!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Именувани в.д. шефови на скопското и на обвинителството за организиран криминал


Скопје, 6 декември, 2017 - 15:47 (META) 

Советот на јавни обвинители на денешната седница именуваше в.д. шефови на неколку обвинителства, кои ќе ги вршат овие функции во наредните еден-два месеци.

Ова, како што појасни претседателот на Советот на јавни обвинители, Коле Штериев, било едногласно договорено за да може новиот јавен обвинител, Љубомир Јовевски, да си формира сопствен тим.

Така, за в.д. шеф на Јавното обвинителство за гонење организиран криминал е назначена Гордана Смаќоска, на Основното јавно обвинителство – Скопје е именуван Сашо Рајев, во ОЈО – Куманово е избрана Теута Бедиу, во Гостивар – Башким Исини, а прв човек на битолското Основно јавно обвинителство останува Антонио Јолевски.

Седум јавни обвинители за гонење организиран криминал и корупција ќе се избираат заедно со сите други по два месеци, посочи Штериев.

На денешната редовна седница, Советот избрираше јавни обвинители од огласот што беше објавен на 22 јуни оваа година.

За обвинител во државното јавно обвинителство, Советот го избра Исмаил Дарлишта, поранешен уставен судија и министер за правда.

Членовите на Советот на денешната седница за прв човек на Вишото јавно обвинителство во Битола ја избраа Мери Тромбева, за шеф на Основното јавно обвинителство Радовиш е именувана Билјана Стефчева, а Ханефи Амет од скопското Вишо јавно обвинителство е избран за обвинител на ОЈО – Тетово.

За другите места за кои беше распишан оглас, тој ќе биде поништен и ќе се објави нов.

Инаку, Собранието сè уште не гласаше за именувањето на Љубомир Јовески за нов државен јавен обвинител, а засега нема излезено ниту со предлог за уставен судија на местото на Исмаил Дарлишта, чиј деветгодишен мандат во Уставниот суд истече во јули оваа година.


Обвинителството со анализа на видеоснимки ќе го бара убиецот од Чаир


Скопје, 27 ноември, 2017 - 15:04 (META) 

Основното јавно обвинителство Скопје ги зело и ќе ги анализира видеоснимките од камерите што се наоѓаат во околината на местото каде во петокот минатата недела, беше убиен 35-годишниот И.А. од селото Блаце.

Од Обвинителството денеска соопштија дека надлежниот јавен обвинител ги презема сите неопходни мерки за откривање на сторителот и на мотивот за убиството.

„Обезбедени се видеозаписите од камерите што се наоѓаат во околината на местото каде се случи убиството и тие ќе бидат предмет на анализа. По наредба на јавниот обвинител телото на починатиот е предадено на обдукција. Во исто време, издадени се повеќе наредби за вештачење на чаурите, на облеката, на трагите од крв и на други предмети пронајдени и подигнати од местото на настанот“, стои во соопштението од Јавното обвинителство.


Сокол Митревски остана без пасош и доби забрана да го напушта Скопје


Скопје, 2 ноември, 2017 - 13:12 (META) 

Кривичниот суд го прифати барањето на Основното јавно обвинителство Скопје и на поранешниот градоначалник на општина Ѓорче Петров, Сокол Митревски, и на уште пет лица им одреди мерки на претпазливост, потврди судот.

На Митревски и на другите петмина осомничени судот им ги одзеде пасошите, им забрани да го напуштаат живеалиштето, односно Скопје, и им наложи редовно да се јавуваат кај службено лице во судот.

Обвинителството вчера соопшти дека отворило истражна постапка против девет лица за злоупотреба на службената положба и овластување.

Осомничените лица, меѓу кои е и поранешниот градоначалник на општина Ѓорче Петров, Сокол Митревски, се товарат дека во 2014 година постапиле незаконски при одлучувањето во постапки за поднесени барања за утврдување правен статус на бесправни објекти, со што нанеле штета во висина од 4.100.090 денари, односно 66.550 евра.

Според Обвинителството, осомничените незаконски спровеле постапка за легализација на три објекти и приватизација на општинското земјиште по цена од едно евро за еден квадратен метар, иако пазарната цена била значително повисока.


Митревски осомничен за продажба на општинско земјиште за едно евро за квадратен метар


Скопје, 1 ноември, 2017 - 11:23 (META) 

Основното јавно обвинителство Скопје потврди дека води постапка против повеќе лица осомничени за незаконско приватизирање на земјиште кое е сопственост на една општина.

Во соопштението на Обвинителството не е наведен идентитетот на осомничените лица ниту, пак, името на општината, но извесно е дека станува збор за поранешниот градоначалник на општина Ѓорче Петров, Сокол Митревски, како еден од осомничените лица.

Според Обвинителството, осомничените незаконски спровеле постапка за легализација на три објекти и приватизација на општинското земјиште по цена од едно евро за еден квадратен метар, иако пазарната била значително повисока.

