Руска амбасада: Заев и Шекеринска шират русофобија, очекуваме истрага за изјавите


Скопје, 17 јули, 2018 - 9:51 (META) 

Руската амбасада вчеравечер реагираше со соопштение за наводите од премиерот Зоран Заев дека бизнисмени од Русија финансирале антивладини протести. Заев тоа го кажа во интервју за „BuzzFeed News“ и потоа го повтори како одговор на новинарско прашање на почетокот на изградбата на фабриката на американската „Дура“ во Бунарџик.

Од амбасадата сметаат дека станува збор за паушални изјави, слични на тие на министерката за одбрана Радмила Шекеринска од неодамна, стои во соопштението.

„Сметаме дека ваквите паушални изјави, како и неодамнешните наводи од страна на министерот за одбрана, Радмила Шекеринска, имаат за цел ширење на русофобијата, која што преку западните партнери на Македонија сè почесто се прифаќа како алатка за постигнување сопствени внатрешни и надворешно политички цели. Во тој контекст се доведува во прашање искреноста на заложбите на Владата на Република Македонија за градење пријателски односи со Руската Федерација“, се вели во соопштението.

Дополнително, се повикува на истрага за наводите на владата.

„Очекуваме дека македонската страна, во рамките на правното поле на својата држава и меѓународната практика, ќе спроведе детална и објективна истрага на наводите на кои алудираат посочените членови на Владата на Република Македонија, и ќе ѝ презентира на јавноста, како и на руската страна, реални факти, а не конструкции“, се вели во соопштението.

Од амбасадата на Руската Федерација велат дека станува збор за „контрапродуктивни и неодговорни обиди“ за заплашување на граѓаните „со измислена руска закана“.


Панчевски и Стаменковски на чекор до физички инцидент


Скопје, 18 јануари, 2018 - 13:57 (META) 

Судијата Владимир Панчевски, поранешен претседател на Основниот суд Скопје 1, тврди дека утрово бил нападнат на работното место во судот за прекршоци, каде е прераспореден по доаѓањето на Иван Џолев за претседател на Кривичниот суд.

– Додека бев во судница, влезе Горан Стаменковски, вработен како раководител во Кривичниот суд, и почна да ми се заканува. Извикуваше дека ќе сум видел што ќе ме снашло, а почна да изговара и вулгарности, споменувајќи ја во тој контекст мојата сопруга – изјавил Панчевски за „Фокус“, додавајќи дека сведок на вербалниот напад била записничарката.

Панчевски веднаш повикал полиција, по што оттаму му било кажано да поднесе приватна тужба бидејќи така било решено по консултација со јавен обвинител.

Стаменковски, пак, вели дека во канцеларијата влегол службено.

– Правевме ревизија во судот, и кога влегов во канцеларијата на Панчевски, јас не ни знаев која е негова канцеларија, тој почна да ми вика „излегувај, излегувај“. На масата имаше полициски пендрек и го зема, не ме удри, но ме истурка надвор од канцеларија. Обвинувањата на Панчевски се лажни и сега јас ќе одам во полициска станица да го пријавам – изјавил Стаменковски.

Инаку, Стаменковски го тужеше судијата за мобинг, додека Панчевски беше претседател на Кривичниот суд.

Основниот суд Скопје 2 пресуди во корист на Стаменковски, но пресудата сè уште не е правосилна.


Меј ја обвини Москва за мешање во британските избори


Лондон, 14 ноември, 2017 - 10:17 (META) 

Премиерката на Велика Британија, Тереза Меј ја обвини Москва дека се мешала во британските парламентарни избори, што се одржаа на почетокот на јуни, оваа година и дека вршела кибер-шпионажа, пренесува „Би-би-си“.

Во обраќање пред бизнисмените на собир во Лондон, Меј рекла дека владата на рускиот претседател, Владимир Путин се обидува да ги „поткопа слободните општества“.

Меј истакнала дека Русија „посејала лажни приказни“ за да го „ожнее неединството на Западот“.

Британските медиуми коментираат дека ваквите наводи на британската премиерка се во голема спротивност со оние на американскиот претседател, Доналд Трамп, кој минатата недела изјави дека му верува на својот руски колега, Владимир Путин, кој повторно истакна дека Русија не се мешала во претседателските избори во САД, минатата година.

Инаку, шефот на британската дипломатија, Борис Џонсон следниот месец треба да ја посети Русија.


Нема докази дека Русија се вмешала во изборите во Велика Британија, смета Џонсон


Лонодон, 1 ноември, 2017 - 20:11 (META) 

Британскиот министер за надворешни работи, Борис Џонсон, денеска изјави дека нема докази дека Русија се мешала во изборите во Велика Британија.

