!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Невладините немаат официјална информација дека истрагите против нив се затворени


Скопје, 22 ноември, 2017 - 12:40 (META) 

Граѓанските организации што беа предмет на истраги на МВР по налог на ОЈО, сè уште немаат добиено официјална информација дека истрагите се завршени и не е пронајден криминал, вели Фани Каранфилова-Пановска, извршната директорка на Фондацијата „Отворено општество“ – Македонија, на денешната конференција „Е-општество“ во организација на Фондацијата за интернет и општество „Метаморфозис“.

– Многу ми е драго што слушнавме изјава од министерот за внатрешни работи дека истрагите што ги спроведуваше МВР по налог на ОЈО кон граѓанските организации се затворени и не се најдени никакви криминални дејства. Таа вест е одлична, но сакам да кажам дека ние, повеќе од 22 организации што бевме предмет на сериозен институционален притисок од декември 2016 до мај, односно јуни 2017 година, сè уште немаме никаков официјален одговор од ОЈО од каде што беше поведена оваа истрага и под чиј налог и МВР и Финансиската полиција и Агенцијата за финансиско разузнавање беа присутни во нашите канцеларии. Немаме никаква официјална информација дека предистражната постапка е запрена затоа што не се најдени прекршувања на законите, а официјална информација за постапките немаме ниту од Управата за јавни приходи – вели Каранфилова-Пановска.

Според неа, медиумските реформи треба да се направат професионално и нагласи дека дебата мора да има и дека треба навремено да се истакнуваат сите недостатоци.

Таа на конференцијата „Е-општество“ истакна дека и не постои никаква гаранција дека сè уште не се прислушува нелегално.

– Можеби и не се прислушува, но јас не добивам таков впечаток ниту од пишаните документи ниту од тоа како течат процесите. Со самиот факт што МВР допрва поведува инцијатива за нов закон за оперативно-техничка агенција што треба да го извади делот за прислушување од УБК, покажува дека таму поставеноста до пристапот до информации не е променета – додаде Каранфилова-Пановска.


Уапсено лице кое се барало со потерница поради шверц на 20 килограми марихуана


Скопје, 17 ноември, 2017 - 9:59 (META) 

Полицијата вчера го уапсила 39-годишниот М.О., по кој била распишана потерница поради шверц на 20 килограми марихуана од Косово во Македонија, во март годинава, соопшти МВР.

По неколкумесечно бегство, осомничениот бил пронајден вчера и веднаш предаден на Основното јавно обвинителство за понатамошна постапка.

Тој и 65-годишниот Д.И., кој бил приведен при обидот за шверц на марихуната, се товарат за неовластено производство и пуштање во промет на наркотични дроги, психотропни супстанци и прекурсори.

Дрогата, според МВР, тие ја набавиле во Приштина кон крајот на март и сакале да ја прошверцуваат преку граничниот премин Долно Блаце. На преминот, М.О. пеш влегол во земјава, додека Д.И., според негови иструкции, требало да ја пренесе дрогата со автомобилот што го изнајмиле од агенција.

Но, царинските службеници на Долно Блаце извршиле детален преглед на возилото, во кое пронашле 42 пакувања марихуана со вкупна маса од околу 20 килограми.


Со помош од граѓаните уапсени се тројцата насилници од 27 април


Скопје, 17 октомври, 2017 - 20:34 (META) 

По објавувањето на фотографиите на интернет-страницата на МВР, трите лица што беа барани поради учество во насилствата во Собранието од 27 април, се уапсени, соопшти Јавното обвинителство на Република Македонија.

„Јавното обвинителство на Република Македонија изразува благодарност до сите совесни граѓани, со чија помош е утврден идентитетот на лицата чии фотографии беа објавени. По наредба на јавното обвинителство, трите лица се лишени од слобода“, стои во соопштението.

Станува збор за лица кои се инволвирани во кривично-правниот настан во Собранието на Република Македонија. Фотографиите и повикот до граѓаните за нивно препознавање беа објавени во согласност со член 277 од Законот за кривична постапка, по претходно дадено одобрение од Основното јавно обвинителство Скопје и во соработка со Министерството за внатрешни работи.

Синоќа по наредба на обвинителството беа уапсени пет лица поради учество во насилствата од 27 април и за обидот за убиство на пратеникот и лидер на Алијанса за Албанците, Зијадин Села.


