Поднесено обвинение против тројца за 14-годишното девојче што абортираше


Скопје, 19 јули, 2018 - 16:20 (META) 

Основното јавно обвинителство за гонење на организиран криминал и корупција денеска до надлежен суд поднело Обвинителен акт против три лица за сторено кривично дело „трговија со дете“. Иако Обвинителството во соопштението воопшто не наведе идентитети, од прикажаните факти е јасно дека станува збор за 14-годишната штитеничка од установата „25 Мај“, која била подведувана, а потоа и беше извршен абортус.

„Обвинителството утврди дека во период од почетокот на декември 2017 година до 06.02.2018 година, во Кавадарци, Радовиш, Штип и село Мислешево, струшко, првообвинетата, со употреба на сила, сериозна закана и измама ја искористила немоќта на детето кое немало наполнето 14 години. Обвинетата за паричен или друг надоместок ја превезувала, ја продавала, ја нудела на продавање, ја засолнувала и организирала присилен брак на детето. Другите обвинети, иако знаеле дека детето е жртва на трговија со луѓе, ја искористувале и овозможувале на друг повеќекратно искористување за сексуални услуги. Како резултат за злоупотребата, детето останало бремено и било принудено да ја прекине бременоста“, образложија од Обвинителството, појаснувајќи и дека до до судот доставило предлог за продолжување на притворот на тројцата обвинети.​


Поднесено обвинението против градоначалникот на Ново Село и соучесниците


Струмица, 18 јули, 2018 - 14:16 (META) 

Основното јавно обвинителство Струмица денеска до судот доставило Обвинителен предлог против градоначалникот на општина Ново Село, Боро Стојчев, неговата сопруга, синот и двајца соучесници и ги гони за криумчарење.

Притоа, за четиримина од обвинетите е поднесен предлог за продолжување на притворот.

Обвинетите се товарат дека на 10 јули 2018 година, избегнувајќи ја царинската контрола, пренесувале цигари во голема вредност.

Првин двајца од обвинетите во селото Ново Коњарево во две теренски возила натовариле 66 картонски кутии во кои имало 32.980 кутии цигари од марката „Калипсо“. Како што соопшти полицијата на 11 јули, тоа биле градоначалникот и неговиот син. Потоа тие  заедно со уште двајца обвинети со возилата се упатиле по полскиот пат кон селото Бадилен, продолжиле кон граничниот појас помеѓу Македонија и Бугарија каде петтиот обвинет кој ги чекал, имал задача да го надгледува теренот за да извести за евентуално присуство на полицијата.

При пристигнување во местото Попина Чука, на два километри од границата, биле откриени и фатени од полициски службеници.​


Судот го прифати обвинението за настаните во Собранието од 27 април


Скопје, 22 јуни, 2018 - 14:48 (META) 

Кривичниот суд соопшти дека е прифатен обвинителниот акт поднесен од Јавното обвинителство за настаните во Собранието на 27 април минатата година.

„Советот за оценка на обвинителен акт при одделението за гонење организиран криминал и корупција на Основниот суд Скопје 1 – Скопје, постапувајќи во оценка на обвинителниот акт со КОК ООА 10/18 повезан со настаните од 27 април 2017 год. кои се случија во Собранието на Р.Македонија, одржа не јавна седница за оценка. По детелно разгледување на сите приговори поднесени од одбраната и обвинетите како и ценење на фактите и доказите приложени во обвинителниот акт донесе решение со кое го одобри обвинителниот акт во целост“, се вели во соопштението од Кривичниот суд.

Откако ќе биде формиран кривичен предмет по обвинителниот акт и согласно АКМИС системот распределен на понатамошно постапување, ќе биде закажан термин за главна расправа.

Јавното обвинителство на РМ на 27 март поднесе поднесен обвинителен акт против 30 лица во врска со настаните во Собранието од 27 април 2017 година. Дваесет и осум лица се обвинети за кривично дело „терористичко загрозување на уставниот поредок и безбедноста“, а две за помагање при вршење на истото кривично дело.


Утре ќе се знае дали ќе има судски процес за упадот во Собранието


Скопје, 21 јуни, 2018 - 16:21 (META) 

Во текот на утрешниот ден ќе биде познато дали ќе им се суди на обвинетите за насилството што се случи на 27 април 2017 година, во Собранието. Од Кривичниот суд информираат дека денеска била одржана седница за оценка на обвинителниот акт, а утре ќе биде позната одлуката.

Доколку обвинението добие позитивна оценка, тоа значи дека набрзо ќе се закаже и рочиште, по што обвинетите за тероризам ќе седнат на обвинителна клупа. Сепак Советот за оцена има право и да го врати обвинението на доработка, или да го отфрли.

