!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ОБСЕ/ОДИХР со 336 набљудувачи ќе ги следи локалните избори


Скопје, 13 септември, 2017 - 16:51 (META) 

Локалните избори на 15 октомври ќе ги следат 336 набљудувачи на ОБСЕ/ОДИХР. Шефицата на Мисијата на ОБСЕ/ОДИХР, амбасадорката Одри Гловер, денеска на прес-конференција соопшти дека 16 експерти на ОБСЕ/ОДИХР се веќе во земјава, а ним оваа недела ќе им се придружат уште 20 долгорочни набљудувачи, кои ќе бидат распоредени низ целата земја, во тимови по двајца, почнувајќи од 18 септември.

Пред локалните избори во Македонија ќе допатуваат уште 300 краткорочни набљудувачи, кои ќе ги следат изборите во сите 80 општини и во Градот Скопје.

Набљудувачите, како што истакна Гловер, внимателно ќе го следат процесот на регистрација на кандидатите и на гласачите, кампањите, работата на изборната администрација и на владините институции, изборната регулатива, нејзиното спроведување и решавањето на изборните спорови.

Како дел од процесот на набљудување, Мисијата на ОБСЕ/ОДИХР ќе го следи и известувањето на медиумите за кампањите на партиите и на кандидатите за градоначалници.


Заев го презентираше планот „3 – 6 – 9“: Пакет брзи реформи за препорака и за преговори со ЕУ


Скопје, 5 јули, 2017 - 13:42 (META) 

Македонија прави пробив во евроатлантските аспирации преку отворена транспарентна инклузивност на сите заинтересирани страни, изјави премиерот Зоран Заев, презентирајќи го реформскиот план насловен како „3-6-9“.

Тој посочи дека бројките во името ги означувааат временските точки во кои треба да бидат спроведени реформите.

– Во првите три месеци, до локалните избори, планираме да се обезбеди отстранување на условената препорака за почеток на преговорите од Европската комисија. За шест месеци, односно до декември, да се зајакне перцепцијата во Советот на Европа дека Македонија е сериозен кандидат за членство во ЕУ, додека за девет месеци да се насочат земјите членки да зборуваат за почеток на преговори со Македонија – изјави Заев.

Тој посочи дека со новите реформи треба да обезбеди демократски парламент, да се направат реформи во судството, безбедносните струкутруи, да се обезбеди кохабитација со претседателот, реформи во медиумите и соработка со граѓанскиот сектор, преку што ќе се обезбеди континуирана транспарентност и инклузивност.

Премиерот истакна дека е потребна соработка и од опозицијата, која треба истовремено да биде надзор и коректив на планот.

Вицепремиерот за евроинтеграции, Бујар Османи, посочи дека правецот на реформите произлегува од владината програма, која предвид ги има земено точките од Договорот од Пржино, препораките од Брисел во однос на итните реформски приоритети и претходните извештаи на Европската комисија. Тој истакна дека во првата група мерки е предвидено зајакнување на капацитетите и на работата на ДИК, коишто произлегуваат од препораките на ОБСЕ/ОДИХР и на Венецијанската комисија.

– На краток рок мерките ќе се фокусираат на поддршка на ДИК и на внатрешна консолидација и зајакнување на нивните капацитети, а во контекст на подготовките на локалните избори, вклучително и на ажурирање на избирачкиот список, едукација на изборната администрација и на гласачите – рече Османи, додавајќи дека ќе има санкционирање на директорот на МРТ доколку со следниот извештај на ОБСЕ/ОДИХР се констатира небалансирано известување.

Тој најави дека реформите што се однесуваат на Собранието на Република Македонија, ќе бидат насочени кон тоа Владата да дава поддршка на враќање на демократскиот амбиент во парламентот преку политички дијалог и соработка со партиите, особено со опозицијата.

Во однос на имплементацијата на Охридскиот договор, Османи најави дека до локалните избори треба да се усвои и законот за јазиците, кој ќе биде доставен до Венецијанската комисија заради консултација.

Со реформскиот план се предвидува реформа на јавната администрација, како и реформи во судството, во кои спаѓа и укинување на законот за Советот за утврдување на факти и дисциплинска одговорност на судии, формирање на работна група за законот за изменување и дополнување на Законот за судии и на Законот за судскиот совет, формирање на совет за спроведување на реформите во правосудството, целосна институционална поддршка на СЈО, подготвување измени на законот за укажувачи, како и носење нов закон за заштита на сведоци.