„Не видов никакви докази. Колку што знам, Русија немаше никаква улога“, одговорил Џонсон на новинарско прашање во врска со улогата на Русија во британските избори.

Американската амбасадорка во Обединетите нации, Ники Хејли, неодамна ја обвини Русија дека се меша во изборите на другите земји за да ја поткопа нивната демократија.


ВМРО-ДПМНЕ: Заев не може да го сокрие фактот дека изборите беа криминални


Скопје, 22 октомври, 2017 - 18:20 (META) 

„Ова се први избори во кои беше убиен директен учесник во изборниот процес. На кандидат за градоначалник му беше скршен черепот, а секојдневно пристигнуваат сведочења за закани со оружје, заплашувања и за поткуп“, се вели во реакцијата на ВМРО-ДПМНЕ на денешната изјава на лидерот на СДСМ и премиер, Зоран Заев, во Кавадарци.

„Лагите на Заев нема да го покријат фактот дека се одржаа најкриминалните избори досега. ДИК беше ставена под целосна партиска контрола, а нејзините членови, кои не ги слушаа наредбите на Заев, беа заплашувани со пријави и со обвиненија од СЈО. Ваквите криминални дејства еден ден ќе се истражат, документираат и за нив ќе има одговорност. Кавадарци ќе има можност да го даде својот глас против криминалот и лагите на Зоран Заев на 29 октомври“, стои во соопштението.


Заев: Изборите беа кристално чисти, фер и слободни


Кавадарци, 22 октомври, 2017 - 15:42 (META) 

Изборите беа кристално чисти, фер и слободни, со изолирани инциденти, а тоа го потврдија и меѓународните институции, изјави денеска во Кавадарци лидерот на СДСМ и премиер, Зоран Заев, прашан за коментар на вчерашната изјава на лидерот на ВМРО-ДПМНЕ, Никола Груевски, дека изборите биле нелегитмни и недемократски.

– Човекот конечно изгуби избори, ние тврдевме дека само ако има слободна изразена волја, ќе се случат вистински изразени мисли, чувства и определби на граѓаните, тоа се случи на 15 октомври. Поразениот има право да се лути, јас тоа го разбирам. Не видов никаква сериозност во изјавите што тој ги даде. Навистина не можам ниту логично, ниту рационално да заклучам кои се доказите, кои се причините или што, всушност, се случувало во Македонија. Јас сум рационален човек, сакам секогаш да разговарам, спремен сум да прифатам корективи, да се коригирам и јас и политичката партија и коалициските партнери со кои сме, но буквално во Македонија блеска слободно изразената волја и апсолутно нема дилеми за тоа – рече Заев.

Груевски во синоќешното интервју во емисијата „Седмица“ на телевизијата „Алфа“ ја обвини власта за поткуп на гласачи, уцени и за заплашувања на членството на ВМРО-ДПМНЕ и на кандидатите за градоначалници на партијата.

Инаку, лидерот на СДСМ, Зоран Заев денеска беше на средби со граѓаните на Кавадарци, каде побара поддршка за кандидатот за градоначалник на владејачката партија, Бетиан Китев, за вториот круг од локалните избори кои ќе се одржат на 29 октомври. По Кавадарци, за денеска предвидени се средби на Заев и со граѓаните на Демир Капија, Градско и на Росоман.

Лидерот на ВМРО-ДПМНЕ, Никола Груевски, како што соопштија од партијата, денеска има средби со жителите на Стајковци, Хиподром, Автокоманда и на Железара, во општина Гази Баба, а во 19 часот ќе има обраќање на митинг во селото Љубанци во општина Бутел.


Прислушувањето се врши легално со наредби од судот, велат од МВР


Скопје, 22 октомври, 2017 - 13:14 (META) 

Следењето на комуникациите во Министерството за внатрешни работи се врши во согласност со законските процедури – со наредба од суд преку Јавното обвинителство, велат од МВР за „Нова ТВ“ во врска со обвинувањата на лидерот на ВМРО-ДПМНЕ, Никола Груевски, изнесени во интервјуто во емисијата „Седмица“ на телевизијата „Алфа“, дека стотина членови на раководството на партијата се прислушувани од МВР.

„Тоа што го прави МВР е легално и со наредба од суд преку Јавното обвинителство, а токму обвинителството е тоа што ги води истрагите. Нелегалното масовно прислушување, главната одлика на владеењето на Никола Груевски, е предмет на истрага на Специјалното јавно обвинителство. Управата за безбедност и контраразузнавање (УБК) и Бирото за јавна безбедност (БЈБ) постапуваат во согласност со своите надлежности и нивните активности во форма на оперативни акции и обработки во борбата против организираниот криминал, тероризмот, насилниот екстремизам и другите облици на противзаконско однесување, се од доверлива природа и не се коментираат јавно. Работата на овие служби е насочена кон штитење на интересите и на безбедноста на граѓаните и не се под контрола на ниту една политичка партија“, велат од МВР.

