Судењето за „Монструм“ одложено за 14 март, останува обвинението за „тероризам“


Скопје, 12 февруари, 2018 - 12:13 (META) 

Обвинителот на Јавното обвинителство за гонење на организиран криминал и корупција, Наум Пановски, на почетокот на новиот судски процес за петкратното убиство кај Смиљковското езеро, истакна оти останува на првичниот обвинителен акт од пред пет години, односно дека шестмината обвинети сториле кривично дело тероризам.

Сепак, денешното рочиште за случајот „Монструм“ се одложи за 14 март, бидејќи Пановски во судницата прочита само еден од двата обвинителни акти.

Имено, откако Пановски го прочита обвинителниот акт, реагираше адвокатот на дел од обвинетите, Насер Рауфи, кој рече дека недостига второто обвинение за Сами Љута, кој беше уапсен година и половина по апсењето на останатите, поради што тогашната обвинителка Гордана Гешковска направи посебно обвинение за него. Обвинителството за новото судење технички не ги споило двете обвиненија што беше причина за денешното одлагање.

Судскиот процес против шестемина обвинети за петкратното убиство кај Смиљковското Езеро во Скопје што се случи на 12 април 2012 година почна од почетокот откако на 24 ноември, минатата година Врховниот суд ги уважи жалбите на одбраната на обвинетите и ги укина првостепената и второстепената пресуда од првичниот судски процес.

За убиството на доживотен затвор беа осудени Алил Демири, Африм и Агим Исмаиловиќ и Езим и Хаки Азири и Самил Љута. По укинувањето на пресудите, Врховниот суд во декември лани ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. За судот сè уште недостапни се Алил Демири и Африм Исмаиловиќ по кои се распишани меѓународни потерници.

Инаку, обвинителот, Наум Пановски, кој сега го застапува обвинението заедно со својата колешка Вилма Рускоска го застапуваа обвинението за настаните во кумановско Диво Насеље од 9 и 10 мај 2015 година.

Новото судење го води судијата Огнен Ставрев.


Обвинителството отвори истрага за затајување данок при увоз на дизел гориво


Скопје, 25 јануари, 2018 - 15:10 (META) 

Основното јавно обвинителство за гонење на организиран криминал и корупција денеска соопшти дека, отворило предистражна постапка по допрен глас во врска со злоупотреба и затајување на данок при увоз на дизел гориво.

„Предистражната постапка е започната поради постоење на сомнение дека се увезувала стока декларирана како нафта за домаќинство, а всушност се увезувало дизел гориво при што е нанесена штета на буџетот на Република Македонија. Основното јавно обвинителство за гонење на организиран криминал и корупција презема дејствија за утврдување на фактите“, стои во соопштението на Обвинителството.

На почетокот на оваа година дел од компаниите, коментирајќи го новиот закон за енергетика, го отворија прашањето за даночно затајување и неплаќање на акцизата при увоз на гориво на дел од увозниците.

Големите компании, кои надлежните институции редовно ги контролираат, тврдат дека малите увозници наместо дизел, на граница пријавуваат нафта за домаќинство и на тој начин плаќаат девет денари помалку за акциза по еден литар гориво.

Со последните измени на Законот за акцизи во ноември, минатата година акцизата за дизелот се зголеми за три денари и сега изнесува 15,121 денар по литар, додека акцизата за нафтата за домаќинство, која исто така се зголеми за три денари, од 1 јануари 2018 година изнесува 6,136 денари по литар.


ОЈО побарало продолжување на притворот на Чавков, Илиевски, Дамовски, Дурловски


Скопје, 26 декември, 2017 - 14:35 (META) 

Основното јавно обвинителство за гонење на организиран криминал и корупција побарало од Кривичниот суд да им ја продолжи мерката притвор на осомничените за насилствата во Собранието од 27 април.

„Основното јавно обвинителство за гонење на организиран криминал и корупција достави во надлежниот Основен суд Скопје 1 Скопје предлог за продолжување на изречената мерка притвор за лицата осомничени во предметот за кој прашувате“, се вели во одговорот од Обвинителството на прашањето на „Мета“ дали ОЈО за гонење на организиран криминал и корупција ќе бара или веќе побарало продолжување на марките притвор и куќен притвор што им беа одредени на осомничените за настаните во Собранието од 27 април 2017 година.

Обвинителството на 28 ноември соопшти дека отворило истрага против 36 лица за насилствата во Собранието, кои ги товари за терористичко загрозување на уставниот поредок и безбедноста на државата.

Според официјалните соопштенија на судот, на барање на обвинителството притвор им беше одреден на 28 осомничени, а четворица добија куќен притвор. За четворица од вкупниот број на осомничени нема официјални податоци.