Препродавачите на билети за Супер купот се спогодиле со ОЈО да платат казни по 500 евра


Скопје, 9 август, 2017 - 18:01 (META) 

Петмината препродавачи на билети за Супер купот, за кои МВР поднесе кривични пријави, денеска се спогодиле со Основното јавно обвинителство Скопје, да платат парични казни во висина од 500 евра, информираат од таму.

„Еден од осомничените е државјанин на Република Србија, двајца се државјани на Велика Британија, додека двајца имаат двојно државјанство и на Република Македонија и на САД. Со сите нив, надлежните обвинители постигнаа спогодби за одмерување на видот и на висината на кривичната санкција, со кои секое од лицата прифати да плати парична казна во висина од 500 евра. Дополнително, за лицата кои немаат македонско државјанство е предвидена и мерка протерување од земјата за време од една година“, се вели во соопштението на ОЈО.

Предлог-спогодбите со осомничените се доставени до судија на претходна постапка.

„Лицата беа осомничени дека го извршиле делото санкционирано со последните измени на Кривичниот законик, а со кои се санкционира нелегално препродавање билети за спортски натпревари. Согласно законот, за ова кривично дело е предвидена парична казна или казна затвор до една година“, се додава во соопштението.


ОЈО врши увид на две локации каде се пронајдени 4 починати лица


Скопје, 25 јуни, 2017 - 13:42 (META) 

Увидни екипи раководени од дежурен јавен обвинител од Основното јавно обвинителство – Скопје вршат увид во куќа во Ѓорче Петров, каде што претпладнево биле пронајдени тела на две починати лица, соопштија од ОЈО.

„Веднаш по завршувањето на увидот, екипите ќе се упатат кон селото Глумово, каде што се пронајдени телата на уште две лица. Според првичните информации, двата настани се поврзани, а сите починати лица биле во крвно сродство“, известија од Обвинителството.

Исто така, како што посочуваат оттаму, првичните сознанија на истрагата укажале дека меѓу починатите лица е и едно за кое постои сомневање дека ги лишило од живот другите пред да си го одземе животот.

Во настаните уште едно лице е повредено и како што известуваат од Обвинителството, тоа е хоспитализирано и врз него е извршена хируршка интервенција.

Во меѓувреме, до увидот, локацијата во селото Глумово ја обезбедуваат полициски екипи.

Јавниот обвинител издал наредби за прибирање на сите траги и материјални докази пронајдени на местото, кои подоцна ќе бидат испратени на вештачење.

„Телата на починатите лица ќе бидат предадени на обдукција. Интензивно се работи на расветлување на настанот и на утврдување на мотивите“, соопштија од Основното јавно обвинителство.


ОЈО бара притвор за напаѓачот на Тодоров


Скопје, 2 јуни, 2017 - 12:43 (META) 

Основното јавно обвинителство поведе истражна постапка и побара притвор за велешанецот Љупчо Стојановски, кој вчера со возушен пиштол пукаше во поранешниот министер за здравство, Никола Тодоров.

„Осомничениот се гони за сторени две кривични дела и тоа обид за убиство од член 123 во врска со член 19 и за недозволено изработување, држење и тргување со оружје или распрскувачки материи од член 396 од Кривичниот законик. Надлежниот јавен обвинител до судот поднесе и предлог за определување притвор, бидејќи ценеше дека се исполнети законските основи за нејзиното изрекување“, се вели во соопштението.

Стојановски, кој е дедо на малата Тамара Димовска, која почина додека Фондот за здравство го одобри нејзиното лекување во странство, е однесен во Кривичниот суд, каде судија на претходна постапка треба да одлучува по барањето за притвор.
Нападот на Тодоров, кој не е повреден, следеше еден ден откако пратеникот на ВМРО-ДПМНЕ, Димитар Стевананџија, го злоупотреби случајот на малата Тамара за собирање политички поени и за да ја нападне предложената влада на СДСМ.


Поведена постапка против едно лице за полов напад врз дете


Скопје, 2 јуни, 2017 - 12:10 (META) 

Основното јавно обвинителство (ОЈО) денеска соопшти дека е поведена постапка против едно лице за полов напад врз дете, за што му е определен и притвор од триесет дена.

Осомничениот делото го вршел во периодот од септември до декември 2016 година, во времето кога ги користел законски овозможените видувања со своето дете од вонбрачна заедница. Однесувањето на детето создало сомнеж кај мајката, која го пријавила случајот, а од тој момент Обвинителството ги презело сите потребни дејства за прибирање докази и за утврдување на факти во предметот.

