Филипче повторно би ја вакцинирал внуката, антиваксерите и опозицијата пласирале лажна вест


Скопје, 29 јануари, 2019 - 20:45 (META) 

За обвинувањата дека ја лаже јавноста со вакцинирањето на неговата внука, министерот за здравство Венко Филипче во емисијата „Топ тема“ на телевизијата „Телма“ рече дека се „груба манипулација на опозицијата“.

– Жал ми е што ДПМНЕ посегна по груба манипулација да ја смени вистината. Стануваше збор за потег со кој сакав да покажам дека тоа што го зборувам, го мислам. Во таа смисла беше вакцинирањето на внуката, таа вакцина што ја прими во нога е ДТП вакцина, а кога ќе дојде време, ќе се вакцинира и со МРП. Кога има обид да се пласира лажна вест, мора сите да се свесни сите дека станува збор за многу сензитивно прашање и дека со таквите обвинувања, се врши сериозна штета на здравствениот систем, на и онака расклатената доверба во здравствениот систем. Се` уште сметам дека личниот пример е одличен начин да се презентира во јавноста дрка тоа што го зборуваме, го правиме. Ние во тие политики навистина веруваме. Реакциите за вакцинирањето на мојата внука ги немаше веднаш по објавата на веста, тие дојдоа дури отпосле. Стојам на тоа дека повторно би го направил истото. Антиваксерите и политичарите посегнуваат по тоа да ја извртат вистината, но треба да знаат дека на тој начин сериозно се руши довербата во системот, а тоа е на штета на јавното здравје – рече Филипче.


Со 79 гласа поминаа измените на Законот за аудио и аудиовизуелни медиумски услуги


Скопје, 28 декември, 2018 - 14:30 (META) 

Со 79 гласа „за“, на 78-та седница на Собранието, денеска беше изгласан предлог-законот за изменување и дополнување на Законот за аудио и аудиовизуелни медиумски услуги.

За законот гласаа и пратениците од ВМРО-ДПМНЕ и од коалицијата, а Лилјана Затуроска порача дека опозицијата ќе поднесе предлог за измена и дополнување на денеска изгласаниот закон, кого сепак го нарече „почеток на неопходните реформи“.

Здружението на новинарите на Македонија денеска го поздрави договорот на власта и опозицијата да се донесе овој закон.


Шест амнестии за 27 години


Скопје, 19 декември, 2018 - 10:11 (META) 

Лавина реакции во македонската јавност предизвика вчерашното едногласно усвојување на Законот за амнестија за собраниските настани од 27 април за кој 95 пратеници од власта и опозицијата гласаа „за“.

Главното прашање е дали политичарите со користењето на амнестијата како механизам го подриваат правниот систем во Македонија во зависност од моменталните политички интереси. Искуствата покажуваат дека во нашата земја често се посегнува по амнестијата.

Од 1991 година до вчера шест пати се усвојувани слични закони што значи дека за 27 години во просек на секои 4,5 години има амнестија.

Првиот закон за амнестија бил донесен во 1991 година, кога биле амнестирани затвореници и лица осудени со правосилни пресуди, но кои не отпочнале со издржување на затворските казни.

Втората амнестија е донесена во 1999 година, а се однесува на сторителите на кривични дела со кои била предизвикана верска, национална и расна омраза. Овој закон беше дел од политичкиот договор меѓу тогашните коалициски партнери во владата, ВМРО ДПМНЕ и ДПА, со кој биле ослободени градоначалниците на Тетово и на Гостивар, Ајладин Демири и Руфи Османи, како и учесниците во обидот за отворање на Универзитетот со наставана на албански јазик во Мала Речица.

Третиот закон за амнестија е усвоен во 2002 година, како дел од Охридскиот рамковен договор. Со него се ослободени од гонење и од затвор учесниците во конфликтот од 2001 година.

Во 2003 година е донесен четвртиот закон за амнестија, кој е ревидиран во 2004 година и ги опфатил граѓаните кои ја одбегнувале воената обврска и самоволно се оддалечиле од вооружените сили.

