!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

АВМУ ги обжалила казните за изборни прекршоци на радиодифузерите како „недоволни“


Скопје, 9 ноември, 2017 - 16:25 (META) 

Во извештајот на ОБСЕ и ОДИХР од 29 октомври 2017 година се вели дека Основниот суд донел одлуки во два случаи од првиот изборен круг, пресудувајќи казни пониски од пропишаните во Изборниот законик (ИЗ) за прекршување на изборениот молк и неизбалансирано известување.

Во првичните наоди и заклучоци на ОБСЕ и ОДИХР се вели дека иако ИЗ пропишува парична казна од 8.000 евра и 4.000 евра за вакви прекршоци, биле пресудени казни од само 4.500 евра, односно 2.250 евра.

Агенцијата за аудио и аудио-визуелни медиумски услуги (ААВМУ) поведе две прекршочни постапки против некои радиодифузери во тек на вториот круг. Случаите за однесуваат на кршење на одредбите од ИЗ за лимитите за платено политичко рекламирање и за неизбалансирано известување. Основниот суд донесе одлуки во два случаи од првиот круг, пресудувајќи казни пониски од пропишаните во ИЗ. Обете беа обжалени од ААВМУ врз основа на недоволноста на казните. Судовите допрва треба да решаваат за ова во жалбена постапка.

Зоран Трајчевски, директорот на ААВМУ, ги потврдува овие наводи, но вели дека не станува збор само за две обжалени постапки, туку дека ААВМУ „ги обжалила сите одлуки на судот“.

Трајчевски укажа и на некои чудни образложенија на судот за ниските казни, односно дека „една телевизија имала дури 17 казни, па затоа и е пресудена пониска казна“.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


ОБСЕ/ОДИХР: Изборите беа демократски, не забележавме случаи на насилство


Скопје, 30 октомври, 2017 - 16:25 (META) 

Вториот круг од локалните избори се одвиваше во натпреварувачки дух и почитувањето на темелните слободи придонесе за спроведување на демократски избори, заклучи набљудувачката мисија на ОБСЕ/ОДИХР во прелиминарниот извештај за локалните избори што се одржаа вчера.

– Законската рамка претставува солидна основа за спроведување демократски избори. Иако повеќето одредби од Изборниот законик се применуваа и во вториот круг, законот нејасно регулира некои аспекти – рече Гловер, додавајќи дека законот не предвидува ажурирање на избирачкиот список меѓу двата круга, што фактички ги лиши од можноста да го остварат правото на глас гласачите кои наполниле 18 години во тој период.

Гловер рече дека ДИК ја подобрила транспарентноста меѓу двата круга, но истакна дека Комисијата недоволно се подготвила, односно дека не направила дополнителни обуки за избирачките комисии и за гласачите и не го подобрила пребројувањето на гласовите. Таа забележа дека ДИК го пробила рокот од 48 часа за расправање по поднесените приговори, а при одлучувањето е забележан барем еден случај на политичка пристрасност.

Во однос на медиумското покривање и на бесплатното рекламирање, Гловер рече дека и јавниот сервис МТВ и приватните медиуми известувале балансирано, но дека партиите воделе кампања со негативен тон, особено ВМРО-ДПМНЕ.

Во однос на поддршката што премиерот Зоран Заев ја дал на ДУИ, Гловер рече дека не е проблематично тоа што СДСМ и ДУИ се во коалиција, туку изјавата на премиерот дека ако победат, ќе ја имаат поддршката од централната власт.

Прашана како ги коментира обвинувањата на лидерот на ВМРО-ДПМНЕ, Никола Груевски, за изборни нерегуларности и насилства, Гловер рече дека ако партијата смета дека имало насилство, истото треба да го пријави до надлежните институции и во полицијата, а доколку бил нарушен изборниот процес – до соодветните институции задолжени за регулирање и за спроведување на изборите.

– Тоа се обвинувања, но нашите краткорочни и долгорочни набљудувачи и ние не забележавме никакво насилство. Забележавме обиди за поткуп, за фотографирање на гласачки ливчиња, семејно гласање и полицијата веќе реагира на тоа, но немаме докази за насилства. Ние не работиме според обвинувања, туку според докази. Од фотографиите што сами ги пронајдовме, значи не ни беа доставени, не може да се утврди што точно се случува. Тука сме како набљудувачи, а не како изборна полиција. Ние не можеме да се мешаме во изборниот процес – рече Гловер, додавајќи дека конечниот извештај за изборните во Македонија ќе биде објавен за два месеци.


