!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Град Скопје апелира граѓаните да го расчистуваат снегот пред објектите


Скопје, 5 јануари, 2017 - 12:33 (META) 

Поради најавениот екстремно студен бран со ниска температура во текот на наредните денови, Градот Скопје апелира до граѓаните, куќните совети и до сопствениците на деловните објекти да се придржуваат до законската обврска и да го исчистат снегот од приодите до нивните објекти.

– Доколку навреме не се исчисти снегот од приодите до објеките, постои можност од појава на голомразица што ќе го отежни движењето на граѓаните и извршувањето на секојдневните обврски – се вели во соопштението на Град Скопје.

Градот Скопје им препорачува на возачите да возат внимателно и да ја прилагодат брзината на движење на условите на патот.

– Потсетуваме дека во надлежност на Град Скопје се булеварите и одредени градски улици, а преостанатите улици се во надлежност на општините и тие се задолжени за нивно чистење и одржување – додаваат од Град Скопје.


Опожарени три објекти во центарот на Скопје


Скопје, 31 декември, 2016 - 14:12 (META) 

На 30 декември, околу 9.45 часот, во Скопје, на улица Мирче Мацан настанал пожар во барака, при што биле зафатени и целосно опожарени три објекти, од кои еден сопственост на ЈП „Улици и патишта“, сервис за плински уреди сопственост на С.Ѓ. и адвокатска канцеларија сопственост  на Р.Р.

Пожарот е изгаснат, а повредени лица нема.

Увид на местото на настанот извршила екипа на СВР Скопје.


Се санираат фасади од староградската архитектура во Струга


Охрид, 15 декември, 2016 - 14:51 (META) 

По обновата на неколку објекти од староградската архитектура во Охрид, НУ Завод за заштита на спомениците на културата и музеј од Охрид со истата активност продолжи во Струга, каде веќе ја заврши обновата на фасадата на еден објект лоциран во старото градско јадро.

Целосно е обновена надворешноста и покривната конструкција на објектот на улицата Гоце Делчев бр. 84, попознат како куќата на Роза Несторова-Ристова.

Станува збор за објект од 19 век со типична староградска архитектура, кој со овие конзерваторски активности ја сочува својата впечатлива надворешност.

Сега се во тек активностите за конзервација и за реставрација на фасадата на објект лоциран на улица Браќа Миладиновци, број 32, попознат како Куќата на Љуба Блажеска, а ќе се работи и на други објекти.

– Со проектот за конзервација на фасади на повеќе објекти од староградска и градска архитектура низ градовите во Македонија, тие се заштитуваат од понатамошно пропаѓање и од целосно губење на автентичноста. Исто така, се подобруваат и визурите на карактеристични делови од старото градско јадро, како и амбиентот и ликот на амбиенталните целини на цели улички – велат во Завод и музеј во Охрид.


Речиси две третини од општинскиот буџет на Аеродром за плати и за дотации


Скопје, 7 декември, 2016 - 13:30 (META) 

На вчерашната 59. седница на Советот на Општина Аеродром, беше донесен буџетот за 2017 година, кој изнесува околу 18 милиони евра и е сличен на годинешниот, се вели во соопштението на Општината.

Од него, 11 милиони евра се предвидени за дотации и за плати во основните училишта и во градинките и за општинската администрација. Остатокот, односно седум милиони евра, се планира за реализација на проекти и тоа едната половина за довршување на почнатите проекти во 2016 година, а другата половина на средствата за нови проекти предвидени за 2017 година.

„Буџетот за 2017 година се базира врз реалните приходи што ги очекува Општината. Ние сме една од ретките општини во Република Македонија што не се задолжени ниту денар и што ги сервисира редовно своите обврски врз основа на своите приходи, а не на кредити за реализација на проекти“, изјави градоначалникот на Општина Аеродром, Ивица Коневски.

Меѓу покрупните проекти опфатени во буџетот за реализација во 2017 година се изградба на нова детска градинка во Ново Лисиче, како и реализација на инфраструктурни објекти како изградба на комунална инфраструктура и асфалтирање на улици.


Kвалитетната градба e услов за стабилни објекти при силен земјотрес


Скопје, 16 ноември, 2016 - 14:07 (META) 

Во Македонија постои традиција и техничка регулатива за проектирање, изведба и за контрола на градби отпорни на силни земјотреси. Но, регулативата треба да се почитува во целост за да може објектите што се проектираат и се градат да се сметаат за сеизмички отпорни.

Ова е еден од заклучоците на домашните експерти кои учествуваа во дискусијата на стручниот форум посветен на сеизмичката отпорност на градбите во организација на Градежниот факултет од Скопје, Заводот за испитување на материјали и развој на нови технологии (ЗИМ), Институтот за земјотресно инженерство и инженерска сеизмологија (ИЗИИС) и Цементарница УСЈЕ.

Според професорите од Градежниот факултет во Скопје, неопходно е да се посвети внимание на делот од регулативата што го третира испитувањето на сеизмичката повредливост на постојните објекти, бидејќи за нив е неопходна специфична експертиза.

