!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Евакуирано седиштето на ОН во Њујорк поради аларм за пожар


Њујорк, 18 јули, 2017 - 20:44 (META) 

Повеќе од 2.000 луѓе се евакуирани од седиштето на Обединетите нации во Њујорк, откако во подрумот на зградата се активирал аларм за пожар.

Заменик-портпаролот на ОН, Фархан Хак, изјави дека алармот бил проверен и дека се утврдило дека нема пожар. Тој рече дека зградите од комплексот биле веднаш евакуирани по алармот и тоа во знак на „претпазливост во случај на евентуален пожар“.

Дипломатите, вработените и посетителите можеле да се вратат во зградата дури по 25 минути.
Поради тревогата, за 40 минути беше одложена седницата на Советот за безбедност на ОН посветена на Хаити.


ОН повикуваат на почитување на примирјето на истокот на Украина


Киев, 9 јули, 2017 - 18:10 (META) 

Генералниот секретар на Обединетите нации, Антонио Гутереш, денеска ги повика украинските власти и проруските бунтовници строго да го почитуваат новиот прекин на огнот на истокот на Украина.

– Знаеме дека конфронтациите продолжуваат. Повикуваме на целосен прекин на огнот – изјави Гутереш во Киев, пред состанокот со украинскиот премиер Володимир Гројсман.

Новиот прекин на огнот на истокот на Украина стапи на сила на 24 јуни и треба да трае до 31 август за да можат земјоделците да ги завршат своите работи на нивите.

Бројни прекини на огнот беа воведени за Нова година, како и за почетокот на школската година, но трајно примирје досега не успеа да се воспостави од почетокот на конфликтот во април 2014 година, во кој загинаа повеќе од 10.000 луѓе.


ОН сметаат дека договорот за примирје во Сирија ќе помогне за мировните преговори


Дамаск, 8 јули, 2017 - 14:37 (META) 

Обединетите нации го поздравија договорот што САД и Русија го постигнаа за примирје на југозападот на Сирија, наведувајќи дека тоа ќе помогне за мировните преговори.

Заменикот на специјалниот известувач на ОН за Сирија, Рамзи Рамзи, изјави дека договорот за примирјето кој е постигнат вчера во Хамбург на самитот на Г20, претставува чекор напред во правилна насока.

Рамзи изрази надеж дека и за други области во Сирија ќе биде постигнат сличен договор за спречување на насилство.

Рамзи говореше во Дамаск во пресрет на новата рунда мировни преговори што треба да се случат в понеделник во Женева со посредство на ОН.

Примирјето ќе стапи на сила в недела по сириско време, изјавија властите на САД и владата на Јордан, која е исто така вклучена во договорот.


Треба дополнителен импулс од двете страни во спорот за името, му порачал Иванов на Нимиц


Скопје, 2 јули, 2017 - 19:29 (META) 

Неопходно е стриктно придржување до рамката во која се водат разговорите за спорот за името – резолуциите на Советот за безбедност, Привремената спогодба и пресудата од Меѓународниот суд на правдата во Хаг, истакнал македонскиот претседател, Ѓорге Иванов, на средбата со Метју Нимиц, специјален пратеник на Обединетите нации во разговорите меѓу Македонија и Грција за прашањето за името.

Иванов порачал дека Македонија и понатаму ќе учествува во процесот што се води под покровителство на ОН и дека е потребно да се создаде „позитивен амбиент за подобро разбирање и за почитување“.

„Неопходно е да се даде дополнителен импулс од двете страни во надминување на ова прашање, кое има суштинско значење за стабилноста и за просперитетот на целиот регион“, истакнал Иванов на средбата со Нимиц, на која ја поздравил и конструктивноста и фокусираноста на мерките за градење доверба меѓу двете држави и повикал на нивно проширување и на внесување нови содржини.

