ОБСЕ: Скопје и Атина постигнаа историски договор


Виена, 14 јуни, 2018 - 9:42 (META) 

Претседавачот на ОБСЕ, италијанскиот министер за надворешни работи Енцо Моаверо Миланези, и генералниот секретар, Томас Гремингер, го поздравија договорот меѓу Скопје и Атина за решавање на спорот за името.

Тие во соопштенијата наведуваат дека договорот е чекор напред кон јакнење на регионалната стабилност.

– Им честитам на премиерите Зоран Заев и Алексис Ципрас за нивното лидерство и посветеност на овој процес кој е многу важен за двете земји, за Југоисточна Европа и за Европа во целост – вели Моаверо, додавајќи оти ова е единствена можност што мора да се искористи.

Гремингер, пак, го нагласува значењето на дијалогот и компромисот во овој процес.

– Овој историски договор може да доведе до долгорочно решение во корист на сите граѓани и на целиот регион – наведува генералниот секретар на ОБСЕ.


Манчевски: Владата сака независна МРТ и професионални регулаторни тела


Скопје, 11 мај, 2018 - 15:24 (META) 

Владата се залага за создавање медиумски простор за непристрасно и објективно информирање на граѓаните. Наша цел е МРТ да биде целосно непристрасен и независен медиум, а регулаторните тела да бидат транспарентни, професионални и компетентни. Особено е важно во регулаторните тела и националниот радиодифузер да не членуваат високи партиски функционери, поранешни пратеници, кандидати за градоначалници и роднини на партиски функционери, како што е тоа сега. Регулаторните тела и МРТ треба да се остават на медиумските работници. Медиумите треба да се остават на медиумските работници, порача денеска министерот за информатичко општество и администрација Дамјан Манчевски.

Тој се обрати на завршниот панел на Петтата конференција за медиуми на Југоисточна Европа, што изминатите два дена се одржуваше во Струга, во организација на Канцеларијата на претставникот за слобода на медиумите на ОБСЕ, Арлем Дезир со поддршка на теренските операции на ОБСЕ во Југоисточна Европа.

Манчевски се осврна на измените на Законот за АВМУ, за кој рече дека дава шанса политичарите да ги тргнат рацете од медиумите и ја повика опозицијата да овозможи чистење на сферата од партиските влијанија.

– Во моментот Законот е во Собраниска процедура. Јас се уште искрено сакам да верувам дека колегите од опозицијата ќе ја увидат потребата од што поскоро носење на овој закон. Но, за жал тоа по се изгледа не е така. Токму вчера бевме сведоци на амандманска расправа во Комисијата за транспорт и врски во Собранието, каде пратениците од опозицијата беа против јавно претставување на кандидатите за членови на Советот на АВМУ и Програмскиот совет на МРТВ. Да се биде против транспарентност и јавност во изборот на независни регулаторни тела, е да се биде против демократските вредности и слободата на медиуми. Тоа нема да го дозволиме. Никогаш повеќе нема да дозволиме политичарите да се пазарат зад затворени врати, а граѓаните да дознаваат за одлуките, откако тие веќе ќе бидат донесени. Се надевам дека и опозицијата ќе го сфати тоа – информираше министерот Манчевски.

Во својот завршен говор министерот Манчевски, даде осврт на дигитализацијата и слободата на говор, како и на глобалниот проблем со „лажните вести“. Како што рече тој, не смее повеќе да се дозволи меѓународната заедница да ги исправа работите, туку треба медиумската дејност да се остави на професионалците.

