!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Берлин и Москва мора да ги подобрат односите, порача Штајнмаер на средбата со Путин


Москва, 25 октомври, 2017 - 18:40 (META) 

Германскиот претседател Франк Валтер Штајнмаер на денешната средба со претседателот на Русија, Владимир Путин, во Москва, изјави дека е незадоволен од односите меѓу Москва и Берлин и дека двете страни треба да работат на нивно унапредување, јавуваат светските агенции.

– Сметам дека е неопходно ние, како претседатели, да го продолжиме дијалогот и да се обидеме да утврдиме на кој начин можеме да ги подобриме односите меѓу двете земји, со кои во моментот не можеме да бидеме задоволни. Уверен сум дека мораме да ѝ се спротивставиме на отуѓеноста која се зголеми меѓу нашите земји во последните години и да го направиме тоа за да можеме да го продолжиме дијалогот и долгорочните обиди на двете страни за пронаоѓање решенија во кризите – изјави Штајнмаер.

Инаку, ова е прва посета на претседател на Германија на Русија од 2010 година. Односите меѓу двете држави станаа напнати по анексијата на Крим во 2014 година и прорурските сепаратистички активности во Источна Украина.


Томиќ на Заев му пренела позитивни и конструктивни реакции од Србија


Скопје, 1 септември, 2017 - 14:06 (META) 

Премиерот Зоран Заев денеска се сретна со српската амбасадорка во земјава, Душанка Дивјак–Томиќ, која изразила благодарност за конструктивноста во унапредувањето на соработката помеѓу Македонија и Србија, соопшти владината прес-службата.

Томиќ на Заев му ги пренела „позитивните и конструктивни реакции од Србија за понатамошна блиска соработка“.

– Пренесувам и благодарност за поддршката од Владата на Македонија, седиштето на Транспортната заедница да биде во Белград. Тоа што генералниот секретар на Транспортната заедница е од Република Македонија е само потврда за определбата од двете страни, за негување и за развивање на нашите пријателските односи – изјавила Томиќ.

Заев, пак, рекол дека македонската влада е определена да развива добрососедски односи и низ проактивната улога во регионалната соработка да придонесе за евроатлантските перспективи на целиот регион. Тој нагласил дека Србија е традиционален пријател на Македонија и дека Македонија е насочена кон позитивни односи.

На средбата Заев и српската амбасадорка Дивјак-Томиќ договориле да се направи рекапитулар на потпишаните, а досега нереализирани документи за соработка помеѓу двете држави и да се пристапи кон нивна скорешна имплементација.

Официјален Белград пред две недели го повлече целиот персонал од српската амбасадата во Скопје и ги обвини македонските власти за „многу офанзивни разузнавачки активности“ насочени против Србија.
По интензивна комуникација на меѓудржавно ниво, персоналот се врати во амбасадата, која по враќањето и на амбасадорката фукнционира нормално.


Брнабиќ ќе го покани Заев на заедничка владина седница, најави Вучиќ


Белград, 24 август, 2017 - 15:18 (META) 

Српската премиерка, Ана Брнабиќ ќе испрати покана до премиерот Зоран Заев за одржување на заедничка седница на владите на двете земји до крајот на годината во Белград. Ова, меѓу другото, го истакнал претседателот на Србија, Александар Вучиќ, на денешната средба со амбасадорката на Македонија во Белград, Вера Јовановска – Типко.

На средбата, како што се наведува во соопштението на официјалната интернет-страница на претседателот на Србија, Вучиќ и Јовановска – Типко, разговарале за „континуираното унапредување на добрососедските односи и негување на традиционалните пријателски врски меѓу двете земји“.

– Сите сметаме дека е потребно да работиме вредно и одговорно на унапредување на нашите односи – нагласил Вучиќ на средбата.

На неа било договорено, по поставувањето на советникот за национална безбедност на Србија, да биде одржан заеднички состанок со неговиот македонски колега.

Тема на средбата, како што се додава во соопштението било унапредувањето на соработката во сите сфери, особено во областа на економијата, туризмот и зедничкиот настап на трети пазари, науката и културата.

Инаку, зачестената комуникација меѓу македонските и српските власти деновиве, доаѓа откако пред пет дена Белград го повлече комлетниот персонал од својата амбасада во Македонија на итни консултации, поради „многу офанзивни разузнавачки активности“ против Србија во Македонија, што предзвика дипломатски тензии.

Премиерот Зоран Заев и претседателот на Србија, Александар Вучиќ вчера во „долг и отворен“ разговор ги разгледаа сите „новононастанати околности“ и ги договорија принципите на кои ќе ги темелат односите меѓу двете земји, а пред дека сите евентуални несогласувања ќе ги решаваат преку дијалог.

За утре во Ниш е најавена средба меѓу шефот на макеоднската дипломатија, Никола Димитров и неговиот српски колега, Ивица Дачиќ.

