Ахмети: Членството во ЕУ и НАТО ќе ни донесе напредок, стабилност и мир


Скопје, 13 август, 2018 - 16:02 (META) 

Секретаријатот за европски прашања денеска во Клубот на пратеници организираше панел дискусија „Патот до Брисел преку Охрид“ за одбележување на 17 години од потпишувањето на Охридскиот рамковен договор со кој се направи спој помеѓу Охрид како внатрешна интеграција и Брисел како надворешна интеграција на државата.

Премиерот Зоран Заев рече дека Охридскиот рамковен договор гарантира дека насилството нема да биде начин на остварување на нечии права, дека гарантира недискриминација и претставува темел на соживот помеѓу етничките заедници.

– Сега создадовме уште еден историски договор, 17 години по рамковниот. Договорот со Грција ни го гарантира правото да се определуваме како Македонци, нашето државјанство е македонско, нашиот јазик е и ќе остане македонски. Како што пред 17 години храброста на политичарите и на граѓаните ја извадија Македонија од кризата така и сега имаме шанса да ја осигуриме нашата европска иднина – рече Заев.

Лидерот на ДУИ, Али Ахмети, рече дека пред 17 години без ангажирањето на НАТО државата ќе платела висока цена, но не материјална, туку човечка.

– Тогаш имаше многу ангажирања во спротивен правец за договорот да не се реализира. Имаше струи и земји кои што не сакаа нашата земја да биде стабилна и да оди напред, но прогресивните сили победија. Сега, референдумот е момент кој што треба да не сплоти затоа што е во интерес на сите граѓани. Треба да не однесе во правец кон членството во ЕУ и НАТО затоа што таму го гледаме развојот, напредокот и иднината, а тоа ќе значи мир, стабилност и благосостојба за граѓаните, државата и целиот регион – рече Ахмети.

Охридскиот рамковен договор означи крај на еден конфликт за кој се уште не може да даде одговор на прашањата дали мораше да се случи, смета Дафина Јовановска – Стојановска, пратеник во Собранието на Република Македонија како претставник на опозициската партија ВМРО-ДПМНЕ.

-Таа 2001 година не потсетува на период на загинати, исчезнати и трауми. Ужасите на војната не му се потребни на едно вакво мало општество. Војната и резултатите од неа отворија рани кои што времето ќе ги залечи ако не додава некој сол на нив. Тажно е кога се отвораат прашањата кои што се болни за да се затскрие неспособноста да се решат реалните проблеми на граѓаните како сиромаштијата, корупцијата и криминалот – потенцираше Јовановска – Стојановска.

Доколку референдумот за спорот за името биде неуспешен тогаш тоа ќе значи крај на владеењето на правото, а најверојатно и на мирот рече поранешната заменичка на помошникот Скератар за одбрана на САД, задолжена за Европа и Азија во администрацијата на Обама, Евелин Фаркаш.

– Американскиот Стејт департмент ги поддржува мирот и стабилноста на Западен Балкан и борбата против Путин и путинзмот – вели Фаркаш.

Дека од големо значење е одлуката која што граѓаните ќе ја донесат на претстојниот референдум смета и сер Барни Вајт Спунер (Sir Barney White-Spunner, поранешен генерал на Британската армија и поранешниот командант на НАТО во Република Македонија, за време на потпишувањето на рамковниот договор.

– НАТО значи дека 29 членки ќе стојат зад вашиот грб и ќе ве штитат, ќе има обуки за војската, зголемување на БДП, странски инвестиции и многу вработувања – вели Спунер.

На одбележувањето на годишнината од Рамковниот договор не присуствуваа потписниците Бранко Црвенковски, поранешен лидер на СДСМ и Љубчо Георгиевски поранешен претседател на ВМРО-ДПМНЕ. Вицепремиерот за европски прашања рече дека тој лично ги поканил, но дека тие во овој период биле надвор од Скопје.

Забележително беше и отсуството на вицепремиерот за спроведување на Рамковниот договор, Хазби Лика, за кој Османи рече дека тој самиот треба да одговори зошто не дошол на одбележувањето.


Стотици административци вработени по Рамковен уште седат дома и примаат плата


Скопје, 29 јуни, 2018 - 10:58 (META) 

Сè уште не е изготвен план за распоредување на работни места на втората група административци што се вработени според Рамковниот договор и тие уште примаат плата иако седат дома и не одат на работа, пишува „Порталб.мк“.

Секретаријатот за спроведување на Охридскиот рамковен договор веќе два месеца е во фаза на подготовки на планот за нивно распоредување на работните места каде ќе извршуваат работни обврски.