Дополнително, еден од основните услови за успешно асеизмичко проектирање на конструкциите, исто така, е и познавањето на геолошките карактеристики на почвата каде се гради.

„Особено внимание треба да се посвети на сигурноста на градбите за кои постојат недоречености во важечките прописи, како што се: доградбите, надградбите, објектите кои се реконструираат и другите специфични комплексни објекти“, истакна директорот на Институт за земјотресно инженерство и инженерска сеизмологија, Михаил Гаревски.


Обвинети во „Диво Насеље“ префрлени во Охрид, градот под силно обезбедување


Охрид, 4 ноември, 2016 - 10:32 (META) 

Од синоќа, центарот на Охрид, околу објектите на Секторот за внатрешни работи, е под силно полициско обезбедување, што предизвика коментари и вознемиреност кај граѓаните.

Веќе втор ден улицата и паркиралиштата пред СВР Охрид, затворот и пред објектот на охридската противпожарна бригада се блокирани и забрането е паркирање и задржување на возила.

Објектите ги обезбедуваат вооружани полицијаци под полна опрема.

Надлежните сè уште не излегле со официјално соопштение, меѓутоа, како што дознава „Мета“ од извори во полицијата, засилените мерки на безбедност се поради неколку лица, обвинети во случајот „Диво Насеље“, кои се префрлени од Скопје во Охрид.


Тетовските гимназијалци ќе следат настава во старото медицинско училиште


Тетово, 7 октомври, 2016 - 15:31 (META) 

Наставата на македонски наставен јазик за тетовските гимназијалци ќе продолжи привремено да се одвива во двете згради на старото медицинско училиште. Децата во овие објекти ќе почнат да учат откако, најверојатно месецов, ќе заврши нивната реконструкција. Засега средношколците следат предавања во големата сала на Општина Тетово.

– Па, тука е лошо за следење настава. Ги нема потребните услови. Нема табла, има само една сала, па поради тоа цела настава ни трае час и половина, што е недоволно – изјави ученичка од гимназијата „Кирил Пејчиновиќ“ во Тетово.

Од секторот за образование на Општина Тетово велат дека интензивно се работи на реконструкција на зградите, кои подолг период беа во рунирана состојба. Се работи и на трајно решение за просторниот проблем на тетовските гимназијалци.

– Работиме на добивање дозвола за изградба на објект во рамките на централниот објект на гимназијата, што би било трајно решение за просторниот проблем на гимназијалците што следат настава на македонски јазик. По добивањето дозвола, се надеваме дека централната власт ќе одвои пари за изградба на овој објект, изјави Ахмед Ќазими, раководител на секторот за образование при Општина Тетово.

Инаку, предлогот тетовските гимназијалци привремено да следат настава во двата објекти на старото медицинско училиште, го понуди градоначалничката на Тетово, Теута Арифи. Но, тој беше одбиен од советот на родители и професори при тетовската гимназија. По десетина дена, советот се премисли и го прифати предлогот, со образложение дека најважно е учениците да не губат настава.


Неколку илјади луѓе во Белград протестираат поради Савамала


Белград, 30 септември, 2016 - 9:58 (META) 

Неколку илјади луѓе се собраа синоќа пред градското обрание на Белград на протест поради нелегалното уривање објекти во населбата Савамала, заради изградба на проектот „Белград на вода“.

Протестот беше одржан под слоганот „Нема страв, нема предавство“, а беше завршен со прошетка низ градските улици до зградата на Вишото јавно обвинителство, кое ни по пет месеци не ја завршило истрагата за случајот „Савамала“.

Учесниците носеле транспаренти на кои пишувало „Паѓа Мали“ (белградскиот градоначалник), „Маските паднаа“, „Фантомките убаво ви стојат“, „Поради слобода, не даваме“. На протестот имало и жолта шатка која станала симбол на протестите.

Протестот по шести пат го организираше иницијативата „Не го давиме/даваме Белград“ (Не да(је)мо Београд), барајќи оставки на министерот за внатрешни работи Небојша Стефановиќ, градоначалникот на Белград, Синиша Мали и други градски функционери поради нелегално уривање објекти, врзување и малтретирање луѓе во населбата Савамала и поради тоа што полицијата не одговорила на повиците за помош.

Вечерта по одржаните парламентарни избори во Србија, меѓу 24 и 25 април, маскирани лица со фантомки на главата, со помош на багери урнале неколку објекти во Савамала, а никој од надлежните не интервенирал на повикот на граѓаните.


МВР ги сумираше штетите од серијата земјотреси


Скопје, 14 септември, 2016 - 14:21 (META) 

Министерството за внатрешни работи (МВР) денеска излезе со збирна информација за штетите што ги предзвикаа серијата земјотреси што го погодија Скопје на 11 септември, од кои најсилниот беше со магнитуда од 5,3 степени според Рохтеровата скала, пријавени во Единицата за команда и известување во СВР Скопје.

