Е-дневникот „падна“, се бара фирма што ќе го поправи


Скопје, 28 ноември, 2018 - 10:22 (META) 

Оваа учебна година, електронскиот дневник не работи. Наставниците не можат да внесуваат податоци ниту оценки во него бидејќи страницата не е во функција.

– Засега пишуваме се` што е потребно само во пишаниот дневник. Чекаме насоки од администраторот кога да почнеме да внесуваме оцени и во електронска форма. Родителите на учениците сега не добиваат смс-пораки за изостаноците и оценките на нивните деца, бидејќи има некаков проблем во системот. Праксата покажа дека е-дневникот е добра алатка зашто родителите редовно добиваа информации за успехот на учениците – вели Драгица Поповска, одделенски наставник во основното училиште „Панајот Гиновски“ во Бутел.

Во Министерството за образование објаснуваат дека има технички проблеми кои се` уште се решаваат.

„Во моментов компанијата која е избрана преку спроведена јавна набавка за ажурирање и одржување на електронскиот дневник, работи на надминување на извесни технички предизвици и надградба на системот, но и на ажурирање на податоците. Така што, по завршувањето на предвидените активности и тестирање на платформата, наставниците ќе продолжат непречено да го користат електронскиот дневник. Тој задолжително се пополнува и ќе треба да се пополни, согласно актуелните законски прописи“, информираат од МОН.

Со тоа, додаваат од МОН, и родителите/старателите на учениците ќе продолжат да имаат брз и едноставен увид во оценките и поведението на своите деца.

На прашањето, до каде е најавената новина за кратење на купот административни обврски што ги имаат наставниците, од Министерството одговараат дека во оваа фаза е рано да се говори за тоа.

„Рано е да се зборува за конкретни одредби со кои се уредуваат одредени обврски на наставниците, а кои ќе бидат содржани во новите законски решенија кои ќе ја регулираат областа на основното и средното образование, бидејќи процесите на нивната изработка, односно формулирање (конкретно на Законот за основното образование) се се` уште во тек и се работи на утврдување на конечната верзија која ќе биде и понудена на јавна дискусија“, појаснуваат оттаму.

Електронскиот дневник беше воведен во февруари 2011 година. Сите наставници во државата имаат законска обврска редовно да го пополнуваат, исто како што го пополнуваат и пишаниот дневник. Овој проект имаше за цел да ја подобри комуникацијата меѓу наставниците и родителите, но праксата покажа дека системот често им тренира нерви на просветниците бидејќи „паѓаше“, со што им беше овозможено да го пополнуваат навремено. Проблемите беа изразени пред крај на учебна година, кога речиси 20.000 наставници во исто време пополнуваа конечни оценки на сите ученици во Е-дневникот.

  • Е-дневникот се пополнува од 2011 година.  
  • 17.997 наставници во основните и 7.420 наставници во средните училишта имаат законска обврска да го пополнуваат.
  • Родителите на 192.448 основци и на 71.458 средношколци добиваат смс-пораки за изостаноците и оценките. 
  • Е-дневник водат сите просветници во 993 основни и во 132 училишта за средно образование

Општина Чаир има проект за проширување на училиштето „Исмаил Ќемали“, на ред е МОН


Скопје, 23 ноември, 2018 - 10:21 (META) 

Од Општина Чаир, под чија надлежност е основното училиште „Исмаил Ќемали“, велат дека имаат проект за решавање на проблемот на преголемиот број на ученици, каде што во речиси сите паралелки е надминат максималниот број дозволен со закон – 34 ученици.

Од оваа општина велат дека барањето за проширување на сегашниот училиштен објект е испратено до Министерството за образование и наука и дека се чека одобрувањето, по што ќе започнат со реализација на предвидениот проект.

Портпаролот на Општина Чаир, Куштрим Ала за „Порталб.мк“ објасни дека во подготвениот проект од општината, се планира да се изградат уште осум паралелки.

Директорката на ова училиште, Бурбуќе Имери изјави дека најоптоварени се паралелките од петто одделение, каде што во секоја паралелка е надминат бројот од 34 ученици, а во некои случаи тој достигнува и до 40.

Таа рече дека најдобро би било да се изгради ново училиште, бидејќи според неа, проширувањето на сегашниот објект е краткорочно решение и дека во иднина бројот на ученици повторно ќе се зголеми.И наставниците се пожалија дека е многу тешко да се работи со толку голем број ученици во една паралелка, и велат дека се потребни итни решенија.

