!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Скопје го одбележува 13 Ноември – Денот на ослободувањето на градот


Скопје, 13 ноември, 2017 - 10:47 (META) 

Денеска се одбележува 13 Ноември – Денот на ослободувањето на Скопје во Втората светска војна. На 13 ноември, пред 73 години борците од 42. и 50. Народнослободителна дивизија на македонската војска и 16. Македонска бригада го ослободија Скопје од фашистичка окупација.

По неколкудневни тешки борби со припадниците на 22. гренадирска германска дивизија, составена од 47. и 65. полк и делови од 11. воздухопловна десантна дивизија, како и со германската тврдинска бригада „Ангермилер“, која беше распоредена пред Качаничката клисура, борците на Народноослободителната војска со победоносен марш влегоа во Скопје.

Ослободувањето на Скопје ќе биде одбележан со повеќе култирни, хуманитарни и спортски манифестации.

По тој повод, градоначалникот на Град Скопје, Петре Шилегов ќе се сретне со претставници на Градскиот одбор на Сојузот на борци од Народноослободителната антифашистичка војна на Македонија.

Делегации на Собранието на Република Македонија и на Градот Скопје ќе положат цвеќе пред Споменикот на ослободителите на Скопје на Партизанските гробишта и пред споменикот на генерал Михајло Апостолски на Градските гробишта „Бутел“.

Во 12.30 часот, пред Споменикот на ослободителите на Скопје, на платото пред Владата, државни делегации, борци од НОВ, претставници од Армијата на Република Македонија, од општините на Град Скопје, членови на други институции, како и официјалната делегација од Град Скопје ќе положат цвеќиња.

Чествувањето на Денот на ослободување на Скопје ќе продолжи вечерва во Музејот на Скопје каде ќе биде промовирана книгата „На Скопје со љубов“ на архитектот Живко Поповски.

Во фоајето на Македонската опрера и балет (МОБ) ќе бидат изложени дела од 12. Меѓународна ликовна колонија „Скопје 2017“. Во МОБ свечено ќе биде одбележан празникот и ќе биде доделена наградата „13 Ноември“ на Град Скопје.

Од спортските манифестации, досега се одржаа Меѓународен шаховски турнир на слепи и лица со оштетен вид, финални борби доделување на „Златниот гонг“ и ноќна атлетска трка „Низ улиците на Скопје“.

До крајот на месецов се предвидени повеќе активности, по повод Денот на ослободувањето на Скопје.


Делегација на Владата ќе положи цвеќе во чест на 23 Октомври


Скопје, 22 октомври, 2017 - 13:36 (META) 

Делегација на Владата утре ќе положи венци со свежо цвеќе на споменикот на Гоце Делчев во Градскиот парк во Скопје, по повод Денот на македонската револуционерна борба – 23 Октомври, соопшти владината прес-служба.

Владината делегација ќе биде предводена од министерот за култура Роберт Алаѓозовски, кој ќе биде придружуван од министерот за економија, Крешник Бектеши, министрите без ресор, Едмонд Адеми и Зоран Шапуриќ, и од заменик-министерот за локална самоуправа, Дејан Павлески.

Опозициската ВМРО-ДПМНЕ, како што соопшти генералниот секретар на партијата, Христијан Мицкоски преку социјалната мрежа „Фејсбук“, ќе го одбележи Денот на македонската револуционерна борба со централен настан што ќе се одржи утре, во 13 часот, во Домот на културата „Ацо Шопов“ во Штип. Претходно, претставници на партијата ќе положат цвеќе пред споменикот посветен на основачите на ВМРО во Скопје.


Охрид денеска и утре, домаќин на одбележувањето на 50-годишнината на МПЦ


Охрид, 30 септември, 2017 - 19:00 (META) 

Во Охрид, градот во кој пред половина век е прогласена автокефалноста на МПЦ, денеска и утре се одбележува црковниот јубилеј.

На  17 јули 1967 година на свечена седница во црквата „Св. Климент Охридски“ во Охрид,  Светиот архиерејски синод на МПЦ, во состав митрополитот македонски Доситеј, епископот преспанско-битолски Климент, епископот злетовско-струмички Наум, епископот дебарско-кичевски Методиј и епископот американско-канадско-австралиски Кирил, ја донел одлуката за автокефалност.

Чествувањето на овој настан почна денеска во 17 часот, со вечерна богослужба во манастирот „Свети Климент и Пантелејмон“ на Плаошник. За 18.30 часот беше закажан почетокот на Духовната академија во катедралниот храм „Света Софија“, на која свое обраќање ќе има поглаварот на МПЦ-ОА, г.г. Стефан. На свеченоста е поканет државно-политичкиот врв, претставници на дипломатскиот кор, МАНУ, универзитети, културни институции.

