Иванов во посета на САД, ќе се обрати на 73. сесија на Генералното собрание на ОН


Њујорк, 20 септември, 2018 - 12:38 (META) 

Претседателот на Република Македонија, Ѓорге Иванов, од денеска ќе престојува во работна посета на Соединетите Американски Држави, по повод учеството на 73. сесија на Генералното собрание на Обединетите Нации во Њујорк, информираат од кабинетот на претседателот.

Иванов на 27 септември ќе има обраќање на генералната дебата на 73. сесија на Генералното собрание на Обединетите Нации на тема: „Да ги направиме Обединетите нации релевантни за сите луѓе: Глобално лидерство и заедничка одговорност за мирни, рамноправни и одржливи општества“.

Во рамки на учеството на Генералното собрание на ОН Иванов ќе се сретне Генералниот секретар на ОН, Антонио Гутереш и ќе има повеќе билатерални средби со шефови на држави и влади, учесници на Генералното собрание.

Предвидено е Иванов да присуствува на настанот на високо ниво – Глобален повик за акција за светскиот проблем со дрогата, со кој ќе претседаваат Претседателот на САД, Доналд Трамп и Генералниот секретар на ОН, Гутереш. Македонскиот претседател ќе присуствува и на Мировниот самит Нелсон Мандела 2018, пленарен состанок на високо ниво посветен на глобалниот мир, а по повод 100-годишнината од раѓањето на поранешниот јужноафрикански лидер.

Претседателот Иванов во Њу Џерси ќе оствари средба со претставници на македонската заедница.

Во рамки на работната посета на САД, на Иванов во Детроит ќе му биде врачена наградата Глобален државник, највисоко признание што го доделува Обединетата Македонска Дијаспора. Во Детроит претседателот Иванов ќе одржи предавање на Државниот универзитет Вејн, во чии рамки е Мајк Илич Школата за бизнис, и ќе оствари средба со македонската црковна заедница во Детроит.

Сопругата на претседателот, Маја Иванова ќе присуствува на настанот со првите дами учеснички на 73. Генерално Собрание на Обединетите Нации во организација на Првата дама на САД, Меланија Трамп, како и на настан кој го приредува Првата дама на Република Турција, Емине Ердоган.


Гутереш ги повика граѓаните на двете земји заедно да го придвижат процесот напред


Њујорк, 13 јуни, 2018 - 10:30 (META) 

Генералниот секретар на Обединетите нации, Антонио Гутереш во писмена изјава го поздрави договорот кој што го постигнаа Македонија и Грција за решение на спорот за името. Тој ги поздрави сите засегнати страни за нивната решеност да му стават крај на долготрајниот спор и за покажаното лидерство.

Гутереш им честиташе на сите кои што конструктивно учествуваа во напорите што доведоа до договор. Тој му оддаде почит на својот личен пратеник, медијаторот, Метју Нимиц, за кој вели дека ги отелотворил вредностите на упорност, трпеливост и мирна дипломатија во олеснувањето на овој историски договор во текот на многу години.

Генералниот секретар ги повика сите граѓани во двете земји заедно да го придвижат процесот напред. Тој ја потврди посветеноста на Обединетите нации да ја обезбедат сета потребна поддршка, како преку неговиот личен пратеник, така и преку релевантни агенции, фондови и програми на ОН.

Гутереш е убеден дека решавањето на овој долготраен спор ќе има позитивни реперкусии во Европа и пошироко и се надева дека засегнатите страни на други долготрајни конфликти може да бидат инспирирани од овој развој и да работат без натамошно одложување кон преговарачките процеси.


Иванов до Нимиц: Сакаме решение за името кое нема да задира во идентитетот


Скопје, 1 февруари, 2018 - 14:36 (META) 

Македонија ќе продолжи и понатаму конструктивно да учествува во процесот за изнаоѓање на решение на наметнатиот спор од страна на Грција, кое нема да задира во идентитетот на македонскиот народ и нема да го наруши достоинството на македонските граѓани, истакнал претседателот Ѓорге Иванов на средбата со медијаторот Метју Нимиц.