Денеска се очекува персоналот на амбасадата на Србија да се врати назад во Скопје, а наскоро, според најавите од Белград треба да се врати и српската амбасадрока во земјава, Душанка Дивјак – Томиќ.


Српската опозиција во собранието бара итна седница по изјавите на Вучиќ


Белград, 23 август, 2017 - 16:33 (META) 

Пратеничкиот клуб на опозициската Демократската странка во српското собрание бара итни седници на комисиите за контрола на службите за безбедност и за одбрана и внатрешни работи, поради ситуацијата во односите меѓу Србија и Македонија.

Од партијата велат дека е неопходно пратениците да бидат информирани за состојбата со односите со Македонија, за деталите и сознанијата на службите, причините за повлекување на целокупниот персонал од амбасадата во Скопје, како и „признанието на Вучиќ за присуството на припадник на БИА во Македонија“ и нивната улога во протестите на 27 април.

Собранието, велат од ДС, мора да биде информирано и за сите детали од резговорот меѓу претседателот на Србија Александар Вучиќ со македонскиот премиер Зоран Заев.

Како што јавуваат српските медиуми Вучиќ утре ќе ја прими амбасадорката на Македонија Вера Јовановска – Типко. Средбата е закажана во 11 часот, соопштиле од службата за соработка со медиумите на претседателот на Србија.

Заев и Вучиќ денеска во телефонски разговор ги договорија принципите на кои ќе ги темелат односите меѓу двете земји, а пред дека сите евентуални несогласувања ќе ги решаваат преку дијалог.


Заев – Мекилвам: Една третина од реформите предвидени за три месеци се реализирани


Скопје, 26 јули, 2017 - 19:20 (META) 

Премиерот Зоран Заев, придружуван од вицепремиерот за европски прашања, Бујар Османи, попладнево се сретнал со Фиона Мекилвам, директорка за Западен Балкан во Министерство за надворешни работи на Велика Британија, која на средбата била придружувана од британскиот амбасадор во земјава, Чарлс Гарет.

На средбата, како што соопштуваат од Владата, Заев се заблагодарил за искрената поддршка од Велика Британија.

„Владата е ориентирана кон ефикасна и квалитетна реализација на реформите преку планот „3-6-9“, што треба да ги отвори перспективите за граѓаните и за државата. Веќе се реализирани една третина од реформите предвидени за првите три месеци. Голем дел од реформите се поврзани со политичка волја, а Владата е определена да ја обезбеди. Градиме добри односи со соседите, како што е претстојниот договор што ќе го потпишеме со Бугарија за пријателство, добрососедство и за соработка“, изјавил Заев.

Заев и Мекилвам разговарале и за можноста за интензивирање на соработката помеѓу Македонија и Велика Британија.


Државјаните од земјите што ги прекинаа односите со Катар, може да останат во таа држава


Доха, 11 јуни, 2017 - 15:36 (META) 

На државјаните на земјите што ги прекинаа односите со Катар, ќе им биде дозволено да останат во таа држава, јавуваат странските медиуми.

„Доха нема да преземе никакви мерки против оние граѓани што потекнуваат од државите што ги прекинаа или ги ограничија дипломатските односи со Катар“, се вели во соопштението објавено во странските медиуми.

Оваа одлука ќе влијае на повеќе од 11.000 лица кои потекнуваат од Саудиска Арабија, Обединетите Арапски Емирати и од Бахреин, а живеат во Катар.

Овие земји заедно со Египет ги прекинаа дипломатските односи со Катар, обвинувајќи дека таа држава ги поддржува регионалните терористички групи.


Вучиќ: Односите на Балканот се напнати, но проблемите не се туркаат под тепих


Белград, 30 мај, 2017 - 14:47 (META) 

Српскиот премиер во заминување, Александар Вучиќ, денеска изјави дека на Балканот има многу тензии и дека е потребно да се вложат многу напори за да се подобрат односите, но дека сега проблемите „не се туркаат под тепих“ и „не се лажеме едни со други“.

Говорејќи за односите во регионот, на последната прес-конференција во улога на премиер, Вучиќ рече дека донекаде изградил доверба со Босна и Херцеговина, дека односите со Црна Гора и со Македонија се „далеку од лоши“, а дека најкомплицирани се односите со Приштина, но дека секогаш е подобро да се разговара.

Тој додаде дека како претседател на Србија ќе настојува да ги унапреди односите во регионот.


Дачиќ: Живаљевиќ требаше да извести дали во Собранието има српски државјани


Белград, 25 мај, 2017 - 22:39 (META) 

Шефот на српската дипломатија Ивица Дачиќ, изјавил денеска дека службеникот на Амбасадата на Србија во Македонија и припадник на Безбедносно-информативната агенција (БИА), Горан Живаљевиќ, со влегувањето во Собранието на Македонија на 27 април, за време на инцидентите, не го прекршил дипломатскиот протокол, ниту ја нарушил Виенската конвенција, туку само си ја вршел работата.