– Медиумите и медиумските работници се тие кои треба да бидат мотор на промените. Не смееме да се доведеме во состојба каде поради нарушените медиумски слободи, политичарите, партиите или меѓународната заедница да интервенира, како што беше тоа случај изминатите 2-3 години. Доброто владеење и слободата на медиумите се меѓусебно зависни. Само кога новинарите ќе добијат простор да работат слободно, да набљудуваат, да поставуваат прашања и да известуваат, без страв од притисоци и закани, само тогаш сите граѓани можат да бидат сигурни дека носителите на одлуки ќе се придржуваат до највисоките стандарди – заклучи министерот за информатичко општество и администрација.
 
foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Османи ѝ се заблагодари на амбасадорка на ОБСЕ за придонесот во развојот на демократијата


Скопје, 3 април, 2018 - 13:26 (META) 

Вицепремиерот задолжен за европски прашања, Бујар Османи, оствари средба со амбасадорката на ОБСЕ, Нина Суомалаинен, по повод завршувањето на нејзиниот мандат и нејзиното заминување.

Како што информираат од неговиот кабинет, вицепремиерот изразил огромна благодарност за нејзиниот личен ангажман, како и за поддршката за време на мандатот како амбасадор на Мисијата на ОБСЕ во нашата земја.

-Мисијата на ОБСЕ имаше важна улога во надминувањето на многуте предизвици изминатиов период, особено во делот на изборните реформи, но и севкупно, во имплементацијата на принципот на владеење на правото – истакнал Османи притоа додавајќи дека поддршката на ОБСЕ уште од самите почетоци на демократскиот развој на Македонија претставува нераскинлив дел од изградбата на демократското општество.

За време на разговорот соговорниците размениле податоци за поддршката и помошта што Мисијата на ОБСЕ во Скопје ја обезбедува за Македонија во насока на исполнување на реформите и во другите области, како што се судството, медиумите, граѓанскиот сектори итн. Тие изразиле задоволство од досегашната соработка и заеднички изразиле надеж дека поддршката и соработката меѓу ОБСЕ и Владата на Република Македонија ќе продолжи и во иднина.


ОБСЕ загрижен за безбедноста на новинарите во Косово


Приштина, 28 март, 2018 - 10:29 (META) 

Претставникот на ОБСЕ за слобода на медиуми, Харлем Дезир, и шефот на мисијата на ОБСЕ во Приштина, Јан Брату, изразија длабока загриженост за безбедноста на новинарите кои известувале за интервенцијата на полицијата во северниот дел на Косовска Митровица, кога беше уапсен директорот на српската Канцеларија за Косово и Метохија Марко Ѓуриќ.

За време на полициската операција на 26 март, повредени се петмина новинари, а уништена е медиумска опрема, се наведува во соопштението на ОБСЕ.

– Длабоко сум загрижен поради нападите на тие новинари. Неопходно е на медиумските работници да им се овозможи да ја работат својата работа слободно, без страв за својата безбедност – изјави Дезир.


Димитров утре во Рим на конференција за борба против антисемитизмот


Скопје, 28 јануари, 2018 - 13:35 (META) 

Министерот за надворешни работи, Никола Димитров утре во Рим ќе учествува на меѓународната конференција за одговорност на државите, институциите и поединците во борбата против антисемитизмот во регионот на ОБСЕ, соопштија од МНР.

Конференцијата е организирана во рамките на италијанското претседавање со Организацијата за безбедност и соработка во Европа.

„Министерот Димитров ќе има свое излагање на конференцијата во кое ќе се осврне на значењето и улогата на еврејската заедница во Република Македонија и активностите кои ги презема Република Македонија во справувањето со кривичните дела мотивирани од омраза и борбата против антисемитизмот“, стои во соопштението на МНР.


Мисијата на ОБСЕ на Косово го осуди убиството на Оливер Ивановиќ


Приштина, 16 јануари, 2018 - 13:07 (META) 

Шефот на мисијата на ОБСЕ на Косово, амбасадорот Јан Брату го осуди убиството на Оливер Ивановиќ, еден од лидерите на косовските Срби, и ги повика правосудните органи да направата сè што е во нивна можност да ги изведат извршителите пред лицето на правдата.