„По спроведување на предистражна постапка, надлежен јавен обвинител од ОЈО Скопје донесе наредба за спроведување на истражна постапка против осомничениот за полов напад врз малолетник кој не наполнил 14 години“, се наведува во соопштението.

Обвинителството ценејќи дека се исполнети законските основи, до судија на претходна постапка поднело предлог за определување притвор за осомниченото лице. Судот го прифатил предлогот и со решение на осомничениот му е определен притвор во времетраење од триесет дена.


Судот на барање на СЈО ги замрзнал имотот и сметките на Кочан


Скопје, 10 мај, 2017 - 22:39 (META) 

Основен суд Скопје 1 на барање на Специјалното јавно обвинителство попладнево го замрзнал имотот на сопственикот на „Трансмет“, Сеад Кочан, јавува телевизија „Телма“.

Неофицијално, решението од судот опфаќало замрзнување на целиот движен и недвижен имот, како и на сметките на компаниите каде што тој има удели, меѓу кои телевизија „Нова“, градежната компанија „Трансмет“ и други.

За бизнисменот Сеад Кочан распишана е меѓународна и домашна потерница, бидејќи му е одреден притвор за случајот „Труст“.

СЈО ја отвори истрагата под име „Труст“, во која три физички лица и фирмите „Трансмет“ од Скопје, „Силекс“ од Кратово и „Вато“ од Студеничани се товарат дека со фалсификувана документација добиле тендер од ЕЛЕМ, вреден 17.235.772 евра.


ОЈО ги гони двајцата напаѓачи на Села за обид за убиство и побара притвор


Скопје, 10 мај, 2017 - 20:14 (META) 

Основното јавно обвинителство – Скопје информираше дека до овој момент биле идентификувани двајца напаѓачи на пратеникот З.С. за време на настаните во Собранието на 27 април.

Оттаму додаваат дека од досега прибавените докази, обвинителството оценило дека постои основано сомневање дека овие две лица, заедно со други, кои во овој момент не се идентификувани, го извршиле кривичното дело, обид за убиство.

„Надлежниот јавен обвинител донесе наредба за спроведување истражна постапка против двете лица за наведеното кривично дело. Истовремено, по оценка на Јавното обвинителство, против осомничените неопходно е да биде изречена мерка за нивно обезбедување, поради што јавниот обвинител до судија на претходна постапка поднесе предлог за одредување притвор, бидејќи постојат сите законски основи за тоа“, информираат од обвинителството.

Полицијата рано утринава извршила претрес во домот на К.Ѓ. (39), а потоа го привела заедно со неговиот татко Ц.Ѓ. (68), под сомневање дека се едни од напаѓачите на пратеникот Зијадин Села во Собранието за време на насилното влегување на група граѓани во законодавниот дом.


ВМРО-ДПМНЕ ги повика институциите „да не приведуваат недолжни луѓе“


Скопје, 2 мај, 2017 - 10:06 (META) 

ВМРО-ДПМНЕ денеска ги повика институциите да не приведуваат, како што велат од партијата, „недолжни луѓе, брзајќи да покажат некаков резултат од настаните во четвртокот“.

„Во текот на вчерашниот ден до партијата допреа информации дека приведени се многу луѓе кои не сториле никакво насилство или кривично дело, а полицијата ги привела, ги држела со часови во полициска станица, а дел од нив добиле и притвор без елементарен доказ дека сториле кривично дело или насилство. Треба да се разграничи неколкучасовно влегување на граѓани во народниот парламент, заради насобран револт и гнев од предавничките, антидржавни и кукавички политики на СДС, од нанесувањето тешки телесни повреди. ОЈО и судовите да немаат различни аршини за овие настани од настаните при насилствата врз полицијата направени од шарените платени протестанти минатата година, кои за пари протестираа и вршеа насилство врз македонските полицајци“, велат од партијата.

Од ВМРО-ДПМНЕ го предупредуваат министерот за внатрешни работи, Агим Нухиу, да не врши притисок на вработените во Министерството по секоја цена да апсат што повеќе луѓе без основа.

„Потсетуваме дека предизвикувач на овој народен бунт е токму СДС, кој не само што 60 дена ги игнорираше граѓаните кои масовно, упорно, мирно и демократски протестираа, туку и континуирано го провоцирааше со навреди, погрдни зборови, омаловажувања и конечно со незаконскиот и противиставен обид за избор на претседател на парламентот“, додаваат од партијата.