Нимиц, кој од денеска до 4 јули претстојува во Скопје, утре во 9 часот ќе има средба со премиерот Зоран Заев, а потоа ќе се сретне и со министерот за надворешни работи, Никола Димитров.

Веднаш по посетата на Скопје, предвидено е Нимиц да замине за Атина, на покана на грчката влада.

Специјалниот пратеник на ОН пред неговото доаѓање изјави дека целта на неговата посета е да ја испита подготвеноста за сериозен напредок во разговорите меѓу Скопје и Атина за спорот за името.


Нимиц: Не носам нов предлог за името, доаѓам да ја тестирам подготвеноста за напредок


Скопје, 1 јули, 2017 - 18:59 (META) 

Овојпат не носам ново предлог-решение во Скопје, доаѓам да разговараме за напредокот во преговорите со Атина околу спорот за името, вели специјалниот пратеник на Обединетите нации во разговорите меѓу Македонија и Грција во интервју за емисијата „360 степени“ на телевизијата „Алсат М“.

Нимиц, кој од денеска до 4 јули ќе престојува во Скопје, на покана на македонската Влада, вели дека е добро што новиот државен врв покажува волја разговорите да продолжат.

– Во Скопје има нова влада со нови идеи околу ова прашање. Во изминативе неколку години од различни причини времето не беше соодветно за интензивни и сериозни преговори за прашањето за името. Се надевам дека вниманието се враќа кон ова многу важно прашање, одам за да се сретнам со страните и да ја тестирам подготвеноста за сериозен напредок. Овојпат не носам нов предлог – вели Нимиц.

Тој посочува дека во изјавите на новата влада се чувствува клима за подобрување на односите со соседите.

– Ги читам изјавите на премиерот, на министерот за надворешни работи и на другите функционери во новата влада. Има аспекти што даваат надеж, во однос на тоа што тие го велат. Мислам дека отсекогаш беше важно земјата да се согласува со соседите. Соседството е тежок регион, а земјата е нова земја и како што знаете во ОН е под привременото име – Поранешна југолосвенска република Македонија, кое јас како претставник на ОН морам да го користам. Но, тоа име отсекогаш беше планирано да биде привремено, а Привремената спогодба е веќе стара, напишана е во 1995 година. Така што, време е да се решат некои проблеми и ми се допаѓа што луѓето имаат свеж пристап во однос на прашањата со соседните земји – вели специјалниот пратеник на ОН во интервјуто.

На покана на Владата на Грција, предвидено е Нимиц да замине за Атина веднаш по посетата на Скопје.

Специјалниот претставник на ОН во разговорите меѓу Македонија и Грција последен пат ги посети двете земји кон крајот на јули 2014 година.


ОН: 173 загинати, 100.000 заробени лица во Рака


Рака, 28 јуни, 2017 - 20:54 (META) 

Високиот комесар за човекови права на Обединетите нации, Зеид Раад ал Хусеин, соопшти дека овој месец најмалку 173 цивили се убиени во операција против Исламска држава во Рака.

Тој соопшти дека 100.000 цивили се заробени во тој сириски град.

Светските агенции пренесуваат дека Ал Хусеин ги изнел овие податоци во време кога борците со поддршка од САД водат борба за преземање на Рака од рацете на Исламска држава.

Ал Хусеин ги повика сите страни, вклучувајќи ја и меѓународната заедница, да ги преземат сите можни мерки за да ги поштедат животите на цивилите заробени во тој град.

– Цивилите не смеат да бидат жртвувани заради брзите воени победи – соопшти високиот комесар за човекови права на ОН.


ОН: До 2050 година на Земјата ќе има повеќе од 9 милијарди жители


Њујорк, 22 јуни, 2017 - 11:59 (META) 

Индија за седум години ќе ја надмине Кина по бројот на жители, а се очекува Нигерија пред 2050 година да стане трета најнаселена земја во светот и да ги претекне САД, се наведува во извештајот на Обединетите нации.

