Промовирана програмата за одбележување на 1.000 години Охридска архиепископија


Охрид, 14 мај, 2018 - 15:20 (META) 

Низа културни и спортски настани ќе се случуваат во периодот од мај до декември во чест на одбележувањето на милениумскиот јубилеј „1.000 години од формирањето на Охридската архиепископија“, беше истакнато на денешната презентација на програмата во Охрид.

„Во програмата има културни, научни, уметнички како и спортски настани, издавање на публикации кои ќе наидат на голем интерес кај граѓаните, настани кои сметаме дека ќе го приближат значењето на Охридската архиепископија до граѓаните. Ги покануваме граѓаните од целата држава да го посетат Охрид за време на централната свеченост и да бидат дел од одбележувањето на милениумскиот јубилеј“, велат од Комисијата за односи со верските заедници и религиозни групи.

На 27 мај во Катедралниот храм на охридските архиепископи Св. Софија ќе се одржи свечена академија, под покровителство на претседателот Ѓорге Иванов, а пригодни обраќања ќе има државниот и црковниот врв. Вечерта ќе се одржи и свечен концерт на камерниот оркестар на Македонската филхармонија.

На 28 мај во храмот Св. Софија со почеток во 9 часот ќе започне литургиското чествување, чиноначалствувано од архиепископот охридски и македонски г.г Стефан, во сослужение на членовите на САС на МПЦ-ОА, свештенството и монаштвото.

Градот Охрид програмата ја надополнува и со културни настани кои ќе се случуваат во периодот од 24 мај до 28 мај во центарот на Охрид.


МПЦ ја покани БПЦ на 1.000 годишнината на Охридската архиепископија, СПЦ ќе слави посебно


Скопје, 11 мај, 2018 - 10:09 (META) 

Македонската православна црква – Охридска архиепископија (МПЦ-ОА) ја поканила Бугарската православна црква (БПЦ) на одбележувањето на 1.000 годишнината на Охридската архиепископија.

Поглаварот г.г. Стефан за бугарската агенција БГНЕС потврдува дека поканата е испратена до бугарскиот патријарх Неофит и до државниот врв на Бугарија за заедничко одбележување на 1000-годишнината од основањето на Охридската архиепископија.

Според најавите од МПЦ-ОА, 1000-годишниот јубилеј ќе биде одбележан со црковно-државни свечености во Охрид на 27 и 28 мај.

Српската православна црква (СПЦ), исто така ќе ја одбележи илјадагодишнината од основањето на Охридската архиепископија, се наведува во соопштението издадено по годишното заседание на Светиот архиерејски собор на СПЦ, што заврши вчера.

Во соопштението се вели дека одбележувањето ќе биде „во текот на оваа година, молитвено и достоинствено“.

Исто така, на соборот е поздравена правосилната одлука на Големиот совет на Европскиот суд за човекови права „со која се констатира дека власта на Поранешна југословенска Република Македонија ја прекршиле меѓународната конвенција за човечки права и за слободата на вероиспосвеста и совеста одбивајќи да ја регистрираат канонската Охридска архиепископија.


Денот на Европа и 68-годишнината на Унијата ќе се слават во повеќе градови


Скопје, 7 мај, 2018 - 11:36 (META) 

Денот на Европа, 9 мај, годинава, како 68-ми роденден на ЕУ, Делегацијата на ЕУ во Македонија ќе го одбележи со настани во неколку градови во земјава.

На 9 мај ќе се слави во Куманово, Крива Паланка, Дебар, Кавадарци, Кочани, Гевгелија, Охрид, Гостивар, Тетово, Велес, Струмица и Битола. Инфо точките на ЕУ на универзитетот „Св. Кирил и Методиј” во Скопје, Универзитетот на ЈИЕ во Тетово и Битолскиот универзитет ќе ги вклучат студентите во дискусии за европската иднина на земјата. Амбасадорот на ЕУ, Самуел Жбогар и други амбасадори на земји-членки на ЕУ ќе учествуваат на прославите и ќе ја пренесат пораката за заедничка иднина.

