Од пештерата во Тајланд спасени и последното момче и тренерот


Бангкок, 10 јули, 2018 - 14:20 (META) 

Специјалците „фоки“ од тајландската Воена морнарица предмалку соопштија дека од пештерскиот систем, каде беа заглавени од 23 јуни годинава, се спасени и последното момче и тренерот.

Излегувањето од отворот на пештерите Там Луанг на нуркачите и на момчето, беше поздравено со бурен аплауз и френетични извици. Четиримина нуркачи остануваат внатре во пештерите „за секој случај“, велат од тајландската армија, иако со сигурност се знае дека сите заглавени се спасени, а се водеше евиденција и за нуркачите.

Тие ќе бидат пренесени в болница, каде ќе бидат под лекарска нега и набљудување во следните денови.

Првите четири момчиња беа спасени во неделата, а четири во понеделникот, а другите денеска.

Денеска е третиот ден од спасувачката операција за 12-те момчиња, млади фудбалери, и тренерот кои повеќе од две седмици беа заглавени во пештерата во Тајланд, која беше поплавена, па нуркачи им носеа канистри со кислород и храна и пијалоци. Притоа нуркач загина во петокот, кога му снемало кислород враќајќи се од местото каде што беа момчињата.

Системот пештери и пештерски канали, дел поплавени, при што мора да се нурка, а преку кој се извлекуваат момчињата, е долг четири километри. При секое поединечно спасување во изминативе три дена, двајца нуркачи придружуваа а по едно момче и го носеа неговиот канистер со кислород, а момчињата беа со  нуркачка маска преку целото лице, во која влегува кислородот. Тоа е одбрано како подобра варијанта од класичниот нуркачки респиратор, кој се држи со забите. Познатиот бизнисмен Илон Маск понуди и специјална капсула за спасување, во која момчињата би биле затворени, но беше избрана погоре наведената варијанта.

Момчињата исто така добиле лекови за смирување, за да се спречат напади на паника, при што би можеле да се повредат или да ги повредат нуркачите.

Момчињата на возраст од 11 до 16 години на 23 јуни тргнале на своевидна екскурзија за докажување во пештерскиот систем, по што поради поројните дождови кои поплавија некои од каналите, тие оделе сè подалеку и не можеа да се вратат назад. Животите им зависеа од постојаниот дотур на кислород, храна и пијалоци, што беа многу истоштувачки за нуркачите.


Реализирана прва акција за чистење на дното на езерото Матка


Скопје, 21 мај, 2017 - 11:55 (META) 

Нуркачите на спелео-нуркачкиот клуб „Врело“ од Скопје, нуркачи од Охрид, Кавадарци и Битола успешно реализирале спуштање низ езерото Матка од подводната пештера Врело се до местото викано Широко езеро (на половина од браната до пештерите) со цел на лоцирање и означување на подводен одпад, и негово понатамошно отстранување.

Акцијата ја реализирале нуркачи кои биле помогнати со повеќечлен логистички тим и два моторни чамци.

По успешно реализираниот прв чекор, како што најави Кире Ангелески, претседател на спелео-нуркачкиот клуб Врело, ќе започне чистењето на дното на езерото, во кое можат да се вклучат сите заинтересирани за заштита и зачувување на животната средина.

Ова е една од десетте еколошки акции предвидени за ова лето, под наслов „За да не се срамиме пред нашите поколенија за загадените води и уништената природа“.


Нуркачите алармираат дека пастрмката сè помалку ја има


Охрид, 18 јануари, 2017 - 21:10 (META) 

Синоќа во Охрид премиерно беше прикажан документарниот филм на „Амфора“ – „Танцот на пастрмките“, во рамките на активностите за празникот Богојавление – Водици.

Филмот се снимал пет години, исклучиво во зимска сезона, во месеците декември, јануари и февруари, период кога се мрести охридската пастрмка, кој охриѓани го викаат „татиљ“ или тотална забрана за ловење.

Нуркачите направиле материјал од 50 часа, конципиран во употреблив материјал за филм од 28 минути, а биле реализирани повеќе од 100 нуркања.