На средбата, како што соопштија од кабинетот на Иванов, била разгледана актуелната состојба на процесот кој се води под покровителство на ОН и биле разменети информации и мислења поврзани со идеите и размислувањата на Нимиц, како и за исходот од неговата посета на Атина.

„Претседателот Иванов потенцираше дека решението за разликата околу името може да се бара само во рамките на Обединетите нации, и го реафирмираше ставот дека е потребно стриктно придржување до рамката во која се водат разговорите – Повелбата на Обединетите нации, резолуциите на Советот за безбедност, Времената спогодба и пресудата од Меѓународниот суд на правдата“, стои во соопштението.

Иванов го поздравил интензивирањето на дијалогот и потензирал дека надминувањето на разликата околу името мора да биде во согласност со меѓународното право и меѓународно преземените обврски.


ОН: Нема друг збор за Трамп освен расист


Женева, 12 јануари, 2018 - 15:42 (META) 

Обединетите нации остро ја осудија и ја нарекоа расистичка изјавата на американскиот претседател Доналд Трамп кој африканскиte земји и Хаити ги нарече „дупки“.

-Ако тоа се потврди, во прашање е шокантна и срамна изјава на претседателот на САД. Нема друг збор кој би можел да се употреби освен „расист“ – рече на прес-конфренција портпаролот на ОН, Руперт Колвил.

Трамп на состанок со членовите на Конгресот наводно прашал зошто луѓе со потекло од „вуко….а“ доаѓаат во САД. Коментарот се однесувал на луѓето од Хаити и од некои африкански земји.

Белата куќа не негираше дека Трамп користел вулгарни зборови на состанокот со членовите на Конгресот кој бил посветен на прашањето за имиграцијата.

Африканската унија соопшти дека е „искрено вознемирена“ со изјавата на претседателот и од таму додаваат дека ваквите изјави штетат на глобалните вредности за различноста, човековите права и взаемното разбирање.

Трамп на „Твитер“ напиша дека тоа не биле зборовите кои што тој ги употребил.


Трамп ја критикуваше Кина поради наводите дека ѝ дава нафта на Северна Кореја


Вашингтон, 28 декември, 2017 - 21:00 (META) 

Претседателот на САД, Доналд Трамп денеска ја критикуваше Кина во врска со објавените информации во медиумите дека нафта од кинеските бродови незаконски била префрлана во севернокорејски бродови на море, јавуваат светските агенции.

Трамп на „Твитер“ наведе дека Кина е „фатена во прекршок“ и дека е „многу разочаран што Кина дозволува нафтата да стигне во Северна Кореја“.

Американскиот претседател додаде дека „никогаш нема да има пријателско решение за севернокорејскиот проблем“, ако продолжи ваквата практика.

Министерството за надворешни работи на Кина вчера соопшти дека Пекинг ги применува санкциите на Обединетите нации кон Северна Кореја и дека нема информации за префрлање на нафта.


Во нападите на арапската коалиција во Јемен убиени 109 цивили, соопшти ОН


Женева, 28 декември, 2017 - 18:56 (META) 

Во воздушните напади на арапската коалиција предводена од Саудиска Арабија во Јемен загинале 109 цивили за десет дена, соопшти денеска координаторот на Обединетите нации (ОН) за хуманитарни прашања, Џејми Мекголдрик, јавуваат светските агенции.

Според него, меѓу жртвите се 54 лица кои биле убиени во воздушните напади на пазар во западната провинција Таиз, како и 14 лица од едно исто семејство убиени во напад на имот во провинцијата Ходеида.

Мекголдрик изјави дека ваквите инциденти покажуваат непочитување кон човечкиот живот и упати критики до сите страни во судирот, вклучително и до коалицијата предводена од Саудиска Арабија, кои како што рече продолжуваат со оваа апсурдна војна.

Арапската коалиција од март 2015 година бомбардира позиции на шиитските бунтовници во Јемен. Коалицијата го поддржува претседателот на Јемен, Абед Рабо Мансур Хади, кој беше принуден да побегне од земјата.