„На приватизацијата ѝ претходела постапка за утврдување на статусот на незаконито изградени три објекти, која била реализирана спротивно на закон. Како резултат на оваа постапка, извршена е легализација на објектите и приватизација на земјиштето. Со тоа е овозможено земјиштето да биде откупено по цена од едно евро за еден квадратен метар, додека пазарната цена на лицитација по редовна постапка би била значително повисока“, стои во соопштението на ОЈО Скопје, во кое се додава дека за повеќе детали во врска со текот на постапката, навремено ќе ја информираат јавноста.

Поранешниот градоначалник на општина Ѓорче Петров, Сокол Митревски, како што потврдија за „Мета“ извори од истрагата, утрово бил приведен од полицијата и, според неофицијални информации, однесен во една од полициските станици во Скопје.


Првообвинетиот за грабежот во НЛБ тврди дека парите ги украл поради долгови


Скопје, 27 октомври, 2017 - 13:37 (META) 

Бобан Смилевски, првообвинетиот за грабежот во НЛБ, во завршните зборови ја призна вината и рече дека парите ги украл бидејќи имал долгови, а тој и семејство живееле под закани, пренесува „Фокус“.

– Делото не е од лукративна причина и не е за да се оствари имот за себе или за кој било друг. Бев во долгови и во последните два месеци бев под закани, јас и семејството. Губењето самоконтрола ме доведе до ова. За себе можам да кажам дека сум бил пример во приватниот живот, општеството, а до кражбата за себе можам да кажам дека не сум бил криминалец, ниту имам криминален ум – рекол Смилевски во својот завршен збор.

Тој додал дека другите обвинети ненамерно ги вмешал, па затоа побара тој да биде казнет наместо нив.

– Колку е поблага казната и колку побргу се вратам во општество, ќе почнам побргу да придонесувам – рекол Смилевски.

Тој им се извини на своите родители за нанесениот стрес и срам, како и на својата сопруга која ја оставил со две малолетни близначиња.

Објавата на пресудата за овој случај е закажана за 3 ноември.

Претходно, Обвинителството побара највисоки казни за четворицата обвинети во случајот – Бобан Смилевски, неговиот брат Горан Смилевски, Борис Минчевски и Мирослав Каевски.

Според обвинителниот акт, тие се товарат дека од НЛБ украле првин 400.000 швајцарски франци и 375.000 евра, а потоа уште 2 милиони швајцарски франци и 270.000 евра.


Обвинителство бара 10 години затвор за обвинетите за грабежот во НЛБ


Скопје, 27 октомври, 2017 - 12:41 (META) 

Основното јавно обвинителство Скопје, во завршните зборови за милионскиот грабеж во НЛБ, денеска побара од судот на обвинетите да им одреди највисока казна, која според Кривичниот законик изнесува 10 години затвор.

Четворицата обвинети, Бобан Смилевски, неговиот брат Горан Смилевски, Борис Минчевски и Мирослав Каевски, на претходното рочиште ја признаа вината, но не открија каде се парите и што сториле со нив. Денеска и тие треба да дадат завршни зборови.

Обвинителството бара највисока казна за првообвинетиот Бобан Смилевски бидејќи ја искористил довербата во банката и ги убедил другите да ги уништат доказите по кражбата, додека за неговиот брат, Горан Смилевски, се бара идентична казна бидејќи откако ги примил парите, го фрлил телефонот и не открива каде се парите.

Единствена олеснителна околност, која може да влијае на намалување на казната, според Обвинителството, би било тоа што обвинетите претходно немале сторено кривични дела.

Адвокатите на обвинетите, пак, бараат поблаги казни бидејќи нивните клиенти ја признале вината и биле угледни луѓе во општеството, односно Горан Смилевски е претседател на Синдикатот на вработените во Народна банка, поради што, според неговиот адвокат, уживал висок општествен углед и добивал признанија и високи оценки за неговата работа.

Според обвинителниот акт, обвинетите, искористувајќи ја својата работна позиција и познавањето на процесите на работа во банката, првин украле 400.000 швајцарски франци и 375.000 евра, а потоа украле уште 2 милиони швајцарски франци и 270.000 евра.

Надлежниот обвинител, кој го води предметот, поднесе обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума пари. Тие се товарат за несовесно работење во службата. Постапката против овие четири лица продолжува одвоено.


ОЈО Скопје почна истрага за тепањето на студентите на ланските студентски избори


Скопје, 26 октомври, 2017 - 16:26 (META) 

Основното јавно обвинителство Скопје по 16 месеци почна постапка за расветлување на упадот на Единицата за брзо распоредување (ЕБР) на МВР во просториите на Студентскиот парламент при Универзитетот „Св. Кирил и Методиј“ по минатогодишните студентски избори.

Обвинителството постапува по кривичната пријава што тогаш ја поднесе Хелсиншкиот комитет за човекови права против поранешниот директор на Бирото за јавна безбедност (БЈБ), Митко Чавков.

Од ОЈО Скопје за порталот „Сакам да кажам“ потврдиле дека е поднесено барање до надлежни институции да достават податоци, а повикани се и седум лица да дадат исказ пред јавен обвинител.

