!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев: Очигледно е дека опозицијата ќе треба да ги промени ставовите по изборниот резултат


Скопје, 16 октомври, 2017 - 14:13 (META) 

Резултатите на локалните избори не се добри, туку се одлични, изјави премиерот и лидер на СДСМ, Зоран Заев, одговарајќи на новинарско прашање на денешната заедничка прес-конференција со црногорскиот премиер Душан Марковиќ.

Заев истакна дека тие се дополнителен мотив за Владата и дека претставуваат показател дека опозицијата треба да ги промени ставовите од изминатите месеци.

– Граѓаните дадоа поддршка во кој правец ќе се движи Македонија и ставија крај на национализмот. Порака стигна и до опозицијата. И во Источна и во Западна Македонија покажаа дека национализмот не поминува. Опозицијата очигледно треба да ги промени ставовите од изминатите месеци – рече Заев, наведувајќи дека не сака да се меша во внатрешните работи на опозицијата и додаде дека силна опозиција води до поодговорна власт.


Хојт Ји: За интеграцијата во НАТО и во ЕУ е клучно да се утврди кој прислушувал


Скопје, 3 октомври, 2017 - 11:08 (META) 

Многу е важно да се утврди одговорноста за нелегалното прислушување и за наводните владини злоупотреби во врска со него, бидејќи тоа ќе биде клучен чекор за Македонија да ги увери НАТО и Европската Унија, како и другите меѓународни партнери, дека е подготвена да се интегрира во тие организации. Ова го истакна заменикот помошник државен секретар на САД, Хојт Брајан Ји, во интервју за емисијата „360 степени“ на „Алсат-М“.

– Тоа е важно и за граѓаните на земјата да се уверат дека е воспоставено владеење на правото. Ги повикуваме сите политички партии, политички и владини лидери, членовите на Собранието, да сторат сè што можат да биде спроведена правдата, СЈО да ја добие потребната поддршка за да си ја заврши работата и да нема политички притисок врз обвинителите и судиите од инволвираните во утврдување на одговорноста. Тоа треба да се направи во разумен рок и да не се одолжува – вели Хојт Ји.

Според него, клучно за државата е да се направат потребните реформи во судството, кои треба да овозможат независно судство, ослободено од политички притисок.

– Тоа е важно за граѓаните, за интеграцијата во НАТО и во ЕУ, но и за привлекување странски инвеститори – нагласува Ји.

Во врска со односите власт – опозиција, тој вели дека Македонија не може да си дозволи луксуз на постојани одложувања и опструкции од партиите. Според Хојт Ји, на секоја демократија ѝ е потребна силна влада, но и силна опозиција која нема само да блокира предлози со кои не се согласува, туку и ќе нуди алтернативи.

Тој во интервјуто се осврна и на влијанието на Русија во регионот на Западен Балкан. Според него, Македонија треба да се спротивстави на руското влијание и на дезинформациите што пристигнуваат од Москва.

– Гледаме дека Русија се обидува да ја обесхрабри интеграцијата на земјите од Западен Балкан во НАТО и во ЕУ. Важно е Македонија да работи со нас, со ЕУ и со партнерите во регионот, да продолжи да се противи на малигните влијанија од кој било извор, да продолжи да ја зајакнува независноста на медиумите, важно е да има силни, професионални, независни медиуми кои ќе се спротивстават на дезинформациите од Русија или други извори – изјави Хојт Ји.


Собранието денеска ќе ја продолжи расправата за Законот за употреба на јазиците


Скопје, 23 септември, 2017 - 11:29 (META) 

Собранието денеска напладне ќе ја продолжи 15. седница на која на дневен ред е законот за употреба на јазициите. Предлог-законот е со европско знаменце, односно треба да биде донесен по скратена постапка.

Расправата по оваа точка на претходните продолженија на седницата се одвиваше во тензична атмосфера, бидејќи пратениците на опозициската ВМРО-ДПМНЕ сметаат дека законот е неуставен, дека е резулатат на политички договор на владејачката коалиција и дека нема аргументи за законот да е обележан со европско знаменце.

