!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Објавен огласот за нов јавен обвинител, почнуваат да течат роковите за пријавување


Скопје, 14 септември, 2017 - 9:48 (META) 

Собранието на Република Македонија денеска го објави огласот за именување нов државен јавен обвинител, по разрешувањето на Марко Зврлевски од оваа функција.

Со ова и официјално почнува да тече рокот од 15 дена за пријавување на заинтересираните кандидати за оваа функција.

„Заинтересираните кандидати кои ги исполнуваат условите предвидени со членот 44, ставови 1 и 2 од Законот за јавно обвинителство (да е државјанин на Република Македонија, активно да го владее македонскиот јазик, да е работоспособен и да има општа здравствена способност, да има стекнато универзитетска диплома за дипломиран правник во Република Македонија или нострифицирана диплома од странство, да има положено правосуден испит во Република Македонија и да има работно искуство од најмалку осум години со потврдени резултати на правни работи по положениот правосуден испит, или редовен или вонреден универзитетски професор кој предавал повеќе од десет години правен предмет од правосудната практика), пријавите со потребните документи треба да ги поднесат до Собранието на Република Македонија, во рок од 15 дена од денот на обајвувањето на одлуката во ’Службен весник’“, пишува во огласот, потпишан од претседателот на Собранието, Талат Џафери.

oglas za imenuvanje na javen obvinitel 2

Рокот за пријавување на заинтересираните кандидати е 15 дена, пишува во огласот потпишан од претседателот на Собранието, Талат Џафери

Инаку, Собранието го изгласа распишувањето на огласот за именување нов државен јавен обвинител пред точно една недела.

Според Законот, по пријавувањето на кандидатите, Владата мора да поднесе барање за мислење до Советот на јавни обвинители, кое има обврзувачка улога.

Советот има рок од 15 дена од денот на приемот на барањето од Владата да даде позитивно или негативно мислење за сите пријавени кандидати. По тоа, до Собранието доставува предлог за именување јавен обвинител со кандидатите за кои Советот дал позитивно мислење.

Доколку Советот на јавни обвинители од оправдани причини во рок од 15 дена не достави мислење, добива дополнителен рок од 15 дена, а ако и во овој рок Советот не достави мислење, се смета дека мислењето е позитивно.

Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот.

За именувањето, како и за разрешување државен јавен обвинител, Собранието одлучува со просто мнозинство, односно со 61 глас.

Засега во јавноста своите кандидатури ги најавија адвокатите Александар Тортевски, Звонко Давидовиќ, Александар Наков, Сејфула Османи и нотарката Лорија Ваневска.


Собранието го изгласа распишувањето оглас за нов јавен обвинител


Скопје, 7 септември, 2017 - 16:25 (META) 

Пратениците во Собранието со 61 глас „за“ го изгласаа предлогот за распишување оглас за именување нов државен јавен обвинител. За време на гласањето, пратениците на ВМРО-ДПМНЕ ја напуштија салата.

Координаторот на пратеничката група на ВМРО-ДПМНЕ, Илија Димовски, побара гласањето да биде в понеделник, бидејќи претходно со претседателот на Собранието, Талат Џафери, констатирале дека нема мнозинство.

Ставањето на оваа точка на гласање, за Димовски е изигрување на дадениот збор од страна на Џафери дека седницата ќе продолжи в понеделник.

– За нас ова е прекршување на членот 8а од Изборниот законик. Ве информираме дека ако го прекршите дадениот збор дека седницата ќе ја продолжите в понеделник, за време на гласањето ќе излеземе надвор од салата – изјави Димовски.

Џафери му одговори дека по разговорот со него, координаторите на пратеничките групи го информирале дека парламентарното мнозинство е обезбедено и затоа свикал седница.

По завршувањето на гласањето, Џафери констатираше дека Собранието огласува именување на јавен обвинител на Република Македонија.

По гласањето за оваа точка, претседателот на Собранието даде 15 минути пауза за да се координира со координаторите на пратеничките групи, за продолжението на седницата.


Заврши расправата за огласот за нов јавен обвинител, ќе се гласа друг ден


Скопје, 6 септември, 2017 - 17:48 (META) 

Собранието попладнево ја заврши расправата по предлогот за распишување оглас за именување нов државен јавен обвинител, откако и последниот пратеник од вкупно 24 пријавени за дискусии го кажа својот став околу ова прашање.

