!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Во воздушни напади во Сирија загинале 29 лица


Рака, 9 август, 2017 - 19:17 (META) 

Сириската опозиција соопшти дека изминатите два дена во воздушни напади на северот на Сирија, кој е под контрола на Исламската држава, загинале најмалку 29 лица.

Коалицијата предводена од САД се обидува повторно да воспостави контрола на Рака, а силите предводени од Курдите, моментно контролираат половина од тој сириски град.

Опсерваторијата за човекови права соопшти дека воздушните напади се интензивирале во изминатите неколку дена и дека помеѓу загинатите имало девет жени и 12 деца.


Џафери: Расправата за Зврлевски ќе продолжи, а пратениците нека си бараат друго мислење


Скопје, 7 август, 2017 - 13:24 (META) 

На седницата за разрешување на јавниот обвинител Марко Зврлевски, пратеникот на ВМРО-ДПМНЕ, Илија Димовски, побара еден час пауза за да состави писмо до Државната комисија за спречување на корупција, за таа да се произнесе дали треба да продолжи седницата бидејќи се распишани локалните избори.

Тој смета дека во согласност со членот 8а од Изборниот законик, од денот на донесувањето на одлуката за распишување избори до завршување на изборите, пратениците не можат да носат одлуки, не можат да се почнат постапки за вработување нови лица и за престанок на работните односи на јавните функционери, односно постапките се ставаат во мирување.

На ова, претседателот на Собранието, Талат Џафери, рече дека како координатор на пратеничка група и пратеник може да се обрати до која било институција и да побара мислење, но тоа не значи дека Собранието не треба да продолжи да работи.

– Собранието не е должно да прекине со работа ако пратеник или партеничка група мислат поинаку. Немам намера да се обратам до ниту една институција во однос на моите надлежности. Според законот и деловникот, она што важи за Влада не се применува аналогоно на работата на Собранието. Секој пратеник може да се обрати до кој било орган доколку има некоја дилема, јас немам дилема за продолжението на оваа седница. Собранието не е должно да бара мислење од институција, во случајов Државна комисија за спречување на корупција, која ја формирало самото Собранието – рече Џафери.

Пратеникот на СДСМ, Тунтев, смета дека и денеска опозицијата се обидува да ја одолжи работата на Собранието по оваа точка.

– Опозицијата се обидува да оди во недоглед со постапката почната на барање на Владата за разрешување на Зврлески поради незаконско и несовесно работење на државниот обвинител. Дебатата не е дел од постапката за разрешување. Ако толку сакаат, нека се откажат од дебатата и нека се оди директно на гласање – изјави Тунтев.

Пратеникот на ВМРО-ДПМНЕ, Антонио Милошоски, кажа дека дебатата е дел од постапката за разрешување и никој нема право да ги тера пратениците да се откажат од таа дебата.

И тој побара седницата да биде прекината и да се дебатира за други теми, кои, како што рече, се значајни за граѓаните, како депонијата, пожарите, зголемување на платите во администрација и за мигрантите.

Продолжението на седницата е закажано за 15 часот.


Горгиева: Новата Влада ќе гради, нема да краде и ќе враќа стари долгови


Скопје, 5 август, 2017 - 13:36 (META) 

Пратеникот на ВМРО-ДПМНЕ, Драган Цуклев, на расправата за ребалансот на буџетот во Собранието кажа дека целта е да се задоволат две основни популистички ветувања од страна на СДСМ, а тоа се укинување на радиодифузната такса и обезбедување на средства за минимална плата.

За задолжителната минимална плата од 12.000 денари тој рече дека ќе направи дискриминација помеѓу стопанските субјекти и вработените.

Цуклев, исто така, ја обвини власта дека земјоделците се соочиле со скапување на родот по нивите, имало неоткупена пченица, а ги спомна и пожарите за кои кажа дека во Поречието изгореле 70 проценти од боровата шума.

– Се крати на капитални инвестиции за да не се признаат успешните економски политики на претходната влада и дека проектите се добри за граѓаните и за општеството – изјави Цуклев.