Од владејачкиот СДСМ, пак, велат дека предложениот закон за употреба на јазиците не е противуставен, туку е во согласност со членот 5 од Уставот на Република Македонија и ја унапредува употребата на сите јазици на немнозинските заедници и отвора шанса за изградба на едно општество за сите.


Мнозинството во Собранието ги отфрли законите предложени од опозицијата


Скопје, 12 септември, 2017 - 21:18 (META) 

Собранието попладнево на 13. седница не ги прифати законот за приватизација и закуп на градежно земјиште во државна сопственост и предложените измени на Законот за водостопанство, предложени од пратениците на опозициската ВМРО-ДПМНЕ.

Предложениот закон за приватизација и закуп на градежно земјиште во државна сопственост, според предлагачите, требаше да овозможи граѓаните што досега не успеале да си ги приватизираат своите градежни земјишта, сега да го направат тоа. Пратениците од мнозинството се спротивставија на предложеното законско решение, затоа што во него не се предвидува временска рамка во која граѓаните треба да го направат тоа.

Од опозициската ВМРО-ДПМНЕ го обвинија СДСМ дека со одбивањето на законот ги ставаат партиските интереси пред тие на граѓаните. Координаторот на ВМРО-ДПМНЕ, Илија Димовски, од говорницата изрази чудење што пратениците од ДУИ сега не го поддржуваат законот, иако додека биле во парламентарно мнозинство со ВМРО-ДПМНЕ неколкупати го гласале законот.

Васко Ковачевски од СДСМ рече дека неприфатливо е законско решение во кое не се дадени временски рокови и дека владата подготвува решение за овој проблем.

Со 49 гласа „против“ и 29 „за“ беа отфрлени на прво читање предложените измени на Законот за водостопанство.

Со измените, предложен од пратениците на ВМРО-ДПМНЕ, се бараше АД „Водостопанство“ да не ги презема системите за наводнување кои се на опфат помалку од 50 хектари и кои земјоделците сами, на сопствено земјиште и со сопствени средства, ги изградиле.

Од СДСМ истакнаа дека предложеното решение со ништо не придонесува земјоделците да добиваат повеќе вода за наводнување и дека со нив се задоволат интересите само на мала група земјоделци. Од владејачката пратија истакнаа дека во земјава има многу системи за наводнување што не се регулирани, односно околу 50.000 хактари и дека водостопанските претпријатија покриваат 30.000 хектари.


Заев: Постојат реални можности да добиеме препорака, а потоа и датум за преговори со ЕУ


Скопје, 7 септември, 2017 - 20:42 (META) 

Премиерот Зоран Заев, во обраќањето пред зградата на Владата по повод прославата на 8 Септември – Денот на независноста, рече дека во Македонија има одговорни политичари кои знаат што им е потребно на граѓаните, но има и свесни граѓани кои знаат што ѝ е потребно на државата.

Тој додаде дека од земја „генератор на криза“, Македонија е претворена во „мотор на развој на регионот“.

– Постојат реални можности Македонија да добие чиста препорака, а потоа и датум за преговори со Европската Унија. Реални се надежите и дека Република Македонија може да биде 30. членка на НАТО – рече Заев.

Тој додаде дека клучен тест се локалните избори, а Владата е определена да организира и да спроведе фер, демократски и регуларни избори, со нула толеранција за евентуални злоупотреби.

Според премиерот, друг тест се и реформите, за да се овозможи независно судство, објективни медиуми, независни институции, како и развој на добрососедски односи и регионална соработка.

Освен пред зградата на Владата, прослава по повод 8 Септември имаше и во Собранието, каде што претседателот на законодавниот дом, Талат Џафери, во обраќањето пред премиерот и пратениците рече дека пред 26 години биле поставени стратешките цели на државата, како на внатрешен така и на надворешен план.

– На внатрешен план, Македонија беше дефинирана како граѓанска држава која се темели врз индивидуалните и колективните човекови права и слободи, врз принципите на парламентарната демократија и владеењето на правото, почитувањето на приватната сопственост и пазарните законитости. Притоа, општество беше дефинирано како мултиетничко, мултикултурно и мултиконфесионално. На надворешен план, како приоритетна стратешката цел беше поставена целосната интеграција во евроатлантските структури – рече Џафери.

