!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Продолжуваат протестите против Вучиќ во Белград, Ниш и во Нови Сад


Белград, 6 април, 2017 - 20:08 (META) 

Неколку илјади претежно млади лица, незадоволни од победата на Александар Вучиќ на претседателските избори во Србија, и денеска излегоа во центарот на Белград, на четвртиот по ред „Протест против диктатурата“, јавува дописникот на „Мета“ од Белград.

Учесниците на протестот, кој е организиран преку „Фејсбук“, носеа знамиња на Србија и транспаренти со натписи „О (не)свести се“, „Вучиќ арамијо“, „Долу диктатурата“, „Денеска сум на улица за утре да не живеам на неа“…

Демонстрантите бараат намалување на бројот на членови во Републичката изборна комисија (РИК) и во Регулаторното тело за електронски медиуми (РЕМ) поради неправилности за време на кампањата за претседателските избори, смена на претседателката на српското собрание, Маја Гојковиќ, и против раководството на српската национална радиотелевизија поради „режимското известување и нерамномерната застапеност на кандидатите“, како и за средување на избирачкиот список.

Демонстрантите денеска се движеа по малку изменета рута, која се држи во тајност за да се избегнат инциденти.

„Протестите против диктатурата“ продолжија и во Ниш и во Нови Сад, каде за сабота е најавен контрамитинг на приврзаниците на Александар Вучиќ.

Вучиќ денеска повторно изјави дека протестите на улиците се доказ дека Србија е демократска држава. Сепак, двајца од неговите министри, за полиција, Небојша Стефановиќ, и за труд, Александар Вулин, ја обвинија опозицијата за организирање на протестите и предупредија дека изборната волја не може да се смени на улица.


Седницата продолжува в понеделник, предлогот на СДСМ не се најде на дневен ред


Скопје, 6 април, 2017 - 18:42 (META) 

Без суштинска расправа и со многу процедурални забелешки, заврши денешното деветто продолжение на конститутивната седница на Собранието на Република Македонија за избор на претседател и на членови на Комисијата за избори и за именувања и за избор на претседател на Собранието.

Претседавачот со седницата, поранешниот спикер на Собранието, Трајко Вељаноски, не го стави на гласање предлогот на СДСМ да се премине на следната точка од дневниот ред и да се избере претседател на Собранието. Тој, по паузата за координација со претставниците на парламентарните партии и по кратката „дебата“ што следеше по неа, точно во 18 часот ја прекина седницата и следното продолжение го закажа за понеделник во 11 часот.

По координацијата кај Вељаноски, пратениците на ВМРО-ДПМНЕ од собраниската говорница инсистираа дека првин да заврши расправата по третата точка од дневниот ред, пред да се оди на избор на претседател на Собранието и го обвинија СДСМ и парламентарното мнозинство дека го кршат деловникот и се обидуваат да им го одземат правото за збор во парламентот.

– Ние треба да ја завршиме оваа точка, да избереме Комисија и да дојдеме до точката 4, по што можеме да разговараме за еден, двајца, тројца, а по можност и за шест кандидати за претседател на Собранието. Мислам дека треба да спласне тензијата што ја имавме денеска тука. Важно е да се почитува процедурата – рече Илија Димовски од ВМРО-ДПМНЕ.

Неговиот колега пратеник, Антонијо Милошоски, исто така процедурално, апелираше да се почитува членот 80 од деловникот на Собранието, со кој се гарантира правото на збор и на говор на пратеникот во Собранието.

– Во целата држава, особено во главниот град, вознемиреноста кај граѓаните е зголемена и ние како претставници во Собранието да не долеваме масло. Да го почитуваме деловникот и да продолжиме по третата точка – рече Милошоски.

Пратеникот на ВМРО-ДПМНЕ, Владимир Ѓорчев, истакна дека „ако некој мисли дека со бајпас-варијанти ќе ги спречи пратениците да го артикулираат мислењето на мнозинството граѓани во Македонија, тоа не може, а да не остави последици врз севкупните состојби во државата“.

Пратеничката на СДСМ, Радмила Шекеринска, го обвини претседавачот Вељаноски дека ја узурпира функцијата со одбивањето да го стави на гласање предлогот да се премине на следната точка на дневен ред, за избор на претседател на Собранието и да се одблокира работата на законодавниот дом.