ОБСЕ/ОДИХР во 15 часот ќе ги соопшти првичните оценки за вториот круг од изборите


Скопје, 30 октомври, 2017 - 10:30 (META) 

Набљудувачката мисија на Канцеларијата за демократски институции и човекови права (ОБСЕ/ОДИХР) денеска во 15 часот ќе ги претстави првичните постизборни оценки за вториот круг од локалните избори.

Наодите и заклучоците за изборниот процес ќе ги претстави амбасадорката Одри Гловер, шефица на набљудувачката мисија на ОДИХР.

Набљудувачкиот тим на ОБСЕ/ОДИХР кој ги следеше изборите беше составен од 126 набљудувачи од 26 земји – 17 изборни експерти во главниот град, како и 17 долгорочни и 88 краткорочни набљудувачи распоредени низ целата држава.


Ѓорчев: Извештајот на ОБСЕ/ОДИХР е замижување за сите нерегуларности


Скопје, 18 октомври, 2017 - 16:07 (META) 

Извештајот на ОБСЕ/ОДИХР е необјективен и не ја одразува фактичката состојба на изборниот процес, вклучувајќи го и денот на гласањето, изјави денеска на прес-конференција Влатко Ѓорчев од ВМРО-ДПМНЕ.

– Извештајот на ОБСЕ/ОДИХР повеќе е замижување и перење на сите нерегуларности, отколку изнесување на виделина и прецизно посочување на одговорните за очигледните нарушувања. Во најмала рака е неодговорно и некредибилно во фуснота да се сокрие убиство на учесник во изборниот процес, дејство кое само по себе фрла огромна дамка на изборите – вели Ѓорчев.

Тој наведува дека настапите на ВМРО-ДПМНЕ и на СДСМ на митинзите не биле слични како што се наведува во извештајот, туку дека настапите на ВМРО-ДПМНЕ биле афирмативни, а на СДСМ исполнети со навреди, закани и со омаловажувања дури и кон граѓаните.

Ѓорчев нагласува дека имало поткуп на гласачи со тарифа од 50 до 100 евра, недостиг од гласачки ливчиња, пронајдени гласачки ливчиња од една во друга општина со заокружени имиња на кандидати, кои, според него, се потврда за организирано лажирање на изборниот процес од страна на власта на СДСМ.

– Заплашувањата со различни суптилни методи беа упатувани не само до неутрални гласачи, туку и до активисти, а дел и до претседатели на месните комитети на ВМРО-ДПМНЕ за нивно пасивизирање доколку сакаат да одбегнат непријатности од новата власт на СДС – додаде Ѓорчев.

Тој информираше дека ВМРО-ДПМНЕ до ДИК поднела 43 приговори за 94 избирачки места, кои се однесуваат на неспроведување на гласањето, односно на изборниот процес во согласност со изборниот законик, регистрирано семејно гласање, притисок врз гласачите и организирано носење на гласачките места.


ВМРО-ДПМНЕ без реакција на извештајот на ОБСЕ/ОДИХР


Скопје, 17 октомври, 2017 - 12:11 (META) 

ВМРО-ДПМНЕ ја кажа својата оценка за изборниот процес, а дали и колку се совпаѓа таа со извештајот на ОБСЕ/ОДИХР за изборите, не знам…, одговори Иво Котевски, портпаролот на ВМРО-ДПМНЕ, на прашање од „Мета“ дали партијата ќе има реакција на вчерашната оценка за телото на ОБСЕ што ги следи изборните процеси. Инаку, ОБСЕ/ОДИХР зборуваше за напредок во спроведувањето на изборите.

– Иако процесот сè уште не е завршен, на овие избори се виде напредок во демократскиот процес на оваа земја и довербата на гласачот во изборниот процес се зголемува. Се надеваме дека ова ќе продолжи и во вториот круг – изјави вчера амбасадорката Одри Гловер, шеф на мисијата за набљудување на изборите на ОБСЕ/ОДИХР.

Го прашавме Котевски дали највисоките партиски тела, односно извршниот и централниот комитет на ВМРО-ДПМНЕ ќе заседаваат наскоро, бидејќи партискиот лидер Никола Груевски неколку часа по завршувањето на првиот круг гласање обвини за недемократска атмосфера, нефер услови и за злоупотреби, а најави дека за изборниот пораз ќе се расправа наскоро во рамките на ВМРО-ДПМНЕ. Котевски појасни дека медиумите ќе бидат информирани кога ќе има седници на телата.

Инаку, во првото соопштение што ВМРО-ДПМНЕ го испрати до медиумите во последните 36 часа, се вели дека насилствата продолжуваат и по изборите, реагирајќи за нападот врз претседателот на ГРОМ, Стевчо Јакимовски, и за уште два инцидента.