Вицепремиерот Османи се сретна со шефот на набљудувачката мисија на ОБСЕ/ОДИХР


Скоје, 23 јуни, 2017 - 13:16 (META) 

Вицепремиерот за европски прашања, Бујар Османи, денеска се сретна со шефот на набљудувачката мисија на ОБСЕ/ОДИХР за последните парламентарни избори, Кајетана де Зулуета.

Османи истакнал дека посетата, која е пред локалните избори, претставува одлична можност да се применат клучните приоритети од извештајот на ОБСЕ/ОДИХР.

– Владата веќе подготви план во кој посебно место имаат т.н. реформски приоритети на кои Владата ќе се посвети во наредните три месеци, т.е. токму пред одржување на локалните избори. Потребно е да покажеме дека имаме капацитет да спроведеме демократски и веродостојни избори, во согласност со меѓународните стандарди, што би било уште еден позитивен елемент за придвижување на земјата во процесот на европска интеграција – додаде Османи.

Османи и Де Зулуета изразиле задоволство и оптимизам од враќањето на земјата на европскиот пат и констатирале дека позитивната клима треба да се искористи за уште похрабар пристап кон исполнување на предвидените реформи, а со тоа да се забрзаат процесите на евроатлантската интеграција на Република Македонија.


Трамп му честиташе на Ердоган за резултатот на референдумот


Вашингтон/Анкара, 18 април, 2017 - 10:25 (META) 

Претседателот на САД, Доналд Трамп, синоќа му ја честиташе на својот турски колега, Реџеп Таип Ердоган, победата на референдумот за уставните измени во земјата, со кои во голема мера се зголемуваат овластувањата на турскиот претседател, пренесува „Би-би-си“.

Трамп, како што пренесуваат агенциите, телефонски му го честитал успехот на Ердоган на референдумот, на кој 51,4 отсто од граѓаните ги поддржаa уставните измени во Турција.

Честитиките на Трамп кон Ердоган се во спротивност со загриженоста меѓу европските лидери околу исходот на референдумот.

Инаку, Централната изборна комисија на Турција во неделата вечерта потврди дека граѓаните на референдумот гласале за уставните промени со кои на претседателот Реџеп Таип Ердоган му се даваат широки овластувања.

Врз основа на 98,95 отсто од пребројаните гласови, 51,34 отсто од граѓаните на Турција гласале за уставните промени, односно за воведување претседателски систем, додека 48,66 отсто Турци гласале против. Конечните резултати треба да бидат објавени во рок од 11 до 12 дена.

Мисијата на ОБСЕ/ОДИХР оцени дека референдумот во Турција се одржал во нефер услови и дека двете страни во кампањата немале еднакви можности.

Ердоган ги отфрли ваквите обвинувања, порачувајќи им на меѓународните набљудувачи дека „треба да си го знаат своето место“.


ОБСЕ/ОДИХР оцени дека референдумот во Турција се одржал во нефер услови


Анкара, 17 април, 2017 - 17:29 (META) 

Мисијата на ОБСЕ/ОДИХР оцени дека референдумот во Турција се одржал во нефер услови и двете страни во кампањата немале еднакви можности.

Во заедничкото соопштение на ОБСЕ/ОДИХР и на Парламентарното собрание на Советот на Европа (ПССЕ) се вели дека референдумот се одржал во политички амбиент во кој основните слободи кои се од суштинско значење за вистински демократски процес се прекинати во рамките на вонредна состојба во државата.

Надзорот на набљудувачката емисија покажал дека кампањата која ги поддржувала уставните промени доминирала во медиумите. Тоа, заедно со притисоците и со затворањето на медиумите, како и со апсењето на новинарите, придонело гласачите да не можат да ја видат пошироката слика.


Баша: Со оваа влада не се можни слободни избори


Тирана, 8 март, 2017 - 17:47 (META) 

Доведено е во прашање одржувањето слободни избори, оти сегашната влада не сака да ги спроведе антикорупциските закони, а огромна е опасноста парите од трговијата со дрога да се користат за купување гласови, порачал лидерот на албанската опозиција, Љуљзим Баша, на денешната средба во Тирана со клучните претставници на ОБСЕ/ОДИХР.

Баша рече и дека Централната изборна комисија не е независна и е подложена на притисоци и на закани од владата. Претседателот на Демократската партија на Албанија порача и дека единственито начин да се гарантираат слободни и чесни избори е преку формирање техничка влада која ќе се фокусира на спроведувањето на антикорупциските закони.


