!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Пропаднаа преговорите меѓу власта и опозицијата во Албанија, посредувани од ЕП


Тирана, 26 април, 2017 - 12:42 (META) 

Преговорите меѓу власта и опозацијата во Албанија, посредувани од европарламентарците Кнут Флекенштајн и Дејвид Мекалистер, не успеаја да донесат никакви резултати, јавува дописникот на „Мета“ од Тирана.

Опозицијата, предводена од Љуљзим Баша, смета дека критериумите за техничка влада не треба да бидат предмет на преговори. Разговорите на двајцата европратеници со претставниците на власта и на опозацијата траеја нeколку часа. Извори блиски до албанската влада потврдија дека премиерот Еди Рама изразил согласност неколку министерски места во владата да бидат заменети и на нивно место да бидат поставени технички министри, но, од друга страна лидерот на опозицијата, Баша, истакнал дека техничка влада значи дека во неа не траба да биде актуелинот премиер Рама.

По неуспехот на преговорите, канцеларијата на Европската Унија во Албанија издаде заедничко соопштение на претседавачот на комитетот за надворешни работи на Европскиот парламент, Дејвид Мекалистер, и на известувачот во ЕП за Албанија, Кнут Флекенштајн.

Во изјавата се наведува дека двајцата европратеници имале добри дискусии со владејчкото мнозинство и со опозицијата и дека дале конкретни предлози за надминување на кризата.

„Двајцата европарламентарци дадоа предлози за во иднина, кои се однесуваат на декриминализацијата, борбата против трговија со дрога, технички мерки за подобрување на изборниот процес, како и мерки за зајакнување на политичката доверба“, се наведува во изјавата на европарламентарците.

Тие, исто така, предложиле неколку идеи околу датумот за парламентарните избори и можни предизборни промени во структурата на владата за долгорочно зајакнување на довербата во системот.


Партиите во албанскиот парламент тактизираат со изборот на шеф на државата


Тирана, 20 април, 2017 - 20:00 (META) 

Парламентот на Албанија денеска го одржа вториот круг од гласањето за избор на нов претседател на државата. Сепак, гласање воопшто немаше, бидејќи сè уште нема предложени кандидати за шеф на државата, јавува дописникот на „Мета“ од Тирана.

Лидерите на парламентарното мнозинство, премиерот на Албанија, Еди Рама, и претседателот на албанскиот парламент, Илир Мета, изјавија дека досега не предложиле кандидати бидејќи не сакаат претседателот на државата да биде избран без консензус со опозицијата.

Лидерот на партијата Либра, Бен Блуши, досегашните два круга ги оцени како смешни и ги предупреди партиите дека и третиот круг, кој треба да се одржи следниот четврток, ќе пропадне. Тој додаде дека со исцрпувањето на петте предвидени круга на гласање за избор на претседател на државата, намерата на големите партии е да ги одложат парламентарните избори, закажани за 18 јуни.

Пратеничката на Либра, Мимоза Хафизи, исто така го критикуваше мнозинството во парламентот во врска со ова прашање, додавајќи дека нејзината партија повеќепати предлагала шефот на државата да се избира од граѓаните на непосредни избори, но нивните барања никогаш не биле ставени на дневен ред.

Според албанскиот устав, претседател на државата се избира со тајно гласање и без дебата во парламентатот. За избор на шеф на држвата предвидени се вкупно пет круга на гласање, а за да биде избран победничкиот кандидат, треба да добие најмалку три петтини од гласовите во парламентот, кој брои 140 пратеници. Со измените на уставот на земјата од 2008 година, во четвртиот и во петтиот круг претседателот може да биде избран и со мнозинство од 71 глас.


Груевски – Иваниќ: Односите помеѓу двете земји се пријателски и со заемно разбирање


Скопје, 19 април, 2017 - 20:41 (META) 

Претседателот на ВМРО-ДПМНЕ, Никола Груевски, денеска придружуван од партиските соработници Владимир Ѓорчев и Александар Николоски, се сретнал со претседавачот со Претседателството на Босна и Херцеговина, Младен Иваниќ.

Двајцата соговорници позитивно ги оцениле односите помеѓу двете, земји кои се карактеризираат со заемно пријателство и со разбирање.

Груевски, како што се вели во соопштението на ВМРО-ДПМНЕ, го запознал својот соговорник со аспектите на политичката криза наметната од опозицијата и со позициите и со ставовите на ВМРО-ДПМНЕ во однос на клучните прашања и начините за надминување на предизвиците.

Разговарајќи за можните решенија, како што се вели во соопштението на ВМРО-ДПМНЕ, тие ја повториле оценката дека единствениот начин за излез од политичката криза и за постигнување стабилност е спроведување на брзи парламентарни избори, заедно со редовните локални избори, каде граѓаните ќе имаат можност да се изјаснат „за тиранската платформа која ја прифати СДС“.