Според податоците на МВР, земјотресот предзвикал штети во станбени објекти, пукање на цевки од парно греење, оштетени се покриви и поплавени се простории во повеќе општини во Скопје.

  • Општина Центар – паднати кабли од бандера врз куќа, пуканти цевки од топловодната мрежа и поплавени простории во Македонската радиотелевизија (МРТ), прекин на електрична енергија во Полициската станица Центар, оштетени две возила;
  • Бит-пазар (општина Чаир) – оштетени два автомобили, пукнати sидови и тавани во куќа, оштетен покрив и таван од куќа;
  • Драчево (општина Кисела Вода) – целосно урнат покрив од куќа;
  •  Чаир – пожар во куќа;
  • Аеродром – поплавени простории од пукнати цевки за парно греење во три стана;
  • Кисела Вода – за време на земјотресот, од покрив паднале неколку керамиди и повредиле жена. Кај неа биле констатирани телесни повреди на главата, рамото и на ногата, и по укажаната лекарска помош во градската општа болница „Св. Наум Охридски“ била пуштена на домашно лекување.

Од земјотресите, според МВР, оштетувања имало и во објекти на СВР Скопје.

„Утврдено е дека има оштетувања на службени простории кои се во состав на СВР Скопје, односно на полициската станица од општа надлежност Бит-пазар, полициската станица за безбедност во патниот сообраќај (Пролет), полициската станица Карпош, полицискиот оддел Арачиново, објектот каде се сместени комисиите на одделението за увиди за сообраќајни незгоди и на едницата „Алфа“ и просториите во МРТ, каде е сместена Единицата за криминалистичко разузнавање и аналитика“, информираат од МВР.

Оттаму додаваат дека за констатираните оштетувања се подготвуваат службени белешки и ќе бидат пријавени на телефонскиот број 195.

„Не е побарано дополнително или засилено присуство на полицијата на терен, со исклучок на превентивно обезбедување (со редовна смена) на влезовите од медицинските установи, ургентни центри, за непречено донесување на евентуално повредени лица“, велат од МВР.


ИЗИИС: Земјотресот оштети болници, градинки, училишта и станбени згради


Скопје, 13 септември, 2016 - 15:19 (META) 

Земјоделскиот факултет, Апелацискиот суд, неколку болници и градинки, три училишта и повеќе станбени згради имаат штети од земјотресите, информираат од  Институтот за земјотресно инженерство и сезмологија Скопје (ИЗИИС).

Оттаму велат дека сите оштетувања се во неконструктивните делови на објектот, а стабилноста на објектите не е доведена во прашање.

Некаде ѕидовите се одделени од конструктивните елементи и може да се случи да падне малтер или цигла, поради што и има препорака одредени простории да се затворат и да не се користат додека не се санира оштетувањето.

Вчера тимовите на Институтот за сеизмологија посетиле околу 60 објекти од јавен интерес. Увидот продолжува и денеска, а увидот на настанатото оштетување кај индивидуалните куќи ќе треба да го направат општински комисии.

Како што информираат, пак, од Општина Центар, регистрирани се напукнувања на малтерот во едно училиште и во две градинки во таа општина. Оттаму велат дека по проверката на луѓе од ИЗИИС, Центарот за управување со кризи (ЦУК) и од Општина Центар, забранети се за користење две училници во основното училиште „11 Октомври“, а во градинката „Раде Јовчевски Корчагин“ и во клонот „Јасмин“ на градинката „13 Ноември“, поради паѓање на малтерот во некои занимални, децата се префрлени на згрижување во други простории. Сепак, од Општината велат дека наставата и згрижувањето на децата се одвиваат непречено и инсистираат ИЗИИС побргу да им го достави записникот за да може Општината да ги санира нарушувањата.

Според информациите на „Мета“ од терен, во некои од одделенијата во училиштата во повеќе скопски општини на настава се присутни половина или една третина од децата.

Од Министерството за образование велат дека тие не можат да донесат одлука за затворање на училиштата, ниту да влијаат врз индивидуалната одлука на родителите, туку чекаат инструкции од Управувачкиот комитет за справување со кризи, како централно тело за справување со кризи.

Некои од општините веќе презеле одредени мерки, па така градоначалникот на општината Ѓорче Петров, Сокол Митровски, свикал состанок со директорите на деветолетките. Тие го известиле дека презеле соодветни мерки предвидени за вонредни ситуации.

– Во училиштата беа поставени знаци (насоки) за движење при евакуација на децата и на персоналот. Испратени се пишани известувања во секоја училница за однесување на децата и на наставниците за време на земјотрес и одржани се две показни вежби на кои учество зедоа сите ученици и наставници од училиштата. Освен во ООУ „Димитар Поп-Георгиев Беровски“, каде што има одредени оштетувања на вториот кат од училиштето изградено во 50-тите години од миниот век и каде што наскоро ќе се преземат мерки за санирање на штетите, во другите училишта нема никакви оштетувања што можат да го загрозат непреченото одржување на редовната настава. Иста е ситуацијата и во објектите на градинките – информираат од Општина Ѓорче Петров.