Пратеничката на СДСМ, Милева Горгиева, на ова одговори дека опозицијата „ја болат успесите на новата реформска влада“.

– Ја замајувате јавноста со депонијата во Струга за која веќе се издвоени средства за решавање на проблемот. Пожарите постоеле и ќе постојат, надлежните го решаваат проблемот и ситуацијата е под контрола. Зарем заборавате на тоа што Дирекцијата за заштита и спасување изминатите години потрошила 13 милиони евра – изјави Горгиева.

За задолжувањето, таа рече дека новата влада мора да ги враќа долговите на претходната, за што постојат големи камати.

За изградбата на автопатиштата, Горгиева кажа дека се проневерени 140 милиони евра и во време на владеење на ВМРО-ДПМНЕ изградени се само седум километри автопат.

Претседателот на Собранието, Талат Џафери, најави продолжение на седницата во 15.30 часот.


Десет загинати во хаосот на улиците во Венецуела откако Мадуро прогласи победа


Каракас, 31 јули, 2017 - 9:55 (META) 

Претседателот на Венецуела, Никола Мадуро, прогласи победа на изборите за Уставотворно собрание. Повеќе од осум милиони гласачи, или 41,53 отсто вчера гласаа за членови на Уставотворното собрание на Венецуела, а изборниот процес го обележа насилство во кое загинаа десет лица, соопштија властите на земјата.

– Имаме Уставотворно собрание – рече Мадуро, обраќајќи се пред стотина приврзаници во Каракас, откако изборната комисија соопшти дека излезноста на граѓаните изнесува 41,5 отсто.

Опозицијата, сепак, наведува дек изленоста била околу 12 отсто, додавајќи дека власта е подготвена да соопшти дека на изборите гласале 8,5 милиони гласачи.

– Тоа е најголемата победа што револуцијата ја оствари во својата 18-годишна историја – рече Мадуро.
За време на гласањето, демонстрантите се судрија со безбедносните сили, додека голем број Венецуелци го бојкотираа гласањето за Уставотворно собрание, за кое левичарскиот претседател Мадуро вети дека ќе почне „нова ера на борба“ во земјата која е погодена од криза.

Според наводите на властите, при судирите 10 лица загинаа, поради што вчерашниот ден е најсмртоносен откако во април почнаа протестите во земјата.

Мадуро, кој меѓу мнозинството Венецуелци е непопуларен поради економскиот колапс за време на четиригодишното претседателствување, инсистираше на вчерашното гласање да се оформи собрание кое ќе има широки овластувања, и покрај заканите од САД за санкции и повеќемесечните протести на опозицијата.

Критичарите предупредуваат дека собранието би му овозможило на Мадуро да го распушти Конгресот со кој раководи опозицијата, да ги одложи идните избори и да ги измени изборните правила за да го спречи тргањето на социјалистите од власт во оваа своевремено просперитетна земја членка на ОПЕК.


Заев: Договорот за добрососедство со Бугарија е во согласност со националните интереси


Скопје, 26 јули, 2017 - 15:34 (META) 

Договорот за добрососедство со Бугарија е во согласност со националните интереси и овој голем чекор одговора на интересите на народите на Македонија и на Бугарија, а е одраз на новиот дух на политики од генерација политичари кои градат мостови, а не уриваат, сплотуваат граѓани, а не ги делат, изјави премирот Зоран Заев на презентацијата на договорот за добрососедство со Бугарија во Владата.

Тој рече дека договорот ќе биде објавен на веб-страницата на Владата и дека така секој ќе може да го види.

– Договорот е основа за добрососедство и за пријателство, за поврзување на патната и на гасната инфраструктура. Тој претставува унапредување на размената на стоки и на услуги и на капиталните инвестиции. Трговската размена со Бугарија сега изнесува 500-600 милиони евра, зошто да не биде една милијарда евра? Македонија во Трст доби 70 милиони евра за изградба на Коридорот 8 – изјави Заев.

