Влада: Сите помагачи за бегството на Груевски ќе бидат изведени пред правдата


Скопје, 18 јануари, 2019 - 16:52 (META) 

По денешното соопштение од седум граѓански организации кои побараа политичка одговорност, односно оставки од министерот за внатрешни работи Оливер Спасовски, директорот на Управата за безбедност и контраразузнавање (УБК) Горан Николовски и директорот на Агенцијата за разузнавање (АР), Зоран Иванов, Владата порача дека сите вклучени во бегството на Никола Груевски од земјава ќе бидат изведени пред лицето на правдата. Притоа посочи и дека има сознанија оти во бегството биле вклучени и граѓани од „трети земји“.

„Владата и МВР се одлучни дека ќе ги почитуваат законите и дека нема да дозволат извршната власт да ја нарушува истрагата која ја води Јавното обвинителство, што беше редовна пракса во минатото. Укажуваме дека е неопходно целосно затворање на сите прашања во истрагата за да се добијат одговори кои недвосмислено и без сомнеж ќе ја прикажат комплетната слика и сите инволвирани“, порача Владата.

Во соопштението се нагласува дека „МВР по налог и супервизија на министерот Оливер Спасовски, со сите свои ресурси и професионални капацитети учествува во асистирање на истрагата“.

„Истовремено, Одделот за внатрешна контрола, криминалистички истраги и професионални стандарди,  ги завршува истрагите за можна инволвираност на полициски службеници, а Секторот за внатрешни работи – Скопје за начинот на бегство и можните помагатели“, уверува Владата, нагласувајќи дека „ќе ги прифати сите докажани резултати на истрагата, и дека ќе поддржи преземање одговорност и правосудна постапка“.


Граѓански организации побараа оставки од Спасовски и директорите на УБК и АР за бегството на Груевски


Скопје, 18 јануари, 2019 - 14:04 (META) 

Седум граѓански организации денеска побараа оставки да поднесат министерот за внатрешни работи Оливер Спасовски, директорот на Управата за безбедност и контраразузнавање (УБК) Горан Николовски и директорот на Агенцијата за разузнавање (АР), Зоран Иванов. Невладините порачуваат дека тие лица мора да понесат  политичка одговорност за бегството на Никола Груевски.

„Сметаме дека навршувањето на втор календарски месец од бегството е разумен рок за на јавноста да и’ бидат соопштени информации околу истрагите кои се водат како и да се утврдат пропустите на институциите кои што во конкретниот случај биле надлежни да постапуваат. Одолговлекувањето ги подгреа сомнежите на јавноста и дополнително придонесе да се зголеми перцепцијата дека културата на неказнивост опстојува во Македонија. Затоа сметаме дека е неопходно да се преземе политичка одговорност, односно да следуваат оставки“, порачуваат граѓанските организации.

Зад повикот застанаа Институт за демократија Социетас Цивилис- Скопје, Институт за европска политика, Институт за човекови права, Коалиција „Сите за правично судење“, Младински образовен форум, НВО Инфоцентар и Центар за економски анализи.


Спасовски: 27 април нема да се повтори


Радовиш, 11 јануари, 2019 - 13:58 (META) 

Во моменти кога се очекува финалното усвојување на уставните измени, во услови на тензични протести пред Собранието, министерот за внатрешни работи, Оливер Спасовски денеска од Радовиш директно не одговори на прашањето дали е можна ескалација на настаните, како на 27 април 2017 година, кога демонстрантите упаднаа во Собранието и беа брутално претепани повеќемина пратеници и новинари.

-Треба да знае македонската јавност дека 27 aприл нема да се повтори. Граѓаните треба да бидат безбедни, институциите функционираат и секој еден без разлика дали е член на политичка партија, дали е граѓанин кој што има намера да учествува повторно во нарушувањето на уставниот поредок, упатувам порака да се откажат од таквата намера, затоа што ние сме цврсто решени во чувањето на уставниот поредок и да се чува системот – порача Спасовски.

Министерот за внатрешни работи беше прашан да ја коментира изјавата на лидерот на ВМРО ДПМНЕ, Христијан Мицкоски, дека во протестите пред Собранието има полицајци – провокатори, при што ги повика граѓаните да не подлегнуваат на тие провокации.

