Османи: Тие што се против законот за јазиците се против за ЕУ и НАТО и против земјата


Скопје, 22 февруари, 2018 - 14:03 (META) 

Тоа што може да го кажам како новина е вчерашната посета на Германија, и на средбите со претседателот Франк Валтер Штајнмајер и со канцеларката Ангела Меркел, јасно се поздрави донесувањето на законот за употреба на јазиците и на некој начин се осуди однесувањето на оние што имаат осуди за законот во дневнополитички цели. Тоа е опасен пристап за земјата, посебно за оние што сакаат со многубројни амандмани да го спречат донесувањето на законот, рече вицепремиерот за европски прашања Бујар Османи од собраниската говорница.

Тој одговараше на прашањето на пратеникот Реџаиљ Исмаили, негов сопартиец од ДУИ, на денешната седница за пратенички прашања на која прашања до владата поставуваат само пратеници од власта. Исмаили се интересираше каков е ставот на претставници на земјите кои ги посетува Османи или се среќава со нив во земјава.

– Нема да кажам ништо ново ако го повторам фактот дека меѓуетничките односи се столбот на прогресот на оваа земја, и тоа беше консензус на сите земји од Западниот свет дека патот до Брисел поминува низ Охрид. Со тоа на метафорички начин, тој се вреднува како придонес кон идно членство во ЕУ и НАТО.  Законот за јазиците е последен легислативен дел од Охридскиот договор, но е и најчуствителното прашање – за употреба на мајчиниот јазик. Ставот на генералниот секретар на НАТО на оваа говорница пред неколку недели го слушнавте, го поздрави донесување на законот кога тој рече дека тој закон е услов за членство во НАТО – рече Османи.

Тој го спомена министерот за надворешни работи на Русија, Сергеј Лавров, за кого рече дека го поздравил законот како дел од Охридскиот договор.

– Ова и даде друга димензија на дебатата за употребата на јазиците. Кои се за или против законот за јазиците, всушност се во дебата за политичките определби на земјата. Определбата е за мултиетничко, демократско општество, каде ќе се ценат етничките диверзитети, вклучувајќи го и ставот од Берлин, кој вели дека законот мора да се донесе и да почнеме со имплементација. Така, сега има дебата на тие што се за донесување на законот и за заокружување на Охридскиот договор и имаат евроатлантска определба и на тие што се против и се против земјата – рече Османи.

Сепак, од изјавата на Лавров во Белград не се гледа дека тој „го поздравил“ законот, туку, сосема обратно, вели дека тоа е „вознемирувачки“.

– Примерите за тоа се доста вознемирувачки. Неодамна, кога беа одржани парламентарните избори во Македонија, претседателот на Парламентот, откако беше избран на функцијата, влезе во својот кабинет и на работната маса постави албанско знаме. Ова е во Македонија. Деновиве албанскиот премиер, Еди Рама, гордо кажа дека тој од Албанија го иницирал законот во Македонија со кој на албанскиот јазик му за дава статус на државен јазик во земјата – изјави Лавров одговарајќи на новинарско прашање на прес-конференцијата со Вучиќ, за време на неговата официјална посета на Србија.

На тој начин, рече шефот на руската дипломатија, се прекршува Охридскиот рамковен договор „кој сите ние го примивме како олеснување, бидејќи создаде основи за надминување на кризата во Македонија пред повеќе години“.


Ахмети – Бејли: Реформите и владеењето на правото се приоритетите на новата влада


Скопје, 26 мај, 2017 - 18:47 (META) 

ДУИ е посветена на реформите во земјата, почнувајќи силно од реформирањето на судството и владеењето на правото. Преку спроведување на реформите, Македонија ќе помогне во враќањето на меѓународниот фокус и што поскоро интегрирање на земјата во НАТО и започнување на преговорите за членство во Европската Унија. Други приоритети на новата Влада,остануваат и добрите меѓуетнички односи и Охридскиот договор заедно со подобрувањето на животниот стандард, економскиот развој и отворање нови работни места, порачал претседателот на ДУИ, Али Ахмети, на денешната средба со амбасадорот на САД во Македонија, Џес Бејли, соопшти ДУИ.