Инаку, согласно законот на Министерството за образование и наука, минималниот број ученици во еден клас е 24, а максималниот 34, но паралелки може да се формираат и со помал број ученици доколку се исполнат условите.

Родителите бараат Општината Чаир да бара долгорочно решение на проблемот, МОН да се ангажира повеќе за распределба на паралелките во кои е надминат максималниот број на ученици определен со Закон и изградба на училишта, а таму каде што има потреба, Министерството за финансии да даде согласност за спроведување на законот.


Германската Влада со двајца експерти ќе го поддржи професионалното образование


Скопје, 22 ноември, 2018 - 15:05 (META) 

Тим од Министерството за финансии предводен од министерот Драган Тевдовски одржаа состанок со делегација на „Источниот комитет на Источно – европската асоцијација на германската економија“ предводена од генералниот директор, Мајкл Хармс.

Со цел засилување на присуството на германските компании во Македонија, на состанокот се зборувало и за нивните потреби како инвеститори.

„Еден од предусловите за влез на пазарот на германските компании е постоењето на квалификуван кадар. Токму со цел да се излезе во пресрет на потребите на пазарот на трудот, во Македонија почна да се спроведува дуалното образование. Германската Влада со двајца експерти ќе го поддржи развојот на професионалното образование во земјава. Дополнително, во буџетот за 2019 година се предвидени највисоки средства за активните мерки за вработување. Преку оваа програма на краток рок ќе се реши проблемот со поврзувањето на понудата и побарувачката за кадар на пазарот на трудот. Во буџетот за следната година, поддршката за приватниот сектор бележи раст од 37 проценти“, се вели во соопштението на Министерство за финансии.

На средбата биле дискутирани клучните процеси во државата важни за инвеститорите евроатланските интеграции на земјата, даночната реформа, воведувањето на европски стандарди во работењето и фискалната транспарентност.

Германија е најзначаен трговски партнер на Македонија. Првите девет месеци, извозот во Германија изнесува 1.951,6 милиони евра, што претставува пораст од 13,5 проценти во однос на истиот период лани. За истиот период, увозот од Германија изнесува 643,6 милиони евра, што претставува пораст од 11,6 проценти во однос на истиот период лани. Размената со Германија во првите девет месеци од 2018 година изнесува 26,6 проценти и се карактеризира со трговски суфицит.


Од СОНК бараат зголемувањето на платите да биде повеќе од пет отсто и да почне од јануари


Скопје, 13 ноември, 2018 - 14:14 (META) 

Самостојниот синдикат за образование, наука и култура на Република Македонија – СОНК се залага зголемувањето на платите од пет осто во овие дејности да биде од први јануари, а не од септември 2019 година.

– Со пет отсто апсолутно не сме задоволни. Платите се далеку под просекот. Ако просечната месечна плата е околу 24 илјади денари, просечната плата во образование е околу 19 илјади денари. Најниската е 12.100, а на наставниците и професорите е до 22 илајди, ако не се земе предвид платата на директорите – рече денеска на прес-конференција претседателот на СОНК, Јаким Неделков.

Тој додаде дека има 250 лица чиј работен однос треба да се трансформира од определено на неопределено време.

– Општинските комисии што се задолжени да направат чекор во трансформации на работни договори од определено на неопределено работно време или одреден број на такви општински комисии воопшто не функционираат. Според наша проценка, тоа намерно се прави за да истечат овие три месеци на договори на определено време за потоа да се распишат конкурси и се вработат други луѓе, веројатно поподобни овие што се на работно место – рече Неделков.

Министерот за финансии Драган Тевдовски на вчерашната средба со синдикатите, при претставување на предлог-буџетот за 2019 година рече дека знае дека платите се мали, но тие како министерство гледале колкав е фискалниот простор за зголемување, бидејќи морале да внимаваат и на поддршката на економијата, компаниите, земјоделците.


Заедничката мултидисциплинарна комисија помеѓу Македонија и Бугарија ќе има втора средба


Скопје, 3 октомври, 2018 - 10:26 (META) 

На 4 и 5 октомври, во Скопје, ќе се одржи втората средба на Заедничката мултидисциплинарна експертска комисија за историски и образовни прашања, формирана согласно Договорот за пријателство, добрососедство и соработка меѓу Република Македонија и Република Бугарија, информираат од Министерството за надворешни работи.

На средбата, како што велат од МНР, се очекува членовите на Комисијата, согласно договорената методологија и принципи на работа, да разменат мислења поврзани со наставните содржини во образовните процеси во двете земји, како и можностите за заедничко одбележување на одредени историски настани и личности.