– Има полицајци кои што си ја вршат својата работа, кои што го штитат јавниот ред и кои што ја гарантираат безбедноста на граѓаните. Дегутантно е еден лидер на партија да потценува полициски службеник кој што работи за бебзедноста на сите, па и за неговата безбедност – одговори Спасовски.

Тој објасни дека Мицкоски е на протести со лично полициско обезбедување

-Впрочем тој лидер на ВМРО-ДПМНЕ има полициско обезбедување кое што го бараше да го заштити и сега слушаме такви квалификации. Мислам дека крајно некоректно или безобразно таквото оценување на состојбите – додаде министерот Спасовски.

На прашањето што доколку уставните измени не поминат и најавата на премиерот Зоран Заев за негова одговорност со оставка, Спасовски рече дека e оптимист.

– Јас знам дека ќе успееме во таа битка, ќе успеат во оваа битка, затоа што е многу важна за иднината на Македонија и ќе продолжиме цврсто понатаму во развојот на државата – изјави Спасовски, кој додаде дека е уверен дека Договорот од Преспа ќе биде ратификуван во грчкиот Парламент.


Спасовски: Проверка на сите во МВР – од чистачка до министерот


Скопје, 28 декември, 2018 - 13:58 (META) 

Обемен процес на „vetting“ (проверка и прочистување) во Министерството за внатрешни работи (МВР) е планиран да почне следната година, за што допрва ќе се изготвува законската рамка, а во овој процес сакаме да ја вклучиме и јавноста, рече министерот за внатрешни работи Оливер Спасовски на денешниот брифинг со новинарите. Тој посочи дека за ваквиот процес на проверка на секој вработен во МВР веќе се известени дел од вработените.

– Идејата е конечно да се воведат вистински стандарди и конечно да се стави крај на многу неправилности, за кои сме сведоци досега. Ќе изготвиме законска рамка и сакаме во тој процес да ја вклучиме и стручната јавност и новинарите, како претставник на јавноста, за да добиеме едно вистинско решение за контрола – рече Спасовски, напоменувајќи дека законското решение ќе се изготвува, покрај со домашната јавност, и со дел од меѓународната заедница.

Тој појасни дека идејата на прочистувањето е да се проверува и личното досие на вработените во полицијата – од чистачка до министер – ќе се проверува дали навистина вработениот се стекнал со соодветно образование, како бил вработен во МВР и како напредувал до позицијата што ја има, но и ќе се следи имотната состојба, а ќе се проверува и кој колку престапи направил, како и тоа дали некој истовремено и е полицаец и сопственик на кафеана или камион.

– Полицијата треба да биде вистински сервис на граѓаните и за тоа мора да ги правиме вистинските проверки. Јас лично не верувам дека е в ред некој да биде и полицаец и да има кафеана, да биде полицаец и да има агенција за обезбедување, или камион, на пример – рече Спасовски.

На новинарско прашање дали ваквиот нов пристап значи признание дека Внатрешна контрола во МВР не си ја врши работата, министерот за внатрешни работи рече дека новиот процес на прочистување ќе мора да зафати со некои работи коишто Внатрешна контрола сега сепак не може да ги сузбие до крај.

– Иако, морам да кажам, сепак тие си ја работат работата и само во последнава година имаме многу повеќе постапки отколку во 11-те години на претходната власт – рече Спасовски.


Спасовски: Има нови работи околу бегството на Груевски, тоа Обвинителството ќе го соопшти


Штип, 24 декември, 2018 - 16:18 (META) 

Министерот за внатрешни работи, Оливер Спасовски, кој беше еден од најповикуваните по бегството на Никола Груевски на прашањето дали има новости во истрагата и кога ќе излезат официјално со резултатите кратко одговори.

– Има, тоа ќе го соопшти Јавното обвинителство – рече Спасовски.

Министерот за внатрешни работи вели дека ја очекувал интерпелацијата од ВМРО-ДПМНЕ за неговата работа. Но, вели, ќе мора да ги разочара.

– Ако им е новогодишна желба на Христијан Мицкоски и ВМРО ДПМНЕ јас да заминам од власта, ќе ги разочарам, нема да и се исполни – рече Спасовски.

Прашан од „Канал 77“ да ја коментира денешната најава од опозициската партија за интерпелација за неговото работење, министерот рече дека тоа за него било очекуван гест.