Утре, по повод празникот Собор на сите македонски светители, во катедралниот храм „Света Софија“ со почеток во 9 часот ќе се одржи света божествена литургија, со која ќе чиноначалствува поглаварот г.г. Стефан, во сослужение на останатите членови на Светиот архиерејски синод на МПЦ-ОА.


Шилегов: Ќе ставиме крај на градежното дивеење во Скопје


Скопје, 8 септември, 2017 - 15:05 (META) 

Граѓаните на Скопје не заслужуваат арогантни градоначалници кои не мислат на потребите на граѓаните. По промените на локалните избори, новата градска власт заедно со граѓаните ќе работи напорно за Скопје да стане гордост за идните генерации, порача потпретседателот на СДСМ, Петре Шилегов, во своето обраќање по повод 8 Септември, на одбележувањето на големиот државен празник што во местото Три Круши во Драчево традиционално го организира општинската организација на СДСМ Кисела Вода.

– Ќе ставиме крај на градежното дивеење низ градот. Ќе го направиме Скопје така како што доликува. Нема повеќе да има градежна дозвола ако не се засадат пет дрва за секој стан – порача Шилегов, велејќи дека парите на граѓаните нема да се трошат за панорамски тркала и за барокни фасади, туку за еколошки јавен превоз и за нови училишта.


Македонија одбележува 26 години независност


Скопје, 8 септември, 2017 - 11:35 (META) 

Република Македонија денеска одбележува 26 години од референдумот на кој македонските граѓани се изјаснија за самостојна и суверена држава. Убедливо мнозинство, повеќе од 95 отсто од граѓаните што излегоа на референдумот на 8 Септември 1991 година позитивно одговорија на референдумското прашање „Дали сте за самостојна Македонија со право да стапи во иден сојуз на суверени држави на Југославија“.

На референдумот му претходеше Декларација за независност што првиот повеќепартиски македонски парламент ја усвои на 25 јануари 1991 година.  Државноста на Македонија прва ја призна Република Бугарија, по што следуваа признавања и од Турција, Словенија, Хрватска, Русија, Босна и Херцеговина…

Државата се осамостои монетарно со воведување на денарот на 26 април 1992 година, а потоа доби и своја Армија која роденденот го слави на 18 август.

На 8 април 1993 година со акламација во Генералното собрание на Обединетите нации, Македонија беше примена за 181. полноправна членка на светската организација, но поради противењето на Грција зачленувањето во ОН беше под привремената референца Поранешна југословенска Република Македонија.

По повод Денот на независноста, делегација предводена од претседателот на Владата, Зоран Заев, положи цвеќе на гробот на поранешните претседатели на државата, Киро Глигоров и Борис Трајковски, а делегација предводена од министерката за труд и социјална политика, Мила Царовска, пред споменикот „Ослободители на Скопје“.

Под мотото „Заедно кон врвот“, денеска во Крушево, во организација на Министерството за одбрана и Канцеларијата за врски на НАТО, се организира искачување на Бушева Планина. Најавено е присуство на министерката за одбрана Радмила Шекеринска, шефот на канцеларијата за врски на НАТО, морнаричкиот капетан Горазд Бартол, како и на амбасадорите на Обединетото Кралство и ЕУ, одбранбени аташеи во Република Македонија, припадници на МО и на АРМ и претставници на граѓански здруженија.

Во Свечената сала на Собранието, Одборот за доделување на државната награда „8 Септември“ ќе врачи една награда за животно дело и четири награди за остварување во областа на спортот во 2017 година, кои се доделуваат на спортисти, тренери и на спортски работници. Годинава добитник на наградата „8 Септември“ за животно дело е Иван Кочовски, поранешен шаховски селектор и актуелен стручен соработник на Шаховската федерација на Македонија. Други добитници на наградата се каратистот Петар Белистојановски, пливачот Александар Коцевски – Џајо, ракометарот Ристо Магдинчев и кајакарот Ѓокица Николовски.

Централната прослава по повод Денот на независноста се одржа вчера пред платото на Владата на Република Македонија под слоганот „Македонија слободна, слободно живее“. Домаќин на прославата беше Владата, а на присутните им се обрати премиерот Зоран Заев.