Брату изјави дека Ивановиќ речиси две децении бил еден од најистакнатите претставници на косовските Срби, кој неуморно се ангажирал во корист на својата заедница.

– Да се види дека еден политичар може да биде ладнокрвно убиен во 2018 година на Косово е страшна помисла. На најстрог можен начин го осудувам овој гнасен чин и ги повикувам органите за спроведуавње на законот, но и сите актери, да направат се што е можно извршителите да се изведат пред лицето на правдата. Ова ќе биде голем тест за владеењето на правото на Косово – изјави Брату.

Убиството на Ивановиќ, кој утрово беше застрелан со огнено оружје пред неговата канцеларија во Северна Митровица, го осуди и косовската влада и претседателот на Косово, Хашим Тачи.

Тој ги повика надлежните органи што побрзо да ги расветлат околностите на убиството и да ги изведат извршителите пред лицето на правдата.


Димитров утре и задутре во Виена на министерски совет на ОБСЕ


Скопје, 6 декември, 2017 - 13:05 (META) 

Министерот за надворешни работи, Никола Димитров, ќе ја предводи македонската делегација на 24. Министерски совет на Организацијата за безбедност и соработка во Европа (ОБСЕ), кој ќе се одржи на 7 и 8 декември во Виена.

Димитров ќе има обраќање на Министерскиот совет, на кој ќе ги претстави ставовите на Република Македонија.

„На Министерскиот совет, министрите за надворешни работи ќе разменат мислења за активностите на Организацијата во изминатиот едногодишен период, во рамки на австриското претседавање со ОБСЕ. Воедно, се очекува да се усвојат и поголем број одлуки кои се во доменот на надлежностите на ОБСЕ, односно кои се однесуваат на неговите три димензии: политичко-воената, економско-еколошката и хуманата димензија“, велат од МНР.


Програмите на МРТ на јазиците на националностите едвај составуваат крај со крај


Скопје, 27 ноември, 2017 - 13:46 (META) 

„Ромската редакција во МТВ има само еден човек, за програмата на српски јазик ангажирани се еден или двајца. Вработените во редакциите на помалите етнички заедници и во телевизијата и во радиото на јавниот радиодифузен сервис честопати работат во руинирани простории, без доволно столчиња и бироа, а тешко доаѓаат до техника и камери. Се чувствуваат изолирани и другите, а демотивирани се и од тоа што последните вработувања се случиле пред 10 и 15 години, а голем дел од вработените во овие редакции се блиску до возраста за пензионирање“, беше кажано на денешната тркалезна маса во Скопје, организирана од ОБСЕ.

На настанот посветен на зајакнување на капацитетот на редакциите на јазиците на заедниците во јавниот радиодифузен сервис, препораки за реформирање на редакциите на помалите јазици кои ќе треба да функционираат во рамките на новиот четврти канал на МРТ, даде Џонатан Стоунмен, медиумски експерт и поранешен долгогодишен новинар на „Би-би-си“.

Тој рече дека се фрапирал од некои работи што ги видел или ги слушнал во разговорите со вработените во редакциите на помалите јазици и препорача итна обука на вработените за користење на социјалните мрежи и за промовирање и за емитување на содржините, но и за контакт со публиката и за утврдување на нивните интереси.

Стоунмен препорача и да се почне со користење на паметни телефони и мали камери кои може веднаш да емитуваат, како и вработените да се обучат за нивно користење, а посочи дека е потребна и добра безжична мрежа за да може новинарите и другите вработени да функционираат нормално, оти, како што рече, се фрапирал кога видел дека на вработените некогаш им се потребни по 10 минути да се конектираат за да може да пишуваат или да внесат материјали.

Медиумскиот експерт препорача кога ќе се формира четвртиот канал на МТВ, како и тој на Македонското радио, сите редакции да бидат под еден раководител кому ќе може да му се обраќаат за проблемите, но и да бидат во заеднички простории. Стоунмен рече дека е неопходно да почне и титлување на програмите на други јазици, за да се олесни запознавањето на различните јазични заедници за да може да дојде до поголемо зближување.