– Нуркањата беа на длабочина од 2 до 15 метри. Некогаш требаше да се нурка и до 40 метри, но за да се реализира целиот овој проект, имавме доста проблеми со планктон, кој го има во големи количества. Некогаш влегувавме ноќе, се случуваше честопати да има многу матни води, да има и струења, но сепак се надевам дека направивме добар филм – вели Милутин Секулоски од нуркачкиот центар „Амфора“ од Охрид.

Во Центарот за култура „Григор Прличев“ Охрид, покрај прикажувањето на филмот, беа изложени и подводни фотографии, а изложбата беше од хуманитарен карактер.

Пастрмката, за жал, ја има сè помалку, а благодарение на вештачкиот мрест, таа полека се обновува. Од „Амфора“ додаваат дека е пожелно да се прогласи мораториум за неколку години, за да се врати популацијата на оваа риба.

– Мислам дека не е доволен само вештачкиот мрест. Мислам дека можеби треба да се прогласи мораториум за неколку години, за да се врати онаа популација на пастрмката која беше пред 10 или 15 години. За време на мрест пастрмката е многу смирена. Професионалните луѓе нуркачи, кои ја познаваат таа работа, знаат дека за да се доближат до неа, треба на кратко и да се престане со дишење, затоа што, пастрмката чувствува кога нуркачот дише, тогаш се плаши и бега – додава Секулоски.


Кај Струга откриени потопени бродови од 1887 година


Охрид, 31 јули, 2016 - 12:21 (META) 

Нуркачите Никола Паскали, Александар Булески и Кире Ристески, кои се членовите на клубот „Ботом тајм“, откриле потопени бродови во водите на Охридското Езеро.

– Станува збор за два брода – влекачи кои влечат пет т.н. „вагони“ за транспорт на различни добра низ езерото. Истите се произведени во далечната 1887 година во Италија, а намерно биле потопени во 40-тите години од минатиот век, кај Струга. Бродовите се наоѓаат на околу 1.500 метри од брегот, на длабочина од 7 до 9 метри – информираат од „Ботом тајм“.


Кумановец со прострелна рана во главата пронајден во бунар во село Доброшане


Куманово, 30 јуни, 2016 - 12:49 (META) 

Безживотно тело на маж, со прострелна рана на десната слепоочница, е најдено во бунар во близина на црквата „Света Мина“, во село Добрешане, Кумановско, соопшти денеска Јавното обвинителство.

Тим нуркачи на Министерството за внатрешни работи го извадиле телото од бунарот, а надлежен јавен обвинител од Основното јавно обвинителство Куманово извршил увид на местото.

За случајот е осомничено едно лице кое било задржано во полициска станица, а Обвинителството издало наредба за претрес на неговиот дом.

„Надлежен јавен обвинител од Основното јавно обвинителство Куманово изврши увид на место во близина на црквата „Света Мина“ во село Добрашане, каде во бунар кој се наоѓа во борова шума е пронајдено безживотно тело. Во координација со Министерството за внатрешни работи, нуркачи го извадиле телото на кое што била видлива прострелна рана на десната слепоочница. На местото се пронајдени траги од крв и една чаура“, стои во соопштението на Јавното обвинителство.

Оттаму додаваат дека лицето било идентификувано, а се водело како исчезнато неколку дена.

„Надлежниот јавен обвинител издаде наредба за обдукција на починатото лице, како и наредба за вештачење на материјалните траги пронајдени на местото на настанот“, се вели во соопштението.

Од Обвинителството информираат дека до судија на претходна постапка бил доставен предлог за одредување притвор на осомничениот, како и наредба за психијатриско вештачење.


Пронајдено телото на турскиот државјанин што исчезна во Мавровско Езеро


Гостивар, 2 септември, 2015 - 14:04 (META) 

По дводневно пребарување, вчера, околу 16 часот, во водите на Мавровско Езеро, во атарот на селото Леуново, било пронајдено безживното тело на турскиот државјанин Ватансевер С.(66), кој во неделата, пливајќи кон спротивниот брег, исчезна во водите на езерото.

Од полицијата информираат дека телото, на околу 200 метри од брегот, го пронашле членови на спелео-нуркачкиот клуб „Врело“ од Скопје.

Јавен обвинител и екипа на гостиварската полиција извршиле увид на местото. По наредба на јавниот обвинител, телото на турскиот државјанин било предадено за обдукција.