Со македонските возачки дозволи ќе се вози и во Германија


Скопје, 18 септември, 2018 - 16:21 (META) 

Министерот за внатрешни работи Оливер Спасовски и амбасадорот на Германија, Томас Герберих, денеска во Скопје ја потпишаа заедничката декларација меѓу македонското МВР и германското сојузно министерство за транспорт и дигитална инфраструктура, за олеснување на постапките за меѓусебна замена на возачките дозволи на граѓаните од Република Македонија и Сојузна Република Германија.

Со тоа македонските државјани во Германија ќе може да управуваат возила само со македонска возачка дозвола и ќе нема потреба да вадат меѓународна дозвола.

-Овој процес со години беше заглавен во лавиринтите на меѓусебното нормативно усогласување помеѓу  надлежните служби на Македонија и Германија, без надеж за успешно решавање на отворените прашања. Граѓаните со право беа нестрпливи, затоа што со години  им беа давани празни ветувања, но од денес, со потпишувањето на Декларацијата,  ќе им  овозможиме на нашите граѓани, од двете пријателски земји, да ги користат бенефитите од меѓусебното признавање на возачките дозволи – рече Спасовски.

Такви и слични договори веќе има со повеќе европски земји како Италија, Шпанија, Белгија, Романија, Чешка, Унгарија, Австрија, како и со земјите од регионот – Србија, БИХ, Албанија, Словенија, Хрватска, Бугарија, Црна Гора, а во завршна фаза се договарањата со Турција, Велика Британија, соседно Косово, како и Австралија и Нов Зеланд, известуваат од МВР.


Спасовски: Ситуацијата е стабилна, минорни се силите кои сакаат референдумот да не успее


Скопје, 23 август, 2018 - 10:28 (META) 

Министерот за внатрешни работи, Оливер Спасовски вели дека во пресрет на референдумот ситуацијата во земјата е стабилна, институциите функционираат, но вели дека постојат сили кои гледаат шанса, преку нарушување на безбедноста, да остварат некакви свои цели, да се спротивстават членството во НАТО и во Европската Унија.

Тој во интервју за МИА, потенцира дека тоа сепак се минорни сили кои не можат да придонесат за дестабилизација.

– Геостратешката положба на Македонија, носи одредени ризици и предизвици, но тие се превенираат, меѓу другото, и со добро функционирање, размена на податоци и искуства со пријателските служби со кои соработува Република Македонија. Верувајте дека Република Македонија има многу пријатели кои помагаат, пред се, да ја одржиме стабилноста во државата, да се гарантира безбедноста – целовитоста на државата – истакнува Спасовски

За тврдењата дека странски служби се обидуваат да „роварат“ пред референдумот и за руско мешање во „македонските работи“, Спасовски вели дека Македонија има јасен став, национален, витален интерес да стане членка на НАТО и на ЕУ, не сака да се мешаме во работите на други држави, ниту од регионот, ниту пошироко, но нема да дозволиме некој да и наметнува свои интереси.

–Да, ни се случуваат одредени групирања на политички структури, на поединци итн. кои сакаат да се спротивстават на интеграцијата на Република Македонија во НАТО и ЕУ. Да, има такви структури, има такви поединци во Република Македонија кои сметаат дека заради задоволување на некакви свои лични интереси би го искористиле моментот за да се спротивстават на членството во ЕУ и НАТО, а на таа сметка да добијат некакво свое конто на политичка популарност. Меѓутоа, нема сили кои идеолошки се врзани и преку идеологија сакаат да се спротивстават заради тоа што не можат, немаат алтернатива на процесите кои ни се случуваат во земјата. Затоа, сметам дека Македонија е доволно цврста во своите намери да ја реализира својата цел – да биде членка на НАТО и на ЕУ – додава Спасовски.


ВМРО-ДПМНЕ: МВР лажеше дека апсело терористи за да ги покрие скандалите


Скопје, 8 август, 2018 - 15:28 (META) 

Опозициската ВМРО-ДПМНЕ порача дека министерот за внатрешни работи Оливер Спасовски и СДСМ се срам за Македонија и го нарушуваат нејзиниот углед со лаги и манипулации, бидејќи вчера излажале дека МВР уапсила седуммина македонски државјани што се бореле со терористите во Сирија, а всушност станувало збор само за преземање на уапсените.

„За да ги покрие скандалите, злоупотребите и криминалите во кои се фатени пријателите на Заев, вчера повторно беше злоупотребено МВР за да се дезинформира јавноста со измислена голема полициска акција против терористи и радикали. Вистината е дека МВР лажеше!“, порача ВМРО-ДПМНЕ, тврдејќи дека поради лагата Спасовски вчера се криел, а МВР не давало дополнителни информации кога и каде биле приведени радикалите.