Собранието на 15 јануари, годинава по петти пат изгласа закон за амнестија со кој им се намалува затворската казна на осудениците. Со овој закон беа ослободени од издржување на затворска казна осудените лица на кои им е изречена казна до шест месеци. Оние што добиле над шест месеци, се ослободуваат од издржување на 30 отсто од целокупната казна. Амнестијата не се однесува на лицата осудени со правосилна пресуда за: доживотен затвор, за кривично дело убиство, за силување и педофилија, за тероризам и кривични дела против државата, за кривични дела против јавниот ред и мир, за кривични дела против човечноста и меѓународното право.

Пратениците вчера како дел од договорот за помирување меѓу власта и дел од опозицијата по шести пат усвоија закон за амнестија со кој се ослободуваат од кривично гонење, се запираат поведените кривични постапки и целосно се ослободуваат од издржување на казната затвор лицата за кои постои основано сомневање дека сториле кривично дело поврзано со настаните во Собранието на Република Македонија од 27 април 2017 година.

Одредбите не се однесуваат за лица осомничени, обвинети, правосилно осудени како и лица кои издржуваат казна затвор за настаните поврзани и во врска со настаните во Собранието на Република Македонија од 27 април 2017 година за кои постои основано сомнение дека учествувале во подготвување или организирање на настаните во Собранието на Република Македонија или се правосилно осудени, а кои до денот на влегување во сила на овој закон сториле кривично дело „Здружување заради непријателска дејност” од член 324 став 1 од Кривичниот законик, лица со прикриен идентитет кои употребиле физичка сила, лица кои сториле насилство, лица кои неовластено носеле оружје или распрскувачки материјали и лица кои постапиле спротивно на службените овластувања при вршење на кривичното дело „Терористичко загрозување на уставниот поредок и безбедноста” од член 313 од 7 Кривичниот законик, кривичното дело „Убиство” од член 123 од Кривичниот законик, кривичното дело „Насилство” од член 386 од Кривичниот законик.


СДСМ: Мицкоски ја потврдува поврзаноста на ВМРО-ДПМНЕ со насилството од 27 април


Скопје, 10 декември, 2018 - 10:36 (META) 

За владејачката СДСМ е неприфатливо барање на Христијан Мицкоски да се формира независно тело кое ќе ги преслуша снимките на судиите и обвинителите во изминатите две години.

„Мицкоски ги потврдува сведоштвата за сериозна поврзаност на насилниците со ВМРО-ДПМНЕ во организацијата и координацијата на насилството од 27 април. Преку нелогични, несериозни и неосновани барања, интерпелации, измислици, Мицкоски се обидува да ги закочи реформите, да ги блокира процесите за интеграција на Македонија во НАТО и ЕУ. Не му беа доволни 11 години прислушување на Мицкоски па бара нови снимки да преслушувале „експертите“ од ВМРО-ДПМНЕ, одговори вчера СДСМ.

Мицкоски своите вкупно шест барања ги упати вчера од Кочани, каде ВМРО-ДПМНЕ одржа протест.

„Веднаш да се формира независно тело предводено човек предложен од опозицијата, коешто ќе ги преслуша, анализира, систематизира сите материјали коишто се собрани  изминативе две години како резултат на црниот Вотергејт на Заев, односно прислушувањето на сите судии и обвинители. Да ги видиме нарачаните пресуди  за поткуп, да ја видиме нарачаната пресуда за „Глобал“ , да видиме како нарачувате обвиненија за луѓето од 27 Април, да видиме како нарачувате обвиненија за ВМРО-ДПМНЕ, побара претседателот на ВМРО-ДПМНЕ од Кочани.

Тој рече дека после секој протест ќе има нови барања и побара оставки од министрите Спасовски и Димитров.

