Обновливите извори на енергија го победија јагленот во Германија


Берлин, 11 јули, 2018 - 13:56 (META) 

Во првото полугодие на годинава, Германија добила повеќе струја од обновливите извори на енергија, отколку од јагленот, соопшти германската Асоцијација за енергија и вода.

Со тоа Германија и официјално влегува во иднината. Иако досега производената струја од хидроелектрани, соларни електрани и ветроелектрани и од биогас го надминуваше производството од јаглен и лигнит, тоа се случуваше само во одредени денови или седмици, но ова е првпат обновливите извори да доминираат во толку долг период.

Од јануари до јуни, обновливите извори учествувале со 36,3 отсто од вкупното производство, а јагленот само 35,1 отсто. Остатокот отпаѓа на струјата произведена од природен гас и од нуклеарните електрани.

Пресметките велат дека „зелената“ струја изнесувала 118 милијарди киловат часови, а тоа е дури 10 отсто повеќе отколку во истиот период во 2017 година. Струјата произведена со согорување лигнит и јаглен изнесувала 114 милијарди киловатчасови, значително помалку од 127 милијарди киловатчасови во првата половина на 2017 година.

Опаднало и производството на струја од природен гас – од 44 милијарди киловатчасови во првата половина на 2017 година, на 40 милијарди киловатчасови во првото шестмесечје на годинава.  Нуклеарната енергија во првата половина на годинава придонела со 37 милијарди киловатчасови.


Кина ќе изгради 30 нуклеарни електрани долж Патот на Свилата


Пекинг, 3 март, 2016 - 10:17 (META) 

До 2030 година, Кина планира да изгради 30 нуклеарни електрани, изјави претседателот на Националната кинеска нуклеарна компанија, Сун Кин.

Тој рече дека вкупно 70 држави планираат или ги развиваат своите нуклеарни проекти.

– Ние се соочуваме со силна конкуренција на меѓународниот нуклеарен пазар – изјави Кин.

Тој додаде дека земјите како Русија, Јужна Кореја, Јапонија и САД, агресивно го истражуваат глобалниот нуклеарен пазар.

Рутата по која ќе се градат електраните ги опфаќа деловите долж земјоделскиот појас на Патот на Свилата и поморскиот Пат на Свилата на 21 век. Оваа иницијатива ја предложи претседателот на Кина, Си Џинпинг, за зајакнување на регионалната економска интеграција и за инфраструктурно поврзување.