Централен настан на програмата за Денот на Европа е „ЕУ паркот“, што ќе се одржи во Штип на 12 мај, во присуство на премиерот Зоран Заев, градоначалникот на Штип, Благој Бочварски и амбасадорот на ЕУ, Самуел Жбогар. На настанот ќе се одржат презентации на сите земји-членки на ЕУ од страна на студентите на универзитетот во Штип, спортски активности, како и музички изведби на популарни уметници.

За одбележување на Европската година на културно наследство, ќе се одржи изложба на фотографии од локации на културата во земјата и ЕУ, за што повеќе информации може да се најдат тука.

Делегацијата на Европската Унија поддржува и други настани за Денот на Европа, како што се Скопскиот маратон, годишната матурска парада, дебати и натпревари за деца и студенти организирани од Европското движење во Скопје, Велес, и Куманово, како и бројни културни настани.

Денот на Европа е одбележување на годишнината од историскиот говор одржан во Париз во 1950 година кога Роберт Шуман, тогашен француски министер за надворешни работи, ја претставил идејата за нова форма на политичка соработка во Европа, со која војните помеѓу народите во Европа ќе станат незамисливи.


Заев испрати честитка до српската заедница по повод празникот Свети Сава


Скопје, 27 јануари, 2018 - 10:55 (META) 

Премиерот Зоран Заев денеска по повод празникот Свети Сава испрати честитки до српската заедница и до припадниците на православната вероисповед што го празнуваат овој верски празник.

„Славењето на овој голем празник, од посебно значење за српската заедница, истовремено е и придонес кон промовирањето на мултикултурализмот и меѓусебното разбирање во Република Македонија. Со славењето и почитувањето на празниците на нашите сегашни и идни поколенија создаваме традиција на негување на меѓусебните односи и почитување на различните културни особености на сите заедници во нашето општество“, пишува Заев во честитката по повод празникот на српската заедница во Македонија.

Српската заедница во Македонија празникот ќе го одбележни вечерва со свечена академија во Македонската опера и балет.

На свечената академија најавено е обраќање на претставници од Македонија и од Србија, а ќе учествуваат и претставници од јавниот и културниот живот, симфонискиот оркестар и хорот на Радиотелевизија Србија (РТС), актери од Народниот театар во Белград и Народниот ансамбл „Венац“ од Грачаница.


Историско и цивилизациското наследство на Скендербег треба да не обединуваат


Скопје, 17 јануари, 2018 - 15:58 (META) 

Скендербег е национален херој на Албанците, но и на сите народи кои сакаат мир на Балканот, изјави лидерот на ДУИ, Али Ахмети по повод 550-годишнината од смртта на Ѓерѓ Кастриот – Скендербег, која беше одбележана денеска.

Ахмети, претседателот на Собранието, Талат Џафери, министри, пратеници и функционери од ДУИ положија цвеќе пред споменикот на Скендербег во Скопје, откако претходно беше интонирана албанската химна.

– Скендербег останува централна личност за сите народи на Балканот кои го сакаат мирот. Денеска достоинствено можам да кажам дека и Охридскиот договор е во духот на Скендербег – рече Ахмети.

Прашан зошто нема претставници од другите партии на Албанците, но и на Македонците, Ахмети истакна „имало јавна покана за сите“.

Претходно во Големата купола на Собранието беше одржана свечена академија на која, покрај претседателот на Собранието, се обратија и директорот на Институтот на духовното и културното наследство на Албанците, Скендер Асани, директорот на Институтот за национална историја, Драги Ѓеорѓиев и професорот Владо Поповски, историчар и член на Одборот за одбележување на годишнината.

Џафери во своето обраќање истакна дека ликот и делото на Ѓерѓ Кастриоти – Скендербег е тесно поврзано со сите кои денеска живеат во Република Македонија, односно со „вековните стремежи и борбата на албанскиот и македонскиот народ за слобода и самостојност“.