ЕУ: Новоизбраните градоначалници да придонесат за реформите


Скопје, 17 октомври, 2017 - 12:03 (META) 

Локалните избори што се одржаа на 15 октомври беа спроведени во натпреварувачка атмосфера, стои во соопштението на Делегацијата на Европската Унија во Скопје, во врска со изборите.

Во оценката на изборниот процес, ЕУ се повикува на првичниот извештај на Мисијата на ОБСЕ/ОДИХР и ги повикуваат властите во земјава ефективно да ги разгледаат препораките што ќе бидат испорачани од ОБСЕ/ОДИХР.

„Оценката на ОБСЕ/ОДИХР е дека локалните избори придонесоа за зајакнување на довербата во демократскиот процес и дека фундаменталните слободи на собир и на изразување беа целосно почитувани. Сепак, одредени веродостојни наводи за повреди на процесот беа нотирани во предизборниот период. Властите треба ефективно да ги разгледаат и да ги адресираат претстојните препораки на ОБСЕ/ОДИХР. Европската Унија е подготвена да помогне во овој процес. Земјата треба да го подготви вториот круг од изборите во дел од општините на 29 октомври и сите политички претставници треба да дејствуваат одговорно, а институциите да обезбедат услови за веродостоен и транспарентен изборен процес“, стои во соопштението.

Европската Унија ги охрабрува новоизбраните членови на локалните органи да придонесат во напредокот на реформската агенда што ќе ја приближи земјата кон ЕУ и додава дека Унијата ќе продолжи да ја поддржува земјата во реформскиот процес.


ДИК ќе расправа за забелешката од ОБСЕ/ОДИХР дека била нетранспарентна


Скопје, 17 октомври, 2017 - 11:34 (META) 

Државната изборна комисија на седница ќе го разгледа извештајот на ОБСЕ/ОДИХР за локалните избори одржани во неделата, на 15 октомври, и потоа ќе даде свој став.

Портпаролката на ДИК, Љупка Гугучевска, за „Мета“ вели дека практика на ДИК е да ги разгледува забелешките упатени за локалните избори, а потоа да излезе со свој став и со коментари.

Набљудувачката мисија на ОБСЕ/ОДИХР во извештајот за локалните избори ја истакнаа нетранспарентноста на ДИК при носењето на одредени одлуки, кои, како што рекоа, биле донесени зад затворени врати, а потоа не сите од нив биле објавени на интернет-страницата на Комисијата.

„Седниците на ДИК беа отворени за набљудувачите, па сепак често материјални одлуки се донесуваа на затворени состаноци. Објавувањето на записниците од седниците беше задоцнето, а не сите одлуки, регулатива и упатства на ДИК се достапни на нејзината веб-страница. Покрај ова, дискусиите на ДИК за политички спорните прашања и непотребното вклучување во оперативната работа на нејзиниот секретаријат повремено резултираа со пропуштени рокови. Тие, исто така, ја задоцнија сеопфатната кампања на ДИК за едукација на гласачите“, се вели во извештајот на набљудувачката мисија.

Според ОБСЕ/ОДИХР, на овие избори не е испочитуван родовиот баланс, особено кај кандидатите за градоначалници. Тие посочуваат дека и покрај ваквата правна обврска, ДИК прифаќала советнички листи кои исто така не биле родово избалансирани.


ОБСЕ/ОДИХР: Изборите минаа во согласност со меѓународните стандарди


Скопје, 16 октомври, 2017 - 16:11 (META) 

Вчерашните избори минаа во согласност со меѓународните стандарди и продонесоа за зајакнување на довербата во демократскиот процес, заклучија меѓународните набљудувачи преводени од ОБСЕ/ОДИХР и од делегацијата од Конгресот на локални и регионални власти при Советот на Европа.

– Иако процесот сè уште не е завршен, на овие избори се виде напредок во демократскиот процес на оваа земја и довербата на гласачот во изборниот процес се зголемува. Се надеваме дека ова ќе продолжи и во вториот круг – изјави амбасадорката Одри Гловер, шеф на мисијата за набљудување на изборите на ОБСЕ/ОДИХР.

Таа рече дека законската рамка претставува солидна основа за одржување на фер и демократски избори, доколку се почитува пропишаното. Набљудувачите констатирале дека кампањата се одвивала мирно, иако биле регистрирани вербални напади од една политичка партија и еден насилен инцидент.

Од ОБСЕ истакнуваат дека сепак е потребно унапредување на самиот изборен систем и примена на препораките дадени од канцеларијата на ОБСЕ и од Советот на Европа од претходните избори.