На почетокот на тркалезната маса, говореа и заменик-шефот на Мисијата на ОБСЕ во Скопје, Џефри Голдстајн, и министрите Дамјан Манчевски и Роберт Поповски, кои порачаа дека намерите и на ОБСЕ и на македонската влада се за стимулирање на мултикултурноста во земјава, за што се потребни уште реформи и напори. Но, како што рекоа министрите, реформите во МРТ ќе одат бавно, поради недостигот на пари во државата. Сепак, беше нагласено дека Владата има искрена определба да прави реформи и во јавниот радиодифузен сервис, не поради притисоци, туку затоа што нејзина изворна определба се слободата на изразувањето и негувањето на мултикултурноста.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Сите да работат за враќање на довербата во институциите, вели генералниот секретар на ОБСЕ


Скопје, 18 ноември, 2017 - 10:35 (META) 

Успешното надминување на политичката криза и тековните напори за спроведување на владината реформска агенда нудат единствена можност за напредок, рече генералниот секретар на ОБСЕ, Томас Гремингер, по завршувањето на неговата дводневна посета на Скопје.

– Сите чинители треба да ги здружат силите во зајакнувањето на демократските процеси и во враќањето на довербата во институциите во земјата, воспоставувајќи ефективни механизми за контрола – рече Гремингер.

Тој ја истакна потребата да се работи на долгорочните структурни реформи во областите како што се владеењето на правото, слободата на медиумите, демократското владеење, полицијата и безбедносниот сектор.

Гремингер ги охрабри понатамошните чекори за градење кохезивно општество и продолжување на спроведувањето на Охридскиот рамковен договор. Тој, исто така, ги поздрави напорите за зацврстување на добрососедските односи, вклучително и потпишувањето на Договорот за пријателство со Бугарија.


Селмани: Владата сака да ја игра улогата на главен уредник на медиумите


Скопје, 17 ноември, 2017 - 14:01 (META) 

За Здружението на новинарите на Македонија (ЗНМ) е апсолутно неприфатлива идејата на Владата таа да ја регулира медиумската содржина, истакнал претседателот на ЗНМ, Насер Селмани, на средбата со новиот генерален секретар на ОБСЕ, Томас Гремингер, кој е во посета на земјава, а на која учествувале претставници на пет граѓански организации.

„Тоа е во спротивност со најдобрите практики во европските демократии“, рекол Селмани и нагласил дека наметнувањето парични казни за начинот на известување на новинарите покажува дека Владата сака да ја игра улогата на главен и одговорен уредник на медиумите.

Според Селмани, Владата досега не покажала желба за вистинска дебата со аргументи околу моделот за финансирање на „Македонската радио-телевизија“ (МРТ).

„Ако Владата однапред знае дека за МРТ треба да се одвојат само 0,7 отсто од буџетот на државата, тогаш за што служи дебатата за законот“, запрашал Селмани, се наведува во соопштението за средбата.

Претседателот на ЗНМ на средбата со Гремингер посочил и дека во Македонија постои јасна тенденција за неказнивост на насилството врз новинарите затоа што ниту еден насилник не е изведен пред лицето на правдата.

Тој изразил разочарување што пред две недели полицијата приведе двајца новинари во полициска станица за наводно снимање судии на објавувањето на пресудите за случајот „Диво Насеље“, а во суштина ги испрашувале за снимање на полицијата пред судската зграда.

„Тоа е апсолутно неприфатлива практика“, истакнал Селмани и додал дека полицијата сè уште ги третира новинарите како опасни луѓе на кои не треба да им се верува.

Генералниот секретар на ОБСЕ, Гремингер, ги запознал претставниците на граѓанските организации со целите на неговата посета на земјава, односно да се запознае со агендата за реформи на Владата.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.