Иницијатива за смена на претседателката на Собранието на Србија


Белград, 19 април, 2017 - 11:35 (META) 

Собранието на Србија денеска ја продолжува седницата што беше прекината на 1 март поради предизборната кампања. На седницата опозициските пратеници ќе пробаат на дневен ред да ја воведат иницијативата за смена на претседателката на парламентот, Маја Гојковиќ.

Иницијативата за смена на Гојковиќ ја поднесоа Демократската партија и движењето „Доста беше“, тврдејќи дека таа го деградира највисокото законодавно тело, дека ги крши уставот и деловникот за работа на парламентот, а иницијативата ја поддржаа и други опозициски пратенички групи, како и независни пратеници.

Смена на Гојковиќ, помеѓу другите, бара и Либерално-демократската партија чиј лидер е Чедомир Јовановиќ, додека радикалите на Воислав Шешељ досега официјално не се придружија на оваа иницијатива.

За ставање на дневен ред, а потоа и за смена на претседателката на парламентот потребни се гласови на најмалку 126 пратеници. Доколку сите партии и независни пратеници што досега јавно побараа смена на Гојковиќ гласаат „за“, ќе имаат 77 гласови.

Собранието не продолжи да заседава веднаш по завршувањето на изборите на 2 април поради протестите на студентите и граѓаните од иницијативата „Против диктатурата“, кои секојдневно почнуваат и завршуваат пред зградата на парламентот.


Турската опозицијата ги оспори резултатите од референдумот


Анкара, 16 април, 2017 - 23:22 (META) 

Турска опозициска Републиканска народна партија ги оспори резултатите од референдумот и бара повторно пребројување на најголем дел од гласовите.

Според опозицијата, за време на пребројувањето имало многу неправилности, односно најголем дел од гласачките ливчиња биле со неважечки печати.

– Досега, спорни се 2,5 милиони гласови. Речиси 6о отсто од избирачките места имаат проблем. Неважечки се повеќе од еден милион гласови. Знаеме како да се справиме со неважечките гласови – вели Ердал Аксунгер, потпретседател на опозициската Републиканска народна партија.

Турската изборната комисија на својата веб-страница неколку часа пред затворањето на избирачките места соопшти дека ќе ги прифати и ливчиња без официјални печати освен ако може да се докаже дека се фалсификат.

Измените на Уставот, ќе му овозможат на Ердоган да именува и да менува министри, да се кандидира уште двапати за претседател и повторно да го преземе водството над својата партија. Најави дека ќе го преиспита и договорот со ЕУ во врска со мигрантите, по референдумот.


Вучиќ: Неморални се етикетирањата и нападите на чии било деца од протестите


Белград, 13 април, 2017 - 13:47 (META) 

Актуелниот премиер и избран претседател на Србија, Александар Вучиќ, денеска изјави дека ги осудува етикетирањето и нападите на деца на новинари и на партиски функционери поради нивното учество на „протестите против диктатурата“ во Белград, додавјќи дека никој не ги прогласил за непријатели.

„Кој и да напаѓа чии било деца, мислам дека тоа е неморално и нефер“, изјави Вучиќ пред новинарите во Белград.

Инаку, шефот на пратеничката група на владејачката Српска напредна странка, односно партијата на Вучиќ,  Александар Мартиновиќ, претходно на Радиотелевизија на Србија (РТС) и во собранието, покажуваше фотографии од учесници на протестите против власта, меѓу кои и фотографии од деца на новинари и на политичари од опозицијата, што предзивика бурни реакции кај новинарските здруженија и кај дел од јавноста, кои ваквиот потег го оценија како „цртање мета на чело“.

Повеќе новинарски и медиумски здруженија го повикаа српското обвинителство да утврди дали во случајот има елементи на кривично дело. Покрај деца на новинари, на фотографиите што ги покажуваше Мартиновиќ имаше и новинари, политичари од опозицијата и службеници во амбасади.

Во Белград и во повеќе градови во Србија илјадници граѓани, најмногу млади, секојдневно учествуваат во протестите против Вучиќ и власта во земјата.


Албанската опозиција реши да ги бојкотира парламентарните избори во јуни


Тирана, 11 април, 2017 - 9:32 (META) 

Демократската партија на Албанија, предводено од Љуљзим Баша, заедно со претставници на другите опозициски партии, донесоа конечна одлука опозицијата да не учествува на парламентарните избори закажани за 18 јуни.

„На овој начин потврдуваме дека нема да учествуваме на изборите без реализирање на нашите барања за техничка влада, која ќе спроведе слободни и фер избори“, стои во соопштението од средбата, пренесено од весникот на македонски јазик „Илинден“.

Во соопштението, исто така, се наведува дека шаторите што се поставени пред владата во Тирана по протестниот митинг на 18 февруари и каде секојдневно има по најмалку 1.000 демонстранти, ќе останат таму и понатаму.

