Иванов: Го повикувам Заев веднаш да покрене импичмент, останувам на ставот за договорoт


Скопје, 20 јуни, 2018 - 10:15 (META) 

Го повикувам Заев со истото двотретинско мнозинство кое е неопходно за менување на Уставот на Република Македонија, веднаш да покрене постапка за утврдување на одговорност на претседателот на Републиката, односно импичмент, се вели во реакцијата на кабинетот на претседателот, Ѓорге Иванов на како што велат „сите изнесени невистини и закани од страна на премиерот, Зоран Заев, во емисијата „Само Вистина“ на телевизија „Канал 5“.

„Мојот став во однос на штетниот договор за името е конечен и останува непроменет и покрај сите искажани закани и притисоци“, се додава во соопштението од кабинетот на Иванов.


Димитров: За решение е потребно лидерство и одговорност од сите политички фактори


Скопје, 31 мај, 2018 - 16:56 (META) 

За да се реши спорот со името потребно е лидерство и највисока одговорност од сите политички фактори, изјави министерот за надворешни работи, Никола Димитров, по денешната средба со претседателот на државата Ѓоргe Иванов кого го информираше за содржината на последните разговори со МНР на Грција, Никос Коѕиас, во Њујорк и во Брисел.

– За ова исклучително значајно прашање за разликата околу името, прашање што нè влече надолу и ни ја попречува иднината повеќе години, потребно е лидерство и највисока одговорност од сите политички фактори. Доколку најдеме начин да го затвориме овој проблем со зачувување на идентитетот и достоинството, сите заедно, ќе бидеме на правата страна на историјата – рече Димитров.

Претходно претседателот Иванов рече дека целиот процес на преговори со Грција наликува на личен договор на двајцата премиери и го повторил својот став дека не прифаќа решение „ерга омнес“, односно едно, ново име за сеопшта употреба.


Суспендиран раководителот на сектор Mлади во АМС, Комисијата треба да ја плати штетата


Скопје, 3 април, 2018 - 15:31 (META) 

Директорот на Агенцијата за млади и спорт, Дарко Каевски денеска на прес-конференција соопшти дека Агенцијата ќе поведе дисциплинска постапка и ќе го суспендира раководителот на секторот Mлади поради објавувањето на збирката поезија, која содржи сексизам и дискриминацијата.

Тој истакна дека одговорност за објавувањето на збирката ќе сносат и членовите на Комисијата којашто го вршела изборот на песните, бидејќи според него таа имала и должност да направи избор кои од песните ќе бидат објавени. Од нив ќе се бара и да ја надокнадат направената штета од 170.000 денари, за печатењето на 5.000 примероци.

-Комисијата имала обврска да изврши селекција на пристигнатите песни, одговорноста за извршениот избор ја имаат нејзините членови. Агенцијата ќе поведе постапка и ќе бара од Комисијата да ја надомести штетата во целост – рече Каевски.

Тој додаде дека не размислува да поднесе оставка, туку инсистира да се истражи случајот и да се лоцира одговорноста. Според него утврдено е несовесно, нестручно несоодветно и непрофесионално работење кај неколку чинители кои имале активна улога околу публикацијата „Млади поети“.

-Како директор не сум дал ниту писмена, ниту усна согласност да бидам уредник на збирката песни, а Агенцијата за млади и спорт не може да биде издавач, ниту пак јас како овластено лице не можам да бидам уредник, согласно Законот за издавачка дејност – вели Каевски.

Директорот на Агенцијата информираше дека МВР ќе го гони за украден идентитет авторот на песните со дискриминаторска содржина и говор на омраза, објавени во збирката „Млади поети“.


Заев ги поздрави оставките во Антикорупциска комисија


Скопје, 6 март, 2018 - 15:34 (META) 

Убеден сум дека на Македонија и треба сериозна Антикорупциска комисија која што ќе биде поставена според сите меѓународни практики, ќе биде будното око на следење на извршната власт и сè што има допир со народните пари, одговори премиерот Зоран Заев на новинарско прашање за оставките во оваа комисија.

Тој додаде дека потребна е таква институција која што ќе биде еден од најголемите коректори на слабостите во системот и севкупната определба за борба против корупцијата.

„Ги поздравувам исчекорите, заради тоа што не и е лесно на која било личност или поединец да поднесе оставка заради тоа што била прозвана од јавноста. Ние можеме да ги ослободиме институциите ако бидеме транспарентни, отчетни и ако понесеме одговорност, па макар било тоа и етички“, додаде Заев.