Меѓу притворените се и поранешниот министер за внатрешни работи и директорот на Бирото за јавна безбедност, Митко Чавков, водачите на протестите на „За заедничка Македонија“, Богдан Илиевски, Игор Дурловски и Борис Дамовски, како и актерот Владо Јовановски на кои притворот им истекува на 28 декември.

Инаку на 28 декември им истекува притворот на 19 осомничени, на 29 декември на двајца, а на 30 декември на едно лице.

На шестмината пратеници во Собранието од редовите на ВМРО-ДПМНЕ, Крсто Мукоски, Љубен Арнаудов, Сашо Василевски – кои добија притвор и Јохан Тарчуловски, Жаклина Пешевска и Љупчо Димовски – на кои судот им одреди домашен притвор, мерките им истекуваат на 5 јануари, бидејќи за нив судот одлучуваше подоцна оти се чекаше од Собранието да им го одземе пратеничкиот имунитет.

Кривичниот суд најдоцна од овие датуми, односно до истекот на првичната мерка треба да донесе одлука дали ќе го прифати барањето на Обвинителството за продолжување на притворите.


Судот им одреди притвор на четворицата осомничени за 27 април кои се во бегство


Скопје, 25 декември, 2017 - 13:44 (META) 

Судија на претходна постапка при Основниот суд Скопје 1 им одредил мерка притвор на четворица осомничени за насилствата во Собранието од 27 април, оваа година, кои се во бегство и против нив треба да биде распишана потерница, соопшти судот.

„Судија на претходна постапка при Основниот суд Скопје 1 – Скопје, по добиено известување од надлежните органи дека лицата А.В., Н.М., М.Д. и Д.Д. опфатени со предлогот на ОЈО за гонење организиран криминал и корупција за определување мерка притвор, а во врска со настаните од 27 април во Собранието на Р.М., се недостапни на органите за прогон, донесе решенија со кои на сите им определи мерка притвор во траење од 30 дена по нивно пронаоѓање односно лишување од слобода, а поради постоење на причините предвидени во член 165 став 1 точки 1, 2 и 3 од Законот за кривична постапка“, стои во соопштението на Кривичниот суд.

Решенијата за притвор се испратени до Обвинителството, кое треба да донесе наредба за распишување на потерница по осомничените лица.

Обвинителството за гонење на организиран криминал и корупција кон крајот на ноември отвори истрага против вкупно 36 лица за насилствата од 27 април, од кои најголемиот дел се наоѓаат во притвор.

Меѓу притворените се и поранешниот министер за внатрешни работи и директорот на Бирото за јавна безбедност, Митко Чавков, водачите на протестите на „За заедничка Македонија“, Богдан Илиевски, Игор Дурловски и Борис Дамовски, како и шестмина пратеници од редовите на ВМРО-ДПМНЕ во Собранието.

Сите 36 осомничени се товарат за кривичното дело „терористичко загрозување на уставниот поредок и безбедноста на државата“, за кое е предвидена казна затвор од најмалку 10 години.


ВМРО-ДПМНЕ им се закани на Јеремиќ и на медиумите што ја пренеле изјавата за Мијалков


Скопје, 7 декември, 2017 - 17:07 (META) 

Објавувањето дека е отворена предистражна постапка по допрен глас за интервјуто на Вук Јеремиќ е уште еден доказ дека во Македонија нема правен систем и правда која е еднаква за сите, туку партиско-политички прогон нарачан од Заев и од неговата хунта, се вели во реакцијата на опозициската ВМРО-ДПМНЕ на денешното соопштение на Основното јавно обвинителство за гонење организиран криминал и корупција.

Од партијата велат дека очекуваат што е можно побргу Јавното обвинителство да излезе со информација за оваа предистражна постапка што „политички ја отвора“ и наводите да ги соопшти во јавноста за да може потоа соодветно да се процесуира случајот и против Вук Јеремиќ и против сите медиуми блиски до СДСМ кои, како што наведуваат од партијата, ја злоупотребуваат оваа изјава заради нарушување на честа и на угледот на партиските функционери.

Оттаму наведуваат дека премиерот Зоран Заев пред неколку месеци најави дека функционери од власта се предмет на истрага, но јавноста, велат од партијата, сè уште нема информација кој му ги соопштил тие информации на Заев, а органите на прогон кријат за кои случаи станува збор.