„Не учествуваше во кривично дело, само известуваше за ситуацијата во Македонија, бидејќи Србија мора да знае како таа ситуација може да се одрази на националните и на државните интереси“, изјавил Дачиќ пред новинарите.

Тој додал дека Живаљевиќ како официјален претставник на БИА во Македонија не престојува илегално, туку неговата работа била да известува што се случува и дали во нередите во Собранието учествувале државјани на Србија.

Прашан, со кој тој влегол во Собранието, Дачиќ го прочитал списокот на имиња на луѓе од Македонија, кои, како што тврди, во Србија организирале протести против премиерот во заминување Александар Вучиќ. Тој додал дека српските власти за тоа, Македонија ја известувале веќе две години.

На прашањето, дали овој случај ќе влијае врз влошувањето на односите со Македонија, Дачиќ изјавил дека синоќа разговарал со македонскиот министер за надворешни работи и дека тој воопшто не му го спомнал Живаљевиќ, а дека мандатарот за состав на новата влада Зоран Заев, само изјавил дека службите случајот треба да го решат помеѓу себе.


Вучиќ: Не ми пречи што Заев ме навредува, важно ми е како ќе се однесува кон Србија


Белград, 18 мај, 2017 - 16:21 (META) 

Премиерот на Србија, Александар Вучиќ, денеска изјави дека не го интересираат внатрешните односи во Македонија, ниту дали мандатарот за состав на новата македонска влада го навредува, туку го интересира како Македонија ќе се однесува кон Србија.

– Не би сакал да зборувам што мислам за Зоран Заев. Ниту сакам ниту можам да зборувам остро, иако тоа некои можеби го сакаат. Тој ја претставува втората партија по сила во Македонија. Ќе судиме во делата – изјави Вучиќ.

Лидерот на СДСМ, Зоран Заев, вчера во интервју за регионалната телевизија „Н1“ изјави дека е непријатен начинот на кој Србија ги коментира случувањата во Македонија, но дека ќе се труди да има добри односи со Белград.

„Вучиќ водеше кампања и буквално на секој од своите настапи зброуваше за некакво „македонско сценарио“. За жал, мене ми беше непријатно за слушање како нашиот сосед зборува за Македонија“, рече Заев.

Вучиќ денеска додаде и дека не му пречи „кога Заев го навредува“, туку дека „единствено го интересира Србија да ја остават на мира“.

– Не сакам да ги коментирам односите во Македонија. Мене не ми пречи што ме навредуваше, за мене е важно како ќе се однесувате (мисли на Македонија, н.з.) кон Србија. Ако сум ја критикувал Македонија, тоа сум го направил затоа што гласаше за влегување на Косово во УНЕСКО – рече Вучиќ.

Во врска со можноста Рамуш Харадинај, кого Србија го товари за воени злосторства, да биде новиот косовски премиер и главен преговарач во дијалогот меѓу Белград и Приштина во Брисел, Вучиќ изјави дека тоа би било понижување и за ЕУ. Тој додаде дека останува да се види што ќе се случи на изборите на Косово, „каде има две коалиции, едната во која се поранешните водачи на ОВК и другата – „американска“ – на чело со Беџет Пацоли, додека „Србија и српскиот народ треба да се гледаат себе“.


Дачиќ го обвини Заев дека ги нарушува односите помеѓу Белград и Скопје


Белград, 17 мај, 2017 - 16:18 (META) 

Министерот за надворешни работи на Србија, Ивица Дачиќ, го обвини мандатарот за составување на новата влада на Македонија, Зоран Заев, дека со своите изјави ги нарушува односите помеѓу Белград и Скопје и наведе дека „навредите што Заев ги упатува на српското раководство секако ќе влијаат на билатералните односи“.

„Србија не се меша во внатрешните прашања на другите држави и сака добри односи со соседите, но изјавите на Заев се токму со спротивен тон. Србија сигурно нема да дозволи на кој било, па ни на Заев, да ја понижува, а односот спрема властите во Скопје во иднина ќе биде рецирпоцитетен со нивниот однос спрема Србија“, се наведува во соопштението на српското Министерство за надворешни работи.

Заев утринава, пред да му биде врачен мандатот за составување на владата, во интервју за регионалната телевизија „Н1“ рече дека е „непријатен начинот на кој Србија ги коментира случувањата во Македонија“, но дека тој ќе се труди да има добар однос со властите во Белград.

Дачиќ на почетокот на годината рече дека Белград погрешил што ја признал Македонија под нејзиното уставно име затоа што Македонија го признала Косово и гласала за прием на Косово во УНЕСКО.