Тантуровски: Нема да поднесам оставка затоа што не чувствувам одговорност


Скопје, 2 март, 2018 - 14:21 (META) 

Јас не чувствувам одговорност, не бев посочен како одговорен ниту во извештајот и од тие причини немам намера да поднесам оставка, изјави за „А1 он“, претседателот на Државната комисија за спречување на корупцијата (ДКСК), Игор Тантуровски, по обелоденувањето на скандалот за трошењето во Комисијата.

– Извештајот беше направен за интерна употреба, но целта на неговото објавување во јавноста беше единствено да се дискредитира Комисијата и нејзините членови. Тоа што беше објавено е парафразирано и е далеку од вистината. Целта на извештајот беше да се дадат препораки за тоа како да се постапува за одредени недоследности – рече Тантуровски.

Тој тврди дека случувањата во последните денови се политички притисок врз него и работата на Комисијата. Тој гарантира дека нема корупција во Антикорупциската комисија. Тантуровски рече дека извештајот не може да биде официјално споделен со јавноста.

Ревизорскиот извештај на УЈП за работата на Комисијата, што беше објавен во медиумите, покажа дека некои од членовите користеле неверодостојни патни налози за кои им биле исплаќани патни трошоци.

Дополнително, како ненаменско трошење буџетски пари се посочуваат и трошоците за ручеци и вечери во ресторани, што членови на Комисијата ги правеле при патување во странство, како и трошоци за изнајмување стан.

Ревизијата се однесува на составот на Комисијата на чело со претседателот Игор Тантуровски и членовите Фарие Алиу, Горан Миленков, Жаклина Дамческа, Најдо Спасевски, Сузана Таскова-Аџикотарева и Сејди Халили, кои на оваа функција во ДКСК се од април 2015.


МВР (и ЈО) по 9 постапувања за малолетничка дозволија системот да остане „труден“


Скопје, 21 февруари, 2018 - 10:36 (META) 

Од постапувањето, односно несоодветното постапување на МВР и на ЈО (другите задолжени не се исклучени од одговорноста), сите институции во државата останаа „трудни“, исто како и граѓаните кои мораат да се соочат со овој срам од нефункционирањето на правната држава, пишува „Вистинимер.мк

Министерството за внатрешни работи во консултација со надлежно јавно обвинителство излегоа со сооопштение пред неколку дена околу случајот со малолетничката–штитеничка на државата во кое цениме дека има извртена вистна, т.е. спин:

Во врска со случајот со 12-годишното девојче штитеник на ЈУ за згрижување на деца со воспитно-социјални проблеми, од страна на МВР постапувано е од крајот на 2016 и во текот на 2017 година и 2018 година и според евидентираните оперативни сознанија и комуникација со надлежното ОЈО, ја информираме јавноста за следното:

Малолетното девојче во текот на споменатиот период е девет пати пријавувано за исчезнато лице од страна на вработени во социјално-згрижувачките установи, при што во сите девет случаи е постапувано од страна на соодветните полициски служби.

[Извор: МВР – Соопштение, датум: 16.02.2018]

Kontraspin-foto-Vistinomer-1024x281-e1500652724996

Контраспин: МВР во соопштение за јавноста изнесе тврдење дека 9 пати е постапувано од страна на соодветни полициски служби по пријави дека е исчезнато лице од Јавна установа за згрижување на деца со воспитно-социјални проблеми, што го сметаме како своевидно извртување на вистината односно спин.

Во моментот додека се пишува овој текст, во јавноста е потврдено дека уште две малолетнички–штитетнички на соодветната ЈУ се или биле трудни, при што едната ја прекинала бременоста, додека другата одбива и сака да го роди дететото. Самото ова сознание, заедно со претходниот случај на 12-годишното девојче, кое неодамна абортираше, го отвора сомнежот дали МВР постапувало или „постапувало“.

Консултирајќи искусни полициски службеници кои биле и на високи функции во системот, може да се најде разбирање за нивната теза дека МВР е сведено во многу случаи како да станува збор за невладина организација, а не за институција задолжена за откривање и гонење на криминалот и заштита на безбедноста на граѓаните, пред сè, поради Законот за кривична постпка од 2013 година, кога главна улога во истрагата му е дадена на јавниот обвинител.

Но, тоа што може да се најде разбирање, секако не смее да значи амнестија за МВР и префрлање на вината само кај Јавното обвинителство, кое, пак, очигледно, според неколку тврдења, не сторило речиси ништо (досегашна истрага на Канцеларија на НП, изјава на Министерката за труд и Социјална политика Мила Царовска и веб страницата на Обвинителството, каде не може да се најдат активности за посочениот период).