Од Министерството додаваат дека УБК во своето работење е фокусирано на лев и на десен екстремизам и радикализам, а тероризмот е посебен глобален феномен за кој и не треба посебно објаснување.

Оттаму потсетуваат дека во Собранието постојат две комисии чија функција е да вршат надзор над работата на УБК и на Агенцијата за разузнавање (АР) и над примената на посебните истражни мерки (ПИМ).

„Тие комисии се добредојдени во секој момент да извршат надзор и контрола над примената на овие мерки“, велат од МВР.

Лидерот на ВМРО-ДПМНЕ, Никола Груевски, вчера, во специјалното издание на магазинот „Седмица“ на „Алфа“, обвини дека членови на партијата се прислушувани во изминатиот период и дека во УБК е отворено досие под името „Македонски екстремизам и тероризам“.

– Такви досиеја се воделе во комунизмот и во 1990-тите против ВМРО-ДПМНЕ, како случаите „Темел“ и „Сина птица“. Така и сега, против ВМРО-ДПМНЕ се водат истраги за да се урниса партијата – рече Груевски.


Трамп ѝ се закани на „Ен-би-си“ со одземање на лиценцата


Вашингтон, 11 октомври, 2017 - 19:19 (META) 

Претседателот на САД, Доналд Трамп, денеска повторно ги нападна медиумите, кои, според него, шират лажни вести и праша дали треба да им бидат одземени дозволите за работа.

„Со сите лажни вести кои доаѓаат од „Ен-би-си“ и од мрежите, кој момент е соодветен да им бидат оспорени лиценците? Лошо за земјата!“, напиша Трамп на „Твитер“.

„Ен-би-си“ претходно денеска пренесе дека Трамп сака за десет пати да го зголеми американскиот нуклеарен арсенал.

Трамп е во судир со повеќе медиуми во САД, а последен во низата е „Ен-би-си“, кој неодамна објави извештај за несогласувања меѓу претседателот на САД и американскиот државен секретар, Рекс Тилерсон.


ВМРО-ДПМНЕ: Заев шести ден молчи и крие што договорил во Софија


Скопје, 26 јуни, 2017 - 10:13 (META) 

Опозициската ВМРО-ДПМНЕ во редовното утринско соопштение повторно го обвини премиерот Зоран Заев дека шести ден молчи и крие од македонските граѓани што договорил за време на неговата посета на Софија, во врска со договорот за добрососедство меѓу Македонија и Бугарија.

Од партијата велат дека Заев во текот на изборната кампања ветувал експертски дебати и јавни расправи за секое поголемо прашање од значење за Македонија.

„Заев од Софија кажа дека договорот е речиси постигнат, без притоа да ги информира граѓаните што тоа преговарал и речиси договорил. Заев од Софија кажа дека ќе се бришат одредени термини од македонските учебници по историја, без притоа да каже кој и како ќе одлучува што треба да биде избришано. Заев во Бугарија јавно ја обвини Република Македонија, земја чиј премиер е, дека ширела национализам и омраза во минатото, без притоа да прецизира кон кого тоа ширела нашата држава национализам“, стои во соопштението на ВМРО-ДПМНЕ.

Оттаму порачуваат дека ВМРО-ДПМНЕ, како партија, е за градење добрососедски односи базирани на заемно почитување и дека ќе поддржи сè што е во насока на подобрување на односите со соседите, но нема да поддржи ништо што е во спротивност со интересите на македонскиот народ и држава.


Арапските земји испратија листа со барања до Катар, вклучувајќи и затворање на „Ал Џезеира“


Доха, 23 јуни, 2017 - 10:09 (META) 

Четирите арапски држави кои воведоа санкции кон Катар поради наводна поддршка на тероризмот, ѝ испратиле на Доха 13 барања, вклучувајќи и затворање на телевизијата „Ал Џезеира“ и намалување на врските со Иран, изјавил официјален претставник на една од четирите држави.

Листата со барањата, како што пренесуваат светските агенции, ја составиле Саудиска Арабија, Обединетите Арапски Емирати, Египет и Бахреин.

Од Катар се бара и затворање на турската воена база во оваа земја и испорачување на сите терористи од нејзина територија.

Четирите држави ѝ дале на Доха рок од десет дена да ги исполни барањата.

Листата на раководството на Катар ја предал претставник на Кувајт, земјата посредничка во спорот меѓу земјите во овој регион. Од Катар претходно ги демантираа наводите дека поддржуваат терористички групи.