За настаните на 27 април обвинети се 30 лица за тероризам и загрозување на уставниот поредок. Меѓу нив се и петте пратеници на ВМРО – ДПМНЕ, Крсто Мукоски, Љубен Аранудов, Јохан Тарчуловски, Сашо Василевски и Љупчо Димовски. Обвинет е и екс директорот на Бирото за јавна безбедност, Митко Чавков.

Минатата недела во истражниот затвор во Шутка сами се пријавија и Александар Василевски – Нинџа, Никола Митревски Кољо и Митре Питроповски. Потерница има и за Дејан Давидовски.


Обвинетиот за обидот за убиство на Села – Тошта му се слоши во судница


Скопје, 6 јуни, 2018 - 12:49 (META) 

Обвинетиот Александар Јаневски Тошта се струполи на подот од судницата во Основниот суд Скопје 1 на рочиштето за случајот за обидот за убиство на Зијадин Села.

Откако обвинителот го повлече обвинението за еден обвинет, а за двајца направи преквалификација на делото од убиство во насилство, го прочита изменетото обвинението во кое останатите седум обвинети се товарат за обид за убиство, меѓу кои и Тошта.

Тошта побара збор и бурно реагираше.

– Зошто да ми се суди за убиство? Кој тоа од горе се јави на телефон? Зошто ми се суди, затоа што сум еден од основачите на ВМРО-ДПМНЕ? Подобро оставете кесичка тука во судница- рече Тошта.
Судијката му рече дека го предупредува на секое рочиште да не го нарушува редот во судницата и дека повеќе нема да го предупредува туку ќе го отстрани од судницата.

Во еден момент, Тошта стана и веднаш падна на подот. Неговата ќерка извик адека тој е срцев болесник.
Во судница интервенираше и Итната медицинска помош со чие возило тој веднаш беше пренесен во болница.


Сашо Сенков, обвинет за обид за убиство врз Зијадин Села, од денеска е слободен граѓанин


Скопје, 6 јуни, 2018 - 12:34 (META) 

Обвинителството го повлече обвинението за еден од обвинетите за нападот на пратеникот Зијадин Села, за време на нередите во Собранието од 27-ми април, минатата година. Како што информираат од Јавното обвинителство на Република Македонија, одлуката е донесена по анализа на нова снимка и сите досега изведени докази.

Притоа утврдено е дека Сашо Сенков не го сторил делото кое му се става на товар.

За две други лица, Ц.Ѓ. и С.П., обвинението е преквалификувано, од обид за убиство во кривично дело „насилство“. За седум од вкупно 10 лица, останува обвинението за обид за убиство.

Врз основа на дополнителните сознанија, обвинителството презема и понатамошни дејствија за целосно расветлување на настанот во поглед на оштетениот Зијадин Села.


Обвинение против 13 лица за убиството во Мала Речица


Скопје, 23 мај, 2018 - 12:11 (META) 

Основното јавно обвинителство Тетово поднесе обвинение против 13 лица за учество во вооружениот инцидент во Мала Речица, во кој на 5 април годинава беше убиен кумановецот Наип Реџепи, а двајца беа повредени.

Против четири лица е поднесен обвинителен акт со предлог за продолжување на мерката притвор, со кој едно лице се товари за убиство и за неовластено изработување, држење, посредување и тргување со оружје. Три лица се товарат за обид за убиство и за неовластено изработување, држење, посредување и тргување со оружје. Надлежен јавен обвинител до Основниот суд Тетово предложи на тројцата обвинети кои се уапсени, како и на еден обвинет кој и натаму е во бегство да им биде продолжен притворот до правосилноста на пресудата против нив.

Против останатите девет лица Основното јавно обвинителство Тетово поднесе обвинителен предлог за учество во тепачка. За осуммина обвинети е доставен предлог за определување мерки на претпазливост, додека за едно лице е предложен притвор до правосилност на пресудата, бидејќи станува збор за државјанин на Република Албанија.

„Во текот на истрагата, јавниот обвинител утврди дека обвинетите лица биле дел од две меѓусебно спротивставени групи, кои по претходен договор и заради претходна меѓусебна нетрпеливост, со возила дошле на местото на инцидентот во Мала Речица. Петмина, меѓу кои и починатото лице, биле вооружени со пиштоли, по што дошло до меѓусебна вербална расправија која прераснала во тепачка и употреба на огнено оружје. Освен пиштоли, во тепачката биле користени бејзбол палки, секира, нож и други предмети“, соопшти обвинителството.


Кривична пријава за Марјан Ристески за назначувањето директорка на Старскиот дом


Прилеп, 8 мај, 2018 - 15:22 (META) 

Основното јавно обвинителство Прилеп изготви обвинителен предлог против Марјан Ристески, претходниот градоначалник на Прилеп, товарејќи го за несовесно работење во службата. Станува збор за случајот за назначување на Ирена Стерјоска Локвенец, за директорка на Дом за стари лица „Киро Крстески Платник“, која, пак, на почетокот на годинава, заедно со Ристески, доби кривична пријава за злоупотреба на службената положба и областување. Но обвинителството сепак ја исклучило од обвинението.