„Странски државјанин излезе со јавно обвинување дека в.д. директорот на Агенцијата за филм, Горјан Тозија, го рекетирал „Јадран филм“, но постапка околу овој случај не беше поведена по јавно допрен глас. По јавно допрен глас не беше поведена ниту постапка за бројните сведочења за изборното насилство и сите закани кои беа упатувани кон гласачите. Не беше поведена постапка кога насилници влегуваа со пиштоли или кога отворено се говореше дека криминалци под команда на СДС делат поткуп низ државата. Не беше јавно соопштено ниту дали се отвора предистражна постапка за криминалот на Заеви со ‘Цареви кули’ или криминалот поврзан со ‘Тритерол’“, стои во соопштението од ВМРО-ДПМНЕ.


Именувани в.д. шефови на скопското и на обвинителството за организиран криминал


Скопје, 6 декември, 2017 - 15:47 (META) 

Советот на јавни обвинители на денешната седница именуваше в.д. шефови на неколку обвинителства, кои ќе ги вршат овие функции во наредните еден-два месеци.

Ова, како што појасни претседателот на Советот на јавни обвинители, Коле Штериев, било едногласно договорено за да може новиот јавен обвинител, Љубомир Јовевски, да си формира сопствен тим.

Така, за в.д. шеф на Јавното обвинителство за гонење организиран криминал е назначена Гордана Смаќоска, на Основното јавно обвинителство – Скопје е именуван Сашо Рајев, во ОЈО – Куманово е избрана Теута Бедиу, во Гостивар – Башким Исини, а прв човек на битолското Основно јавно обвинителство останува Антонио Јолевски.

Седум јавни обвинители за гонење организиран криминал и корупција ќе се избираат заедно со сите други по два месеци, посочи Штериев.

На денешната редовна седница, Советот избрираше јавни обвинители од огласот што беше објавен на 22 јуни оваа година.

За обвинител во државното јавно обвинителство, Советот го избра Исмаил Дарлишта, поранешен уставен судија и министер за правда.

Членовите на Советот на денешната седница за прв човек на Вишото јавно обвинителство во Битола ја избраа Мери Тромбева, за шеф на Основното јавно обвинителство Радовиш е именувана Билјана Стефчева, а Ханефи Амет од скопското Вишо јавно обвинителство е избран за обвинител на ОЈО – Тетово.

За другите места за кои беше распишан оглас, тој ќе биде поништен и ќе се објави нов.

Инаку, Собранието сè уште не гласаше за именувањето на Љубомир Јовески за нов државен јавен обвинител, а засега нема излезено ниту со предлог за уставен судија на местото на Исмаил Дарлишта, чиј деветгодишен мандат во Уставниот суд истече во јули оваа година.


Полицијата трага по уште шестмина осомничени за насилствата од 27 април


Скопје, 1 декември, 2017 - 14:15 (META) 

Шест лица осомничени за насилствата во Собранието од 27 април годинава, и понатаму остануваат недостапни за органите на прогонот и по нив се трага, изјави денеска министерот за внатрешни работи, Оливер Спасовски, одговарајќи на новинарски прашања на прес-конференција во Владата.

– Вчера беа 12, денеска се шест – рече Спасовски, алудирајќи дека во последните 24 часа по налог на Обвинителството за гонење организиран криминал и корупција се приведени уште шест лица.

Спасовски изјави дека налозите за претреси траат 15 дена и дека полицијата продолжува да постапува по нив.

Обвинителството за гонење организиран криминал и корупција во вторникот оваа недела, соопшти дека отворило истрага против 36 лица за насилствата од 27 парил во Собранието. Осомничените, меѓу кои се поранешниот директор на Бирото за јавна безбедност и поранешен министер за внатрешни работи, Митко Чавков, како и дел од организаторите на иницијативата „За заедничка Македонија“, Владо Јовановски, Борис Дамовски, Игор Дурловски и Богдан Илиевски, се товарат за терористичко загрозување на уставниот поредок и на безбедноста на државата.


Во Македонија откриена најголемата лабораторија за синтетички дроги во регионот


Скопје, 1 декември, 2017 - 11:34 (META) 

Во Тетово и во Скопје вчера е откриена најголемата лабораторија за нелегално производство на синтетички дроги во Југоисточна Европа, соопшти денеска Јавното обвинителство.

Лабораторијата е откриена во акција на Обвинителството за организиран криминал и корупција и на Министерството за внатрешни работи, а во предистражната постапка учествувале и Јавното обвинителство за организиран криминал и Министерството за внатрешни работи на Србија, преку заеднички истражен тим со македонските правосудни органи.

Во акцијата која вчера била спроведена на подрачјето на Тетово и на Скопје, била откриена цела инсталација за производство на синтетички дроги и се запленети големи количества дрога и суровини за нејзино производство.

