!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Буџетот за 2018 година денеска на седница на Влада


Скопје, 9 ноември, 2017 - 13:19 (META) 

Владата денеска ќе ја одржи 37. седница, на која ќе го разгледа и ќе донесе одлуки за предлог-буџетот на државата за 2018 година, соопшти владината прес-служба.

На седницата, како што информираат оттаму, Министерството за финансии ќе го достави на разгледување и предлог-законот за извршување на буџетот за 2018 година.

Покрај буџетот, на дневен ред на денешната седница се уште неколку точки од кои една се однесува на кадровски прашања.

Седницата е закажана за доцна попладне, односно во 18 часот.

Инаку, според податоците што министерот за финансии, Драган Тевдовски ги презентираше пред јавноста, граѓанските организации и пред претставниците на стопанските комори, буџетот за 2018 година тежи 3,4 милијарди евра, а буџетскиот дефицит е планиран на 2,7 проценти од домашниот бруто-производ.

Најголеми реакции во јавноста и кај стручната фела предизвика планираното зголемување на акцизата за нафтата за три денари. Тевдовски го бранеше ваквото решение тврдејќи дека зголемувањето на акцизата нема да ја зголеми инфлацијата.


Заев: Очекувам жестока реакција на Москва околу приемот во НАТО, но подготвен сум


Подгорица, 6 ноември, 2017 - 10:49 (META) 

Македонскиот премиер, Зоран Заев, во интервју за црногорското радио „Антена М“ вели дека очекува жестока реакција од Русија кога ќе дојде време за прием на Македонија во НАТО, но нагласува дека Северноатлантската алијанса и Европската Унија се единствена алтернатива за земјава.

Заев, кој бил гостин во емисијата „Жива вистина“ на црногорското радио, изјавил дека е уверен оти Македонија ќе биде 30. членка на НАТО и дека е подготвен за жестоката реакција на Москва, како што беше случајот и со приемот на Црна Гора во НАТО.

– Реагираа за Црна Гора. Ние сме подготвени, бидејќи мојата земја нема алтернатива. Ние сакаме да ја унапредиме соработката со Русија, сакаме, на пример, таму што повеќе да продаваме домати, зелка и други земјоделски производи. Сепак, ние немаме алтернатива, нашиот избор се ЕУ и НАТО – рекол Заев, чија изјава ја пренесуваат голем број црногорски и српски медиуми и агенции.

Македонскиот пример вели дека е подготвен на сè за остварување на овие цели и за носење одлуки какви што очекуваат македонските граѓани, бидејќи, како што подвлекува, тоа е единствената опција.

– Знам дека имаше обиди за ликвидации и добро е што навреме се реагираше и тоа беше спречено. Некои аналитичари ми велат „Сега си ти на ред“. Ако нешто треба да се случи, нека се случи. Јас ја прифатив работата на премиер, на мојата земја ѝ треба лидер и подготвен сум да носам одлуки какви што очекуваат нашите граѓани, по секоја цена, па нека биде што биде – изјави премиерот Зоран Заев.


ВМРО-ДПМНЕ: Управниот суд подлегна на притисоците од СДС и од СЈО


Скопје, 24 октомври, 2017 - 12:44 (META) 

Управниот суд подлегна под систематскиот притисок од СДС и од Специјалното јавно обвинителство и не дозволи прегласување во ниту едно избирачко место, реагираат од ВМРО-ДПМНЕ на одлуките на Управниот суд за тужбите што партијата ги поднесе во врска со одбиените приговори од ДИК за првиот круг од локалните избори.

– ВМРО-ДПМНЕ до Управниот суд поднесе 24 тужби за 45 избирачки места за изборни нерегуларности, а судот не дозволи прегласување во ниту едно избирачко место. Ваквото дејствување на Управниот суд е поради оркестрираниот притисок од страна на двоецот СДС – СЈО. Имено, СЈО во предизборниот период поведе монтирана постапка против пет судии во Управниот суд поради нивно слободно судско уверување, додека Судскиот совет под влијание на СДС, надвор од секаква правна логика, им го одзеде судскиот имунитет – изјави денеска пратеникот на ВМРО-ДПМНЕ, Драган Данев.

Тој рече дека Државната изборна комисија (ДИК) и Управниот суд биле под страшен притисок, како и целата администрација.

– ВМРО-ДПМНЕ ги предупредува и ги потсетува сите што за потребите на СДС вршат изборен криминал и ги изигруваат законите, дека со враќањето на демократијата во Македонија, ќе се врати и правната држава, а сите прекршители на законите ќе одговараат во согласност со законите – рече Данев.


