Унгарија: EП го пика носот каде што не му е место, Груевски ја бранеше Европа


Будимпешта, 30 ноември, 2018 - 11:59 (META) 

Откако Европскиот Парламент (ЕП) вчера при гласањето за резолуцијата за Македонија усвои и два амандмани за азилот на Никола Груевски во Унгарија, со кои се бара негова екстрадиција во Македонија, од Унгарија стаса остар одговор.

Владиниот портпарол, односно Државниот секретар за меѓународна комуникација на кабинетот на унгарскиот премиер Виктор Орбан, Золтан Ковач, во интервју за телевизијата „Ехо“ порача дека резолуцијата, односно амандманите, немаат правно дејство, дека ЕП си го пика носот каде што не му е место. Ковач рече и дека единствениот „грев“ на Груевски бил што кренал ограда и го спречил продорот на мигрантите.

-Постапката за политички азил на Груевски не е политичка, туку правна работа. Европскиот парламент нема никаква врска со екстрадицијата на Груевски и она што го прави е дека го пика носот таму каде што не му е местото. Верувам дека мнозинството пратеници гласаа за резолуцијата, иако тие немаат никаква врска со случајот Груевски.  Најголемиот грев на Груевски е што изгради ограда и застана во одбрана на Европа од тероризмот и миграцијата – изјави Ковач.

Дека амандманите немаат правно дејство, но сепак се „шлаканица“ за Унгарија, вчера изјави и ректорот на ФОН, Нано Ружин.


Стефановиќ: Не постои жица што ќе ги сопре мигрантите


Белград, 4 јули, 2017 - 11:59 (META) 

Поединечните решенија на некои земји како Унгарија, не го решаваат проблемот со мигрантите, туку само го продлабочуваат, порача министерот за внатрешни работи на Србија, Небојша Стефановиќ, откако вчера владата на Унгарија објави дека наредила пробно да се пушти во употреба новата „умна“ ограда на границата со Србија, која има струја под напон од 900 волти, за која тврди дека не може да повреди човек.

– Не постојат жици што ќе ги сопрат луѓето, тие наоѓаат начин да поминат. Тоа не е решение, туку создава проблем на цела Европа. Не постои решение само за една земја, туку треба да се најде решение што сите ќе го примениме – рече Стефановиќ гостувајќи на телевизијата „Пинк“.

Тој нагласи дека во Србија во моментот има помалку од 6.000 мигранти и дека српските прифатни центри се доволни за таа бројка луѓе.


ВМРО-ДПМНЕ: Нема нови проекти – првата мерка на СДСМ е уривање


Скопје, 6 јуни, 2017 - 9:56 (META) 

Нема нови проекти, нема подобрувања, нема нова додадена вредност за граѓаните. Првата мерка на Владата на ВМРО-ДПМНЕ во 2014 година беше законот за отпис на долгови, а првата мерка на СДСМ во 2017 година е уривање на нешто што е веќе изградено, порачува ВМРО-ДПМНЕ во своето редовно утринско соопштение денеска.

Партијата порачува дека граѓаните се против антиреформи.

„Владата на Заев не губи време да го оправда епитетот антиреформска. Уривање на оградата околу владината зграда и укинување на програмата „Кембриџ“ се приоритетите на Зоран Заев и на неговиот тим. Граѓаните не сакаат деструкција, блокади и поништување на проектите.Тие очекуваат СДС да го исполни ветеното. Да не се реализира тиранската платформа и да се изградат нови 500 километри автопат. Граѓаните очекуваат минимална плата од 16.000 денари, просечна од 30.000 денари, а лекарите со право се надеваат дека час поскоро ќе добијат плати од 100.000 денари, кои СДС им ги вети“, се вели во соопштението во кое се споменуваат и други изборни ветувања на СДСМ.


Литванија подигнува ограда на границата со Русија


Вилнус, 5 јуни, 2017 - 18:01 (META) 

Литванија почна да гради ограда на границата со руската енклава во Калининград во обид да спречи криумчарење и илегална имиграција, како и да ги зајакне надворешните граници на ЕУ.

На церемонијалниот почеток на изградбата присуствуваше и министерот за внатрешни работи на Литванија, Елмутис Мисиунас.

Проектот подразбира и електронски системи за надзор и дронови. Се предвидува дека вкупните трошоци ќе изнесуваат 3,6 милиони евра и дека оградата ќе биде завршена до крајот на годинава.

Како што е соопштено, оградата со висина од два метри ќе се протега низ двата литвански округа, до реката Њемен, која претставува природна граница на земјата и Калининград.