По повод стоте дена од конституирањето на Собранието, тој додаде дека ова парламентарно мнозинство „има храброст, волја, знаење и капацитет да направи значајни чекори напред во остварувањето на тие стратешки цели“.

– Секако дека во овие процеси очекувам свој придонес да даде и опозицијата, со аргументирана критика, меѓутоа и со конструктивни предлози. А мнозинството е должно да создаде услови за опозицијата да може сето ова да го артикулира преку институциите на транспарентен начин пред јавноста – додаде Џафери.


Габриел: Опозицијата да не го блокира импресивниот старт на новата влада


Берлин, 6 септември, 2017 - 19:05 (META) 

Македонската влада направи импресивен почеток со поставувањето на своите приоритети на прашањата со соседите, на амбициозните реформски проекти и на позитивните чекори, истакнал министерот за надворешни работи на Германја, Зигмар Габриел, на денешната средба со шефот на македонската дипломатија, Никола Димитров, во Берлин, се наведува во соопштението на германското МНР.

Габриел нагласил дека тоа што е важно е што најавените реформи се спроведуваат и дека реформските процеси во Македонија повторно добиваат интензитет, како и дека само на тој начин Македонија ќе може да напредува на својот пат кон евроатлантска интеграција.

– Исто така, сакам да испратам апел до актуелната опозиција да не го блокира овој добар початок на новата влада и да не одбива конструктивно да соработува со неа, бидејќи сето ова нема да биде на сметка само на европската перспектива на земјата, туку и на граѓаните во земјата, кои се надеваат на видлив напредок и на подобрување во нивните животи – рекол Габриел.

Тој посочил дека Германија ја поддржува евроатланстаката перспектива на Македонија, но дека реформите мора да се спроведат бидејќи нема да има отстапки за време на процесот на пристапување кон ЕУ и кон НАТО.

– Германија ја поддржува евроатлантската перспектива Македонија – како и на другите земји од Западен Балкан. Ова го правиме политички, но исто така и практично, со совети и со акција. Пролетта, почнав иницијатива за нов поттик во рамките на Берлинскиот процес, кој постои од 2014 година. Задоволен сум што на самитот на Западен Балкан во јули во Трст, првите предлози можеа да бидат одобрени. Заедно со нашите партнери во Европската Унија работиме на интензивирање на нашата поддршка. Во исто време, сепак, нема да има отстапки за време на процесот на пристапување. Реформите треба да се спроведат – порачал Габриел.

Тој, како што се наведува во соопштението, на Димитров и на премиерот Заев им ги честитал првите 100 дена од формирањето на Владата.


Заев: ВМРО-ДПМНЕ манипулира со становите за бегалци поради страв од пораз на изборите


Велес, 2 септември, 2017 - 18:03 (META) 

Референдумите од неколку општини за изградба на станови за бегалци најавени за денот на локалните избори се политичка манипулација за одвлекување на вниманието на граѓаните во пресрет на изборите, изјави денеска премиерот Зоран Заев, како одговор на новинарско прашање при неговата посета во Велес.

– Македонија не е толку добра земја за бегалците да останат овде. Дај боже да е добра земја, тогаш ќе имаат аспирации да останат. Ова е политичка манипулација од страна на нашиот политички опонент, кој сака да го одвлече вниманието на граѓаните во пресрет на локалните избори. Тоа го прават затоа што се исплашени дека ќе ги загубат и општините – изјави Заев.

Премиерот рече дека ако преку мнозинството во поголемиот дел од општините биде спроведен референдум за забрана за отворање кампови во Македонија, на нив ќе гласа и СДСМ, со што 100 проценти ќе се покаже дека ќе нема кампови.


ВМРО-ДПМНЕ: СДСМ со игнорантскиот однос во Собранието сака да спроведе самоволие


Скопје, 2 септември, 2017 - 13:18 (META) 

СДСМ нема што повеќе да зборува за конструктивност на опозицијата бидејќи со нивниот игнорантски однос, неконструктивност и самобендисаност, единствено што сакаат да спроведуваат во Собранието е самоволие, се вели во реакцијата на ВМРО-ДПМНЕ во соопштението на СДСМ.

