Французите се тепаа и си пуштаа крв поради евтината „Нутела“


Париз, 26 јануари, 2018 - 14:53 (META) 

Откако францускиот синџир супермаркети „Интермарш“ вчера воведе попуст од 70 отсто на популарниот крем „Нутела“, па теглите со тежина од 950 грама беа поевтинети од 4,5 на 1,4 евра, во голем број супермаркети избија тепачки.

Некои муштерии буквално се фрлале на вработените кои ги носеле палетите.

– Беа како животни. Една жена ја кубеа за коса, друга постара жена носеше цела палета на глава, трета беше со раскрвавени дланки – раскажува една жена која пазарувала во супермаркетот „Интермашр“ во Рив де Жир во централна Франција.

Купувачите постојано се туркале и се тепале, па морала да интервенира и полицијата, како во Острикур, каде избила тепачка меѓу купувачите, а исто било и во Рубо, Марл ле Мин и Па де Кале. Во Сен Сипријан купувачите се фрлале врз вработените што донесувале палети со тегли.

Според производителот „Фереро“, малку повеќе од една четвртина од светската потрошувачка на „Нутела“ отпаѓа на Франција.


Италијанската компанија „Фереро“ ќе постави опитни парцели со лешник


Скопје, 9 август, 2016 - 14:35 (META) 

Италијанската компанија „Фереро“ е заинтересирана за поставување опитни парцели со лешник во Македонија, поради што од државата бара под концесија 10 до 20 хектари земјоделско земјиште.

Претставниците на компанијата, Гофредо Перна и Томасо Патикнина, за оваа цел денеска имаа средба со министерот за земјоделство, шумарство и водостопанство Михаил Цветков, како и со државниот секретар Бесир Јашари.

Јашари информираше дека за најповолни за одгледување на лешник се сметаат регионите на Охрид, Струга и Ресен.

Во наредните години ќе се утврдува кој вид лешник најдобро успева, а потоа компанијата планира производство. „Фереро“ е позната по производство на еурокремот „нутела“ како и чоколадните бонбони „рафаело“ и „фереро рошер“.

Компанијата ја реализираше посетата на Македонија на покана од фирмата „Ал јунајтед“ со која соработува, а која во Македонија има 37 хектари засадени со лешник.

 


Почина сопственикот на „нутела“


Монте Карло, 15 февруари, 2015 - 12:22 (META) 

Најбогатиот човек во Италија и сопственик на глобалното царство за чоколади и слатки, Микеле Фереро, почина вчера на 89 години, во својот дом во Монте Карло, по долго боледување.

Компанијата „Фереро“ го произведува намазот „нутела“, чоколадата „фереро-рошер“ и линијата „киндер“, а аналитичарите и банкарите сметаат дека е највредната приватна компанија во Италија.

Сè до пред некоја година Фереро секој ден со хеликоптер од вилата во Монте Карло патувал до седиштето на компанијата во гратчето Алба, на североистокот на Италија, каде активно учествувал во создавањето нови производи.

Магазинот „Форбс“ го опиша како најбогатиот слаткар на светот, а тој и неговото семејство со 23,4 милијади долари се најдоа на 30. место на листата на најбогати луѓе на „Форбс“.