбраната.

Според Фискалната стратегија на Република Македонија за 2019-2021, министерството за финансии предвидува дека буџетот на одбраната, кој сега е 106 милиони евра, ќе расте по околу 200 милиони денари или 3,2 милиони евра годишно во следните три години. АРМ, според овие проекции, во следните три години ќе има околу 65 милиони евра за нова опрема од сопствениот буџет. Но, одбраната до 2024 година треба да добие двојно повисок буџет, кој треба да изнесува 2 отсто од бруто домашниот производ, со што за опремување ќе бидат наменети по околу 40 милиони годишно.

За да ја опреми само Лесната пешадиска баталјонска група, на АРМ и требаат меѓу 34 и 40 пешадиски борбени возила или оклопни транспортери. Според сегашните цени, еден чини меѓу 2,5 и 3 милиони евра, но само како платформа, без целосно вооружување и опрема. Оклопните транспортери само за еден баталјон би чинеле меѓу 80 и 120 милиони евра, или во најевтината варијанта на АРМ би и требале најмалку четири години за со својот буџет да ги купи само транспортерите за еден баталјон.

За целосно да се опреми сегашната механизирана пешадиска бригада на АРМ, која има четири баталјони, ќе бидат потребни меѓу 136 и 160 оклопни транспортери, што би чинело од 340 до 480 милиони евра само за платформите-возилата без вооружување.

Покрај оклопните транспортери или пешадиски борбени возила, според Стратегискиот одбранбен преглед усвоен во јуни, на АРМ и требаат и тактички комуникациски систем, инженериски машини и опрема, опрема за сајбер-одбрана, воени транспортни возила, орудија за посредна огнена поддршка, индивидуална и колективна опрема за атомско-биолошко-хемиска одбрана и балистичка заштита, опрема за извидување, разузнавање, набљудување и определување на цели, комуникациска опрема…

Според овие проекции, АРМ би можела сама да ги опреми декларираните единици со буџетите за следните десет години. Но, не и целата своја формација.


Во Судот се слушнаа четири „бомби“ за „Трезор“, следно рочиште на 10 септември


Скопје, 28 јуни, 2018 - 16:37 (META) 

На денешното рочиште за случајот „Трезор“ се слушаа четири снимки од прислушувани разговори предложени од СЈО, а кои се однесуваат на фирмата „Финси“ и набавката на опрема наменета за МВР.

На снимките се слушаат разговори од 2010 и 2011 година меѓу Гордана Јанкулоска и Зоран Ставревски, Сашо Мијалков и Влатко Мијалков и на Влатко Мијалков и Саша Глишиќ.

Одбраната на обвинетите приговараше до Судот да не се пуштаат разговорите се додека не се достави потврда од СЈО од записник составен од примопредавање од СДСМ на СЈО.

Судот го одби предлогот, откако обвинителите од СЈО кажаа дека таков записник е изработен и доставен за случајот „Таргет-Тврдина“.

Обвинетите во „Трезор“ се товарат за злоупотреба на службената положба и овластувања и предизвикување штета на Буџетот во висина од околу 770 илјади евра за набавката на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.

Поради завршување на работното време судијката Џенета Бектовиќ го прекина денешното рочиште и ново закажа за 10 септември.


Мијалков на судењето за „Трезор“ се изјасни како невин


Скопје, 28 јуни, 2018 - 14:10 (META) 

Поранешниот директор УБК, Сашо Мијалков, кој е обвинет во случајот „Трезор“ на СЈО на денешното рочиште во Кривичниот суд рече дека го разбрал обвинението, но дека не се чувствува виновен.

-Не сум виновен – рече Мијалков во судницата, а истото го изјавија и Небојша Стајковиќ и Тони Јакимовски. Сите тројца рекоа дека разбрале за што се обвинети, но дека не се чувствуваат виновни.

Обвинителот од СЈО, Артан Ајро го даде воведниот говор за обвинението за случајот “Трезор”.

Ова е прво изјаснување на Мијалков за признание на вина за случаите за кои го обвинува СЈО.