Како недостаток ја истакнаа нетранспарентноста на Државната изборна комисија (ДИК) при носење на одредени одлуки, кои, како што рекоа, биле донесени зад затворени врати, а потоа не сите од нив биле објавени на интернет-страницата на Комисијата.

Тие забележаа дека недостига можност за ревизија на финансиските извештаи што ги поднесуваат политичките партии, особено зашто некои од нив сè уште немаат доставено извештаи.

Според ОБСЕ/ОДИХР, на овие избори не е испочитуван родовиот баланс, особено кај кандидатите за градоначaлници. Тие посочуваат дека и покрај ваквата правна обврска, ДИК прифаќала советнички листи кои исто така не биле родово избалансирани.

Според шефот на дeлегацијата од Конгресот на локални и регионални власти при Советот на Европа, Карим ван Овермеире, излезноста од повеќе од 60 отсто е важна затоа што претставува индикатор дека граѓаните веруваат дека работите можат да се сменат кон подобро.

За обвинувањата на лидерот на ВМРО-ДПМНЕ, Никола Груевски, за изборни нерегуларности, Гловер рече дека сите забелешки и жалби на партијата се регистрирани и ќе го следат понатамошното одлучување на надлежните институции по овие жалби.

Ван Овермеире рече дека избори без неправилности се невозможни бидејќи сме луѓе, а луѓето грешат.

– Предизборната кампања и гласањето беа во согласност со меѓународните стандарди, но тоа не значи дека нема нерегуларности. Секогаш има простор за подобрување – рече Ван Овермеире.


Заев – Гловер: Ќе има строги санкции за секој што ќе ја наруши регуларноста на изборите


Скопје, 26 септември, 2017 - 16:22 (META) 

Не смееме да дозволиме поради изборни нерегуларности да ги доведеме во прашање нашите евроатлантски аспирации, на кои работевме многу во изминатите неколку месеци, рекол премиерот Зоран Заев на денешната средба со шефицата на мисијата на ОБСЕ/ОДИХР за набљудување на локалните избори, Одри Гловер.

Заев посочил дека ќе има строги санкции за секој поединец или организација што ќе се осмелат да се впуштат во прекршување на регуларноста на изборниот процес, како во предизборниот период, така и на денот на изборите.

Тој, како што се наведува во соопштението од владината прес-служба, ја замолил шефицата на мисијата на ОБСЕ/ОДИХР навремено да го информира за сите обиди за нарушување на регуларноста на избирачкиот процес, за да не се дозволи никаков пропуст што ќе предизвика оспорување на легитимноста на изборите.

– Би сакал да сугерирам, да се посвети повеќе внимание на забелешките на опозицијата, не само на ВМРО-ДПМНЕ, туку на сите опозициски партии. На овие избори Македонци ќе гласаат за Албанци, и Албанци ќе гласаат за Македонци, тоа е една солидна гаранција за заедничка иднина, која цврсто верувам дека ќе ферментира во една позитивна практика во иднина – рекол Заев.

Гловер на средбата го информирала премиерот со претстојните активности на ОБСЕ/ОДИХР поврзани со изборниот процес, за бројот на краткорочни и долгорочни набљудувачи на мисијата, кои веќе се на терен и го набљудуваат предизборниот процес. Таа инфрормирала дека пред денот на изборите мисијата ќе го засили надзорот со дополнителни 200 краткорочни набљудувачи.


ОБСЕ/ОДИХР со 336 набљудувачи ќе ги следи локалните избори


Скопје, 13 септември, 2017 - 16:51 (META) 

Локалните избори на 15 октомври ќе ги следат 336 набљудувачи на ОБСЕ/ОДИХР. Шефицата на Мисијата на ОБСЕ/ОДИХР, амбасадорката Одри Гловер, денеска на прес-конференција соопшти дека 16 експерти на ОБСЕ/ОДИХР се веќе во земјава, а ним оваа недела ќе им се придружат уште 20 долгорочни набљудувачи, кои ќе бидат распоредени низ целата земја, во тимови по двајца, почнувајќи од 18 септември.

Пред локалните избори во Македонија ќе допатуваат уште 300 краткорочни набљудувачи, кои ќе ги следат изборите во сите 80 општини и во Градот Скопје.

Набљудувачите, како што истакна Гловер, внимателно ќе го следат процесот на регистрација на кандидатите и на гласачите, кампањите, работата на изборната администрација и на владините институции, изборната регулатива, нејзиното спроведување и решавањето на изборните спорови.

Како дел од процесот на набљудување, Мисијата на ОБСЕ/ОДИХР ќе го следи и известувањето на медиумите за кампањите на партиите и на кандидатите за градоначалници.