Премиерот рече дека со договорот двете држави се обврзуваат заеднички да се борат против говорот на омраза и национализмот, за спречување на недобронамерната пропаганда од страна на институции и на агенции. Прашан дали тоа значи дека ќе се казнуваат медиуми и личности што ќе прават вакви дејства, Заев рече дека во такви случаи Владата ќе се огради од ставовите на други лица и институции.

Тој додаде дека значајно е што Бугарија цврсто го поддржува приемот на Македонија во ЕУ, без условувања, и дека таа ќе го пренесе своето искуство во процесот на европски интеграции.

– Европската индина им е потребна на Република Македонија и на регионот. Европската Унија на самитот во Трст препозна во Македонија мотор за развој на регионот – рече Заев.

Тој изјави дека потпишувањето на овој договор е финализирање на процесот почнат во 2009 година, од кога комисиите на Македонија и на Бугарија имале 10 меѓусебни средби.

Во однос на делот на договорот со кој Македонија потврдува дека нема да се меша во внатрешните работи на Бугарија заради заштита на статусот и на правата на Македонците во Бугарија кои не се државјани на Македонија, Заев рече дека македонскиот Устав е демократски и дека со последните негови измени отстранет е членот што овозможува земјата да се грижи за македонското малцинство во другите земји.

Премиерот очекува конструктивна дебата во Собранието и опозицијата да учествува во заокружувањето на процесот и да даде поддршка на договорот. На прашање дали за договорот е консултиран претседателот Ѓорге Иванов, Заев рече дека градат добра кохабитација и дека и пред посетата на Бугарија имале двочасовна средба, како и дека министерот за надворешни работи, Никола Димитров, редовно има средби и состаноци со претседателот.

На новинарско прашање во врска со јазикот на кој ќе биде потпишан договорот, Заев појасни дека тој ќе биде составен во два примероци, на македонски и на бугарски јазик, и дека во таква форма ќе биде потпишан од двете страни. Тој истакна дека договорот станува обврзувачки откако ќе биде потпишан, но рече дека истиот, иако тој тоа не би го сакал, може да го раскине која било од страните со испраќање писмено известување. Важноста на договорот, во таков случај, престанува една година од датумот на приемот на известувањето.


Ако се оди според планот, на 6 август Џафери ќе ги распише локалните избори


Скопје, 21 јули, 2017 - 12:22 (META) 

Локалните избори ќе бидат распишани на 6 август ако нема промени во планот тие да се одржат на 15 октомври, вели претседателот на Собранието, Талат Џафери, во интервју за државната новинска агенција МИА.

– Ако вака останат работите, 6 август е краен рок да ги распишам локалните избори и со тоа да почнат да течат роковите и организацијата во однос на локалните избори, а потоа би работеле до почетокот на предизборната кампања до 25 септември. Во тој период би ги разгледале новите предлози на Владата што ги најавува, околу 30 закони, дел од предлог-законите што се процедура од пратениците, би ги завршиле преостанатите седници односно точки, главно извештаи на соодветни институции и тоа од прилика би била динамиката до локалните избори – рече Џафери.

Џафери е задоволен од тоа што досега е направено во Собранието и покрај последиците од настаните од 27 април и додава дека Собранието сега станало поотворено, потранспарентно. Тој оцени дека успева да ја менаџира ситуацијата во контекст на односот меѓу владејачкото мнозинство и опозицијата.

– Мислам дека е направен чекор и опозицијата да ја види својата улога и придонес и мислам дека сме на добар пат тоа и да се дообработи – рече Џафери, додавајќи дека не би можел целосно да каже дека имало обид за опструирање, бидејќи е во рамки на она што може да се смета за дозволено однесување на опозицијата во смисла на потребата за дебата.


ФРОДЕМ: Опозицијата се сведе само на негирање


Скопје, 16 јули, 2017 - 15:32 (META) 

Фронт за демократска Македонија (ФРОДЕМ) ги повика добронамерните членови на ВМРО-ДПМНЕ „во наредниот период да се воздржат од вплеткување во манипулативни игри на Груевски и на врхушката за спасување на сопствената криминална кожа“.