Џафероски: Се штитиме и спасуваме со опрема која е донација уште од ЈНА


Скопје, 27 февруари, 2018 - 14:05 (META) 

Дирекцијата за заштита и спасување (ДЗС), од своето формирање до минатата година, не успеала целосно да го воспостави системот за заштита и спасување, рече директорот на ДЗС, Аднан Џафероски, на средбата со новинарите на која информираше за состојбата во Дирекцијата, во која, како што кажа, наследил долг од 70 милиони денари (милион и 135.000 евра).

Според него, до неговото доаѓање на функцијата, несоодветно се водела кадровска политика, посебно во поглед на изборот на раководителите. Наследениот долг, пак најмногу отпаѓа на неисплатени услуги за механизација која е користена во елементарни непогоди.

Тој рече дека со неговото доаѓање на чело на Дирекцијата ги реактивирал 64-те тимови за брз одговор кои во моментов се на дообука, а претходно не функционирале, не биле соодветно опремени и не се спроведувале стандардните процедури.

Џафероски се пожали и дека во ДЗС во последните десет години не се направени никакви инвестции, освен трите авиони за гасење пожар кои се набавени во 2009 година. Голем дел од опремата бил дониран уште од ЈНА, a и другата опрема е главно од донации.

Новиот директор се пофали дека откако дошол на функцијата, за првпат навреме и законски извршил сервисирање на авионите што се подготвени за гасење на пожари за следната сезона. Тој рече дека набавиле и дрон што ќе превенира во пожарите, односно ќе се интервенира веднаш онаму каде има мал пожар да не се прошири.  Оваа инвестиција, вели то, е многу исплатлива отколку да се прават превентивни летови со авионите, што трошат по две до три илјади евра од лет.

Директорот најави посебна прес-конференција на која ќе информира за состојбата со материјално-техничките средства кои ги користи ДЗС во справувањето со елементарните непогоди, меѓу кои се и средствата од меѓународни донатори.


Институциите купувале исти производи и услуги по огромни разлики во цените


Скопје, 7 февруари, 2018 - 11:34 (META) 

Центарот за граѓански комуникации денеска го објави индексот на рационалност, во кој се споредени цените по кои се купувани зимски и летни работни униформи, што се дел од личната заштитна опрема (ХТЗ-опрема) кај комуналните претпријатија. Најголемата разлика во цената е евидентирана во набавката на летните работни униформи.

„Летните работни униформи комуналните претпријатија ги купувале по цени од 424 до 2.773 денари, со што највисоката цена е за 554 проценти повисока од најниската. Зимските работни униформи од страна на комуналните претпријатија се купувани по цени од 1.124 до 4.602 денари, со што највисоката цена е за дури 309 проценти повисока од најниската. Работните обувки, кои најчесто ги купуваат детските градинки, се купувани по цени од 718 до 2.183 денари, со што највисоката цена е за 204 проценти повисока од најниската“ се вели во истражувањето на Центарот за граѓански комуникации.

Одржувањето на хигиената во внатрешните работни површини, државните институции ги чинело од 30 до 103 денари за еден метар квадратен месечно, со што највисоката цена е за 243 проценти повисока од најниската цена.

Кај системите за инфузија во здравствените установи, има најмала разлика во цената во набавката.

„Системите за инфузија се купувани од страна на здравствените институции по цени од 5,78 до 9,98 денари за еден систем, со што највисоката цена е за 73 проценти повисока од најниската“, се додава во истражувањето.

Во изработката на индексот на рационалност, биле вклучени 48 институции на национално и на локално ниво, коишто за овие набавки спровеле 53 тендери во текот на 2016 и во 2017 година.


Владата планира да ги субвенционира студентите


Скопје, 22 јануари, 2018 - 17:58 (META) 

Владата на денешната 49. седница ја разгледала и усвоила информацијата за воведување на проект „Субвенциониран студентски оброк и други студентски потреби“.

Проектот, како што информираат од таму, предвидува можност за субвенционирање на потребите на студентите по нивен избор и тоа оброк, автобуска карта, карта за во театар, книга и други услуги, а плаќањето ќе се врши преку мобилен телефон или дигитална студентска картичка.

„Овој проект, повеќе од 10 години успешно се спроведува во Словенија. Од страна на тамошните институции постои согласност и поддршка за имплементирање на проектот и во Македонија, со одредени прилагодувања, согласно финансиските можности на Македонија“, информираат од Влада.