– Итна и неотповиклива оставка на министерот којшто својата нација ја нарече искомплексирана нација. Министерот кој благодарение на ова нација која го полни буџетот зема плата, ужива во привилегиите да се школува неговото семејство надвор од Република Македонија со стипендиите кој овој народ ги обезбедил. Итна и неотповиклива оставка на министерот за терор и прогон т.е. полиција, Оливер Спасовски затоа што откако е министер само порази шпиунски акции, претреси и омаловажувања на нашите браќа и сестри, граѓани на Република Македонија – рече Мицкоски.

Тој побара веднаш да сопре иницијативата од Владата за покачување на даноците „и да престане осиромашувањето на бизнисот и на граѓаните.“ Побара и соодветни мерки за решавање на проблемот со загадувањето на воздухот.

– Ги лажевте граѓаните испентарени на падините на преубавото Водно и велевте само да падне режимот и ќе започне да дува алпски воздух. Овде во Кочани им велевте на луѓето најзагаден град сте, многу скара вртите па затоа ви е загаден градот – рече Мицкоски, кој исто така побара „почитувања на јасно изразената волја на народот на референдум“.


Расправата за предлог-буџетот за 2019 продолжува во матичната собраниска комисија


Скопје, 5 декември, 2018 - 9:49 (META) 

Комисиската расправа за предлог-буџетот продолжува во матичната Комисија за финансирање и буџет во Собранието.

Предлог-буџетот за 2019 година тежи 3,7 милијарди евра, вкупните приходи се проектирани на 210,8 милијарди денари, (3,4 милијарди евра), а порастот на економијата 3,2 проценти на домашниот бруто-производ (БДП).

Со буџетот за 2019 година се предвидува намалување на буџетскиот дефицит, кој за следната година е проектиран на 2,5 проценти од домашниот бруто-производ (БДП).Во предлoг-буџетот за 2019 година предвидена е реформа во Фондот за пензиско осигурување, односно намалување на вкупниот трансфер.

Нови 10 проценти повисоки плати се предвидени за лекарите специјалисти од јануари 2019 година, а нови пет проценти повисоки плати од септември 2019 година за сите вработени во јавното здравство. Пораст на платите од пет проценти се предвидени и за просветните работници, вработените во градинките и за јавната администрација.

За капиталните инвестици, кои секоја година се кратат со ребаланс, предвидени се 25,7 милијарди денари.

Согласно фискалната стратегија, јавниот долг за 2019 година ќе изнесува 54,2 проценти и ќе се финансира од домашниот и странскиот пазар на хартии од вредност, но не е планирано издавање на нова еврообврзница.

За пратениците на ВМРО-ДПМНЕ, буџетот е мегаломански, се собираат повеќе пари од граѓаните за власта да ги троши на луксуз, наместени тендери, криминални субвенции и иновации.


Српската опозиција прашува каква е улогата на Белград во бегството на Груевски


Белград, 15 ноември, 2018 - 13:05 (META) 

Опозициските Движење на слободни граѓани (ПСГ) и Граѓански блок 381 (ГБ381) денеска упатија прашање до власта во Србија каква е улогата на официјален Белград во бегството на Никола Груевски во Унгарија и дали е точно дека српскиот претседател Александар Вучиќ „незаконски наредил БИА тајно да го прифати Груевски и да го спроведе низ Србија“, мислејќи на српската агенција за безбедност.

ПСГ, чиј претседател е поранешниот јавен правобранител на Србија, Саша Јанковиќ, потсетуваат и дека советникот на шеикот Бин Зајед, Мухамед Дахлан, иако по него е распишана меѓународна потерница, добил српско државјанство и орден од Србија и дека режимот на Вучиќ му дал азил на романскиот тајкун Себастијан Гица, за кого меѓународна потерница распиша Романија поради сомнеж за повеќе кривични дела.

„Србија под власта на Српската напредна партија стана сигурна зона и фришоп за богати луѓе што бегаат од правдата во своите земји“, се додава во соопштението на двете движења.