„Опсесивниот, секојдневен притисок за вклучување на партиски лица во јавните реакции не е ништо друго туку „димна завеса“ која треба да создаде привид на божемна опозициона активност. А која е, всушност, опозиционата активност: негирање, негирање и негирање. Тоа не е став на опозиција, туку став на очајници кои не сакаат ништо друго освен трескавично, папагалско промовирање на зададени пропагандни пароли. Но, таа импотентност не нè загрижува. Нас реално нè загрижува фактот што зад параванот на партиските соопштенија, на божемната партиска активност, се врши активно попречување на правдата, односно безобѕирно криминално бранење на огромниот организиран криминал кој досега е направен“, се вели во соопштението од ФРОДЕМ.

Од партијата порачуваат дека власта мора да „го демонтира режимот“ или да им овозможи на вонпартиските професионалци да ги вратат нормалноста и редот во државата.


По две години опозицијата ќе може да предлага јавен обвинител, вели Заев


Скопје, 5 јули, 2017 - 13:48 (META) 

Премиерот Зоран Заев денеска го оцени како лицемерен предлог-законот на ВМРО-ДПМНЕ, јавниот обвинител да се избира по предлог на опозицијата.

– Ќе го дефинирам предлогот како мало лицемерие. Ние ветивме дека по втората година, на предлог на опозицијата ќе се избира јавен обвинител. Сега на Македонија ѝ треба да биде исправена пред реформите и најдобриот експерт што можеме да го најдеме дома да биде државен обвинител – рече Заев.

Тој истакна дека новата влада треба да покаже на дело дека навистина е за враќање на правната држава и дека очекува експертско решение за оваа функција.


Заев: До 1 јули ќе биде готов „Патоказот“ што ќе нè одведе до преговори за членство во ЕУ


Скопје, 26 јуни, 2017 - 17:29 (META) 

Владата работи на акциски план наречен „Патоказ“, што треба да се финализира до 1 јули, а во кој се опфатени сите предвидени реформи во клучните области како владеењето на правото, професионални државни институции, независни регулаторни тела и слободни медиуми. Ова го истакна премиерот Зоран Заев на заедничката прес-конференција со еврокомесарот за проширување и за добрососедска политика Јоханес Хан по седницата на Владата посветена на реформските приоритети на која учествуваше и Хан.

– Дефиниравме краткорочни, среднорочни и долгорочни реформски цели со кои имаме намера наесен Европската комисија да ја отстрани условеноста на препораката за почеток на претпристапните преговори, а во текот на следната година земјите членки на Еврппската Унија да ги фокусираме на дискусија за утврдување датум за почеток на претпристапните преговори на ЕУ со Република Македонија – рече Заев.

Премиерот истакна дека реформскиот процес Владата ќе го води инклузивно и ја повика парламентарната опозиција да се вклучи во овој процес.

– Овој чекор очекувам дека ќе биде мотивација за сите граѓани, експерти, за граѓанското општество, опозицијата. Прифатете ја подадената рака на Владата и заедно сите да се вложиме во реформскиот процес. Ние како Влада покажавме зрелост, очекуваме одговорност од сите, затоа што целта ни е заедничка – позитивни промени и членство на Македонија во ЕУ и во НАТО – истакна премиерот Заев.

Еврокомесарот Хан на прес-конференцијата рече дека неговата порака до сите денеска е да се концентрираат на задачите што претстојат.

– Сите одговорни актери, тука ја вклучувам и опозицијата и судството и сите релевантни институции, треба да работат на создавање модерно општество кое добро ќе функционира, држава која ќе работи во интерес на сите граѓани без оглед на нивната припадност. Ова попладне ќе се сретнам со лидерите на сите политички партии кои се застапени во Собранието. Се надевам дека сите ќе одиграат конструктивна и позитивна улога и дека за разлика од минатото, овојпат ќе имаме дебата што ќе се води во рамките на институциите, односно во рамките на Собранието – рече Хан, додавајќи дека ја поздравува подготвеноста на Владата да работи заедно со опозицијата на прашањата поврзани со интеграцијата на земјата во ЕУ.