Опозициската партија посочува дека станува збор само за репатријација, односно преземање на скопскиот аеродром на радикалите уапсени од меѓународната коалиција.

„Вистината ни ја открија денеска нашите партнери од Пентагон кои посочија дека Сириските Демократски Сили до јули заробиле 600 странски платеници од повеќе од 40 земји. Kако што откриваат меѓународните медиуми, македонската полиција вчера немала никаква акција, туку била извршена само репатријација односно преземање на приведените македонски државјани на скопскиот аеродром“, вели партијата.


ВМРО-ДПМНЕ: Жртвувањето на директорот на БЈБ нема да ги реши проблемите во МВР


Скопје, 8 август, 2018 - 14:41 (META) 

Замислете, директорот на Бирото за јавна безбедност злоупотребува службен џип за да го пренесе друштвото на својата ќерка на одмор во авто – камп во Грција и притоа да застанува по продавници. Жртвувањето на директорот на БЈБ нема да ги реши проблемите во МВР.

Ова денеска на прес-конференција го изјави портпаролот на ВМРО-ДПМНЕ, Наум Стоилковски.

Тој додаде дека „проблемите нема да ги реши ниту обидот за дефокусирање со измислени „големи акции“ против наводни екстремисти или против поранешни градоначалници, само за да се оттргне вниманието од аферите поврзани со Оливер Спасовски.“

„Кај министерот Спасовски лежи најголемата одговорност. Неговата партизација на полицијата и ставањето на МВР во партиска функција ја претвори Македонија во државата во која граѓаните не се чувствуваат безбедни. А, за тоа не може да ја понесе одговорноста само туроператорот Лазе Велковски. Оливер Спасовски мора да одговори зошто пет дена го криеше скандалот? Спасовски мора да каже кога и кому директорот на БЈБ ги пријавил заканите? Ако воопшто постоеле закани, какви биле тие закани и за што? Што има МВР преземено по тие закани и колкумина се приведени?“, рече Стоилковски.

Тој додаде дека „доколку МВР на Спасовски не апси и не може да открие кој му се заканувал на директор на Бирото за јавна безбедност за да биде гарантирана неговата безбедност, може ли Спасовски воопшто да гарантира безбедност на граѓаните и на државата?

„Дали пак можеби инсистирањето на оставка е дел од внатрешните пресметки во МВР откако директорот, познат како туроператор Велковски, неодамна го приведе Драган Симоновски, советникот и близок соработник на Спасовски? Оливер Спасовски, престани да се криеш зад туѓа одговорност и поднеси оставка од местото кое е клучно за внатрешната безбедност на државата“, додаде Стоилковски.


ВМРО-ДПМНЕ: Боро Стојчев не е единствениот од власта вмешан во криминал


Скопје, 12 јули, 2018 - 10:53 (META) 

Градоначалникот на Ново Село, Боро Стојчев, не е единствениот функционер на власта за кој што постојат сериозни индиции за криминал. Наместо обиди за дефокусирање од големите криминали, јавноста очекува истраги за сомнителните милионски тендери на Заеви, Анѓушев и Спасовски. Заради нив Македонија е на дното на листите за корупција и срам за цела Европа, порача ВМРО-ДПМНЕ денеска.

„Доколку властите не поткренат истраги за милионските тендери во РЕК Битола и вмешаноста на камионите на Заеви, милионските тендери на Анѓушев, како и милионскиот тендер за набавка на возила за МВР распишан од Спасовски, ќе се потврдат сомнежите дека ова е само дефокус од милионскиот криминал. Овој случај само ја покажува криминогеноста на власта, дури и на нејзините најмали пипци“, велат од ВМРО-ДПМНЕ, велејќи дека Зоран Заев и оваа власт не работат за Македонија, туку „на штета на државата и нејзините интереси и само за профитот на своите фирми“.


Спасовски: Полицијата во неделата постапи правилно


Скопје, 20 јуни, 2018 - 15:14 (META) 

Македонските полицајци во неделата беа напаѓани со дрва и бетонски плочи и еден час се воздржуваа за да ја смират ситуацијата, но нивната реакција е резултат на оценката на претпоставените, а можам да кажам дека постапиле правилно, изјави министерот за внатрешни работи Оливер Спасовски на отворањето на новиот објект за тактички вежби во полицискиот комплекс во Ѓорче Петров, одговарајќи на прашање зошто полицијата употребила хемиски средства против насилните демонстранти пред Собранието.