ДИК на маратонската седница ги одби сите приговори за изборите


Скопје, 20 октомври, 2017 - 10:09 (META) 

Државната изборна комисија (ДИК) ги одби сите приговори поднесени за гласањето и сумирањето на резултатите од првиот круг на локланите избори кои што се одржаа во неделата, на 15 октомври.

Портпаролката на ДИК, Љупка Гугучевска за „Мета“ изјави дека маратонската седница, која почна вчера околу 10 часот претпладне, завршила утрово и дека сите приговори се одбиени.

ДИК одлучуваше по вкупно 43 приговори, од кои 40 беа поднесени од ВМРО-ДПМНЕ, и по еден од ТМРО, Алијанса за Албанците и Левица.

Против одлуките на ДИК, партиите во рок од 24 од приемот на решенијата можат да поднесат жалба до Управниот суд, кој, пак, е должен по приемот на жалбата да донесе одлука во рок од 48 часа.

Вториот круг на локалните избори ќе се одржи на 29 октомври.

Инаку, седницата на ДИК за разгледување на приговорите до најголем дел помина во жестоки расправии меѓу членовите на Комисијата од СДСМ и од ВМРО-ДПМНЕ.

Комисијата за дел од приговорите на ВМРО-ДПМНЕ констатираше дека се полни со технички грешки, кои се повторуваат, односно наместо имињата на општините во кои се наоѓаат избирачките места за кои се однесува приговорот, беше наведено името на друга општина. Претставниците на подносителот ВМРО-ДПМНЕ, беа согласни дека има грешки во приговорите, но, бараат ДИК и покрај тоа да одлучува по нив по службена должност бидејќи имало неправилности.


Заев не размислува за предвремени избори, туку за реформите и за спорот за името


Скопје, 17 октомври, 2017 - 13:06 (META) 

Не размислувам за предвремени парламентарни избори бидејќи сè уште се во тек локалните, а наш приоритет е тие да завршат комплетно регуларно и веродостојно, како и во првиот круг оти само тогаш Македонија победува, изјави премиерот Зоран Заев на денешната заедничка прес-конференција со претседавачот на Советот на министри на Босна и Херцеговина, Денис Звиздиќ.

Заев рече дека на резултатите од изборите гледа како на поддршка за работа, а не за повторни избори.

– Резултатите од локалните избори ми даваат дополнителна храброст за носење одлуки, вклучувајќи го и решавањето на спорот за името. Македонија има сериозни одлуки пред себе и треба да ги носи на еден транспарентен и инклузивен начин, меѓу другото и одлуките за проблемот што Грција ги има со нашето уставно име – рече Заев.

Во врска со спорот за името, тој потсети дека го повикал посредникот во разговорите, Метју Нимиц, уште во ноември, по изборите, да излезе со нови предлози, идеи и со можни решенија.

– Би ја повикал опозицијата да учествува во ова прашање, но во функција на наоѓање решение, а не на негово одложување, затоа што навистина сакаме Македонија да стане 30. членка на НАТО и затоа што е значајно за одлуките што ЕУ ќе ги носи напролет. Сите знаеме дека мораме да направиме нешто со овој сензитивен проблем наметнат од грчка страна – рече Заев.

Тој, во овој контекст, додаде дека е охрабрен од подобрувањето на односите со Атина во периодот по формирањето на Владата.

– Градењето на пријателството со Грција што го имавме сите овие месеци наназад дополнително мене лично и другите министри во Владата нè охрабрува за решавање на овој проблем, притоа внимавајќи на нашата поставеност во поглед на наоѓањето решение. Сигурен сум дека по изборите ќе има попрецизни и поконкретни стратегии и правци, но сигурен сум и дека ќе се разговара за решавање на овој проблем – подвлече Заев.


Врховен суд денеска ќе ги разгледува жалбите за притворите од „бомбите“


Скопје, 26 јули, 2017 - 9:46 (META) 

Иако требаше да почне вчера, седницата на Врховен суд на која треба да се решава за жалбите на одлуките на Апелациски суд Скопје за притвор за обвинетите Горан Грујовски, Тони Јакимовски и Никола Бошковски, ќе биде одржана денеска.

Одбраната на обвинетите се жалеше до Врховниот суд на одлуките на Апелцискиот суд со кои беше прифатено барањето за притвори што го поднесе Специјалното јавно обвинителство (СЈО).

