!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

На казахстанските олимпијци им се одземени медалите од Пекинг


Казахстан, 17 ноември, 2016 - 13:52 (META) 

Олимпискиот комитет на Казахстан денеска соопшти дека на тројца спортисти од земјата им се одземени олимписките медали по новите тестирања на примероците од Олимписките игри од Пекинг од 2008 година.

Без сребрени, односно бронзени медали останаа Ирина Некрасова и Марија Грабиветсаја, кои се натпреваруваа во кревање тегови, како и освојувачот на бронза во борење, Асет Мамбетов.

Покрај нив, поради допинг на игрите во Пекинг, ретроактивно се дисквалификувани и Владимир Седов и Маија Менеза, исто така натпреварувачи во кревање тегови, додека Алмас Утешов „падна“ поради користење недозволиви средства на годинешните игри во Рио де Жанеиро.


Грција бесна: Бразил го употребил уставното име на Македонија на веб-страницата на ЛОИ


Скопје, 31 јули, 2016 - 20:35 (META) 

Грчкиот олимписки комитет најави дека ќе преземе мерки поради наводната грешка на официјалната веб-страница за годинешната Олимпијада во Рио де Жанеиро, на која Македонија наместо под референцата Поранешна југословенска република Македонија е заведена под уставното име.

Како што јавуваат грчките медиуми, грешката е направена и покрај тоа што Меѓународниот олимписки комитет јасно ставил на знаење дека земјата во Обединетите нации е заведена како ФИРОМ.rio olimpijada mkd

Грчките медиуми реагираат и поради тоа што Бразилскиот олимписки комитет ја искористил и кратенката МКД на интернет-страницата, како и за тоа што во неколку различни написи за атлетичари и за спортски настани го употребиле името Македонија, а не ФИРОМ.

Претседателот на Грчкиот олимписки комитет, Исидорос Кувелос, најави дека ќе преземе мерки за да се исправи грешката.

Грција повеќе од две и пол децении го оспорува уставното име на Република Македонија.


Пожар во олимпиското село во Рио де Жанеиро


Рио де Женеиро, 30 јули, 2016 - 11:04 (META) 

Австралискиот олимписки комитет потврди дека избил пожар во зградата во Рио де Жанеиро, поради што се евакуирани персоналот и спортистите од оваа земја.

„Пожар со помал интензитет изби во подрумот на зградата во олимпиското село. Евакуирани се персоналот и спортистите“, стои во соопштението.

Засега не е позната причината за пожарот.

Ова е последен во низата инциденти поврзани со сместувањето на австралискиот олимписки тим. Австралискиот олимписки комитет на 24 јули соопшти дека нема да им дозволи на своите спортисти да влезат во собите затоа што во зградата наменета за нивниот тим тече вода од цевките и од плафонот.


Марко Чаласан, најдобар од Македонија на информатичка олимпијада


Охрид, 19 септември, 2015 - 10:26 (META) 

На свечена церемонија беа доделени наградите и медалите на Јуниорската балканска олимпијада по информатика што се одржува во Охрид.

Овој значаен настан во програмирање им претходи на Балканската и на Интернационалната олимпијада по информатика, на кои Македонија беше домаќин од 14 до 19 септември, во организација на Здружението на информатичарите на Македонија.

На Јуниорската балканска олимпијада по информатика учествуваа ученици на возраст до 15 години. Истата се одржува по деветти пат со учество на членки на Балканската иницијатива, како и Полска и Словенија.

Секоја земја учествува со тим кој се состои од четири натпреварувачи, лидер и заменик лидер на тимот. Учениците се натпреваруваат во решавање алгоритамски проблеми во два натпреварувачки дена.

Најдобар учесник на настанот беше ученикот од Полска, Јулиус Фам, а најдобар официјален учесник беше Романецот, Овидиу Разван Харшан. Освојувач на бронзен медал и најдобар учесник од Македонија беше Марко Чаласан. Наградите ги врачи претставник на Министерството за информатичко општество и администрација.