Претседателот на Собранието, Талат Џафери, по говорот на Нола Исајлоска-Старова, констатираше дека е исцрпена листата на пријавени за збор и ја прекина седницата, а за тоа кога ќе продолжи и кога ќе се гласа по оваа точка, рече дека ќе информира дополнително.

Спикерот апелираше до комисиите кои расправаат за седумте предлог-закони, меѓу кои се трите социјални закони на Владата – за минимална плата, за стечајците и за укинување на радиодифузната такса, а кои се први точки на дневен ред на оваа седницата, да известат до каде се со работата.

Инаку, на дводневната расправа по предлогот за распишување оглас за нов државен јавен обвинител, главно дискутираа пратениците на ВМРО-ДПМНЕ, кои бараа оваа точка да биде повлечена од дневниот ред и расправата да продолжи по локалните избори.

Пратениците на опозицијата ја обвинија власта за арогантно однесување и за манифеситирање самоволие бидејќи со постапката за избор на јавен обвинител во период кога се распишани локални избори, се крши членот 8-а од Изборниот законик.

Пратеничката на СДСМ, Фросина Ташевска-Ременски, реплицирајќи на говорот на Димитар Стевананџија од ВМРО-ДПМНЕ, рече дека тој и неговите колеги не дискутираат по точката на дневен ред, туку ги повторуваат изјавите на лидерот на партијата, Никола Груевски, од вчера, но дека „никој не паѓа во несвест“, алудирајќи на момчето кое вчера за момент се онесвести на прес-конфренцијата на Груевски.


Законот за јазиците и огласот за наследникот на Зврлевски денеска во Собранието


Скопје, 6 септември, 2017 - 10:52 (META) 

Собраниската Комисија за европски прашања денеска треба да ја продолжи седницата на која се расправа за предлог-законот за употреба на јазиците, во прво читање. Со законот се предвидува во сите органи на државната власт во Република Македонија, централни институции, јавни претпријатија, агенции, дирекции, установи и организации, комисии, правни лица кои вршат јавни овластувања согласно закон и други институции, службен јазик, покрај македонскиот јазик и неговото писмо, да биде и албанскиот јазик.

За предлагачот и за пратениците од мнозинството, законот е дел од патот на евроатлантските интеграции на Македонија и на никаков начин не го нарушува ниту Уставот, ниту унитарниот карактер на државата. За пратениците од опозицијата, пак, тој е противуставен за што, според нив, говори и фактот што се носи со европско знаменце иако нема никаква европска регулатива со која се усогласува и тој ќе донесел само дополнителни поделби, а не кохезија во општеството.

Во Собранието треба да продолжи и седницата на која ќе се расправа за предлогот за распишување оглас за нов јавен обвинител на Република Македонија.


Собраниската расправа за огласот за нов државен јавен обвинител продолжува в среда


Скопје, 4 септември, 2017 - 18:32 (META) 

Претседателот на Собранието, Талат Џафери, точно во 18 часот ја прекина расправата по точката за предлогот на Владата за распишување оглас за именување нов државен јавен обвинител, по разрешувањето на претходниот – Марко Зврлевски.

Следното продолжение на седницата Џафери го закажа за среда, во 11 часот, затоа што утре тој ќе присуствува на Меѓународната научна конференцијата „Балканот помеѓу Западот и Истокот: Стари и/или нови безбедносни предизвици“ во Охрид.

Расправата по оваа точка помина во говори на пратениците на ВМРО-ДПМНЕ кои го обвинија владејачкото мнозинство дека незаконски, спротивно на членот 8-а од Изборниот законик, сака да го протурка именувањето на новиот државен јавен обвинител.

Илија Димовски од ВМРО-ДПМНЕ рече дека одењето спротивно на законот и на членот 8-а, кој беше изгласан на барање на СДСМ, е ароганција и надминување на нормалното функционирање на државата.

Координаторот на пратеничката група на СДСМ, Томислав Тунтев, рече дека доаѓањето на новиот јавен обвинител е неминовно и дел од пакетот реформи во правосудството.


Почна и веднаш заглави расправата за распишување оглас за наследник на Зврлевски


Скопје, 4 септември, 2017 - 16:52 (META) 

Собранието ја почна расправата за предлогот на Владата за распишување оглас за именување нов државен јавен обвинител, по разрешувањето на претходниот – Марко Зврлевски.

Координаторите на десетте пратенички групи на ВМРО-ДПМНЕ, кои почнаа да се јавуваат за збор, еден по еден, обвинија дека постапката се води незаконски за време на распишани избори, идентично како и при разрешувањето на Зврлевски, бидејќи е во спротивност со членот 8-а од Изборниот законик.