Рокот од 48 часа за одлука по жалбите истекува денеска во 13 часот.

Поранешните функционери на УБК, Грујовски, Јакимовски и Бошковски, се обвинети во предметите „Тврдина“ и „Таргет“ и се товарат за прислушување и за уништување на доказите за прислушувањето.

Претходно Кривичниот суд само им ги одзеде пасошите и им одреди да се јавуваат во суд еднаш неделно, но Апелација ја прифати жалбата на СЈО и ја преиначи одлуката. СЈО побара притвори, образложуваќи дека Грујовски не се појавил на распит, влијаел на сведоци, а во неговиот тефтер имало инструкции за изјавите на сведоците пред СЈО.


Попладне ќе се одржи 16. седница на Владата


Скопје, 25 јули, 2017 - 13:32 (META) 

Владата денеска ќе ја одржи шеснаесетта седница, со почеток во 17 часот, информираат оттаму.

„Во согласност со предложениот дневен ред, на седницата ќе бидат разгледани информации за активнoстите на министерствата поврзани со санирање на последиците од поројни дождови, електрични празнења, силен ветер и град, како и за причинетите штети на земјоделските култури во Ресенскиот и во Тетовскиот Регион“, се вели во соопштението на Владата.

Владата ќе донела неопходни одлуки во пресрет на активностите предвидени со воената вежба и вежбовните активности на „Змеј заштитник“ (Dragoon Guardian) околу влегување и престојување на војска на САД на територијата на Македонија заради учество во заедничката вежба.

На денешниот дневен ред е и информацијата во врска со учество на Македонија на „Експо 2020“ во Дубаи.

На седницата ќе се разговара и за извештајот за извршени преговори, со усогласен текст на договорот помеѓу Советот на министри на Босна и Херцеговина и Владата на Република Македонија, за заемно признавање возачки дозволи во двете земји.

„На денешната седница Владата ќе разгледа предлози и одлуки за кои Владата дава мислење по барање на Собранието, а кои се однесуваат на годишните извештаи и планови на повеќе агенции, регулаторни тела и јавни претпријатија. На 16. седница превидено е и разгледување на предлог-одлука за утврдување на стратешките приоритети на Владата за 2018 година“, се додава во соопштението на Влада.


ВМРО-ДПМНЕ: Кога ќе дојдеме на власт, ќе ги преиспитаме одлуките на Апелција


Скопје, 20 јули, 2017 - 12:24 (META) 

Недозволиво е судот да потклекнува под партиско-политичките притисоци на СДС и на нивната испостава СЈО, вели Орце Ѓорѓиевски од ВМРО-ДПМНЕ во изјава пред Апелацискиот суд.

– Оваа одлука е скандалозна од причина што при носењето не биле земени предвид аргументите на одбраната, туку е водена исклучиво според барањата и диктатите на СЈО. Оваа хајка во која сега директно се вклучи и судот е крајно тенденциозна и има цел да изврши удар врз функционерите врз самата ВМРО-ДПМНЕ. Овој притисок е оркестриран, дотолку повеќе што во него се вклучија и медиумите блиски до СДС кои сега креваат нова хистерија со барања за апсења. Јасно е дека притисокот на СЈО и на СДС врз судовите ќе продолжи и понатаму – вели Ѓорѓиевски.

Тој порача дека овие одлуки ќе бидат преиспитани кога ќе дојде до промена на власта и дека тогаш секој ќе одговара за своите постапки, вклучително и сите правосудни органи кои спротивно на законот носат одлуки.


ВМРО-ДПМНЕ: Одлуките на Апелација за одземените пасоши не кореспондираат со реалноста


Скопје, 18 јули, 2017 - 12:10 (META) 

Одлуките на Апелацискиот суд, со кои не се вратија патните исправи на лицата што се политички гонети од Специјалното јавно обвинителство, се конформистички и не кореспондираат со реалноста, обвинуваат од опозициската ВМРО-ДПМНЕ.

Орце Ѓоѓиевски, член на централниот комитет на партијата денеска пред Апелацискиот суд Скопје изјави дека „одлуките се донесени повеќе како компромис“.

– За да не изгледа дека судот ги отфрлил само апсурдните барања на СЈО за притвори и за поригорозни мерки, тој ги отфрла и жалбите на одбраната за враќање на патните исправи, односно за укинување на мерките за обезбедување. Реална опасност за бегство нема. Судот не треба да потклекнува под политичкиот притисок на СДС или, пак, под канонадата на разни неосновани барања на СЈО – рече Ѓорѓиевски.