– Таа постапка на полицијата е како по книга. Тука полицајците имаат целосна поддршка и апелирам до граѓаните кои сакаат да го изразат својот револт, да протестираат мирно. Не смееме да дозволиме да има напад на полицијата, ниту пак напад врз некоја од институциите, за да не ни се повтори 27 април – рече Спасовски.

Тој информираше дека целиот материјал за приведените е предаден на Обвинителството.

Министерот Спасовски нагласи дека во моментов нема загрозување на безбедноста на државава, но рече дека секојдневно тој, премиерот и другите министри примаат закани. Според него, добро е што најчесто доаѓаат од луѓе што седат само на „Фејсбук“ и пишуваат.

– Сепак, заканите се процесуирани до ЈО, а некои и се детектирани. Тие што се детектирани ќе се постапува соодветно врз основа на законските прописи – појасни Спасовски.


Спасовски: Не се расчистени 15 случаи на напади врз новинари


Скопје, 29 мај, 2018 - 16:07 (META) 

Петнаесет случаи за напади врз новинари сѐ уште не расчистени, соопшти министерот за внатрешни работи Оливер Спасовски денеска на прес-конференција во владата.

– Во последните неколку години имавме бројни напади на новинари. МВР направи анализа за да се утврди на кое ниво се истрагите досега. Се утврди дека во одредени постапки пропуштени се дејствија кои требало да бидат направени во краток рок, во некои постапки недостасуваат докази. Од 2013 до јуни 2017 до МВР се поднесени 47 пријави кои се однесуваат на физички напад на новинари или говор на омраза. Во Скопје се 29, во Охрид 14, две во Струмица, и во Штип и во Битола по еден – рече Спасовски.

Во периодот од 2017 до денес, до МВР се поднесени 12 пријави за напади врз новинари, од кои пет се во Охрид, четири се во Скопје, два во Велес и еден во Штип.

– Постапувано е во сите случаи и за две лица веќе се поднесени кривични пријави за сторени кривични дела насилство и загрозување на сигурноста, во три случаи се покренати прекршочни постапки против шест лица за констатирани три прекршоци – рече Спасовски.

Тој истакна дека сега заживува функционирањето на внатрешната контрола на МВР, која претходно прогледувала низ прсти.

– Апелирам до сите што доживеале објективен напад, како омаловажување или навреда да го пријават во полиција на 192 каде сѐ се снима и има траг. Не се пријавува на „Фејсбук“ – рече Спасовски.

Министерот за транспарентност, отчетност и комуникација, Роберт Поповски потенцираше дека ќе има нула толеранција за загрозување на слободата на изразување.

– Нула толеранција за каков било обид за загрозување на слободата на изразување. Секој напад врз медиумските претставници, физички или вербален, ќе биде најостро санкциониран – порача Поповски.


Фракционерите на ВМРО-ДПМНЕ бараат оставка од министерот Спасовски за изјавата на Хоџа


Скопје, 9 мај, 2018 - 9:55 (META) 

Демократската фракција на ВМРО-ДПМНЕ, изјавата на министерот за внатрешни работи Оливер Спасовски во врска со ангажирањето на Џезаир Шаќири-Хоџа за советник ја сметаат за контроверзна и бараат да си поднесе оставка.

„Што е контроверзно во изборот на Џезаир Шаќири-Хоџа за советник во премиерскиот кабинет? – праша вчера министерот за внатрешни работи Оливер Спасовски. Министре Спасовски, контраверзно е тоа што вие како министер во владата на Зоран Заев и ние како држава се досега немавме контрола на дел од територијата на Македонија, а молчевте и криевте од јавноста. Контраверзно е дека ангажирањето на Хоџа е резултат на политички договор, вие него да го ставите поблиску до премиерот Заев, а тој да го ослободи селото Танушевци. Контраверзно е што направивте гола трампа. Функција во замена за ослободена и досега неконтролирана територија. И не е само што е контраверзно, министре Спасовски, туку е жално и срамно. Затоа е најдобро сега кога имате компетентен советник за безбедност и радикализам во кабинетот на премиерот Вие како некомпетентен и некадарен да си поднесете оставка и да заминте од функцијата. По можност во пакет со премиерот“, се вели во соопштението на партијата.