– Очекував, да, но, тоа за мене е само признание за мојата работа. Имам многу што да има кажам за интерпелацијата – одговори Спасовски.


ВМРО-ДПМНЕ поднесе интерпелација за Оливер Спасовски


Скопје, 24 декември, 2018 - 12:54 (META) 

Пратениците на ВМРО-ДПМНЕ и коалицијата „За подобра Македонија“ денеска во Собранието на Република Македонија ќе поднесат интерпелација за работата на министерот за внатрешни работи Оливер Спасовски, информираше на прес-конференција, координаторот на пратеничката група, Никола Мицевски

Според опозициската партија, Спасовски во изминатиот период покажал и докажал дека функцијата министер за внатрешни работи ја извршува крајно несовесно, нестручно, селективно и по насока на врвот на неговата политичка партија, а спротивно на Уставот и законите во Република Македонија.

-Граѓаните секојдневно се сведоци на скандали и афери поврзани со работата на министерството за внатрешни работи. Наместо да се грижи за јавниот ред и мир и да ја гарантира безбедноста на граѓаните, главна задача на министерството за внатрешни работи стана прикривањето на убиства и криминал. МВР и наместо да се бори со криминалот и корупцијата, стана институција која служи за собирање изнуда, поткуп и заштита на криминалот. Откако министерот Спасовски започна да раководи со министерството за внатрешни работи граѓаните секојдневно се жртви на грабежи, обиди за убиства, убиства, рекетирања и насилства кои минуваат неказнето – вели Мицевски.

Тој додаде дека интерпелацијата ја поднесуваат со цел да ги заштитат граѓаните, но и да спречат состојбата во МВР да се влоши.

На новинарско прашање дали во интерпелацијата е ставено и бегството во Унгарија на осудениот експремиер Никола Груевски, Мицевски рече дека ќе почекаат на извештајот на институциите за бегството.


„Свиркачите“ Лазаревски и Костовски се враќаат во МВР


Скопје, 20 декември, 2018 - 11:50 (META) 

Ѓорѓи Лазаревски и Звонко Костовски, „свиркачите“ што ја обелоденија аферата со прислушувањето на претходниот режим, од денеска повторно се враќаат на своите работни позиции во МВР.

Ова на својот Фејсбук профил го објави министерот за внатрешни работи Оливер Спасовски, каде објави и фотографија од средбата.

Лазаревски е сведок во предметот на СЈО за прислушувањето „Таргет – Тврдина“. Тој и во сведочењата, но и претходно,  откри детали за тоа колку време му било потребно да открие што се случува зад ѕидовите на УБК, со какви закани се соочувал и кој се бил прислушкуван од блиското опкружување на обвинетите за аферата.

Заедно со Костовски ја открија аферата за најмасовно прислушување во Македонија.

Лазаревски 11 месеци беше во притвор.


Заев: Со Спасовски разговаравме за оставка како морален чин, ама не гледам таков пропуст


Скопје, 5 декември, 2018 - 15:13 (META) 

Убеден дека ако Груевски реши да „удира“, или како што тој знаеше да користи фраза „забивање нож во грбот на Македонија“, тој може да ја рани Македонија, но безбедноста не може да ја загрози, вели премиерот Зоран Заев во интервју за „Дојче Веле“.

– Мислам дека нема да има безбедносни импликации. Македонија не зависи од ниеден поединец, ниту пак има поединец којшто има толкав вид на информации што му стојат на располагање, за да предизвика некои безбедносни ризици за државата. Секако дека може да биде ранета Македонија на некој начин, затоа што се работи за човек кој десет години бил премиер. Сѐ она што е доверливо, државна тајна, службена тајна, останало во најголем дел кај него – вели Заев.

Во однос на истрагата за бегството на поранешниот премиер, Заев вели дека има сознанија за дел од истрагата но дека ќе почека да заврши работата на институциите пред да дава дополнителни коментари.

На прашањето зошто никој не понудил оставка како морален чин, Заев вели дека министерот за внатрешни работи Оливер Спасовски, разговарал за тоа со него.

– Како колега во Владата и мој долгогодишен соработник, секогаш сме разговарале што со моралниот чин во вакви околности. Бидејќи, ако има морална одговорност, треба да има аргументација за тоа, да се објасни, да се лоцира каде е моралниот хазард, проблем, пропуст… Јас не гледам таков пропуст. Но, ако се покаже дека имало одговорност – јас ќе барам таа да биде конкретно понесена – вели Заев.