„Порталб.мк“ пишува и дека и по три месеци, од 29 март, кога испратиле барање според законот за слободен пристап до информации од јавен карактер да се каже колку долго луѓе примале плата за седење дома, какво се нивното образование и квалификации и колкави плати добиваат, одговор од Секретаријатот нема.

Во однос на првата група кои требаше да почнат со работа, над 90 отсто од 958 административци потпишале договори за систематизација во релевантните институции, од Владата велат дека мал дел од нив почнале да одат на работа.


Манчевски: Вработените според Рамковен ќе бидат распределувани и во училишта


Скопје, 8 март, 2018 - 13:11 (META) 

Луѓето што примаат плата според Охридскиот рамковен договор, а не одат на работа, ќе бидат распоредувани на работни места не само во јавната администрација, како досега, туку ќе добијат понуда да работат во целиот јавен сектор, односно и во училишта, градинки, здравствени установи, јавни претпријатија, рече денеска министерот за информатичко општество и администрација Дамјан Манчевски.

Тој појасни на 1.600 вработени според Рамковниот договор ќе им биде понудено работно место, а доколку не го прифатат, ќе бидат ставени на трансфер листа од каде повторно ќе може да бидат распоредени за потребите на друга институција доколку тоа биде прифатливо за нив.

Тоа го овозможуваат промените на четири закони и амандманската интервенција во Законот за јавна администрација.


Лавров: ЕУ е пасивна околу тиранската платформа и кршењето на Охридскиот договор


Белград, 22 февруари, 2018 - 13:13 (META) 

Министерот за надворешни работи на Русија, Сергеј Лавров на заедничка прес-конференција со српскиот претседател, Александар Вучиќ во Белград вчера повторно ја спомена Македонија, истакнувајќи дека Москва не може „а да не биде загрижена за пасивноста на Европската Унија во врска со иницијативата што се појави од Тирана за т.н. тиранска платформа“, која, како што кажа, е „нескриен повик за создавање на ‘Голема Албанија’“.

– Примерите за тоа се доста вознемирувачки. Неодамна, кога беа одржани парламентарните избори во Македонија, претседателот на Парламентот, откако беше избран на функцијата, влезе во својот кабинет и на работната маса постави албанско знаме. Ова е во Македонија. Деновиве албанскиот премиер, Еди Рама, гордо кажа дека тој од Албанија го иницирал законот во Македонија со кој на албанскиот јазик му се дава статус на државен јазик во земјата – изјави Лавров одговарајќи на новинарско прашање на прес-конференцијата со Вучиќ, за време на неговата официјална посета на Србија.

На тој начин, рече шефот на руската дипломатија, се прекршува Охридскиот рамковен договор „кој сите ние го примивме како олеснување, бидејќи создаде основи за надминување на кризата во Македонија пред повеќе години“.

– Доколу овие постигнувања и договори сега се уништат, се што било сработено и договорено со големи напори, било да е тоа во Македонија, Босна и Херцеговина и на друго место во Западен Балкан, ќе биде изгубено. Ми се чини дека има доволно причини да побараме од Европската Унија да каже како ги исполнува своите сопствени одлуки и колку тоа кореспондира со довербата што и беше дадена од меѓународната заедница – изјави Лавров.


Тунтев: Работиме на амандмани за да нема различни толкувања на законот за јазиците


Скопје, 15 ноември, 2017 - 14:11 (META) 

Пратениците на Социјалдемократскиoт сојуз на Мaкедонија работат на амандмански предлози за предлог-законот за упиреба на јазииците со кои сакаат да интервенираат во законот секаде онаму каде што се отвора проблем за различни толкувања на членовите, изјави коодринаторот на пратеничката група на СДСМ, Томислав Тунтев на прес-конференција во Собранието.

– Со денешното изгласување на потребата за донесување на законот почна постапката за целосно решавање на ова прашање отворено со потпишувањето на Охридскиот рамковен договор. Со ова конечно ќе се заокружи имплементацијата на делот на Охридскиот договор за човековите права и слободи. Се надевам дека во понатамошната процедура и ние од владејачката коалиција, но и другите ќе го изгласаме овој предлог-закон – рече Тунтев.

Тој кажа дека пратениците од СДСМ ја гледат Македонија како општество за сите во кое сите ќе бидат еднакви.

– На оваа држава и треба соработка за сите да можеме да се избориме за подобра држава, за подобра иднина и живот каков што граѓаните заслужуваат – рече Тунтев.

Одговарајќи на новинарски прашања, Тунтев рече дека станува збор за закон за сите јазици, кои што ги зборуваат заедниците во Македонија, а не само за албанскиот јазик и рече дека пратениците од СДСМ ќе се потрудат граѓаните да го добијат сето она што Уставот го препознава како право.