Од таму потсетуваат дека „постои меѓународна потерница од страна на Србија за поранешниот командант на ОВК, Џезаир Шаќири Хоџа кој е под обвинение дека е еден од организаторите за нападот на преминот Доброшин кај Прешевската долина, но и дека тој се наоѓа на црната листа на САД.“

„Исто така сакаме да го потсетиме министерот и премиерот дека кондовецот Агим Красниќи и неговата дружина кои своевремено се закануваа дека ке го гранатираат Скопје за возврат не добија функци, туку вкупно 53 години затвор за злосторничко здружување и поседување оружје“, се додава во соопштението.


Спасовски: Во МВР имало група која по нарачка бришела траги и докази


Скопје, 27 април, 2018 - 15:41 (META) 

Во МВР постоела група која бришела траги и докази, рече министерот за внатрешни работи Оливер Спасовски на дебатата „Омбудсманот меѓу специјалните надлежности и капацитетите:Надворешна граѓанска контрола врз работата на полицијата“.

– Во МВР постоела група која била задолжена за бришење на трагите, по нарачка и потреба. Група која била политички окупирана, пред се, од високо позиционирани функционери во министерството и затоа ни се случува да имаме случаи за кои не можеме да најдеме докази и да дојдеме до релевантни сознанија бидејќи доказите или ги нема или повеќе не се такви како во време на извршувањето на кривичното дело – вели Спасовски.

Тој информираше дека во изминатите десет месеци, во МВР биле покренати кривични постапки против 33 лица за сторени 36 кривични дела меѓу кои и за злоупотреба на службената положба, за изнуда и за насилство. Дисциплински постапки се поднеле против 291 лице, вработено во МВР.

Со измените на Законот за Народниот правобранител што беше донесен во Собранието во февруари годинава, надзорна контрола врз полицијата треба да има Омбудсманот, а во обвинителството и во судот да бидат формирани специјализирани одделенија за гонење на полициски службеници за незаконско работење и прекумерна употреба на сила.

Универзитетскиот професор, Гордан Калајџиев вели дека не е избран најдобриот модел и изрази револт поради тоа што како што наведе моделот бил избран на затворен состанок во МВР, на идентичен начин како што тоа било сторено со моделот за следење на комуникации.

– Иако ова многу квалитетно го отворивме како прашање, го затворивме многу набрзина со пропусти во законските решенија – рече Калајџиев.

Тој истакна дека во моделот за надворешна контрола на полицијата фокусот е ставен пред се на тешките повреди, додека, од друга страна со системот на надзор ќе останат нечепнати случаите со полицијата со кои секојдневно се соочуваат граѓаните.

– Пајак службата е рекет систем за полнење на буџетот. Не може да се крене едно возило освен во случаи кога суштински го блокира сообраќајот – рече Калајџиев.


МВР: Полицајката сама се удрила од пајакот, Асани само вербално ја нападнал


Скопје, 2 март, 2018 - 12:19 (META) 

Полицајката Јасмина Јаначковска која вчера имаше инцидент со функционерот на ДУИ и поранешен претседател на огранокот во Чаир, денеска била примена од министерот за внатрешни работи Оливер Спасовски, извести МВР.

Притоа, според соопштението, таа пред министерот кажала дека не била удрена од Асани, кого долго време медиумите го посочуваат како учесник во некои физички инциденти, туку дека самата се удрил од пајакот.

МВР вчера извести дека „со Б.А. е извршен разговор во полициската станица Бит Пазар и изготвен записник за констатиран прекршок по чл. 13 од Законот за прекршоците против јавниот ред и мир“.

Според денешното соопштение, Спасовски се сретнал со полициската службеничка Јасмина Јаначковска, за лично да се информира за вчерашниот настан, а полицајката рекла дека била вербално нападната од сопственикот на возилото Б.А.

„Пристапи едно непознато лице за кое подоцна разбрав дека станува збор за Б.А., и почна да вика. Веднаш повикав засилување и дојдоа поголем број полициски службеници“, рекла Јаначковска, пренесува МВР.

На прашањето од министерот  дали имало било каков физички контакт и зошто полициската службеничка побарала медицинска помош, Јаначковска објаснила дека со Б.А. „имала само вербална расправија, меѓутоа  при повлекување од местото на настанот таа се удрила со левата рака во специјалното возило „пајак“, но не се здобила со посериозна повреда, што било констатирано и при лекарскиот преглед во ГОБ Св. Наум Охридски“, тврди МВР.

Спасовски порачува дека ги охрабрува сите полициските службеници да постапуваат неселективно и професионално, согласно нивните  законските овластувања.

– Полициските службеници кои постапуваат професионално, од мене како министер и од целото раководство на МВР, ќе имаат целосна поддршка. Сите мора да бидат еднакви пред законот. Заврши времето кога некои беа поеднакви од другите – вели Спасовски.