„ВМРО-ДПМНЕ за сето ова време, додека е опозиција, покажа максимална вклученост и иницијативност и даде до знаење дека сака да работи за подобро на граѓаните, а не да води политика на теснопартиски интереси во Собранието. Смешно е кога СДСМ се обидува да ја објасни итноста и брзањето за поднесените закони кога имаа доволно време да ги поднесат и преку дебата по редовна постапка досега ќе беа донесени. Сега им се брза со трите поднесени закони во Собранието бидејќи се ближат локалните избори, а немаат изработено ништо и повторно се користат со манипулациите и со тактиките што се препознатливи за СДСМ, додека ВМРО -ДПМНЕ поднесе низа закони кои доколку СДСМ имаше слух за потребите на граѓаните и дадеше поддршка, досега ќе беа изгласани и донесени“, се вели во партиското соопштение.

Од опозициската партија велат дека пратениците на ВМРО-ДПМНЕ, откако се опозиција, во Собранието на Република Македонија имаат поднесено низа законски решенија што произлегуваат од реалните потреби на граѓаните, но дека пратениците на СДСМ не нашле сила и храброст да покаже конструктивност.


Во воздушни напади во Сирија загинале 29 лица


Рака, 9 август, 2017 - 19:17 (META) 

Сириската опозиција соопшти дека изминатите два дена во воздушни напади на северот на Сирија, кој е под контрола на Исламската држава, загинале најмалку 29 лица.

Коалицијата предводена од САД се обидува повторно да воспостави контрола на Рака, а силите предводени од Курдите, моментно контролираат половина од тој сириски град.

Опсерваторијата за човекови права соопшти дека воздушните напади се интензивирале во изминатите неколку дена и дека помеѓу загинатите имало девет жени и 12 деца.


Џафери: Расправата за Зврлевски ќе продолжи, а пратениците нека си бараат друго мислење


Скопје, 7 август, 2017 - 13:24 (META) 

На седницата за разрешување на јавниот обвинител Марко Зврлевски, пратеникот на ВМРО-ДПМНЕ, Илија Димовски, побара еден час пауза за да состави писмо до Државната комисија за спречување на корупција, за таа да се произнесе дали треба да продолжи седницата бидејќи се распишани локалните избори.

Тој смета дека во согласност со членот 8а од Изборниот законик, од денот на донесувањето на одлуката за распишување избори до завршување на изборите, пратениците не можат да носат одлуки, не можат да се почнат постапки за вработување нови лица и за престанок на работните односи на јавните функционери, односно постапките се ставаат во мирување.

На ова, претседателот на Собранието, Талат Џафери, рече дека како координатор на пратеничка група и пратеник може да се обрати до која било институција и да побара мислење, но тоа не значи дека Собранието не треба да продолжи да работи.

– Собранието не е должно да прекине со работа ако пратеник или партеничка група мислат поинаку. Немам намера да се обратам до ниту една институција во однос на моите надлежности. Според законот и деловникот, она што важи за Влада не се применува аналогоно на работата на Собранието. Секој пратеник може да се обрати до кој било орган доколку има некоја дилема, јас немам дилема за продолжението на оваа седница. Собранието не е должно да бара мислење од институција, во случајов Државна комисија за спречување на корупција, која ја формирало самото Собранието – рече Џафери.

Пратеникот на СДСМ, Тунтев, смета дека и денеска опозицијата се обидува да ја одолжи работата на Собранието по оваа точка.

– Опозицијата се обидува да оди во недоглед со постапката почната на барање на Владата за разрешување на Зврлески поради незаконско и несовесно работење на државниот обвинител. Дебатата не е дел од постапката за разрешување. Ако толку сакаат, нека се откажат од дебатата и нека се оди директно на гласање – изјави Тунтев.

Пратеникот на ВМРО-ДПМНЕ, Антонио Милошоски, кажа дека дебатата е дел од постапката за разрешување и никој нема право да ги тера пратениците да се откажат од таа дебата.

И тој побара седницата да биде прекината и да се дебатира за други теми, кои, како што рече, се значајни за граѓаните, како депонијата, пожарите, зголемување на платите во администрација и за мигрантите.

Продолжението на седницата е закажано за 15 часот.