АРМ прославува 25 години од формирањето


Скопје, 18 август, 2017 - 10:12 (META) 

Армијата на Република Македонија денеска ја одбележува 25-годишнината од формирањето. Централната свеченост ќе се одржи на воениот стадион во Градскиот парк во Скопје, со почеток во 19 часот, на која, како што е најавено, ќе говорат претседателот на државата Ѓорге Иванов и министерката за одбрана, Радмила Шекеринска.

Претседателот Иванов ќе додели одликувања на командата за обука и доктрини, баталјонот за почести и четвртиот механизиран пешадиски баталјон од првата механизирана пешадиска бригада.

На почетокот на свеченоста, на која ќе присуствуваат највисоки претставници од сите државни институции, локални самоуправи, амбасади во Македонија и граѓански здруженија, ќе биде извршена почесна стрелба, со истрелување на 10 плотуни од артилериски орудија.

Во рамките на одбележувањето на 18 Август – Денот на АРМ, денеска на градските гробишта во Бутел во Скопје, повеќе делегации со воени почести ќе положат венци со свежо цвеќе на партизанските гробишта, на гробот на загинатиот претседател Борис Трајковски, на гробот на поранешниот претседател Киро Клигоров и на гробот на генерал Михаило Апостолски.

На воениот стадион во Градскиот парк во Скопје ќе биде поставена целодневна изложба на борбени средства, техника и воена опрема на АРМ.

На 18 август 1943 година на Славеј Планина, во областа Дебарца, е формиран баталјонот „Мирче Ацев“, кој се смета за прва организирана воена формација на Народно ослободителната војска на Македонија. Денот на формирањето на баталјонот се смета за роденден на Армијата на Република Македонија.


Иванов и Шекеринска ќе говорат на свеченоста за Денот на АРМ


Скопје, 17 август, 2017 - 18:41 (META) 

Централната свеченост по повод одбележувањето на 25-годишнината од формирањето на Армијата на Република Македонија (АРМ) ќе се одржи утре на воениот стадион во Градскиот парк во Скопје. Според протоколот, на свеченоста, која ќе почне во 19 часот, свои обраќања ќе имаат претседателот на државата, Ѓорге Иванов и министерката за одбрана, Радмила Шекеринска.

Претседателот Иванов ќе додели одликувања на командата за обука и доктрини, баталјонот за почести и четвртиот механизиран пешадиски баталјон од првата механизирана пешадиска бригада.

На свеченоста, како што информираат од Министерството за одбрана и Генералштабот на АРМ, ќе присуствуваат највисоки претставници од сите државни институции, локални самоуправи, амбасади во Македонија и граѓански здруженија.

Од касарната „Илинден“ во чест на Денот на АРМ и почетокот на централната прослава, ќе бидат истрелани 10 плотуни од артилериски орудија.

Во рамките на одбележувањето на 18 Август – Денот на АРМ, утре во 9 часот на градските гробишта во Бутел во Скопје, повеќе делегации со воени почести ќе положат венци со свежо цвеќе на партизанските гробишта, на гробот на загинатиот претседател Борис Трајковски, на гробот на поранешниот претседател Киро Клигоров и на гробот на генерал Михаило Апостолски.

На воениот стадион во Градскиот парк во Скопје ќе биде поставена целодневна изложба на борбени средства, техника и воена опрема на АРМ. Во текот на изложбата ќе бидат изведени и показни вежби од страна на припадниците на полкот за специјални намени, баталјонот за почести и центарот за обука и дресура на кучиња.


Шеснаесет години од потпишувањето на Охридскиот рамковен договор


Скопје, 13 август, 2017 - 9:56 (META) 

Денеска се одбележуваат 16 години од потпишувањето на Охридскиот рамковен договор, со кој се стави крај на воениот конфликт во Македонија во 2001 година и се постави рамка за меѓуетички соживот.

Преговорите, почнаа во Скопје, а потоа продолжија во Охрид, каде завршија со парафирање на документот на 10 август. Три дена подоцна на 13 август 2001 година во претседателската резиденција на Водно во Скопје Рамковниот договор го потпишаа тогашниот претседател на Република Македонија Борис Трајковски, поранешниот претседател на ВМРО-ДПМНЕ и тогашен премиер Љубчо Георгиевски, претседателот на ПДП Имер Имери и тогашните претседатели на СДСМ Бранко Црвенковски и на ДПА Арбен Џафери.

Потписници на договорот, во својство на гаранти, беа и специјалните претставници на Европската Унија и на САД, Франсоа Леотар и Џејмс Пердју, кои учествуваа во преговорите. Покрај потписниците во разговорите учествуваа и Хавиер Солана, тогашен висок претставник на ЕУ за безбедносна и надворешна политика и Питер Фејт, претставник на САД, како и повеќе правни експерти, меѓу кои професорите Владо Поповски и Љубомир Фрчковски.