– Да не заборавиме дека големиот македонски поет Глигор Прличев има напишано поема на грчки јазик која се вика Скендербег. Скендербег наоѓа место и во зборниците на Кузман Шапкарев, како и во Зборникот на народни песни на браќата Миладиновци. Односно, како што има речено големиот современ македонски поет, есеист, историчар и академик, Гане Тодоровски: „Скендербег е позитивен историски јунак во македонската историска меморија“ – рече Џафери.

Тој нагласи дека денес кога регионот и секоја поединечна држава се соочуваат со разни предизвици „токму споменот за Скендербег и неговото историско и цивилизациско наследство, треба да не обединува“, повторно цитирајќи го Гане Тодоровски, кој во своето експозе по повод 600 години од раѓањето на Скендербег, во МАНУ, рекол: „Големиот Скендербег, вечниот Скендербег, е божјото око кое бдее врз мирот на Балканот“.

По повод 550-годишнината денеска беше презентирана и поштенска марка со ликот на Скендербег.


Свечена академија во Собранието по повод 550-годишнината од смртта на Скендербег


Скопје, 15 јануари, 2018 - 18:11 (META) 

Во Собранието в среда, со свечена академија ќе биде одбележана 550-годишнината од смртта на Ѓерѓ Кастриот – Скендербег.

Како што е најавено на собранискиот календар, свечената академија ќе биде одржана во Големата купола во Собранието.

На свеченоста, обраќања ќе имаат претседателот на Собранието, Талат Џафери, директорот на Институтот на духовното и културното наследство на Албанците, Скендер Асани, директорот на Институтот за национална историја, Драги Ѓеорѓиев и Владо Поповски, историчар и член на Одборот за одбележување на 550-годишнината од смртта на Ѓерѓ Кастриот-Скендербег.

Во рамките на свеченоста ќе биде промовирана и поштенска марка со ликот на Скендербег, а по тој повод ќе се обрати и генералниот директор и претседател на Управниот одбор на „Македонска пошта“, Фаадис Реџепи.


Скопје го одбележува 13 Ноември – Денот на ослободувањето на градот


Скопје, 13 ноември, 2017 - 10:47 (META) 

Денеска се одбележува 13 Ноември – Денот на ослободувањето на Скопје во Втората светска војна. На 13 ноември, пред 73 години борците од 42. и 50. Народнослободителна дивизија на македонската војска и 16. Македонска бригада го ослободија Скопје од фашистичка окупација.

По неколкудневни тешки борби со припадниците на 22. гренадирска германска дивизија, составена од 47. и 65. полк и делови од 11. воздухопловна десантна дивизија, како и со германската тврдинска бригада „Ангермилер“, која беше распоредена пред Качаничката клисура, борците на Народноослободителната војска со победоносен марш влегоа во Скопје.

Ослободувањето на Скопје ќе биде одбележан со повеќе култирни, хуманитарни и спортски манифестации.

По тој повод, градоначалникот на Град Скопје, Петре Шилегов ќе се сретне со претставници на Градскиот одбор на Сојузот на борци од Народноослободителната антифашистичка војна на Македонија.

Делегации на Собранието на Република Македонија и на Градот Скопје ќе положат цвеќе пред Споменикот на ослободителите на Скопје на Партизанските гробишта и пред споменикот на генерал Михајло Апостолски на Градските гробишта „Бутел“.

Во 12.30 часот, пред Споменикот на ослободителите на Скопје, на платото пред Владата, државни делегации, борци од НОВ, претставници од Армијата на Република Македонија, од општините на Град Скопје, членови на други институции, како и официјалната делегација од Град Скопје ќе положат цвеќиња.

Чествувањето на Денот на ослободување на Скопје ќе продолжи вечерва во Музејот на Скопје каде ќе биде промовирана книгата „На Скопје со љубов“ на архитектот Живко Поповски.

Во фоајето на Македонската опрера и балет (МОБ) ќе бидат изложени дела од 12. Меѓународна ликовна колонија „Скопје 2017“. Во МОБ свечено ќе биде одбележан празникот и ќе биде доделена наградата „13 Ноември“ на Град Скопје.