Ахмети на средбата во амбасадата на САД изразил уверување дека Македонија ќе има нова влада идната недела.


Бушати: Албанија не се меша во можните коалиции во Македонија


Тирана, 10 јануари, 2017 - 17:37 (META) 

Шефот на албанската дипломатија, Дитмир Бушати, вчера изјави дека официјална Тирана немала никаква улога во однос на можните владини коалиции во Македонија, јавува дописникот на „Мета“ од Тирана.

Бушати истакна дека Албанија не се меша во внатрешните работи на соседната земја, ниту, пак, вршела некакво влијание за можните коалиции и додаде дека ќе поддржат кој било процес што ќе осигура демократија и стабилност на Македонија.

– Еднаквоста, слободата и демократијата се трите основни елементи на Охридскиот договор, а тие сè уште не се целосно имплементирани. Токму затоа ова е златна шанса за албанскиот политички фактор. Тие можат да се обединат и да постигнат прогрес за овие прашања – рече Бушати.

Тој истакна дека првпат од потпишувањето на Охридскиот договор албанските партии во Македонија ги надминале своите идеолошки разлики и застанале зад една заедничка платформа.

Кратко по изборите на 11 декември, лидерите на партиите од албанскиот политички блок, кои обезбедија пратенички места во Собранието – ДУИ, Движење Беса и Алијанса на Албанците, беа на средби со премиерот на Албанија, Еди Рама. По средбите, партиите викендов ја објавија заедничката платформа, која е основа за преговори за нивно учество во идната влада.


Изборите можат да ја извлечат земјата од кризата ако бидат фер и веродстојни, оцени Жбогар


Скопје, 18 октомври, 2016 - 13:25 (META) 

Евроамбасадорот Самуел Жбогар денеска изјави дека изборите на 11 декември можат да ја извлечат земјата од политичката криза само доколку кампањата биде фер, а изборите – веродостојни.

– Изборите можат да ја извлечат земјата од политичката криза и под услов новата влада, кога ќе ја преземе функцијата, да побара итно, искрено и сеопфатно спроведување на реформските приоритети – рече Жбогар, кој денеска присуствуваше на отворањето на Националната конференција „Градење култура на соживот: Соработка помеѓу граѓанските организации и локалната самоуправа како фактор за развој на меѓуетничкиот дијалог“.

Жбогар рече дека во реформските приоритети спаѓа и подобрување на односите меѓу заедниците и спроведувањето на Охридскиот рамковен договор. Тој истакна дека функционалните односи меѓу едничките заедници се гарант на демократијата и на функционално и прогресивно општество.

Посочи дека меѓу нив се и подобрувањето на односите меѓу заедниците и спроведувањето на Охридскиот рамковен договор.


Ахмети: Првo да се исполнат условите, а потоа да се разговара за избори


Скопје, 28 јуни, 2016 - 16:48 (META) 

Пред да се разговара за избори, партиите првo треба да се согласат дека условите за избори се исполнети и дека сите партии ќе учествуваат во процесот, истакнал лидерот на ДУИ, Али Ахмети, на средбата со шефицата на Мисијата на ОБСЕ во земјава, амбасадорката Нина Суомалаинен.

На средбата, како што информираат од партијата, Ахмети и Суомалаинен разговарале за новите политички случувања во Македонија и во регионот, условите за изборите, Специјалното јавно обвинителство и за препораките што произлегуваат од анализата на Охридскиот договор.

„По откажувањето на предвремените парламентарни избори на 24 април и на 5 јуни, претседателот Ахмети оцени дека земјата не треба повторно да се соочи со ваква несигурност, која предизвикува институционална нестабилност, но пред да се разговара за избори, партиите првин треба да се согласат дека условите за избори се исполнети и дека сите партии ќе учествуваат во процесот. Прашањето за чистење на избирачкиот список и прашањето за медиумите може да се решат ефикасно ако нема опструкции од политичките партии“, стои во соопштението на ДУИ за средбата.

Во врска со анализата на Охридскиот договор, Ахмети истакнал дека македонските политички партии мора да ги надминат предрасудите во оваа насока, особено кога станува збор за службената употреба на албанскиот јазик во согласност со Уставот.