Имено, додека топката се префрла од МВР кон ЈО, бидејќи МВР тврди дека се до почетокот на оваа година го известило ЈО во посебни извештаи, МВР треба да одговори зошто по 9 пријавувања за исчезнатото лице, реагирале експресно дури на 14.11.2017, кога од болницата во Велес добиле известување дека малолетничката е донесена кај нив во бессознание. Тогаш конечно системот профункционирал, девојчето го испитувале и од Институтот за судска медицина, па врз основа на наодот МВР, дури на 19-ти февруари поднела кривична пријава против некој си Е.Х, до ОЈО, а и натаму го испитувала случајот, односно истрагата продолжува и против други лица.

Повеќе прочитајте на „Вистиномер.мк“.


Груби: Државата е пред големи предизвици и има потреба од одговорна опозиција


Скопје, 30 јануари, 2018 - 12:23 (META) 

Претседателот на Комисијата за европски прашања, Артан Груби денеска се сретна со амбасадорката на Австрија во Македонија, Ренате Коблер.

​На средбата, Груби истакнал дека коалицијата работи посветено, со цел во Годишниот извештај за земјата во април, да биде тргната условеноста на препораката за почеток на преговори за наше членство во ЕУ, и во јуни Советот во Софија да ја потврди оваа препорака.

Во случајот со Законот за употреба на јазиците, Груби потенцирал дека опозицијата продолжува со деструктивната политика.

„Државата е пред големи историски предизвици и има потреба од одговорна опозиција“, рекол Груби.

Тој исто така истакнал дека се очекува во текот на австриското претседавање, почеток на отварање на поглавјата.

​Амбасадорката Коблер информирала за подготовките за австриското претседавање со ЕУ, кое започнува во втората половина на годинава, при што ја потврдила поддршката на Австрија за евроинтегративните процеси на Македонија, како и на останатите земји од Западен Балкан.


Талибанците ја презедоа одговорноста за нападот на хотелот во Кабул


Кабул, 21 јануари, 2018 - 15:30 (META) 

Одговорноста за синоќешниот напад врз хотелот „Интерконтинентал“ во Кабул ја презедоа талибанците. Во нивното образложение се вели дека пет напаѓачи со самоубиствени појаси барале странци и припадници на авганистанската власт.

Портпаролот на талибанците, Забихулах Муџахид изјавил дека бунтовниците првично планирале хотелот да го нападнат во четвртокот вечерта, но нападот се одложил затоа што во тоа време таму се одржувала свадба, а тие сакале да избегнат цивилни жртви.

Авганистанските специјални сили утрово соопштија дека операција за ослободување била завршена.
Спасени се 126 луѓе, а сите напаѓачи биле елиминирани.


Амбасадата на САД му понудила експертска помош на Судскиот совет за реформите


Скопје, 18 јануари, 2018 - 13:18 (META) 

Претседателот на Судскиот совет, Зоран Караџовски вчера имал средба со претставниците на Амбасадата на САД во земјава, Дејвид Стивенсон – шеф на политичкиот и економскиот сектор и со Џон Т. Мекнил – правен советник.

На состанокот, како што информираат денеска од Советот, било разговарано за начинот на избор на судиите, како и за одговорноста на сите субјекти во судството, вклучувајќи ги судиите и членовите на Судскиот совет.

„Делегацијата од Амбасадата на САД изрази желба за соработка и нивна поддршка за подобрување на законските решенија за избор на судии и водење на дисциплинските постапки, како и за транспарентноста на Судскиот совет на Република Македонија, а воедно понудија и можност за активна помош на експерти од САД“, стои во соопштението.


СДСМ: ВМРО-ДПМНЕ да покаже одговорност и да се вклучи во реформските процеси


Скопје, 9 јануари, 2018 - 14:58 (META) 

Од СДСМ како реакција на прес-конференција на лидерот на ВМРО-ДПМНЕ, Христијан Мицкоски велат дека целосно се неосновани тврдењата дека нема услови за демократско функционирање на Собранието.

Од таму додаваат дека граѓаните и целокупната јавност од новото раководство на ВМРО-ДПМНЕ очекуваат конечно да се ослободи од политиките на поделби, блокади и деструкции и да земе активно учество во спроведувањето на зацртаните реформи.

„ВМРО-ДПМНЕ треба да покаже одговорност пред интересите на граѓаните и државата и конструктивно да се вклучи во реформските процеси што обезбедуваат економски раст, повисок животен стандард, демократија, владеење на правото, добрососедски односи и целосна интеграција на Република Македонија во ЕУ и НАТО, што истовремено е врвен државен и национален интерес“, стои во партиското соопштение.