Заев: На првата седница се економските закони и кадровските решенија


Скопје, 5 јуни, 2017 - 13:47 (META) 

Пакет економски закони, распределување на ресорите и портфолијата на министрите без ресори, поставување на заменици на претседатели на Владата, избор на генерален секретар и шеф на кабинет и формирање на постојните и на адхок комисиите, ќе бидат темите на дневен ред на денешната прва седница на новата Влада, закажана за 14 часот, најави премиерот Зоран Заев.

– Мој прв впечаток е дека есенва мора да следува ребаланс на буџетот заради новата владина програма и политики, но тоа зависи и од моменталната финансиска кондиција и ликвидност на буџетот на Република Македонија – објасни Заев, одговарајќи на новинарско прашање пред почетокот на конференцијата „Жени во енергетика“ во Скопје.

Во врска со економските закони, Заев рече дека станува збор за пакет закони што се подготвувале целиот период додека граѓаните очекуваа нова влада и дека тие ќе бидат разгледувани на неформалниот дел од денешната седница.

– Тоа е делот за реализација на ветувањата за укинувањето на радиодифузна такса, враќањето на евтината тарифа на струјата и социјалниот пакет за најранливите категории граѓани – истакна Заев.

Тој рече дека сè уште не е одлучено кој ќе биде портпарол на Владата. Новиот премиер посочи дека се разгледува можноста и новинари да бидат ангажирани во Владата.

На новинарско прашање за уривање на оградата на Владата, Заев рече дека одлуки ќе се носат наскоро, по разгледување на законските можности. Рече дека дел од оградата би можел да се преправи во клупи, но ќе чека да види какви предлози ќе дојдат од архитектите и од инженерите.

Прашан кога очекува државниот јавен обвинител Марко Зврлевски да поднесе оставка, Заев рече дека денеска е првиот работен ден по неговиот повик за оставка и дека очекува реакција од јавниот обвинител.

– Еден од симболите за узурпирана правна држава е Марко Зврлевски и затоа верувам дека што поскоро треба да поднесе оставка – посочи Заев.


Ветер од 100 километри на час причини штета во Штип


Штип, 19 април, 2017 - 15:12 (META) 

Силниот ветер што од синоќа во Штип дува со брзина од 100 километри на час, искрши дрвја и гранки, соголи покриви, главно на стари и напуштени куќи, урна билборди, а штипјани ги остави без сон. Од силината на ветерот има искинати кабли од електричниот систем.

Еден скинат кабел од ноќеска и попладнево остана припоен на железна ограда кај градскиот базен, од каде повремено излегуват искри.

Паднати тополи на патот Кочани – Штип кај селото Долни Балван два часа го прекинаа сообраќајот. Десет пожарникари од штипската Територијална противпожарна единица рано утрото, околу 3 часот, повеќе од два часа ги сечеле трупците за да се воспостави сообраќајот.

Пожарникарите интервенирале на паднати дрвја во повеќе населби во Штип. Најмногу настрадаа овошките, чии плодови ја озеленеа земјата.

Ветерот продолжи да дува и попладнето, проследен со повремен слаб дожд. Во Општината Штип до претпладнето немаше пријави за штети, но очекуваат дека може да следат, со оглед на тоа дека последиците се евидентни.


Шешељ: На границите треба ограда или минско поле за заштита од мигранти


Белград, 26 март, 2017 - 14:52 (META) 

Кандидатот за претседател на Србија и лидер на Српската радикална партија, Воислав Шешељ, во синоќешното преставување на РТС рече дека на државните граници би требало да се подигне ограда за да се спречи илегалниот прилив на мигранти, а доколку тоа не е доволно, тогаш треба да се постави минско поле.

Лидерот на радикалите рече дека е горд што толку години поминал во Хашкиот трибунал, како и дека тоа нема да му биде пречка во односите во регионот доколку победи на изборите.

Тој рече дека никогаш нема да се откаже од идејата за „голема Србија“, наведувајќи дека таа не опфаќа само православни Срби, туку и Срби католици и муслимани.

Одговарајќи на наводите дека тој му е на Вучиќ најомилен опозиционер, Шешељ рече дека Вучиќ му е поблизок отколку другите опозициски кандидати, но дека не му е доволно близок за со него да прави влада сè додека не се откаже од членството во ЕУ.

На Шешељ ова му е шести пат да се кандидира за претседател на Србија, а според изборните предвидувања, тој е на четврто или петто место помеѓу 11 кандидати со поддршка далеку под 10 отсто.