На прашање дали законот предвидува двојазични банкноти и униформи Тунтев одговори одречно.


Османи: Патот до Брисел води преку Рамковниот договор и Законот за јазиците


Скопје, 13 август, 2017 - 18:33 (META) 

Патот до Брисел води преку Охридскиот рамковен договор и Законот за јазиците како едно од најсензитивните и најважните прашања од договорот, вели вицепремиерот за европски прашања, Бујар Османи во интервју за „Телма“.

Тој вели дека Законот за јазиците е со европско знаменце, што предвидува негово донесување во брза постапка, затоа што е дел од националната програма за усогласување со европското законодавство и очекува до крајот на овој месец да се најде на дневен ред во Собранието.

– По 16 години постигнавме меѓуетнички консензус преку партиите што ги претставуваат македонската и албанската заедница да најдеме начин да го усогласиме различното интепретирање на членот 5 од Уставот и последното отворено прашање од Рамковниот договор да го унапредиме – вели Османи.

Според вицепремиерот за европски прашања за донесувањето на законот  нема да се чека мислењето на Венецијанската комисија околу употребата на албанскиот јазик на униформите на полицијата и на војската и на банкнотите, и додава дека доколу Комисијата оцени дека овие одредби се уставни тие ќе бидат додадени во законот, а доколку не, тие ќе бидат оставени настрана.

Османи соопшти дека очекува во наредните денови да има средба со претставници на опозициската ВМРО-ДПМНЕ, на која ќе ја побара нивна поддршка за законот.

–  Овој закон е одличина можност ВМРО-ДПМНЕ да го ревидира ставот во однос на Албанците. Текстот на законот е разговаран со сите политички партии и сите се запознаени со него. Очекувам наредните денови да се сретнам со претставници од ВМРО-ДПМНЕ со цел да укажам дека одредени прашања кои што се стратешки важни за државата треба да се издигнат на натпартиско ниво и за нив да биде постигнат консензуз. Се надевам дека ќе има разбирање по однос на потребата за затворање на ова важно прашање – вели Османи.


Биљали: Очекувам брз прием на Македонија во НАТО, а потоа решавање на спорот за името


Скопје, 13 август, 2017 - 12:14 (META) 

Меѓународната заедница ќе инсистира Македонија првин да добие покана за членство во НАТО, без да има промена на името, а потоа да се даде рок за преговори за изнаоѓање решение за спорот со Грција, вели универзитетскиот професор Мерсел Биљали во неделното интервју за македонскиот сервис на „Радио Слободна Европа“.

– Колку што јас имам информации, меѓународната заедница или главните креатори на НАТО ќе инсистираат на некакво соломонско решение, Македонија да добие покана за членство во НАТО без да има промена на името, па потоа да се даде некој рок,  да се даде можност да се преговара. Од прилика така ќе оди и интеграцијата во ЕУ и не мислам дека толку брзо ќе ѝ се даде толку големо значење на неминовна промена на името кое може да има негативни ефекти кај нас – вели Биљали.

Во врска со имплементацијата на Охридскиот рамковен договор, од чие потпишување денеска се одбележуваат 16 години, тој вели дека недостасува срповедување на практичниот дел од договорот, за што дел од вината ја лоцира кај албанскиот субјект.

– Од нормативен аспект многу е имплементирано, меѓутоа во практичниот дел многу работи останаа неимплементирани. За жал тука вината е и кај самиот албански субјект. Наша рак рана е партизацијата на институциите и на општеството како целина. Наместо Рамковниот договор да стане инструмент на една граѓанска рамноправност на луѓе со еднакви можности, стана инструмент на партизирани односи и партиски интереси – вели Биљали.


Шеснаесет години од потпишувањето на Охридскиот рамковен договор


Скопје, 13 август, 2017 - 9:56 (META) 

Денеска се одбележуваат 16 години од потпишувањето на Охридскиот рамковен договор, со кој се стави крај на воениот конфликт во Македонија во 2001 година и се постави рамка за меѓуетички соживот.

Преговорите, почнаа во Скопје, а потоа продолжија во Охрид, каде завршија со парафирање на документот на 10 август. Три дена подоцна на 13 август 2001 година во претседателската резиденција на Водно во Скопје Рамковниот договор го потпишаа тогашниот претседател на Република Македонија Борис Трајковски, поранешниот претседател на ВМРО-ДПМНЕ и тогашен премиер Љубчо Георгиевски, претседателот на ПДП Имер Имери и тогашните претседатели на СДСМ Бранко Црвенковски и на ДПА Арбен Џафери.