„Станува збор за меѓународно организирана криминална група, составена од државјани на Република Србија и од македонски државјани, која се занимава со неовластено производство, обработка, поседување, пренос, посредување во продажба или купување, како и на друг начин неовластено пуштање во промет на наркотични дроги, психотропни супстанции и прекурсори. Во исто време, од страна на групата во Тетово била опремена илегална лабораторија за производство на синтетички дроги и прекурсори, со намера за понатамошна продажба и организирање на испорака на истите во Република Македонија, Република Србија и во други земји“, стои во соопштението од Јавното обвинителство за организиран криминал.

Оттаму додаваат дека годинава ова е десетта организирана криминална група разбиена од ОЈО за гонење организиран криминал и корупција.


Тројца осомничени за 27 април од куќен притвор одат во истражен затвор


Скопје, 1 декември, 2017 - 10:23 (META) 

Кривичниот совет на Основниот суд Скопје 1 вчера уважил дел од жалбите на Јавното обвинителство за гонење организиран криминал и корупција и на тројца осомничени за насилствата во Собранието од 27 април, им го заменил куќниот притвор, што претходно им беше одреден, со построга мерка – притвор, потврдија од судот.

Како што соопштија оттаму, станува збор за лицата М.П., Г.Ѓ. и Е.Д.Б.

Ова значи дека овие тројца осомничени треба, а според дел од медиумите, веќе и се префрлени од домашен притвор во притвор во истражен затвор.

За другите двајца кои добија куќен притвор, за кои се жалеше Обвинителството, Кривичниот совет ќе одлучува дополнително.

Инаку, уште еден осомничен, кој ѝ беше недостапен на полицијата, вчера самиот им се предал на органите на прогонот. Тој, како што информираат од судот, бил изведен пред судија на претходна постапка, кој по распитот му одредил мерка притвор од 30 дена.

Со ова вкупниот број на осомничени за насилствата од 27 април кои добија притвор, сега изнесува 19 лица.

Денеска, Собранието ќе одлучува за одземањето на имунитетот на пратениците Крсто Мукоски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, во врска со барањето на Кривичниот суд за нивно притворање.

Обвинителството за гонење организиран криминал и корупција во вторникот оваа недела, соопшти дека отворило истрага против 36 лица за насилствата од 27 парил во Собранието.

Осомничените, меѓу кои се поранешниот директор на Бирото за јавна безбедност и поранешен министер за внатрешни работи, Митко Чавков, како и дел од организаторите на иницијативата „За заедничка Македонија“, Владо Јовановски, Борис Дамовски, Игор Дурловски и Богдан Илиевски, се товарат за терористичко загрозување на уставниот поредок и на безбедноста на државата.


Собранието напладне ќе одлучува за имунитетот на шестeмина пратеници


Скопје, 1 декември, 2017 - 9:34 (META) 

Претседателот на Собранието, Талат Џафери, за дененска напладне ја закажа пленарната седницата на која ќе се одлучува за одземањето на имунитетот на пратениците Крсто Мукоски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, во врска со барањето на Кривичниот суд за нивно притворање.

Шестемина пратеници се дел од 36-те осомничени за насилствата во Собранието од 27 април оваа година. Нив, Обвинителството за гонење организиран криминал и корупција ги товари за терористичко загрозување на уставниот предок и на безбедноста на државата.

Џафери ја закажа седницата откако вчера Комисијата за деловнички и мандатно-имунитетни прашања едногласно, со пет гласа „за“ и без воздржани или против, го одобри барањето на судот и донесе заклучок да му предложи на Собранието да им се одземе имунитетот на шестемина пратеници.

За одземање на имунитет на пратеник се гласа со просто мнозинство, односно потребни се 61 глас.

Oд пратеничката група на ВМРО-ДПМНЕ реагираа на одлуката на Комисијата, која ја нарекоа „гола желба за политички реваншизам“.

Од опозициската партија велат дека пратеничката група на ВМРО-ДПМНЕ и на Коалицијата за подобра Македонија не сака да дава легитимитет на противуставните одлуки на партиската комисија на СДСМ.

Инаку, според објавените материјали за седницата, од Кривичниот суд до претседателот на Собранието пристигнале две барање за одобрување притвор. Едното барање се однесува на барањето за одборување притвор на пратениците Крсто Мукоски, Љубен Арнаудов и Јохан Тарчуловски и е потпишано од судијката на претходна постапка Весна Димишкова, а другото е за пратениците Сашо Василевски, Љупчо Димовски и Жаклина Пешевска, потпишано од судијата на претходна постапка, Ненад Савески.