!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Анѓушев во официјална посета на САД


Скопје, 13 ноември, 2017 - 11:05 (META) 

Вицепремиерот за економски прашања, Кочо Анѓушев, од денеска до четврток ќе претстојува во официјална посета на Вашингтон, соопштија од неговиот кабинет.

Анѓушев во главниот град на САД ќе учествува на Трансатлантскиот форум во организација на „Школата за напредни меѓународни студии“ на Универзитетот „Џонс Хопкинс“, Стопанската комора на САД и Центарот за трансатлантски односи.

„За време на посетата планирано е вицепремиерот да оствари средби и со претставници на Конгресот на САД, Стејт департментот, меѓународни финансиски организации, како и со претставници од организации на македонската дијаспора во САД“, стои во соопштението од кабинетот на Анѓушев.


Шефот на црногорската дипломатија, Срѓан Дармановиќ утре во посета на Македонија


Скопје, 8 ноември, 2017 - 17:59 (META) 

Министерот за надворешни работи на Црна Гора, Срѓан Дармановиќ утре ќе престојува во официјална посета на Македонија, соопшти Министерството за надворешни работи.

Покрај средбата со шефот на македонската дипломатија, Никола Димитров, Дармановиќ ќе биде примен од претседателот на државата, Ѓорге Иванов, претседателот на Собранието, Талат Џафери и премиерот, Зоран Заев.

„Во рамките на посетата се очекува да бидат разменети мислења за натамошно унапредување на билатералните односи во сферите од заемен интерес, како и за продлабочување на секторската соработка. Во фокусот на дискусиите ќе биде и соработката на планот на интеграциите во Европската Унија и во НАТО, потребата од инфраструктурно поврзување, а ќе стане збор и за регионалната соработка и заедничката европска иднина“, стои во соопштението од МНР.


Каракачанов утре во официјална посета на Македонија


Скопје, 17 септември, 2017 - 12:38 (META) 

Министерот за одбрана на Бугарија, Красимир Каракачанов, утре ќе престојува во официјална посета на Македонија и ќе има средба со министерката за одбрана, Радмила Шекеринска, соопштија денеска од Министерството за одбрана.

Станува збор за прва официјална посета на висок бугарски функционер по потпишувањето на Договорот за добрососедство меѓу Македонија и Бугарија, на 1 август оваа година во Скопје. Каракачанов и тогаш беше дел од делегацијата предводена од бугарскиот премиер, Бојко Борисов. Тој тогаш изјави дека Бугарија ќе ѝ помогне на Македонија на патот кон НАТО.

Пречекот на бугарската делегација е предвиден утре во 9 часот на платото пред Министерството за одбрана. Половина час подоцна е закажана средбата помеѓу делегациите на двете земји, а во 10.30 часот Шекеринска и Каракачанов ќе дадат изјави за медиумите.

Бугарскиот министер за одбрана ќе ја посети и касарната „Илинден“ во Скопје, каде полкот за специјални операции ќе изведе показна вежба.

Инаку, Каракачанов е долгогодишен лидер на бугарската ВМРО-БНД, која е позната по екстремниот национализам кон Македонија.


Заев: Со Хан в понеделник ќе ги договараме првите реформски приоритети


Тетово, 7 јуни, 2017 - 11:04 (META) 

Премиерот Зоран Заев вчера, при посетата на Порој, одговарајќи на новинарско прашање, потврди дека в понеделник ќе ја оствари првата официјална посета на Брисел и првата средба со еврокомесарот Јоханес Хан, на која ќе се договараат првите реформски приоритети што треба да ги реализира новата влада. На првата официјална посета, премиерот ќе биде придружуван од вицепремиерот Бујар Османи, министерот за надворешни работи Никола Димитров и од други владини функционери.

– Во моментот таа посета ни е најважна поради тоа што треба да го постигнеме договорот за првите реформиски приоритети со кои ќе се зафати Владата во согласност со извештајот на Прибе, како и во согласност со извештајот на Европската Унија. Тимовите се подготвени, со засукани ракави, подготвени сме да се втурнеме во процесот на работа. Се надевам дека ќе оствариме средби и со други високи претставници на Евопската Унија, како што се Јункер, Туск, Могерини, за да можеме генерално да ги сублимираме сите очекувања на високите институции на ЕУ за да работите што ќе се спроведат во Република Македонија да бидат прецизни, точни, навремени и во согласност со очекувањата на граѓаните, но, секако, и на ЕУ – рече Заев.

Премиерот појасни дека најверојатно потоа првата посета ќе биде на Бугарија, која на почетокот на следната година ќе го преземе претседателството со ЕУ.

– Веднаш потоа веројатно следува посета на една од соседните земји, јас верувам дека тоа ќе биде Република Бугарија, поради тоа што Република Бугарија ќе биде претседавач со ЕУ од 1 јануари, а е целосно подготвена да ѝ помогне на Македонија како свој сосед во интегративните процеси. Ваквите најави значат засилена активност, сериозно мотивирана прво внатре во државата, а со помош на пријателите од ЕУ и на соседите на Р.Македонија, да ја придвижиме силно Македонија кон полноправно членство во НАТО и во ЕУ – рече Заев во Порој.