Потписници на договорот, во својство на гаранти, беа и специјалните претставници на Европската Унија и на САД, Франсоа Леотар и Џејмс Пердју, кои учествуваа во преговорите. Покрај потписниците во разговорите учествуваа и Хавиер Солана, тогашен висок претставник на ЕУ за безбедносна и надворешна политика и Питер Фејт, претставник на САД, како и повеќе правни експерти, меѓу кои професорите Владо Поповски и Љубомир Фрчковски.

„Овој Рамковен договор ќе го промовира мирниот и хармоничен развој на граѓанското општество, истовремено почитувајќи го етничкиот идентитет и интересите на сите македонски граѓани“, стои, меѓу другото, во текстот на договорот.

По повод 16-годишнината од потпишувањето на договорот, под покровителство на вицепремиерот задолжен за спроведување на Охридскиот рамковен договор, Хазби Лика и на претседателот на Собранието на Република Македонија, Талат Џафери вечер ќе се одржи свеченост во хотелот „Александар палас“ во Скопје.


Поради годишнината од Рамковниот, Џафери ја презакажа седницата за в понеделник


Скопје, 12 август, 2017 - 23:12 (META) 

Претседателот на Собранието, Талат Џафери се премисли и расправата за разрешувањето на државниот јавен обвинител, Марко Зврлевски, која требаше да продолжи утре, ја презакажа за в понеделник.

На официјалната интернет-страница на Собранието стои дека за утре не се предвидени никакви активности во законодавниот дом, а продолжението на седницата е закажано за в понеделник во 11 часот.

Пратениците, како што објави „Телевизија 24“, веќе добиле смс-пораки дека седницата планирана за утре е презакажана.

Според неофицијални информации, седницата се одложува поради активностите на дел од политичарите и пратениците околу одбележувањето на 16-годишнината од потпишувањето на Охридскиот рамковен договор.

Од кабинетот на Џафери вечерва соопштија дека утре во 19 часот тој ќе има обраќање по повод одбележувањето на годишнината од потпишувањето на Охридскиот договор, што ќе се одржи во хотелот „Александар Палас“ во Скопје. Во најавата за обраќањето на Џафери, нема информација за одложувањето на собраниската седница.

Инаку, собранискиот спикер на денешното продолжение не го прифати барањето на кооридинаторот на една од 10-те пратенички групи на ВМРО-ДПМНЕ, Илија Димовски, седницата за разрешувањето на државниот јавен обвинител, Марко Зврлевски да продолжи в понеделник. Џафери изјави дека пратениците на опозициската партија ја поставиле динамиката во која тече дебата и дека додека имаат работа ќе мора да работат.


Трамп ја продолжи важноста на црната листа за Македонија – 10 лица се закана за САД


Вашингтон, 22 јуни, 2017 - 15:52 (META) 

Американскиот претседател Доналд Трамп побара од Конгресот да ја продолжи важноста на т.н. „закана по националните интереси на САД“ од регионот на Западен Балкан, документ кој беше донесен во јуни 2001 година од Џорџ Буш.

Со него се опфатени Босна и Херцеговина, Косово и Македонија и тој пропишува дека од овие сè уште земји постои закана од „лица кои помагаат или поддржуваат екстремно насилство“.

Инаку, станува збор за прва одлука потпишана од Трамп која се однесува на Западен Балкан и на Македонија, откако тој ја презеде должноста претседател на САД во јануари оваа година.

Tramp crna lista odluka

За т.н. црна листа се вели дека опфаќа лица „кои се непријателски кон интересите на САД и кои претставуваат закана за националната безбедност и за надворешна политика на земјата“.

На неа од Македонија има 10 лица, повеќето поранешни команданти на Ослободителната национална армија (ОНА), од кои некои се во новиот состав на Собранието.

Станува збор за Џеват Адеми, Гафур Адили, Нури Беџети, Невзат Халили, Џавит Хасани, Кастриот Хаџиреџа, Џемаљ Хисени, Даут Реџепи, Џезаир Шакири и за Мендух Тачи.

Од нив во актуелниот парламентарен состав се Џеват Адеми од ДУИ и Мендух Тачи од опозициската ДПА.

Посебно за Македонија се вели дека таа листа била ревидирана во 2003 година „за да се преземат чекори против делата за попречување на имплементацијата на Рамковниот договор“.

Листата, на која се ставени лицата опфатени со оваа одлука, ја објавува Канцеларијата за контрола на странски средства (ОФАК), која работи во рамките на американското Министерство за финансии.