ОБСЕ/ОДИХР: Постизборниот период беше тензичен и со остра реторика


Скопје, 28 февруари, 2017 - 17:48 (META) 

Мисијата на ОБСЕ/ОДИХР денеска попладне го објави конечниот извештај за предвремените парламентарни избори, одржани на 11 декември минатата година во Македонија, во кој се наведува дека е потребно и понатаму да се работи на унапредување на правната рамка, но и да се преземат законски мерки за заканите кон амбасадорите.

„Иако партиите генерално, имаа можност за слободно претставување на кампањите, се препорачува властите и политичките партии да преземат конкретни чекори за да не се врши притисок врз вработените од јавната администрација, политичките активисти и другите кои ги посетуваат таквите настани или, пак, на самото гласање. Наводите за притисок треба темелно да бидат истражени“, порачуваат од ОБСЕ/ОДИХР.

Во извештајот се наведени забелешки за работата на ДИК и за нејзината внатрешна организација, проблемите со гласачките списоци, пробивањето на законските рокови. Од мисијата препорачуваат дека потребно е повторно да се разгледа Изборниот законик, да се зголеми транспарентноста и ефикасноста на ДИК, да се врши редовна контрола на избирачките списоци, брзо да се интервенира во случаите кога лицата не се наоѓаат на избирачкиот список и да се работи на подобрување на независноста на медиумите.

Од ОБСЕ/ОДИХР во извештајот истакнуваат дека постизборниот период бил обележан со тензии и со остра реторика, особено од страна на ВМРО-ДПМНЕ. Се наведува дека сè уште не е познато дали се преземени законски мерки за заканите кон амбасадорите, по прогласот на ВМРО-ДПМНЕ што го прочита лидерот Никола Груевски на протестот пред Државната изборна комисија (ДИК) на 17 декември лани.

„Постизборниот период беше одбележан со тензична атмосфера и со остра реторика, главно од ВМРО-ДПМНЕ. Откако Беса и СДСМ доставија приговори за нерегуларности на неколку избирачки места, ВМРО-ДПМНЕ повика на протести пред седиштето на Државната изборна комисија (ДИК). На 17 декември, лидерот на ВМРО-ДПМНЕ пред насобраните луѓе го претстави партискиот проглас и ја обвини ДИК и неколку амбасадори за мешање во изборите. Следниот ден, се појавија некролози на сегашни и на поранешни претставници на меѓународната дипломатска заедница во Скопје. Мисијата на ОБСЕ/ОДИХР не е запознаена дали биле преземани какви било законски мерки против овие дејства“, се вели во извештајот на ОБСЕ/ОДИХР.


ОБСЕ/ОДИХР: Нема време да се направат промени во изборниот законик на Албанија


Тирана, 15 јануари, 2017 - 21:54 (META) 

Во документ на ОБСЕ/ОДИХР кој го објави националниот албански весник „Панорама“, се вели дека е доцна да се направат промени во Изборниот законик во Албанија. ОБСЕ/ОДИХР го одби барањето на Демократската партија за електронско броење на претстојните избори во јуни. ОБСЕ/ОДИХР исто така го одби барањето на партијата Социјалистичко движење за промена која предложи отворени листи.

Во овој документ се вели дека времето кое преостанува до изборите не е доволно за преземање на суштински промени во Изборниот законик.

Но од ОБСЕ/ОДИХР сметаат дека без разлика на временското ограничување има четири други проблеми кои Специјалниот комитет за изборни реформи може да ги реши.

Промените кои Комитетот треба да ги направи се поврзани со одобрување на измените кои треба да обезбедат транспарентност на политичките партии во изборната кампања, обезбедување на родови квоти, зајакнување на законските санкции за прекршителите на Изборниот законик и подобрување на правната рамка на медиумско покривање на изборната кампања.

ОБСЕ/ОДИХР во овој документ ги повикува и охрабрува албанските власти да го искористат преостанатото време да направат некои подобрувања во изборното законодавство пред парламентарните избори во 2017 година.


Отпечатени дури 80.000 пробни гласачки ливчиња


Скопје, 6 декември, 2016 - 15:28 (META) 

Печатницата „Киро Дандаро“, која официјално ги печати гласачките ливчиња за предвремените парламентарни избори закажани за 11 декември, во саботата попладне отпечатила 80.000 ливчиња повеќе заради тестирање на опремата за печатење, дознава „Мета“ од неколку извори кои сакаат да останат анонимни.

Според истите извори, случајот е пријавен и во набљудувачката мисија на ОБСЕ/ОДИХР. Оттаму на прашањето на „Мета“ за овој случај рекоа дека не можат ниту да го потврдат, ниту да го демантираат бидејќи се набљудувачка мисија. Сите забелешки во однос на изборниот процес, како што рекоа, ќе бидат нотирани во извештајот кој ќе биде објавен по изборите.