Од спортските манифестации, досега се одржаа Меѓународен шаховски турнир на слепи и лица со оштетен вид, финални борби доделување на „Златниот гонг“ и ноќна атлетска трка „Низ улиците на Скопје“.

До крајот на месецов се предвидени повеќе активности, по повод Денот на ослободувањето на Скопје.


Делегација на Владата ќе положи цвеќе во чест на 23 Октомври


Скопје, 22 октомври, 2017 - 13:36 (META) 

Делегација на Владата утре ќе положи венци со свежо цвеќе на споменикот на Гоце Делчев во Градскиот парк во Скопје, по повод Денот на македонската револуционерна борба – 23 Октомври, соопшти владината прес-служба.

Владината делегација ќе биде предводена од министерот за култура Роберт Алаѓозовски, кој ќе биде придружуван од министерот за економија, Крешник Бектеши, министрите без ресор, Едмонд Адеми и Зоран Шапуриќ, и од заменик-министерот за локална самоуправа, Дејан Павлески.

Опозициската ВМРО-ДПМНЕ, како што соопшти генералниот секретар на партијата, Христијан Мицкоски преку социјалната мрежа „Фејсбук“, ќе го одбележи Денот на македонската револуционерна борба со централен настан што ќе се одржи утре, во 13 часот, во Домот на културата „Ацо Шопов“ во Штип. Претходно, претставници на партијата ќе положат цвеќе пред споменикот посветен на основачите на ВМРО во Скопје.


Охрид денеска и утре, домаќин на одбележувањето на 50-годишнината на МПЦ


Охрид, 30 септември, 2017 - 19:00 (META) 

Во Охрид, градот во кој пред половина век е прогласена автокефалноста на МПЦ, денеска и утре се одбележува црковниот јубилеј.

На  17 јули 1967 година на свечена седница во црквата „Св. Климент Охридски“ во Охрид,  Светиот архиерејски синод на МПЦ, во состав митрополитот македонски Доситеј, епископот преспанско-битолски Климент, епископот злетовско-струмички Наум, епископот дебарско-кичевски Методиј и епископот американско-канадско-австралиски Кирил, ја донел одлуката за автокефалност.

Чествувањето на овој настан почна денеска во 17 часот, со вечерна богослужба во манастирот „Свети Климент и Пантелејмон“ на Плаошник. За 18.30 часот беше закажан почетокот на Духовната академија во катедралниот храм „Света Софија“, на која свое обраќање ќе има поглаварот на МПЦ-ОА, г.г. Стефан. На свеченоста е поканет државно-политичкиот врв, претставници на дипломатскиот кор, МАНУ, универзитети, културни институции.

Утре, по повод празникот Собор на сите македонски светители, во катедралниот храм „Света Софија“ со почеток во 9 часот ќе се одржи света божествена литургија, со која ќе чиноначалствува поглаварот г.г. Стефан, во сослужение на останатите членови на Светиот архиерејски синод на МПЦ-ОА.


Шилегов: Ќе ставиме крај на градежното дивеење во Скопје


Скопје, 8 септември, 2017 - 15:05 (META) 

Граѓаните на Скопје не заслужуваат арогантни градоначалници кои не мислат на потребите на граѓаните. По промените на локалните избори, новата градска власт заедно со граѓаните ќе работи напорно за Скопје да стане гордост за идните генерации, порача потпретседателот на СДСМ, Петре Шилегов, во своето обраќање по повод 8 Септември, на одбележувањето на големиот државен празник што во местото Три Круши во Драчево традиционално го организира општинската организација на СДСМ Кисела Вода.

– Ќе ставиме крај на градежното дивеење низ градот. Ќе го направиме Скопје така како што доликува. Нема повеќе да има градежна дозвола ако не се засадат пет дрва за секој стан – порача Шилегов, велејќи дека парите на граѓаните нема да се трошат за панорамски тркала и за барокни фасади, туку за еколошки јавен превоз и за нови училишта.