– Денеска слушаме барања нешто да се прави на ист начин како што се правело пред четири, пет или шест години. Тоа го бараат претставници на партија која со секоја промена на деловникот ги кратеше дискусиите во парламентот. Последниот пат кога бевте нестрпливи, исфрлавте новинари, а потоа и пратеници од Собранието. Одбивањето да се стави легитимен член на деловникот на гласање е узурпација на функцијата. Процедурите ги узурпира човекот кој е претседавач со оваа седница – рече Шекеринска.


СДСМ: Груевски и соработниците бараат поврзаност и таму каде што не постои


Скопје, 19 март, 2017 - 16:20 (META) 

Проблемот на Никола Груевски и на неговите соработници е што тие се препознаваат во секој за кого постои сомнеж дека е дел од какви било криминални активности, па затоа Груевски и соработниците имаат потреба да наоѓаат поврзаност и таму каде што не постои, се вели во реакцијата на СДСМ на денешната прес-конференција на Орце Ѓорѓиевски од ВМРО-ДПМНЕ.

„Во врска со случајот за кој зборуваше соработникот на Груевски, Орце Ѓорѓиевси, на прес-конфернцијата денеска, ставот на СДСМ се јасен. Ја охрабруваме полицијата да го расчисти случајот докрај и секој што работел спротивно на законот да понесе соодветна одговорност. Во Македонија мора да има и ќе има правда“, стои во соопштението на СДСМ.

ВМРО-ДПМНЕ денеска на прес-конференција, на која говореше Орце Ѓорѓиевски, ги обвини СДСМ и неговиот лидер Зоран Заев дека се блиски и соработуваат со лица од криминалното подземје, а во врска со последната полициска акција, спроведена вчера против лица од Прилеп, Битола и од Арачиново.


ВМРО-ДПМНЕ: Заев и СДСМ се блиски и соработуваат со лица од подземјето


Скопје, 19 март, 2017 - 14:59 (META) 

ВМРО-ДПМНЕ денеска ги обвини СДСМ и неговиот лидер, Зоран Заев, дека се блиски и соработуваат со лица од криминалното подземје, а во врска со последната полициска акција, спроведена вчера против лица од Прилеп, Битола и од Арачиново.

– Јавноста вчера беше сведок дека уште еден лик од подземјето, близок пријател на аболираниот криминалец Зоран Заев, бил инволвиран во нелегална трговија со дрога. Истиот тој честопати е во придружба на Зоран Заев и се фотографира со него, а според информациите кои беа објавени, тој е брат на првиот човек на СДСМ во Арачиново. Има ли поголем доказ за тоа на кој начин работи и се финансира криминогеното раководство на СДСМ – рече денеска на прес-конференција Орце Ѓорѓиевски од ВМРО-ДПМНЕ.

Од партијата велат дека ова „не е прв случај најблиските соработници на Заев да бидат фатени за криминалот што го прават“.

– Близок пријател на Зоран Заев е Сеад Рахиќ – Сетко, уапсен од полицијата за организирање на криминална група за продажба на кокаин во Скопје. Соработник на Зоран Заев е Захир Бекири – Чауш кој беше раководител на т.н. „Фабрика за афери“ на СДСМ. Зоран Заев соработува и со Харун Хаџибулиќ, кој е познат припадник на скопското криминално подземје. Соработници на Зоран Заев се и Даниел и Дејан Трајковски кои во скопското криминално подземје се познати како близнаците од Ѓорче Петров. Сето ова укажува за начинот на кој работи аболираниот криминалец Зоран Заев и криминогеното раководство на СДСМ – изјави Ѓорѓиевски.


Јакимовски ја задолжил Општина Карпош за 10,5 милиони евра, обвини СДСМ


Скопје, 18 март, 2017 - 13:48 (META) 

Градоначалникот на општина Карпош, Стевчо Јакимовски, и „неговите соработници од ВМРО-ДПМНЕ“ ја задолжиле Општината за 10,5 милиони евра, обвинија денеска од општинската организација на СДСМ во Карпош.

Од СДСМ велат дека официјалните извештаи на Општината и завршните сметки покажуваат дека само во 2016 година долгот се искачил за нови 5 милиони евра.

– Непознато е каде отидоа овие пари, кога изминатата година не е изграден ниту еден објект од интерес на граѓаните. Но, затоа, само за ставката „репрезентација“, Јакимовски потрошил 140.000 евра во 2015 и во 2016 година, односно по околу 20.000 денари дневно за гозби и за ручеци од џебот на граѓаните – изјави денеска на прес-конференција претседателот на општинската организација на СДСМ во Карпош, Душко Весковски.