„Овој Рамковен договор ќе го промовира мирниот и хармоничен развој на граѓанското општество, истовремено почитувајќи го етничкиот идентитет и интересите на сите македонски граѓани“, стои, меѓу другото, во текстот на договорот.

По повод 16-годишнината од потпишувањето на договорот, под покровителство на вицепремиерот задолжен за спроведување на Охридскиот рамковен договор, Хазби Лика и на претседателот на Собранието на Република Македонија, Талат Џафери вечер ќе се одржи свеченост во хотелот „Александар палас“ во Скопје.


Поради годишнината од Рамковниот, Џафери ја презакажа седницата за в понеделник


Скопје, 12 август, 2017 - 23:12 (META) 

Претседателот на Собранието, Талат Џафери се премисли и расправата за разрешувањето на државниот јавен обвинител, Марко Зврлевски, која требаше да продолжи утре, ја презакажа за в понеделник.

На официјалната интернет-страница на Собранието стои дека за утре не се предвидени никакви активности во законодавниот дом, а продолжението на седницата е закажано за в понеделник во 11 часот.

Пратениците, како што објави „Телевизија 24“, веќе добиле смс-пораки дека седницата планирана за утре е презакажана.

Според неофицијални информации, седницата се одложува поради активностите на дел од политичарите и пратениците околу одбележувањето на 16-годишнината од потпишувањето на Охридскиот рамковен договор.

Од кабинетот на Џафери вечерва соопштија дека утре во 19 часот тој ќе има обраќање по повод одбележувањето на годишнината од потпишувањето на Охридскиот договор, што ќе се одржи во хотелот „Александар Палас“ во Скопје. Во најавата за обраќањето на Џафери, нема информација за одложувањето на собраниската седница.

Инаку, собранискиот спикер на денешното продолжение не го прифати барањето на кооридинаторот на една од 10-те пратенички групи на ВМРО-ДПМНЕ, Илија Димовски, седницата за разрешувањето на државниот јавен обвинител, Марко Зврлевски да продолжи в понеделник. Џафери изјави дека пратениците на опозициската партија ја поставиле динамиката во која тече дебата и дека додека имаат работа ќе мора да работат.


Скопје се потсетува на жртвите на катастрофалниот земјотрес пред 54 години


Скопје, 26 јули, 2017 - 10:39 (META) 

Со низа настани, денеска Скопје се потсетува на една од најголемите трагедии во неговата историја – катастрофалниот земјотрес од 26 јули 1963 година. На денешен ден пред 54 години Скопје беше разурнато од земјотрес со сила од 9 степени според Меркалиевата скала (магнитуда од 6,1 степени), во кој загинаа 1.070 луѓе, а околу 4.000 беа повредени. Потресот уништи 15.800 живеалишта, а оштети 28.000.

Во рамките на денешното одбележување, од 9 до 17 часот во Домот на хумантирани организации „Даре Џамбаз“ ќе се одржи традиционалната  крводарителска акција на  Црвениот крст на град Скопје.

Во 10 часот на Градските гробишта во Бутел, пред Споменикот на загинатите во катастрофалниот земјотрес, цвеќе ќе положат официјални делегации и претставници на институции.

Со настани организирани од Младинскиот културен центар (МКЦ) – Скопје, Музејот на Град Скопје и од Град Скопје исто така се потсетува на земјотресот.

Мултимедијалниот културен настан што под мотото „МКЦ за Скопје“ го организира Младинскиот културен центар, кој традиционално се одржува на 26 јули, годинава се одржува два дена, односно почна вчера, а завршува денеска.

Во 20 часот во галеријата на МКЦ ќе биде отворена изложба на Димитар Аврамовски-Пандилов, а во 22.30 ќе почне концерт на повеќе музички изведувачи од САД. Истовремено, ќе се одржи и фотографска изложба на Вацлав Шваб, како и готографски инсталации „Јас, ти и градината, фотографии на отворено“ од Ан Д’Гела, Максим Делво, Герт Д’Теје, Алан Брејер.

Во Музеј на Град Скопје во 20 часот ќе биде отворена изложба на фотографии од Матијас Шуман од Дрезден, Германија, а со почеток во 21 часот на плоштад Македонија ќе настапи ревискиот оркестар на „Македонска радио-телевизија“. Скопјани, како и сите добронамерници ќе имаат можност да слушнат голем број македонски композиции кои низ децениите се пееле и се свиреле во Скопје или кои асоцираат на Скопје.