Во граѓанската војна во Јемен досега загинаа речиси 9.000 луѓе, десетици илјади се ранети, а повеќе од три милиони се бегалци. Здравствената и санитарната инфраструктура во земјата е речиси целосно уништена.

Јемен е погоден и од тешка хуманитарна криза, пред се поради недостиг на храна.


САД ги намалија средствата кои им ги доделуваат на ОН


Вашингтон, 26 декември, 2017 - 14:02 (META) 

САД соопштија дека го намалуваат придонесот во буџетот на Обединети нации за повеќе од 285 милиони долари за фискалната 2018-19 година. Намалувањето ќе се однесува на управувањето и поддршката на ОН.

Американската амбасадорка при ОН, Ники Хејли вчера изјави дека „неефикасноста и претераното трошење на ОН се добро познати“ и додаде дека САД нема да дозволи да се искористува „великодушноста на американскиот народ или трошењето да биде неконтролирано“.

Хејли наведе дека станува збор за историска одлука и претставува „голем чекор во добар правец“ за зголемување на ефикасноста на ОН.

Одлуката за намалување на учеството на САД во буџетот на ОН следи откако Генералното собрание на ОН усвои резолуција со која се осудува одлуката на американскиот претседател, Доналд Трамп да го признае Ерусалим за главен град на Израел.


ОН усвои резолуција за Крим


Њујорк, 20 декември, 2017 - 10:45 (META) 

Генералното Собрание на Обединетите нации усвои резолуција со која остро се осудува кршењето на човековите права на полуостровот Крим, кој Русија го анектираше во 2014 година.

Резолуцијата, во Русија се наведува како „окупаторска сила“, ја поднесе Украина со поддршка од 30 земји и беше одобрена од 70 држави членки. Дваесет и шест земји, меѓу кои и Русија, Белорусија, Казахстан, Србија и Кина, гласаа против, а 76 држави биле воздржани.

Од делегацијата на Украина соопштија дека резолуцијата го потврдува постоењето на вооружен судир меѓу Украина и Русија и оти се осудува ретроактивната употреба на законот на Русија на територијата на Крим. која официјална Москва ја анектираше во 2014 година.


Фицо: Балканот повторно гори, потребна му е европска перспектива


Њујорк, 19 декември, 2017 - 16:25 (META) 

Важно е на некои држави од Балканот да им се понуди европска перспектива, изјави во Њујорк словачкиот премиер, Роберт Фицо по разговорите со генералниот секретар на ОН, Антонио Гутереш.

– Балканот повторно гори, неопходна е европска перспектива. Во спротивно нервозата во регионот ќе продолжи да расте – рече Фицо.

Тој со Гутереш разговарал и за словачкиот проект чија цел е да го ограничи приливот на мигранти, а е изработен во соработка со други земји.

– Мораме да продолжиме со проекти и вон ЕУ и да ги поместиме прашањата за миграција во овие трети земји. Словачка е подготвена да поддржи и одговорни проекти внатре во ОН – рече Фицо

Тој истакна дека е важно ОН да бидат силни, особено затоа што ЕУ не е доволно силна повеќе да се ангажира по некои прашања.

– ЕУ во суштина не е присутна во Украина, a немаме ниту влијание и во Сирија – рече Фицо, истакнувајќи ја важноста на силни меѓународни организации во слични конфликти, како што е ОН.


Ердоган ќе бара поништување на одлуката на Трамп за Ерусалим во ОН


Турскиот претседател Реџеп Таип Ердоган најави дека ќе покрене иницијатива во ОН да се поништи одлуката на Доналд Трамп да го признае Ерусалим како израелска престолнина.

Ердоган рече дека Турција најпрво ќе побара поништување на одлуката на Советот за безбедност на ОН и оти ако тој обид не успее прашањето ќе го покрене пред Генералното собрание на ОН.

Лидерите на муслиманските земји на конференција во Истанбул, која се одржа во средата ја осудија одлуката на Трамп за Ерусалим и го повикаа светот да реагира така што ќе го признае источен Ерусалим за престолнина на Палестина.