Весковски истакна дека од планираните 300 милиони денари за улици и за патишта, потрошени биле само 68 милиони денари, поради што жителите на Карпош имаат „раскопани и непроодни улици и тротоари, кои служат само за паркирање автомобили“. Тој порача дека по новата реформска влада, доаѓа и нова локална власт во општина Карпош.


ВМРО-ДПМНЕ: Единственото решение се нови предвремени парламентарни избори


Скопје, 6 март, 2017 - 10:34 (META) 

ВМРО-ДПМНЕ денеска, во редовното утринско соопштение, „цитира“ точки од платформата на Албанците кои, според партијата, „се прифатени од страна на Зоран Заев“.

– „Усвојување заедничка и обврзувачка резолуција во Собранието на Република Македонија со која владата на Република Македонија се обврзува активно да се вклучи во процесот за решавање на спорот со името“. „Вклучување на Албанците во работната група за директни преговори со Грција“. „Брза интеграција во НАТО и во Европската Унија – Исполнувањето на горенаведените точки ќе го деблокира патот на Македонија кон целосна интеграција во НАТО и отворање на преговорите за членство во Европската Унија“  – се набројува во партиското соопштение.

На изборите, според партијата, граѓаните гласале за ВМРО-ДПМНЕ, а не за „Тиранската платформа“.

– Недозволиво е тиранска платформа да стане услов за формирање влада во Република Македонија. Таа влада би била тиранска влада. Зоран Заев и СДСМ немаат проблем да го свиткаат ’рбетот, да го прогласат албанскиот јазик и неговото писмо за официјален државен јазик, заедно со македонскиот и со неговото кирилско писмо. Зоран Заев и СДСМ немаат проблем да ги променат името на државата, химната, знамето, банкнотите, униформите, написите – велат од ВМРО-ДПМНЕ.

Од партијата го повторуваат ставот дека единственото решение и одговор на сите прашања „ќе може да се добијат на нови предвремени парламентарни избори, отфрлајќи секакви платформи од туѓи држави“.


Трамп го обвини Обама дека го прислушувал пред изборите


Вашингтон, 4 март, 2017 - 15:49 (META) 

Претседателот на САД, Доналд Трамп, денеска го обвини својот претходник, Барак Обама, дека го прислушувал пред претседателските избори, кои се одржаа на 8 ноември минатата година.

Трамп обвинувањата за прислушување ги изнесе во неколку пораки на својот твитер-профил, не наведувајќи детали или докази.

„Страшно. Штотуку дознав дека Обама ме прислушувал во Кулата Трамп непосредно пред мојата победа“, напиша Трамп на „Твитер“.

Тој додава дека се работи за „макартизам“, алудирајќи на потрагата по симпатизери на комунизмот во САД во 50-тите години од минатиот век.

Трамп, во друга порака го обвинува Обама дека „отишол многу ниско“ со прислушувањето за време на изборната кампања и наведува дека „ова е нов Вотергејт“.


ВМРО-ДПМНЕ: Селмани лаже дека сме поврзани со нападот на новинарите


Скопје, 1 март, 2017 - 10:08 (META) 

ВМРО-ДПМНЕ денеска го обвини претседателот на Здружението на новинари на Македонија (ЗНМ) дека „лаже и манипулира“ поврзувајќи ја партијата со нападот на новинарската екипа на „А1он“.

„Насер Селмани молчеше и се криеше додека брутално се напаѓаа новинари, а дивите орди на СДСМ и на СОРОС демолираа цели медиуми како радиото ‘Слободна Македонија’. Насер Селмани, исто како и Оливер Спасовски, цела година глумеа лудило без МВР да мрдне со мал прст и да се обиде да ги заштити новинарите на ‘Курир’, ‘Сител’, МТВ и сите оние кои не пишуваат по нарачка на СДСМ и на СОРОС“, стои во демантот на ВМРО-ДПМНЕ.

Од партијата велат дека изјавата на Селмани била „идентична со онаа испратена од штабот на Бихаќка“.

„Почесно ќе беше да се потрудеше да се избори за свое место во пратеничките редови на СДСМ, доколку има капацитет за тоа. ЗНМ и Насер Селмани, наместо здружение за заштита на новинари, прерасна во здружение за заштита на СДСМ и на СОРОС“, стои во соопштението.


Јанева и Фетаи казнeти по 2.000 евра оти судијката Михајлова ја нарекоа „фалсификатор“


Скопје, 22 февруари, 2017 - 11:52 (META) 

Судијката Татјана Михајлова денеска го прекина судското рочиште за случајот со насилствата пред Општина Центар од јуни 2013 година, во кој се обвинетите поранешниот премиер и актуелен лидер на ВМРО-ДПМНЕ, Никола Груевски, и уште 15 лица, и ги казни по 2.000 евра обвинителките на Специјалното јавно обвинителство (СЈО), Катица Јанева и Фатиме Фетаи за „елементарно непочитување на судот“.