Според обвинителниот предлог, Ристески несовесно постапувал во вршењето на своите овластувања и должности, со тоа што по објавената одлука од страна на Управниот одбор на ЈОУ Дом за стари лица „Киро Крстески Платник“ од Прилеп и распишаниот јавен конкурс за избор на директор на јавната установа, во кој како посебен услов било предвидено работно искуство од 4 години по дипломирањето, донел решение со кое за директор ја избрал кандидатката која во времето на изборот имала работно искуство од 2 години и 6 месеци.

Обвинителството истовремено решило да ја отфрли кривичната пријава против поранешната директорка Ирена Стерјоска Локвенец, поднесено од новото раководство на Домот „Киро Крстески Платник“, кое ја товареше дека направила злоупотреба на службената положба и областување директорувајќи по незаконска одлука на Ристески.

„Надлежен јавен обвинител утврди дека пријавеното дело не е кривично дело кое се гони по службена должност. Имено, во конкретниот случај не произлезе дека осомничената на некаков начин ја искористила својата службена положба или овластување, дека ги пречекорила границите на своето службено овластување, па со тоа за себе или за друг да предизвикала некаква корист или на друг да му предизвикала некаква штета, ниту пак ова кривично дело е сторено при вршење јавни набавки или пак на штета на Буџетот на РМ. Надлежниот јавен обвинител утврди дека незаконските дејствија со изборот на осомничената за директор иако таа не го исполнувала посебниот услов наведен во јавниот конкурс ги сторил оној кој го извршил изборот“, соопштија од Основно јавно обвинителство – Прилеп.


Судот ги врати во притвор Чавков и уште четворица обвинети за упадот во Собранието


Скопје, 28 март, 2018 - 9:32 (META) 

Митко Чавков, поранешниот директор на Бирото за јавна безбедност во времето на крвавите настани во Собранието, Горан Ѓошевски, од обезбедувањето на поранешниот спикер Трајко Вељановски, Душко Лазаров и Оливер Поповски од МВР и Мунир Пепиќ од Агенцијата за разузнавање синоќа повторно се приведени, и се пренесени во Истражниот затвор Шутка.

Кривичниот совет делумно го прифатил барањето на Обвинителството за организиран криминал и корупција кое вчера поднесе обвинение против 30 лица за насилствата во Собранието од 27 април лани и притоа побара и враќање на мерките притвор и куќен притвор за обвинетите.

На Чавков и останатите четворица обвинети определен им е 30 дневен притвор иако тие завчера по одлука на Врховниот суд беа пуштени во куќен притвор поради упадот во Собранието на 27 април минатата година при што беа повредени повеќе пратеници, новинари и граѓани.

Според обвинението кое го покрена Обвинителството вчера, 28 лица се товарат за терористичко загрозување на Уставниот поредок и безбедноста, а две лица се товарат за помагање за истото кривично дело.

Од ВМРО-ДПМНЕ на повторното притворување реагираа дека „тортурата и изживувањето на Зоран Заев и власта со притворените патриоти ги надмина сите граници“.

„Судот мора да пронајде сила и да се ослободи од стегите на власта и да суди во корист на правото. Сите граѓани мора да бидат еднакви пред законот. Обвинителството мора да ги гони вистинските криминалци во Македонија од кои дел се наоѓаат на Илинденска број 2, наместо да ги гони патриотите и уставобранителите“, соопштија од ВМРО-ДПМНЕ од каде рашуваат и што се сменило во однос на околностите поради кои беше преиначен притворот.


ОЈО поднесе обвинение против 30 лица за упадот во Собрание на 27 април


Скопје, 27 март, 2018 - 13:34 (META) 

Обвинителството поднесе обвинение против 30 лица за настаните кои се случија на 27 април кога беше извршен упад во Собранието и беа нападнати пратеници, новинари и собраниски службеници.

Од вкупно 35 осомничени, обвинението е поднесено против 30 лица, од нив 28 се обвинети за терористичко загрозување на уставниот поредок и безбедноста, а двајца се обвинети за помагање при вршење на ова кривично дело.

За четири лица постапката е прекината, бидејќи не се достапни за органите на прогонот, но по нивно пронаоѓање постапката ќе продолжи. Исто така, за едно лице, односно за пратеничката Жаклина Пешевска, постапката е запрена бидејќи немало докази дека сторила кривично дело.

Јавниот обвинител, Љубомир Јовевски рече дека обвинетите го загрозиле уставниот поредок со насилство и создале чувство на несигурност и страв.

-Опсежната истрага утврди дека обвинетите дејствувале со иста цел извршувајќи усогласени дејствија – рече Јовевски.

Според обвинението, обвинетите го загрозиле животот на пратениците, новинарите и на вработените кои во тој момент биле во законодавниот дом.