На состанокот е решено и опозицијата да организира „масовен сенационален протест“ во Каваја, за да се блокираат делумните локални избори во овој град, кои опозицијата ги бојкотира.

Протестот ќе биде одржан на 7 мај, кога во овој град се одржуваат делумни локални избори, откако градоначалникот на Каваја беше обвинет за криминал.

По протестот во Тирана од 18 февруари, опозицијата најавува дека тој во Каваја ќе биде уште помасовен.

Опозицијата ја бојкотира и работата на парламентот, со што е блокирано донесувањето на важните закони од сферата на правосудството, чие усвојување е услов за почнување на преговорите за членство во ЕУ.


Коцијанчич за Албанија: Политичката дебата треба да се случува во парламентот


Тирана, 10 април, 2017 - 20:26 (META) 

Маја Коцијанчич, портпаролката на Европската Комисија, денеска на прес-конференција рече дека Комисијата е разочарана од бојкотот на Собранието од страна на опозицијата во Албанија и додаде дека политичката дебата треба да се случува во Собранието, а не надвор од него.

„Од наша перспектива, соработката помеѓу владата и опозицијата во Албанија се клучни за амбицијата на земјата да се приклучи кон Европската Унија. Подготовките за претстојните парламентарни избори се важен дел од овој процес, а ние одблиску ќе ги следиме случувањата во земјата – изјави Коцинајчич.


Продолжуваат протестите против Вучиќ во Белград, Ниш и во Нови Сад


Белград, 6 април, 2017 - 20:08 (META) 

Неколку илјади претежно млади лица, незадоволни од победата на Александар Вучиќ на претседателските избори во Србија, и денеска излегоа во центарот на Белград, на четвртиот по ред „Протест против диктатурата“, јавува дописникот на „Мета“ од Белград.

Учесниците на протестот, кој е организиран преку „Фејсбук“, носеа знамиња на Србија и транспаренти со натписи „О (не)свести се“, „Вучиќ арамијо“, „Долу диктатурата“, „Денеска сум на улица за утре да не живеам на неа“…

Демонстрантите бараат намалување на бројот на членови во Републичката изборна комисија (РИК) и во Регулаторното тело за електронски медиуми (РЕМ) поради неправилности за време на кампањата за претседателските избори, смена на претседателката на српското собрание, Маја Гојковиќ, и против раководството на српската национална радиотелевизија поради „режимското известување и нерамномерната застапеност на кандидатите“, како и за средување на избирачкиот список.

Демонстрантите денеска се движеа по малку изменета рута, која се држи во тајност за да се избегнат инциденти.

„Протестите против диктатурата“ продолжија и во Ниш и во Нови Сад, каде за сабота е најавен контрамитинг на приврзаниците на Александар Вучиќ.

Вучиќ денеска повторно изјави дека протестите на улиците се доказ дека Србија е демократска држава. Сепак, двајца од неговите министри, за полиција, Небојша Стефановиќ, и за труд, Александар Вулин, ја обвинија опозицијата за организирање на протестите и предупредија дека изборната волја не може да се смени на улица.


ЛДП бара да се одблокира Собранието и да се избере легитимната влада


Скопје, 2 април, 2017 - 11:04 (META) 

„Раководството на ВМРО-ДПМНЕ уште еднаш потврди дека е антидржавно, со тоа што сега една недела го блокира и конституирањето на Собранието на Македонија. Никола Груевски треба да сфати дека е опозиција и од тој факт бегање нема“, се вели во соопштението на Либерално-демократката партија (ЛДП).

ЛДП бара од Груевски да престане да се крие зад бескрајните реплики и контрареплики и на мирен начин да ја предаде власта која граѓаните му ја одзедоа на 11 декември минатата година.

„ЛДП става до знаење дека пратениците од ВМРО-ДПМНЕ најгрубо го кршат Уставот во неговите темелни вредности, како владеењето на правото и правната држава, политичкиот плурализам, прифаќање на резултатите од слободните, непосредните и демократски избори и почитувањето на волјата на мнозинството.Режимот е на самиот крај и неопходно е пратениците да разберат дека апсолутно никој, а најмалку тие како претставници на ВМРО-ДПМНЕ, нема да го сопрат падот на еден трул и временски надминат систем на владеење“, се вели во соопштението.

Од ЛДП велат дека пратениците на ВМРО-ДПМНЕ не смеат да се ставаат во улога на бранители на криминалот на врхушката на партијата.

„Тие треба да знаат дека со ваквите постапки стануваат соучесници во незаконското и нелигитимно задржување на власта. ЛДП бара веднаш да се одблокира работата на Собранието за да се избере новата реформска и легитимна влада која ќе донесе подобар живот за сите граѓани на Македонија“, се додава во соопштението.