Хан посочи дека од утре ќе почнат да пристигнуваат првите експeрти кои ќе ѝ помагаат на Владата со реформите, меѓу кои е и германскиот експерт Рајнхард Прибе. Тој нагласи дека реформите не треба да се спроведат само за да се задоволат високи официјални претставници на ЕУ, туку за да се подобрат условите за живот на граѓаните и ги пофали позитивните чекори кои, како што рече, ги направиле премиерот Заев и шефот на македонската дипломатија, Никола Димитров, со нивните колеги во Бугарија и во Грција, бидејќи од суштинска важност е да се воспостават добрососедските односи.

Прашан околу проблемот за името со Грција, Заев рече дека оти е убеден дека постои решение за сè и дека „голем дел од работите зависат од нас, но овде ни е потреба и помошта и поддршката на соседите“.

– Верувам дека постои решение да се одблокираат процесите, а при тоа интензивно да се фокусираме да изнајдеме решение и на ваков сериозен проблем. Амбиентот мора да биде создаден во двете земји. Јас барам поддршка од граѓаните, владата и од парламентот на Грција, Македонија конечно да може да го направи исчекорот кој го чекаме од 2005 година во поглед на интеграциите во ЕУ и во НАТО – рече Заев.

Хан во врска со прашањето за името рече дека тоа е прашање на кое треба да работат двете земји, додавајќи дека позитивната препорака од Комисијата е тесно поврзана со напредокот што ќе се постигне во спроведувањето на реформските приоротети.

Одговарајќи на новинарско прашање за унапрадувањето на Законот за употреба на јазициите, Заев рече дека тоа е дел од приоритетите кои се составен дел на оваа агенда.

– Тоа е едно од важните прашања, со кои сакаме да ги затвориме поглавјата што произлегуваат од Рамковниот договор. Штом ќе биде сè подготвено, ова прашање ќе биде отворено за дебата, да се дискутира и да бидат донесени одлуки. Ја повикувам и сегашната опозиција, која најави позитивен однос кон граѓаните од албанско етничко потекло, конечно сите да донесеме заедничка консензуална одлука и по ова прашање. Впрочем, претходната влада двапати направи унапредување на законот за употреба на јазициите – рече Заев.


Хан пред посетата на Скопје: И Владата и опозицијата да се фокусираат на реформите


Брисел, 23 јуни, 2017 - 17:17 (META) 

Новата Влада и опозицијата треба да се фокусираат на имплементацијата и на реформските приоритети и на Договорот од Пржино за да ја вратат Македонија на патот кон Европската Унија, се вели во денешното соопштение на еврокомесарот за проширување и за соседска политика, Јоханес Хан, во пресрет на неговата посета на земјава, закажана за понеделник.

„Земјата, со континуирана помош од Европската Унија, конечно ја надмина политичката криза преку добро спроведени избори и со формирањето ја новата Влада. Сега новата Влада, заедно со опозицијата, треба да се фокусира на имплементацијата на реформските приоритети и на Договорот од Пржино за да се врати земјата на нејзиниот пат кон ЕУ-интеграцијата. Реформите мора да бидат спроведени за да се подобри животoт на луѓето, да се работи на стабилноста, напредокот и правдата. Затоа ѝ дадов задача на групата на независни правни експерти, предводена од Рајнхард Прибе, да ѝ помогне и да ја советува новата влада за прашањата за системското владеење на правото“, напиша Хан.

Еврокомесарот в понеделник доаѓа во земјава на разговори за владините реформски планови и за да ја повтори поддршката на ЕУ во процесот на спроведување на потребните реформи за членство на земјава во Европската Унија.

Хан во Скопје, како што стои во соопштението, предвидено е да има средби со премиерот Зоран Заев, со новата влада и со политичките лидери во земјава.