Владата на денешната седница исто така ја усвоила информацијата за набавка на медицинска опрема, медицински и немедицински инвентар во јавните здравствени установи и за специјалната болница за ортопедија и трауматологија „Св. Еразмо“ во  Охрид, во висина од 150, односно 120 милиони денари за оваа, за 2019 и за 2020 година, со утврдена динамика на плаќање за секоја година.


ЕУ на МВР му донираше возила и опрема вредни околу четири милиони евра


Гевгелија, 13 декември, 2017 - 16:23 (META) 

Македонската полиција денеска доби донација од Европската Унија во возила и опрема вредна околу четири милиони евра.

Донацијата, со која треба да се подигнат капацитетите на граничната полиција, се состои од осум комбиња, осум патнички возила, осум четирицикли и пет специјални возила за надзор на границата со термални камери, од кои едно опремено со радар, потоа 100 рачни радио терминали и програмски алатки, 250 рачни палки со ознака „Стоп полиција“со лед светла, четири детектори за срцево отчукување, четири рачни скрининг-системи за карго-товар и проверка на возила, шест системи за проверка на валидност на документи – ВИСПЕК, комуникациска мрежа, како и локално распоредлив координативен-комуникациски центар, мобилен систем за надгледување со камери и радар.

Евроамбасадорот Самуел Жбогар рече дека самиот слоган „ЕУ за тебе“ значи дека Европската Унија е тука за да и помогне на нашата земја да се справува со предизвиците.

– Со оваа донација, полицијата ќе биде поподготвена да се справува со предизвиците со кои се соочува на границата. Европската Унија останува посветена на давањето поддршка за да може полесно да се справите со овие предизвици – рече Жбогар.

Спасовски ја посети и полициската станица во Гевгелија, каде беше информиран дека безбедносната состојба во општината е на задоволително ниво, а беше запознаен и со условите и проблемите со кои се соочуваат полицајците при извршувањето на задачите.


МВР догодина планира да набави две нови машини за пасоши и за лични карти


Скопје, 1 декември, 2017 - 13:54 (META) 

Министерството за внатрешни работи следната година планира да набави две нови машини за изработка на пасоши и на лични карти, соопшти министерот за внатрешни работи, Оливер Спасовски, на денешната прес-конференција на која го презентираше делот од државниот буџет за 2018 година, наменет за МВР.

– Во текот на 2018 година, планирана е набавка на две нови машини за изработка и за персонализација на патните исправи, како и набавка на машини за изработка на лични документи. Обезбедени се средства за нивна хардверска и софтверска надградба, што ќе овозможи граѓаните побрзо да ги обезбедат личните докумнти и патни исправи. За ова се одредени 10 милиони евра од буџетот на Министерството за 2018 година – рече Спасовски.

Тој соопшти дека 570 милиони денари се предвидени за нова опрема за специјалните единици, а дел од оваа сума ќе оди и за подобрување на постојната информатичка и телекомуникациска инфраструктура.

Министерот за внатрешни работи рече дека следната година планираат да ги сведат на нула долговите што ги има МВР, кои, според него, сега изнесуваат околу 400 милиони денари или околу 6,5 милиони евра.

– Со домаќинско работење, ќе се раздолжуваме и ќе ги подобруваме условите за работа во МВР – рече Спасовски.

Инаку, буџетот на МВР за 2018 година е проектиран на 10,2 милијарди денари.

Како што изјави Спасовски, овој буџет е поголем за околу 180 милиони денари од тој за 2017 година.


Домашниот бруто-производ лани се зголемил за 2,9 проценти во однос на 2015 година


Скопје, 29 септември, 2017 - 14:25 (META) 

Домашниот бруто-производ (БДП) во 2016 година изнесувал 598.881.000 денари и стапката на пораст изнесувала 2,9 проценти во однос на 2015 година, објави Државниот завод за статистика.

Финалната потрошувачка во 2016 година во структурата на БДП учествува со 82,1 отсто. Учеството на извозот на стоки и на услуги во структурата на БДП во 2016 година изнесува 50 проценти.

Во техничката структурата на инвестициите во основни средства, градежните работи учествуваат со 62,7 проценти, машините и опремата со 30,1 отсто, а другите инвестиции со 7,2 проценти.