Тој истакна дека судот своите одлуки треба да ги носи исклучиво според Уставот и законите и дека „мерките за претпазливост и за обезбедување присуство кои СЈО од почетокот на своите истраги до денес ги побара за раководството на ВМРО-ДПМНЕ се крајно неосновани“.

– Раководството на ВМРО-ДПМНЕ се политичари со изграден лик и почит помеѓу граѓаните, но и во широките меѓународни кругови, каде уживаат голем углед граден со години. Тие поради природата на својата работа имаат чести патувања и ако сакале досега да избегаат, тоа можеле да го сторат безброј пати. Раководството на ВМРО-ДПМНЕ нема сторено ниту едно кривично дело и затоа нема потреба од бегство. ВМРО-ДПМНЕ верува во органите на правосудниот систем и во принципите на владеење на правото и секогаш ќе биде достапно пред тие органи – рече Ѓорѓиевски.


Судот не знае како обвинетите во „Титаник“ дознале кои судии ќе одлучуваат за притворите


Скопје, 7 јули, 2017 - 15:22 (META) 

Обвинетите во случајот „Титаник“, меѓу кои и лидерот на ВМРО-ДПМНЕ, Никола Груевски, барале изземање на еден од тројцата судии од кривичниот совет што одлучуваше по барањето на Специјалното јавно обвинителство да им биде одреден притвор, потврди денеска Основниот суд Скопје 1.

Како обвинетите и нивната одбрана дознале кои судии го сочинуваат советот, од судот велат дека тоа не му е познато и не можат да дадат одговор ниту коментар за случајот.

Од судот ги отфрлаат како шпекулации наводите што вчера ги објави порталот „Сакам да кажам“, кој повикувајќи се на анонимни извори од судот објави дека Груевски, како и другите обвинети во „Титаник“ – Гордана Јанкулоска, Мартин Протогер, Миле Јанакиески и Кирил Божиновски од тричлениот кривичен совет првично добиле притвор. Како што објави порталот, претседателката на советот веднаш му јавила на претседателот на Основниот суд Скопје 1, Стојанче Рибарев, за соодносот на гласовите од 2 – 1 за одредување притвор, по што од советот незаконски бил отстранет еден од судиите.

Во соопштението на Кривичниот суд се наведува дека првично во советот што одлучувал за притворите, биле определени судиите Билјана Коцевска, Дарко Тодоровски и Диана Груевска-Илиевска. Судијата Билјана Коцевска, поради здравствени проблеми, велат од судот, била спречена да учествува во одлучувањето, поради што на нејзино место, како член на советот, била определена судијката Џенета Бектовиќ.

„Според списите од предметот, од страна на обвинетите лица истиот ден (сабота, 1 јули), во 17.20 часот, во судската писарница е поднесено барање за изземање на судијата Дарко Тодоровски од одлучување по тој предмет. Како дознале обвинетите лица и одбраната за составот на советот, не ни е познато и не можеме да дадеме одговор ниту коментар“, стои во соопштението од судот.

Оттаму објаснуваат дека доколку работата по предметот не е завршена, во согласност со членот 37 од Законот за кривична постапка (ЗКП), судијата чие изземање се бара е „должен да престане со работење по предметот и за тоа да го извести претседателот на судот кој е должен да одлучи по барањето“.

Судијата Дарко Тодоровски дал изјава за поднесеното барање за негово изземање и в.д. претседателот на Кривичниот суд, Стојанче Рибарев, го иззел судијата Тодоровски, а за нов член на советот го определил судијата Марин Станевски, кој во саботата вечерта, околу 23.30 часот, дошол во судот.

„Доколку по конкретниот предметот веќе било одлучено, ќе бил подготвен записник за советување и за гласање и судијата Дарко Тодоровски ќе дал изјава со таква содржина, а барањето за изземање ќе било отфрлено. При составувањето на советот е постапувано итно, за да се овозможи почитување на рокот од 24 часа во кој треба да се одлучи по барањето за притвор“, велат од Кривичниот суд.

Оттаму додаваат дека кој судија како гласал при донесувањето на одлуката е забележано на записник, кој е таен и може да му биде достапен само на повисокиот суд при одлучување по жалба.

Инаку, кривичните совети на Основниот суд Скопје 1 како неосновани ги отфрлија сите 18 барања за притвор што ги поднесе Специјалното јавно обвинителство и бараната мерка ја замени со мерки за претпазливост, односно одземање на пасошите и обврска за јавување во судот еднаш неделно.