Османи го претстави „планот 18“: Реформите мора да ги одделиме од дневната политика


Скопје, 31 октомври, 2018 - 15:05 (META) 

Вицепемиерот задолжен за европски прашања, Бујар Османи денеска ја презентираше содржината на реформскиот „план 18“ кој вчера беше усвоен од страна на Владата.

Османи истакна дека ова следи како континуитет по завршувањето на имплементацискиот период на „планот 3-6-9“.

– Имплементацијата на Договорот од Преспа претставува една од најважните обврски преземени од наша страна. Во следниот период очекувам зголемување на политичката поддршка и изградба на консензус за сите прашања кои се од наднационален интерес, меѓу кои е секако и имплементација на „планот 18“ – истакна Османи.

Тој ги наведе и клучните области на „план 18“: реформи на правосудството, на безбедносните служби, на јавната администрација како и борбата против организираниот криминал и корупција.

– Реформските приоритети дефинирани во овој „план 18“, покрај суштинското унапредување на општеството, претставуваат и клучен параметар преку кој ќе се мери успешноста на нашите европски интеграции – заклучи Османи.

Тој информираше дека во „планот 18“ се вметнати препораките од извештајот на Европската комисија, како и реформските обврски кои произлегоа од „планот 3-6-9“.


Бошњаковски: Владата сака амандманите да ги дефинира со опозицијата, заради консензус


Скопје, 17 октомври, 2018 - 13:54 (META) 

Владата ќе пристапи на изработка на уставните амандмани дури откако ќе заврши работата во Собранието со изгласување на потребата за нивно изготвување и најдобро е тие да се подготват заедно со опозицијата односно да се постигне национален консензус, рече владиниот портпарол Миле Бошњаковски на денешната прес-конференција.

– Потребно е да се изгради национален консензус бидејќи, како што вели и премиерот, пресериозна е работата. Амандманите ќе ги прави Владата и најдобро е да се подготват заедно со опозицијата односно да се постигне национален консензус во духот на Договорот од Преспа – рече Бошњаковски на новинарско прашање.

Тој објасни и дека на вчерашната седница Владата донела  препорака до Уставниот суд да не ја прифати иницијативата поднесена од адвокатската канцеларија на адвокатот Еленко Миланов, со која се бара одговорноста за неправилности во јавните набавки да се префрли врз комисиите за јавни набавки и функционерите да бидат ослободени од каква било одговорност.

– Владата му предложи на Уставниот суд да не ја прифати иницијативата со цел да се оневозможи избегнување одговорност за сторени кривични дела од страна на високи функционери од претходната влада за кои во моментов се води постапка од СЈО – рече Бошњаковски.

Тој појасни дека истовремено со иницијативата се бара и предметите кои се водат во овој момент, а се однесуваат на кривични дела поврзани со злоупотреба на службената положба и овластувње, да бидат запрени сè додека Уставниот суд не се произнесе по неа.

– Ова е неприфатливо во ниту една форма. Амнестија во Република Македонија нема да има за кој било што се огрешил од законот без оглед на етничката или политичката припадност – рече владиниот портпарол.


Заев: Деновиве ќе се знае дали ќе има договор со опозицијата или ќе се оди на избори 


Скопје, 1 октомври, 2018 - 13:49 (META) 

За неколку дена ќе се знае дали постои амбиент за постигнување договор со опозицијата за двотретинско мнозинство кое е потребно за да се изгласаат уставните измени во Парламентот кои произлегуват до Договорoт со Грција.

Ова денеска го истакна премиерот Зоран Заев во изјава дадена по свечениот час на новозапишаните студенти на ФИНКИ.

Заев истакна дека денеска е ден за сублимирање на сите анализи и планови и додаде дека од утре ќе почнат разговори. Според него, постои капацитет за одржување предвремени избори кои се последна опција доколку не се постигне договор.

– Секако дека има капацитет за избори. Законот и Уставот ги предвидуваат следните чекори. Но, се надевам дека ќе успееме да се договориме. Процесите не можат да бидат замрзнати и да стојат на место, работите мора да се движат напред – рече премиерот.