Премиерот вели дека процесот за уставни измени и двотретинското мнозинство нема да бие заложник на работите што се во надлежност на судството

– Попусто ќе биде, ако ние го заокружиме процесот на уставни измени, а ја уништиме правната држава. Тогаш ќе добиеме негативна оценка од земји членки на ЕУ, кои будно ги следат процесите кај нас – потенцира Заев.


Спасовски: Груевски последен пат користел обезбедување во четвртокот


Скопје, 13 ноември, 2018 - 11:48 (META) 

Во четвртокот Никола Груевски последен пат го повикал  обезбедувањето кое му следува како поранешен премиер на земјата, рече денеска министерот за внатрешни работи Оливер Спасовски.

Тој појасни дека иако на Груевски му следува обезбедување, екипата доаѓа на повик, а не е постојано со него.

– Според изјавите на обезбедувањето, последен пат тие го обезбедувале на 8 ноември кога го однеле до дома околу 23 часот – објасни Спасовски.

Тој изјави и дека не се чувствува виновен за бегството на поранешниот премиер и не размислува за оставка. Смета дека за тоа е одговорна судската власт.

– Одговорноста барајте ја кај судиите кои не одредиле мерка притвор за човек кој е осомничен за повеќе кривични дела – рече Спасовски, појаснувајќи дека полицијата работи врз основа на судски наредби.


Во Собрание презентирани модели за реформа на безбедносно-разузнавачкиот систем


Скопје, 8 ноември, 2018 - 12:46 (META) 

Mинистерот за внатрешни работи Оливер Спасовски денеска ги презентираше моделите за реформа на безбедносно-разузнавачкиот систем пред Комисијата за одбрана и безбедност на Собранието.
Појдовна точка за оваа реформа е Извештајот на експертската група на Прибе од 2015 година, каде беа дадени сериозни критики за злоупотребата на Управата за безбедност и контраразузнавање (УБК) преку системот за следење на комуникациите и преку концентрацијата на моќ.

– Една од забелешките велеше дека состојбата е резултат на „непочитување на професионалната етика, основните принципи на ризично управување и недостаток на познавање на чувствителноста на разузнавачите задачи во рамките на УБК. Беа дадени и забелешки за начинот на вработување и селекција во службата, како и недостатокот од изграден систем на постојана обука и усовршување на кадарот во Управата. И токму овие забелешки ги даваат насоките во кои треба да се движи и спроведе реформата на управата. Реформата на УБК не треба и не смее да се сведе само на нови законски решенија. Мора да постои долгорочна стратегија за тоа како да се реформира, но и како во иднина да се развива Управата. Изминатиов период работевме на враќање на угледот на професионална и релевантна служба, углед кој беше сериозно нарушен. Но, активностите не се доволни. Нужно се потребни структурни промени, воспоставување на нови, современи методи на работа на оваа служба. Ова е мотивирано од две причини. Првата е заштита на националните интереси на државата, што впрочем е и најважната улога на оваа служба. Втората е издигнување на службата на нивно на релевантен партнер во рамките во глобалната мрежа на безбедносно-разузнавачките служби – рече Спасовски.

Владата формираше меѓуресорска работна група, која има задача да понуди најсоодветен модел за реформа пред се на УБК, но и осврт на потребата од реформи во Агенцијата за разузнавање и военото разузнавање, како и другите институции од оваа област.

– Реформата е неопходна и таа не смее да биде спроведена само проформа, туку напротив треба да биде сеопфатна и долгорочна. Токму затоа и не ветуваме дека реформата ќе ја завршиме одеднаш, за три месеци во целиот безбедносно-разузнавачки сектор.Како министер и човек кој долги години е дел од општествено-политичките процеси во нашата земја, ќе ги споделам со вас моите очекувања од оваа реформа: Да се создаде ефикасен систем за заштита на националната безбедност, кој нема да биде злоупотребен за партиско-политички цели. Функционирање на службите согласно меѓународните стандарди и правила, притоа штитејќи ги и гарантирајќи ги државните интереси, а тоа пред се значи дејствување на службите ослободени од политички влијанија. Воведување на современи методи на работење, преку кое ќе се зголеми нивната превентивна улога во справувањето со современите безбедносни закани – рече Спасовски.