– Ако за граѓаните беа разбирливи полтичките причини за разрешувањето на претходниот јавен обвинител, одењето спротивно на законот и на членот 8-а, кој беше изгласан на барање на СДСМ, е веќе ароганција и надминување на нормалното функционирање на државата. Тоа значи дека Собранието е над сите закони и дека пратениците можат да се повикуваат на имунитет за секоја одлука што исто така е ароганција – рече Илија Димовски, координатор на една од пратенички групи, кој, повикувајќи се на одлука за апанажа на Зврлевски, додаде дека со одлуката за негово разрешување, тој не само што заминал од функцијата државен јавен обвинител, туку го загубил и работното место, бидејќи е разрешен поради нестручно, несовесно и незаконско вршење на службата.

Димовски рече дека Владата на 24 август донела одлука да стави во мирување четириесетина постапки за изменување на државни функционери, токму поради членот 8-а од Изборниот законик.

Координаторот на пратеничката група на СДСМ, Томислав Тунтев, реплицирајќи, обвини за двојни аршини кај пратениците на ВМРО-ДПМНЕ, а како пример го посочи токму именувањето на Марко Зврлевски за државен јавен обвинител на 21 јануари 2013 година, 10 дена по распишувањето на локалните избори, кои се одржаа на 24, односно на 7 април 2013 година.

На ова реагираше Димовски, кој истакна дека во 2013 година во Изборниот законик ја немало алинејата што ја забранува ваквата постапка за време на избори и дека таа е донесена во 2015 година.

Петре Шилегов од СДСМ од говорницата порача дека ќе продолжат со тоа што го зацртале и дека мислењето на Државната комисија за спречување на корупција околу примената на ченот 8-а не може да влијае на работата на Собранието.

– Антикорупциската комисија е синоним за криминалот, исто како и Марко Зврлевски – додаде Шилегов.


Жонглирања со дневниот ред и барања за конструктивност во Собранието


Скопје, 4 септември, 2017 - 13:35 (META) 

Собраниското мнозинство денеска не го поддржа предлогот на пратеникот на ВМРО-ДПМНЕ, Антонио Милошоски, одлучувањето за распишување оглас за нов државен јавен обвинител да биде отстрането од дневниот ред на 12. седница бидејќи, според пратениците на опозициската партија, се коси со Изборниот законик.

Мнозинството гласаше и против предлогот на Илија Димовски од дневен ред да биде отстранет и изборот на потпретседатели на Собранието, бидејќи опозицијата е против решението да има пет потпретседатели.

– Според Изборниот законик, не треба да има именувања и разрешувања на високи државни функционери за време на избори. Ваквата измена на Изборниот законик беше донесена на барање на СДСМ и ние, како Собрание, треба да ја почитуваме за да може овој предизборен период да биде оценет како фер и демократски. Предлагам точката 15 да се симне од дневен ред и да биде на дневен ред по изборите – рече Милошоски, за чиј предлог гласаа 39 пратеници, а 62 беа против.

По ова неколкумина пратеници на ВМРО-ДПМНЕ се јавија за збор и бараа промена на дневниот ред, односно законите чиј предлагач е опозцијата да добијат приоритет, а распишувањето на огласот за нов државен јавен обвинител и изборот на потпретседатели да бидат последни точки на дневен ред.

Пратениците од мнозинството не ги прифатија ваквите барања и го усвоија предложениот дневен ред.

Претходно Собранието ги усвои предлозите на владејачката коалиција законите за минимална плата, за стечајците и за укинување на радиодифузната такса да бидат донесени во скратена постапка. Мнозинството го поддржа и предлогот по скратена постапка да бидат донесени и законот за зголемување на платата на полицајците, војниците, наставниците и на вработените во јавни претпријатија и фондови за пет отсто, законот за извршување и за доделување на ваучери за студентите за набавка на компјутери.

Димовски истакна дека ако власта сака опозицијата да биде конструктвина, тогаш парламентарното мнозинство треба да покаже двојно поголема конструктивност.

Процедурата за шесте закони, кои се и први на дневниот ред на 12. седница, продолжува во матичните комисии, по што се враќаат на расправа и на одлучување на пленарна седница.

Претседателот на Собранието, Талат Џафери по двочасовна расправа даде пауза до 15 часот.


Огласот за наследник на Зврлевски и трите социјални закони денеска пред пратениците


Скопје, 4 септември, 2017 - 9:44 (META) 

Денеска Собранието на Република Македонија ќе ја почне 12. пленарна седница, прва по двенеделниот одмор на пратениците.