Според извештајот на Економскиот и социјалниот комитет на ОН, светската популација од сегашните речиси 7,6 милијарди луѓе ќе достигне 8,6 милијарди до 2030 година, 9,8 милијари до 2050 г. и на 11,2 милијарди до 2100 година.

Бројот на жители на Земјата секоја година се зголемува за 83 милиони луѓе. Ваквиот тренд, според ОН, ќе продолжи и покрај фактот што од 1960-тите фертилитетот континуирано се намалува.

Директорот на секторот за популација, Џон Вилмонт, изјавил дека вклучува иноформации за популацијата на 233 земји во светот. Вилмонт вели дека бројот на жители во Африка брзо се зголемува, додавајќи оти се очекува до 2050 година половина од светската популација да живее во овој дел од светот.

Според него, може да се очекува намалување на бројот на жители во Европа. Половина од светската популација до 2050 година ќе биде сконцентрирана во само девет земји – Индија, Нигерија, Конго, Пакистан, Етиопија, Танзанија, САД, Уганда и Индонезија.


ОН: Низ светот раселени се 65,6 милиони луѓе


Њујорк, 19 јуни, 2017 - 21:06 (META) 

Рекордни 65,6 милиони луѓе биле принудени да ги напуштат своите домови до крајот на 2016 година, поради војни, насилство и прогон, информираат од Обединети нации.

Оваа бројка претставува скок од 300.000 раселени лица од крајот на 2015 година, но е за повеќе од шест милиони поголема од крајот на 2014 година, се наведува во извештајот на УНХЦР.

– Ова е најголемата бројка од кога го бележиме бројот на раселени лица. Ова е неприфатлив број, кој сведочи погласно од кога било за потребата од солидарност и од заедништво во решавање на кризата – изјави шефот на УНХЦР,Филипо Гранди.


ОН нема да го набљудуваат курдскиот референдум во Ирак


Њујорк, 15 јуни, 2017 - 12:11 (META) 

Обединетите нации нема да се мешаат во референдумот за независност на автономниот курдски регион на северот на Ирак, планиран за 25 септември, соопшти денеска светската организација.

Соопштението на специјалната мисија на ОН во Ирак може да отвори сомнежи за веродостојноста на гласањето, што веќе предизвика критики од централната влада во Багдад и од неколку западни земји.

Претседателот на курдскиот регион, Масуд Барзани, минатата недела изјави дека гласањето треба да одлучи дали регионот ќе се отцепи од Ирак.

Гласањето ќе се одржи во три области кои го сочинуваат курдскиот регион и во областите околу кои се спорат Курдите и централната влада.


Исламска држава се реорганизира и се фокусира на напади во Европа, оцени ОН


Њујорк, 9 јуни, 2017 - 10:24 (META) 

Џихадистичката Исламска држава, и покрај воените неуспеси во Ирак и Сирија се реорганизира и ги насочува своите напади во странство, посебно во Европа, соопштија Обединетите нации.

Потсекретарот на ОН за политички праташа Џефри Фелтман изјави дека џихадистите пружаат отпор во Мосул и Рака, но и дека ги реорганизираат своите воени структури, давајќи им поголеми овластувања на локалните водачи и фокусирајќи се на напади вон зоните на конфликт.

Фелтман како примери ги наведе нападите во Белгија, Франција, Велика Британија, Русија, Шведска, Турција и Германија. Тој рече дека во последните 16 месеци намалени се пораките на исламистите на социјалните мрежи, но заканите остануваат затоа што нивните приврзаници делуваат надвор од Ирак и Сирија и продолжуваат да ја шират нивната пропаганда.

Тој оцени дека ИД месечно добива по неколку десетици милиони долари од продажба на нафта, изнуда на пари, откуп од киднапирани лица, шверц на антиквитети и експлоатација на други ресурси на териториите под нивна контрола, како што е продажбата на фосфат.