Вработени во печатницата „Киро Дандаро“ за „Мета“ потврдуваат дека печатницата отпечатила повеќе ливчиња од потребното, но дека останува прашањето дали тие ќе бидат поништени и дали се со сериски број.

– Отпечатени се поголем број ливчиња, што не е невообичаено. Често се печатат повеќе примероци за да се види дали е погоден фонтот, бојата и други технички карактеристики. Но, сепак, бројот на отпечатени ливчиња е далеку поголем од нормалното. Прашањето е дали овие ливчиња ќе се поништат, дали ќе се складираат за да се знае дека биле пробни и дали се отпечатени со или без сериски број – вели вработен во „Киро Дандаро“, кој побара да остане анонимен.

Од печатницата „Киро Дандаро“, пак, не сакаа да дадат официјален коментар и за сите информации нè упатија во ДИК.

– Од фирмата ни е забрането да даваме какви било изјави, за сè што ве интересира прашајте во ДИК – велат од правната служба на „Киро Дандаро“.

Од Државната изборна комисија велат дека не се запознаени со такво нешто, а дел од членовите на ДИК за „Мета“ велат дека целиот процес на печатење на ливчиња се спроведува според сите пропишани правила и принципи.

Виолета Дума, членот на ДИК од редовите на СДСМ, за „Мета“ вели дека не е запознаена со ваков случај, но дека доколку е вистина, тоа би била страшна ситуација.

– ДИК врши редовни контроли во печатницата „Киро Дандаро“. Целиот процес е под видеонадзор. Тој процес си тече нормално, во предвидените рокови, со најголеми безбедносни мерки. Нема пробно или непробно печатење. Ливчињата се печатат под одреден број. Првпат слушам за печатење на такви ливчиња. Таква ситуација би била страшна ако е вистинита, не дај боже да е така. Но, „бомбите“ ни покажаа дека и кога мислевме дека сè е како што треба, всушност не било – вели Дума.

Потпретседателот на Комисијата, Реџеп Прекопуца, не сакаше да коментира и рече да се обратиме до портпаролите на ДИК.

Членот на ДИК од ДПА, Бедредин Ибраими, вели дека таквите информации се шпекулации и дека печатењето на ливчињата почнало откако печатницата била одбрана од страна на ДИК.

– Не е точна информацијата. На печатницата ѝ дадовме налог за печатење, рокот за печатење на ливчињата почна од денот кога ја одбравме таа печатница – вели Ибраими.

Еден од поранешните претседатели на ДИК вели дека практика е печатницата да печати пробни ливчиња поради проверка на технички спецификации, но дека тоа секогаш биле само неколку ливчиња кои се јасно означени за да не може да се извршат некакви манипулации.


Арсовска-Томовска до ОБСЕ/ОДИХР: Опозицијата користи државни ресурси за партиски цели


Скопје, 26 ноември, 2016 - 12:40 (META) 

Министерката за информатичко општество и администрација, Марта Арсовска-Томовска, упати отворено писмо до Мисијата на ОБСЕ/ОДИХР во кое ја критикува опозицијата дека ги користи институционалните ресурси за партиски активности.

„Преку дел од медиумите се врши политичко етикетирање на вработените, истите се нарекувани со погрдни зборови („крлежи“, „штетници“, „корумпирана стока“), а институциите „штали“. Ова говори за фактот дека на вработените се гледа само како на „број на гласачи#, при што целосно се деградира нивниот углед и достоинство, како нивната егзистенција да треба да зависи од нечија политичка милост, а не од оцената за квалитетот и од нивната работа“, вели Арсовска-Томовска во писмото.

Таа додава дека претставниците на опозицијата во институциите ги користат институционалните ресурси за партиски активности.

„Со партиски ресурси или од партиски спонзори се финансираат постери, летоци и веб страни на кои се става државен потпис и со кој се повикува на авторитетот на државни институции, постојано се надминуваат законските надлежности и овластувања и се припишуваат туѓи надлежности“, додава Арсовска-Томовска во писмото.

Во писмото таа ја известува Мисијата на ОБСЕ/ОДИХР дека опозицијата создава перцепција дека партијата на власт прави политички притисоци на вработените во јавниот сектор, а дека таа перцепција ја зајакнуваат невладините организации.

Министерката Арсовска-Томовска ја повика Мисијата на ОБСЕ/ОДИХР објективно да ја следи состојбата, и објективно да известува за изборниот процес, единствено врз основа на докази и факти.