На дневен ред на седницата, чиј почеток е закажан за 11 часот, е и предлогот на Владата за распишување оглас за именување нов државен јавен обвинител, по разрешувањето на Марко Зврлевски.

Зврлевски беше разрешен на последната седница пред одморите, односно на 17 август, а пет дена подоцна Владата ја почна постапката за избор на нов шеф на Јавното обвинителство, односно донесе предлог за распишување оглас, за што надлежно е Собранието.

Оваа е 11. точка на дневниот ред на денешната седница.

Како што информираат од Собранието, денеска на дневен ред се ставени и законите за минимална плата, за стечајците и за укинување на радиодифузната такса.

Пратеничката група на СДСМ ги повика пратениците од опозицијата да не ја блокираат расправата и да ги поддржат трите закони, кои се предложени во скратена постапка.


Собранието на 4 септември ќе решава за огласот за нов државен јавен обвинител


Скопје, 24 август, 2017 - 13:06 (META) 

Предлогот на Владата за распишување на оглас за именување на нов државен јавен обвинител е ставен на дневен ред на првата наредна седница на Собранието, закажана за 4 септември.

Како што може да се види од најавата за седницата, на интернет страницата на Собранието, предлогот е 11. точка од дневниот ред на седницата.

Според постапката предвидена со Законот за јавни обвинители, Собранието треба на предлог на Владата да донесе одлука за распишување на огласот за именување на државен јавен обвинител.

Собранието во четвртокот, минатата недела го разреши Марко Зврлевски од функцијата државен јавен обвинител, а во вторникот оваа недела, Владата ја почна постапката за избор на нов шеф на Јавното обвинителство, односно го достави предлогот до Собранието.

Инаку, Советот на јавни обвинители поради немање кворум денеска ја одложи седницата за избор на заменик на разрешениот државен јавен обвинител Марко Зврлевски, кој ќе треба да ја врши оваа функција до изборот на нов Јавен обвинител.


Џафери распиша оглас за избор на член на Советот на јавни обвинители


Скопје, 19 август, 2017 - 14:23 (META) 

Претседателот на Собранието, Талат Џафери, распиша оглас за избор на член на Советот на јавни обвинители. Огласот Џафери го распишал вчера, а денеска е објавен во дел од дневните весници, а треба да биде објавен и во „Службен весник“.

Како што стои во објавата, станува збор за избор на член на Советот од „редовите на универзитетски професори по право, адвокати и други истакнати правници“, кој го избира Собранието на Република Македонија. (Собранието избира вкупно 4 членови на Советот кои доаѓаат од оваа фела, од кои двајца се од заедниците кои не се мнозинство во државата).

„Заинтересираните кандидати, универзитетски професори по право, адвокати и други истакнати правници, во рок од 15 дена од денот на објавувањето на овој оглас во „Службен весник“ треба до Собранието на Република Македонија да поднесат пријава, лична биографија и документи, во оригинал или копија заверена на нотар, со кои ќе докажат дека се универзитетски професори по право, адвокати и истакнати правници“, стои во огласот.

Според Законот за Совет на јавни обвинители од денот на распишувањето на огласот до денот на гласањето за избор на член мора да поминат најмалку 30 дена.

oglas za izbor clen na sovet JO

Огласот, кој Џафери го распишал вчера, денеска е објавен во дел од дневните весници и ќе трае 15 дена

Советот на јавни обвинители кој брои вкупно 11 члена, неколку месеци работеше со член помалку, откако Зоран Сулејманов замина во пензија со наполнети 64 години старост. Пополнувањето на неговото место неколку месеци беше блокирано поради кризата со конституирањето на Собранието и изборот на собраниските комисии, конкретно на Комисијата за избори и именувања.

Инаку, распишувањето на оглас за избор на член на Советот доаѓа во исто време со разрешувањето на досегашниот државен јавен обвинител, Марко Зврлевски и постапката за именување нов, што Владата најави дека ќе ја почне во вторник следната недела.

Советот на јавни обвинители има значајна улога во процедурата за именување на нов државен јавен обвинител, односно дава мислење за пријавените кандидати кое е обврзувачко. Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот.

Советот, чиј претседател е Петар Аневски изминативе години беше критикуван дека ја блокира работата и дел од предметите на Специјалното јавно обвинителство. Сепак, мнозинството на членовите во јуни го поддржаа и дадоа позитивно мислење на предлогот на Владата за разрешување на Марко Зврлевски.