Елена Трифуновска: Не треба да се меша говорот на омраза со клеветата и навредата


Скопје, 27 април, 2018 - 11:00 (META) 

Станува тренд да се пријавуваат дискриминацијата и говорот на омраза во онлајн сферата за да се спречи да се развиваат, но важна е и техничката неутралност. Поточно, колку брзо се развива информатичката технологија, исто толку брзо треба да се развиваат и да се приспособуваат и тие механизми, но едукацијата на корисниците не ја следи секогаш брзината на технологијата, рече, меѓу другото,  Елена Трифуновска од Фондацијата за интернет и општество „Метаморфозис“, во вчерашното гостување во  „Студио 1“ на ТВ1.

Како што вели Трифуновска, клучна е едукацијата на корисниците на социјалните мрежи. Децата се повеќе и порано почнуваат да ги користат, но и постарите корисници не се научени и потешко ја учат примената на механизмите.

– Состојбата е проблематична со оглед на тоа колкав број од нас секојдневно користиме социјални медиуми и колку време поминуваме на нив и каков тип на информации не интересираат или со какви информации не таргетира оној што ги пласира – смета Трифуновска.

Случаите на говор на омраза на интернет и во медиумите се пријавуваат во Основното јавно обвинителство и во Единицата за борба со компјутерски криминал во МВР. Нивните и извештаите на „Фридом Хаус“ и на „Репортери без граници“ покажуваат дека случаите не се процесуираат на начинот на којшто предвидува законот – појасни гостинката – експерт.

– Ако ја погледнеме статистиката на Советот за етика, на трето место се пријавите од граѓаните за прекршувања на говор на омраза од вкупниот број на пријави што ги имаат добиено и во 30% од решените случаи токму говорот на омраза е причина за пријавата – вели Трифуновска и според неа, не треба да се мешаат говорот на омраза со клевета и навреда.


Во Охрид се одржува конференција за сузбивање компјутерски криминал


Охрид, 13 јуни, 2016 - 10:13 (META) 

Со учество на повеќе од 80 кривични судски претставници, експерти за компјутерски криминал, претставници од финансиските институции и даватели на услуги, од денеска во Охрид се одржува Конференција за сузбивање на компјутерски криминал (iProceeds.)

Целта е да се договорат конкретни чекори што треба да се преземат за посилна јавно-приватна и меѓународна соработка за подобрување на финансиските истраги и за конфискација на приносите од криминалот што се извршува преку интернет, во рамките на конференцијата за Југоисточна Европа и за Турција.

Конференцијата, покрај другото, ќе ги третира темите кои се однесуват на  учеството на носителите на одлуки и на проектните тимови во активностите на проектот „iProceeds“, а ќе биде претставен нацрт-извештајот за состојбата и за мерките против компјутерскиот криминал и откривање, заплена и конфискација на приноси од компјутерскиот криминал, како и мерки за спречување перење пари преку интернет во областите, односно земјите каде што се имплементира проектот.

Учествуваат високи претставници од Албанија, Босна и Херцеговина, Црна Гора, Србија, Македонија, Турција и од Косово.


Повеќе од еден милион интернет-претплатници на „Њујорк тајмс“


Њујорк, 6 август, 2015 - 18:32 (META) 

Американскиот весник „Њујорк тајмс“ соопшти дека бројот на неговите дигитални претплатници првпат надмина еден милион.
Весникот стигна до милион претплатници за околу четири и пол години, откако почна да наплатува за претплата на своето дигитално издание.

„Тајмс“, исто така, има 1,1 милион претплатници на печатеното издание.

– Ова е потврда за нашето посветено работење, како и потврда за квалитетот на нашето новинарство – рече претседателот и извршниот директор на компанијата, Марк Томпсон.

„Тајмс“ во вториот квартал остварил пораст на профитот од дури 78 отсто на годишно ниво, додека приходите се истовремено намалени за 1,5 отсто.
Приходите од рекламите во печатеното издание во три месеци, заклучно со јуни, се намалиле за 12,8 отсто, додека за дигиталното издание се зголемиле за 14,2 отсто.


Интернет-игра во Кина мора да ги почитува законите од реалниот живот


Пекинг, 27 март, 2015 - 16:44 (META) 

Дизајнерот на интернет-игри, Ксу Јоузен, преку „Веибо“ (Weibo) откри дека кинеските власти побарале растењето деца во видеоиграта на неговата компанија да биде во рамки на планираното семејство, објави „Глобал војсис“.

Насоките биле зададени од Канцеларијата за интернет-култура и Бирото за културни пазари, во нивната презентација со објаснување „Работен план за цензура на содржините од интернет-игрите од Министерството за култура“ во 2010 година.

Освен законот за планирано семејство, во дадените упатства има инструкции за развивачите на игри да не вклучуваат содржини кои ги прекршуваат законите за заштита на животни и брачните закони.


Македонците сè повеќе купуваат преку интернет


Скопје, 23 февруари, 2015 - 10:07 (META) 

Tрговијата и плаќањето преку интернет во Македонија рапидно расте, па за 11 месеци од минатата година (од јануари до ноември), Македонците преку интернет потрошиле речиси 10,5 милиони евра. Податоците за платежни картички и плаќање преку нив, на Народната банка на Република Македонија, покажуваат дека од септември до ноември минатата година, интернет-потрошувачите во земјава месечно трошеле повеќе од еден милион евра. Само во септември лани постигнат е рекорд и преку интернет се потрошени се 1.824.799 евра, додека во октомври и во ноември потрошени се повеќе од 1,1 милион евра. Рекорден месец на интернет-потрошувачка лани е и февруари, кога преку интернет се потрошени повеќе од 1,3 милиони евра.