Коригирани сите математики од прво до деветто одделение


Скопје, 20 септември, 2018 - 11:11 (META) 

Сите учебници по математика од прво до деветто одделение имале грешки и биле коригирани. Новите изданија се распределуваат периодов по училиштата, заедно со другите учебници кои доцнеа и не беа пред учениците на почетокот на учебната година.

„Нови учебници се доставуваат по математика, по природни науки од прво до шесто одделение, по биологија од седмо до деветто одделение, по хемија од осмо до деветто одделение, а нови учебници по физика ќе имаат осмоодделенците и деветтоодделенците“, информираат за „Мета“ од Министерството за образование и наука.

Огромен проблем секоја година е тоа што во средното стручно образование нема учебни помагала. Затоа беше најавено дека се подготвуваат нови 31 учебник за во средно образование.

„Потребата за учебници се менува во зависност од реформите кои се спроведуваат во Центарот за средно стручно образование и обука и Бирото за развој на образованието, по изготвување на наставните програми. Во тек е процесот за изготвување на нови 31 учебник за стручно образование и статусот е секаде различен, односно некаде се` уште не е формиран авторски тим, некаде е формиран и се работи на подготовка на содржината, некаде содржината веќе се разгледува од рецензентска комисија. Исто така, ќе се коригираат и содржините на два учебника – Биологија за прва и Етика за трета година“, информираат оттаму.

Откако учебниците ќе ги одобри рецензентска комисија, Бирото за развој на образованието и Национална комисија за учебници за основно и средно образование, тие ќе бидат доставени до училиштата.

Во Педагошката служба при МОН, која е надлежна за учебниците, не откриваат детали за тоа, какви се` грешки се најдени во учебниците. Оттаму само кусо информираат дека грешките биле од различна природа.

„Има грешки од стручен, методолошки и технички аспект, но и од аспект на превод и адаптирање“, рекоа оттаму.


Атанасов: Учебниците доцнат, но не се потпирајте само на нив


Скопје, 10 септември, 2018 - 10:28 (META) 

И оваа учебна година започна без учебници во основното и во средното образсование. Добар дел од оние од лани и од изминатите години се стари, искинати, мрсни, ишарани и оштетени, па родители по социјалните мрежи реагираа дека сами ќе купат нови комплети бидејќи е невозможно да се учи од партали.

По неуспешниот обид за ова да поразговаравме со првиот човек на ресорот образование во државата, Арбер Адеми, кратко интервју за „Мета“ даде неговиот заменик, Петар Атанасов кој е само втора недела на функцијата.

Повторно нервози за родителите и децата кои или немаат воопшто учебници, или пак, оние кои ги имаат, се за во канта. Зошто?

– Секоја година има по некој застој, проблем, некогаш причините се субјективни, некогаш објективни. Но затоа на тоа работат многу комисии, цела педагошка служба, издавачки куќи, печатници, тендери. Една недела сум заменик-министер. МОН напорно работеше да изготви измени во многу учебници. Одлуката е дека првите три одделенија многу скоро ќе се распределат по училиштата.

Ќе бидат ли во иднина поквалитетно изработени и ќе продолжат ли да бидат бесплатни во наредните години?

– Политиката на Министерството за образование и наука наназад со години е дека треба да има бесплатни учебници. Сето тоа предизвика државата да треба да издвојува многу финансии за таа намена, но во секој случај, политиката на бесплатни учебници за сите ученици продолжува. Ќе настојуваме да бидат што подобри во однос на квалитет. Моја интенција е во пониските нивоа на образование учебникот да биде главно помагало, но во секоја наредна година, мора да се изнаоѓаат и нови алатки и извори на информации. Учениците неопходно е сами да учат, да експериментираат и да истражуваат.

Во средно стручно образование, ретко каде има учебници по стручните предмети. Што ќе преземете во врска со овој долгогодишен проблем?