Претседателот на Здружението на информатичарите на Македонија, Миле Јованов, кој беше и претседавач на Олимпијадата, изјави дека настанот ја потврдува определбата на Македонија да ја подржува информатиката за да изгради информатичко општество и притоа креаторите на истото да се македонските информатичари.

– Ваквите натпревари кои се за најдобрите натпреварувачи од секоја земја, претставуваат и поттик за сите други ученици да се заинтересираат околу информатиката и програмирањето. Учениците учесници кои ќе постигнат значајни резултати на вакви олимпијади, добиваат можност бесплатно да студираат на најпрестижните универзитети во светот – истакна Јованов.


Груевски ги прими претставниците на Македонија на Специјалната олимпијада


Скопје, 14 август, 2015 - 14:38 (META) 

Премиерот Никола Груевски денеска се сретна со претставниците на Македонија на Специјалната олимпијада, кои учествуваа на последните Летни олимписки игри што се одржаа во Соединетите Американски Држави.

Учесниците на Специјалната олимпијада од Македонија од 25 јули до 2 авуст беа дел од ЛОИ во Лос Анџелес и освоија десет медали.

Тие се натпреваруваа во атлетика, пливање, пинг-понг и во јунифајд кошарка. Медали во атлетика освоија Јулијана Петровска – злато на 100 метри, Ајвази Себат – сребро на 200 и 400 метри и Албан Бајрамовски – сребро на 400 метри. Во пливање со медал се закитија Марио Мицковски – злато на 25 метри слободен стил, Стефан Трпковски – бронза на 25 метри слободен стил, Јована Павловиќ – бронза на 50 метри слободен стил. Во пинг-понг, Фатиме Бељур и Давид Стојановски освоија бронза, а тимот во кошарка јунифајд заслужи сребрен медал.

На Летните олимписки игри во Лос Анџелес учествуваа 7.000 атлети и 3.000 тренери од 177 земји и се натпреваруваа во 25 олимписки спортови.


Тетовскиот атлетичар Далибор Спасовски обезбеди пласман на Европска олимпијада


Тетово, 20 април, 2015 - 16:19 (META) 

Тетовскиот атлетичар Далибор Спасовски ќе учествува на првата Европска олимпијада, која ќе се одржи годинава во јуни, во Азербејџан. Одличниот резултат што го постигна на трката на 400 метри на изборниот натпревар во Скопје, му овозможи учеството на оваа олимпијада, каде ќе се натпреваруваат атлетичари во повеќе дисциплини.

– Европската олимпијада, која ќе се одржи во Баку, Азербејџан, ќе биде налик на Светската олимпијада. Ќе има учесници од сите земји и од сите спортски дисциплини. Атлетската федерација е при крај со составувањето на тимот што ќе учествуваа на првата Европска олимпијада – изјави Спасовски.

Спасовски по пауза од неколку години, успеа да се врати во одлична форма, а трката од 400 метри ја истрча за време 49 секунди и 37 стотинки.

– По неколку години пауза, повторно сум во добра форма. Со чести и упорни тренинзи, кои ги правам на фудбалското игралиште на спортскиот центар во Тетово, успеав да го постигнам овој резултат – рече Спасовски.

Спасовски е неколкукратен државен првак во атлетските дисциплини на 200 и на 400 метри, а повеќепати ја има преставувано Македонија на европски и на балкански првенства во атлетика.


Косово стана полноправна членка на МОК


Приштина, 9 декември, 2014 - 14:15 (META) 

Косово стана полноправна членка на Меѓународниот олимписки комитет (МОК) на седницата која  се одржа во Монако. Косово беше примена без ниту еден глас против, со што стана 205. членка на МОК.

Одлуката која ја донесе МОК значи дека Косово ќе може да настапи на Олимписките игри, кои во 2016 година ќе се одржат во Рио де Жанеиро.