Доколку не се постигне договор и се оди на предвремени избори, според него, изборите ќе се случат брзо. Постои можност тие да се организираат до крајот на ноември, временска одредница која ја спомена и вчера. Тој напомена оти во тој целиот тој процес мора да се мисли и на другите рокови, на пример на изборите за Европскиот парламент кои ќе се одржат во мај следната година, а на кој ќе учествува и Грција.


Штипската опозиција обвинува дека граѓанските пари завршија во партиски џебови


Штип, 4 септември, 2018 - 10:17 (META) 

Поделбата на близу милион денари од буџетот на Општината Штип на седум граѓански организации, ги спротивстави ВМРО-ДПМНЕ и СДСМ. Опозициската ВМРО-ДПМНЕ обвини дека пари добила организација чиј претседател беше кандидат за советник од листата на СДСМ на последните локални избори, а две од седумтте организации – добитници, имаат исто лице во управувачката структура.

Со одлука на Советот на Општината Штип, за прв пат ќе се финасираат седум проекти на граѓански организации и фондации, со цел локален економски развој. На Општината и требаше половина година за да одлучи кому да ги додели средствата, додека неофицијално се говореше за лобирања и притисоци. Поради тоа, имаше и неофицијална најава дека повикот за финансирање ќе биде поништен.

Повикот беше распишан на први март годинава, по методологија утврдена од Општината. На последната седница на Советот во петокот, мнозинството и официјално ја прифати одлуката за оваа поделба од Комисија составена од претставници на Општината и граѓанскиот сектор.

Љубе Здравков од ВМРО-ДПМНЕ побара отчет за начинот на кој е одлучувано кои проекти да бидат прифатени и праша дали добија само тие организации што ги застапуваат ставовите на СДСМ.

– Дали е во ред да се доделуваат средства на лице кое беше на советничката листа на СДС, лице кое веќе неколку пати во текот на годината има добиено средства од Општина Штип за настани кои се слабо посетени, а Советот на Општина Штип нема увид во начинот на трошење на тие средства и лице кое преку група на граѓани остварува свои лични интереси? И дали при доделување на средства на две организации, нема судир на интереси на едно лице, кое во едната организација е претседател, а во другата организација, заедно со целото семејство е во Основачко собрание? – рече Здравков на прес-конференција.

Пари од општинскиот буџет доби „Македонски Егеј“, на чие чело стои Јордан Тунев. Тој на последните локални избори беше дел од советничката листа на СДСМ , што резултираше со протест на членовите на Здружението, кои тврдеа дека се против неговата кандидатура за советник.

Реплицираше на говорница советничката од СДСМ Маријана Рогожарска, според која, првичната одлука за доделување на средства за граѓанските организации не е на Советот, ниту градоначалникот, туку на формираната Комисија, во која членуваат и надворешни лица.

– Изборот го направи Комисијата, по методологија што беше презентирана од страна на лицата, кои го доставија до Советот барањето за финансирање на проекти од Општината и Советот ја усвои истата. Ако бевте на комисии ќе знаевте дека изборот не го вршат само лица од Општината , туку и надворешни членови, од кои секој посебно бодираше – рече Рогожарска која е претседател на Комисијатаза финансирање и буџет.

За начинот на избор на проекти објасни и членот на комисијата за избор, Никола Илиев, според кого, рангирањето се извршило според бодовите на секој член од оваа комисија.

Советниците на ВМРО-ДПМНЕ останаа на искажаните сомневања и гласаа против оваа одлука. Сепак, мнозинството одлучи да додели пари на проекти на „Македонски Егеј“, „Гласен Текстилец“, „Виножито“, „Организација на жени“, „Бизнис информативен и консултантски центар“, и „Черења“.

Досегашните локални гарнитури парите за граѓанските проекти не ги доделуваа, со образложение дека нема квалитетни идеи, без при тоа, да распишат повик за финансирање.