Обвинителката Фетаи, откако не ѝ беше даден збор од Михајлова, стана и на судијката ѝ рече дека не е дојдена во судот за да види колку е убава, а потоа ја обвини Михајлова дека направила фалсификат со записникот од претходното рочиште.

– Вие во записникот од претходното рочиште сте направиле интелектуален фалсификат. Ја бараме аудиовизуелната снимка за да поведеме кривична постапка против Вас, оти Вие во записникот од 16 декември 2016 година невистинито имате наведено дека јавноста е исклучена од судницата единствено во делот кога се слушаат снимките од прислушуваните разговори, а всушност новинарите беа истерани и кога јас како обвинител на СЈО се произнесов за моите аргументи за употребливоста на „бомбите“ како доказ – рече Фетаи, додавајќи дека ќе ги повика новинарите како сводоци во кривичната постапка против Михајлова.

По ова, стана и Јанева, која ја обвини судијката дека „не знае да води записник“.

– Треба да се срамите што го носите звањето судија и в.д. претседател на Основниот суд Скопје 1 – рече Јанева.

Михајлова, по ова, го прекина судењето со образложение дека нема услови за одржување на процесот. Таа наложи во записникот да биде нотирано дека целокупниот материјал од денешното рочиште со сите списи ќе се достават до Советот на јавни обвинители, кој, како што рече, е надлежен врз СЈО.

На ова реагираше Фетаи, која рече: „Советот не е надлежен врз СЈО, Вие само продолжете да го кршите законот“.

Груевски и неговиот адвокат Никола Додевски, по излегувањето од судот, рекоа дека денешното рочиште повеќе наликувало на театар, отколку на вистинско судење.

За насилствата пред Општина Центар од јуни 2013 година и за нарачаните шлаканици за градоначалникот Андреј Жерновски, покрај Груевски, обвинети се и поранешниот министер за транспорт и врски, Миле Јанакиески, пратеничката Даниела Рангелова и уште 11 други лица.


ВМРО-ДПМНЕ: Заев го претвори СДСМ во промотор и во заштитник на криминалот


Скопје, 22 февруари, 2017 - 10:55 (META) 

ВМРО-ДПМНЕ денеска обвини дека лидерот на СДСМ, Зоран Заев, и „злосторничкото здружение во раководството на партијата“ го претвориле СДСМ во „партија на подземјето и промотор и заштитник на сè што е незаконско и криминално“.

– Заев и раководството на СДСМ се во близок контакт и соработка со криминалци како Захир Бекири-Чауш, кој им служеше за фалсификување пасоши и за банкарски налози во „Фабриките за афери“ на СДСМ, со близнаците од Ѓорче осомничени за обид за убиство и повеќекратни осуденици, братот на Јане Тица, Зоран Верушевски, јатаците на терористите во Диво Насеље и со уште многу други. Зоран Заев и неговите најблиски соработници се дружат со други криминалци и размислуваат како криминалци. Кога некој од нивните соработници ќе биде уапсен како дилер на кокаин, СДСМ им се заканува на новинарите кои известиле за апсењето на овие криминалци – стои во денешното соопштение на ВМРО-ДПМНЕ.

Од партијата велат дека Заев и СДСМ молчат и не одговараат на прашањата што ја интересираат јавноста.

– Дали аболираниот криминалец Заев знаел дека неговите соработници со години уништувале животи, земајќи ги во вителот на дрогата и дали чувствува барем морална одговорност? Дали овие криминалци биле сигурни во себе дека нема да одговараат поради тоа што СДСМ раководеше со МВР? Дали заднински овие дилери на дрога се чувани од структурите на Оливер Спасовски или, пак, Примислав Димовски? Се познавал ли притворениот Сеад Рахиќ со нив и дали му помагале?Дали Заев или некој од врвот на СДСМ имал директен бенефит земајќи пари од бизнис со дрога за поддршката и за заштитата што ѝ е давана на нарко-групата од безбедносните структури на СДСМ? – прашуваат од ВМРО-ДПМНЕ.

Оттаму додаваат дека ниту една јавна закана на Заев и на функционерите на СДСМ кон новинарите нема да го спречи излегувањето на виделина на вистината и дека местото на криминалците не им е во политиката, туку во казнено-поправниот дом „Идризово“.