Тетовци ја оградуваат дивата депонија, нема да дозволат да се истура смет


Тетово, 28 февруари, 2017 - 16:19 (META) 

Револтирани жители од тетовската населба Деребој, од утре нема да дозволат тетовскиот отпад да се претовара на влезот од градот, на локацијата која е претворена во дива депонија. Утринава почнаа да ја оградуваат локацијата и најавија дека од утре нема да ги пропуштаат камионите на Јавното комунално претпријатие Тетово, на ова место да го истура и да го претовара сметот.

– Дивата депонија е на само неколку метри од нашите домови. Од Општина Тетово неколкупати ни ветиле дека ќе го тргнат сметот од ова место и повеќе нема да го носат, но ниту едно ветување не е исполнето. Секој ден се разболуваме од дивата депонија, од каде се шири непријатна миризба и чад кога повремено се пали. Затоа се решивме на ваков чекор и ќе ја оградиме оваа локација со железна ограда, за да ги заштитиме нашите деца од разни заразни болести – изјави Ибраим Љока, жител на тетовската населба Деребој.

Од Јавното комунално претпријатие Тетово велат дека ќе се обидат да најдат заеднички јазик со жителите од Деребој. Во меѓувреме се преземаат мерки од март годинава, тетовскиот отпад да почне да се претовара по сите стандарди надвор од градот.

– Ние од наредниот месец или на почетокот на март, ќе го претовараме тетовскиот отпад надвор од градот. Сметот пред да се транспортира во скопската депонија Дрисла, ќе се истура и ќе се претовара во специјални контејнери и сметот на земја повеќе нема да се истура – изјави директорот на Јавното комунално претпријатие Тетово, Џелал Цека.

Тој додаде дека се работи на трајно решение на проблемот со тетовскиот отпад. Според него, се планира изградба на претоварна станица, каде исто така и ќе се рециклира сметот.
Вакви ветувања се дадени повеќепати и од сегашните и од претходните градски власти, но деценискиот проблем со тетовскиот отпад сè уште не се реши.


Бугарија подигнува стокилометарска жичена ограда


Софија, 5 октомври, 2016 - 12:56 (META) 

Бугарија ќе постави жичена ограда долга 100 километри долж границата со Грција и со Турција, распоредувајќи илјада граничари да го спречат приливот на мигранти, јавуваат грчките медиуми.

Заедно со постојната структура, вкупната должина на оградата ќе надмине 200 километри.

Во бугарските погранични патроли учествуваат припадници на бугарската војска и на агенцијата Фронтекс.

Бугарија ги зајакна пограничните патроли, а на некои точки ги спроведува заедно со грчките граничари.


Србија размислува за ограда на границата со Македонија и со Бугарија за заштита од мигранти


Белград, 15 септември, 2016 - 17:04 (META) 

Српскиот министер за труд, Александар Вулин, вчера изјави дека е време да му предложи на премиерот Александар Вучиќ, по неговото враќање од Париз, подрастични мерки за заштита на границата со Македонија и со Бугарија од прилив на нови мигранти.

Тој нагласил дека едно од можните решенија е поставување „бариери или одредени препреки“, а причината што ја наведува е структурата на мигрантите, која е промената и сè поголем е бројот на економски мигранти.

– Имаме војска и полиција на границите, но можеби и бариерите или поставувањето одредени пречки е едно од решенијата да се намали бројот на мигранти – изјавил Вулин, додавајќи дека Србија не може да биде земја во која мигрантите ќе влегуваат, а потоа да не можат да излезат.

Изјавата на Вулин предизвика внимание и во европските земји. Неа ја пренесоа германската новинска агенција ДПА и весникот „Франкфуртер алгемајне цајтунг“, под наслов „Србија исто така сака огради против мигрантите“.

Српскиот премиер Александар Вучиќ, кој денеска е во посета на Париз, во врска со ова прашање изјави дека тој е против подигнување огради и ѕидови, но порача дека Европската Унија мора да ја реши мигрантската криза на своите граници во Бугарија и во Грција.

„Изгледа дека јас останав единствениот во Европа кој е против ѕидови и огради. Ѕидовите не се потребни и не се добро решение за никого, но немојте да нè принудувате да мораме да кажеме дека ниту еден мигрант повеќе не може да влезе во Србија… Ние ќе го прифатиме својот дел од одговорноста, покажавме хумано лице и солидарност, но ние својата земја ќе знаеме да ја заштитиме“, рекол Вучиќ, пренесува „Б92“, и додадал дека посакува решение за мигрантската криза бидејќи „во даден момет ќе мора да донесе одлука“.