– Запознаен сум со проблемот. Каде што има мали тиражи и мала популација ученици, како што е тоа во средното стручно образование, нема мотивација кај добрите експерти и професори да изработат учебник. Затоа планот е да ги мотивираме повеќе. Кога предметите се поопшти, полесно е да се изработи учебник, но тоа е потешко кога се работи за стручен предмет. Се надевам дека со професорите кои се професионалци во одредени области ќе изнајдеме решение за проблемот со недостиг од учебници во средното стручно образование. Од друга страна, овде е и дуалното образование, како еден од начините да се воведе што поголема практична работа за учениците. Јас сум поборник на тој систем, но и сум поборник да има повеќе инвестиции во средните училишта. Не само да добијат учебник, туку и да се овозможат повеќе ресурси, да се купи опрема, помагала, за да може да има во самото училиште практична работа. Учениците мора да се обучуваат за конкретни професии. Мора да се намали јазот меѓу теоретското образование и работното место. Тоа е заложба на МОН тој јаз да биде што помал. Така ќе има подобра понуда на пазарот.


Мицкоски: Учебниците доцнат, образованието крахира, имаме демографска катастрофа


Скопје, 3 септември, 2018 - 15:12 (META) 

Македонија денес се соочува со демографска катастрофа, во вториот квартал во 2018 година, имаме пад за 6,3 проценти на бројот на новородени деца, тоа за шест години ќе значи и дополнително намалување на бројот на ученици, паралелки кои ќе се затворат, населени места кои забрзано замираат.

Ова денеска го истакна лидерот на ВМРО-ДПМНЕ, Христијан Мицкоски во неговото видео-обраќање.

Тој додаде дека на Македонија и се одзема иднината, а Владата не презема ништо.

– Поради тоа имаме кратење на паралелките, дури се соочуваме и со затворање на цели училишта.
Додека состојбата во образованието и училиштата е очајна. Имаме училишта кои прокиснуваат, влагата е честа појава, додека бесплатните учебници доцнат. Но затоа, затоа пак додека образованието за родителите е мака, за власта тоа е шанса за профит. Скандалите не престануваат. Милионскиот бизнис од 5,3 милиони евра за набавка на учебници се побрза да се додели на две фирми, во четири очи, без тендер, а фирмите според неформалните информации, важат за блиски до власта- рече Мицкоски.

Тој вели дека зголемувањето на платите за наставниците што го направија од владата е понижувачко и е далеку од првично ветените 500 евра просечна плата.


Ќе се зголемуваат платите во основното и средното образование


Скопје, 30 август, 2018 - 10:15 (META) 

Владата на вчерашната седница донесе одлука за зголемување на платите на вработените во основно и во средно образование за 5%, почнувајќи од исплатата на септемвриската плата годинава.

На покачувањето ќе му претходно потпишување договор меѓу Министерството за образование и наука и Самостојниот синдикат за образование, наука и култура (СОНК). Со овој документ ќе се утврди најниската плата за најнискиот степен на сложеност на вработените во основните училишта, која ќе изнесува 12.714 денари, а најниската плата за најнискиот степен на сложеност на вработените во средните училишта ќе изнесува 13.117 денари.

Исто така, донесена е одлука и да продолжи стипендирањето средношколоци во учебната 2018/2019 година. Според оваа одлука, 100 талентирани ученици и 80 талентирани ученици – спортисти ќе добиваат стипендија во висина од 2. 970 денари. Сто ученици со посебни потреби и 50 ученици – деца без родители ќе добијат стипендија од 2.750 денар, а 400 ученици ќе добијат стипендија за социјална поддршка од 2.200 денари.

Стипендии се предвидени и за средношколци од ромска националност.

На 85-тата седница, на предлог на Министерството за земјоделство, шумарство и водостопанство, Владата вчера прифатила да се дава дополнителна субвенција од 1 денар за килограм предадено грозје за сортите вранец и смедеревка.


Наставниците и професорите ќе може да се вработат на неопределено време


Скопје, 23 мај, 2018 - 9:37 (META) 

На вчерашната 69. седница на Владата формирана е работна група за изнаоѓање на можно решение за проблемот со линдан во ОХИС. Оваа работна група во рок од три месеци треба да ја информира Владата за можните решенија на овој долгогодишен проблем.

Владата ја прифати информацијата голем дел од наставниците и професорите во основното и средното образование да се вработат на неопределено работно време.

Министрите на предлог на Министерството за финансии ја прифатија фискалната стратегија на Македонија 2019-2021.

„Среднорочната фискална стратегија претставува клучен документ за утврдување на среднорочните фискални цели на Владата и нивно поврзување со стратешките приоритети на Владата, како и алатка за следење на динамиката на приходите и расходите во однос на фискалните цели“, информираат од Влада.

Mинистрите го прифатија и текстот на спогодбата помеѓу Министерството за образование и вработување на Република Малта и Министерството за образование и наука на Македонија за взаемно признавање на високообразовните степени, дипломи и сертификати.