Обвинителството не отркива дали е отворена предистражна или можеби истражна постапка, а не информира ни за бројот на лицата за кои постои сомневање дека сториле кривични дела.

Дејствата, велат оттаму, се преземаат во насока на утврдување на постоење на елементи на кривичните дела спречување или попречување јавен собир од член 155 и малтретирање во вршење на службата од член 143 од Кривичниот законик.

Специјалните полициски единици вечерта на 30 јуни, по изборите за студентски лидер, влегоа во просториите на СПУКМ откако „Студентски пленум“ алармираше дека изборите се спроведени незаконски, со многу прекршувања, притисоци и закани, а нивните членови ја блокираа вратата од просторијата во која беа приврзаниците на претседателот на Студентскиот парламент, Кирил Спироски.

Припадниците на ЕБР, кои пред седиштето на СПУКМ пристигнаа со оклопни возила, ги исфрлија членовите на „Студентски пленум“ надвор од зградата, со што студентските избори кулминираа со насилство и со бруталност.


Две лица осомничени за серија кражби во автомобили во Скопје


Скопје, 22 октомври, 2017 - 12:39 (META) 

Секторот за внатрешни работи Скопје поднел известување до Основното јавно обвинителство Скопје за 19-годишниот А.В. од Кавадарци и 17-годишниот Р.М. од Скопје поради сомневање дека извршиле вкупно 59 кривични дела, од кои 16 тешки кражби, 42 обиди за тешка кражба и едно кривично дело одземање моторно возило, соопшти МВР.

Пријава е поднесена и против 24-годишниот Е.Х., кој се товари за прикривање.

Според полицијата, двајцата првоосомничени сите кражби и обиди за кражби ги извршиле во автомобили, кон крајот на мај и на почетокот на јуни годинава, во населбите Кисела Вода и Аеродром.

Дел од украдените предмети ги продале на Е.Х., кој и покрај тоа што знаел дека предметите потекнуваат од кривични дела, ги препродал на трети лица за повисока сума.

Со извршување на кривичните дела, пријавените стекнале противправна имотна корист од околу 126.500 денари, односно околу 2.000 евра, велат од полицијата.


ОЈО Скопје ги гони тројцата уапсени насилници за нападот врз Села на 27 април


Скопје, 18 октомври, 2017 - 17:12 (META) 

Трите лица уапсени вчера, откако беа препознаени од граѓани, по објавувањето на нивните фотографии на веб-страницата на МВР, Основното јавно обвинителство Скопје ги гони за обидот за убиство на пратеникот и лидер на Алијанса за Албанците, Зијадин Села, за време на насилствата во Собранието од 27 април.

Од Обвинителството денеска соопштија дека ја прошириле истрагата за случајот, а надлежниот јавен обвинител доставил предлог до судот на тројцата осомничени да им биде одреден притвор.

Триесетдневен притвор судот веќе им одреди на четворица од петте лица што беа уапсени завчера вечерта, исто така осомничени за учество во насилствата во Собранието и за обидот за убиство на Села.


Брза и масовна била помошта од граѓаните за идентификување на тројцата насилници од 27 април


Скопје, 18 октомври, 2017 - 11:45 (META) 

Брза и масовна била реакцијата на граѓаните што помогнале во идентификувањето и во пронаоѓањето на трите лица осомничени за учество во насилствата во Собранието, од 27 април, за кои МВР, по налог на Основното јавно обвинителство Скопје, вчера објави фотографии на својата интернет-страница и побара помош од граѓаните, дознава „Мета“ од извори во истрагата.

Неофицијално, голем број граѓани експресно реагирале по објавувањето на фотографиите, со информации за осомничените лица. Реакции со поддршка имало и преку „Фејсбук“, а голем бил бројот на граѓани кои за кратко време се јавиле на бројот 192 со информации за осомничените, кои, како што дознаваме, се од Скопје.

Тие беа уапсени само неколку часа по објавувањето на фотографиите. Благодарност до совесните граѓаните за помошта во утврдувањето на идентитетот на лицата чии фотографии беа објавени изрази и Јавното обвинителство, кое синоќа соопшти дека трите лица се лишени од слобода.

Фотографиите и повикот до граѓаните за нивно препознавање, како што соопшти Обвинителството, беа објавени во согласност со член 277 од Законот за кривична постапка, по претходно дадено одобрение од Основното јавно обвинителство Скопје и во соработка со Министерството за внатрешни работи.

„Кога е потребно заради утврдување на идентитетот на лицата и предметите или во други случаи од интерес за успешно водење на постапката, правосудната полиција може да го фотографира осомничениот, да земе отпечаток од папиларните линии од прстите и од дланките, да земе биолошки материјал за ДНК-анализа, а по претходно одобрение на јавниот обвинител да ја објави и неговата фотографија. Правосудната полиција може од осомничениот да земе и примероци заради ДНК-анализа, согласно со членот 249 став (3) од овој закон“, стои во членот 277 од ЗКП.

Инаку, ова е можеби првпат Обвинителството да го користи членот 277 од ЗКП, односно преку јавно објавување на фотографии да бара помош од граѓаните за идентификување осомничени лица.