!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Макрон најави историска посета на Иран


Париз, 14 октомври, 2017 - 17:16 (META) 

Францускиот претседател Емануел Макрон планира да го посети Иран, што ќе биде прва посета на шеф на француска држава или влада на Техеран од 1971 година.

Макрон во телефонски разговор со иранскиот претседател Хасан Рохани потврдил дека Франција останува посветена на нуклеарниот договор и покрај одлуката на американскиот претседател Доналд Трамп.

Макрон би можел да го посети Техеран следната година.

Иран и шесте светски сили – САД, Русија, Кина, Велика Британија, Франција и Германија –  на 14 јули 2015 година постигнаа договор со кој се ограничува иранската нуклеарна програма во замена за укинување на меѓународните санкции кон таа земја.


Кина нареди затворање на севернокорејските компании поради санкциите на ОН


Пекинг, 28 септември, 2017 - 15:54 (META) 

Кина нареди затворање на поголем дел од севернокорејски компании кои имаа бизниси во оваа земја, поради санкциите на Обединетите Нации кон Северна Кореја, јавуваат светските агенции.

Фирмите во сопственост на севернокорејски комапнии и поединци мора да бидат затворни во рок од 120 дена од усвојувањето на санкциите, било наведено во одлуката на кинеското министерство за трговија.

Кина е најголем трговски партнер на Пјонгјанг, а севернокорејските компании чии бизниси се во Кина, и помагаат на Северна Кореја да дојде до странски пари.

Советот за безбедност на Обединетите нации на 11 септември ги заостри санкциите против Северна Кореја, откако земјата ја изведе шестата најголема нуклеарна проба досега.

Новите санкциите на ОН вклучуваат ембарго на нафта, забрана за увоз на текстил, мерки поврзани со севернокорејските иселеници и инспекција на сомнителни бродови.


САД има бројни воени опции против Северна Кореја, вели шефот на Пентагон


Вашингтон, 19 септември, 2017 - 10:57 (META) 

Соединетите Американски Држави имаат „бројни“ воени опции против Северна Кореја, од кои повеќето не би ја загрозиле Јужна Кореја, односно би го поштедиле Сеул од брутален контранапад, изјвил американскиот министер за одбрана, Џејмс Матис, јавуваат светските агенции.

„Пастојат многу воени опции кои можеме да ги примениме, заедно со нашите сојузници, за одбрана на сојузниците и на нашите интереси“, изјавил шефот на Пентагон во Вашингтон, без да прецизира за какви воени станува збор.

Инаку, и покрај зовриената реторика помеѓу САД и Северна Кореја, засега нема позиционирање на американски воени сили кои би упатиле на непосреден воен судир.

Матис изјавил дека верува во дипломатијата и санкциите со кои се врши притисок на Пјонјанг за запирање на нуклеарната програма.

Северна Кореја во текот на летото го изведе шестиот, најголем нуклеарен тест досега и лансираше неколку интерконтинентални балистички проектили, по што Советот за безбедност на Обединетите нации (ОН) донесе нов пакет санкации против Пјонгјанг.

САД најавија дека ќе го искористат Генералното собрание на ОН, кое заседава оваа недела во Њујорк, да побара целосна примена на меѓународните санкции против Северна Кореја.

Инаку, за време на Корејската војна, од 1950 до 1953 година, животите ги загубија 50.000 Американсци и милиони Корејци.


Дипломатските средства за Северна Кореја се при крај, вели амбасадорката на САД во ОН


Вашингтон, 17 септември, 2017 - 19:48 (META) 

Доколку САД ги исцрпат дипломатските опции за да ја убедат Северна Кореја да ја запре нуклеарната програма, тогаш најверојатно работите во свои раце ќе ги преземе Пентагон, вели амбасадорката на САД во Обединетите нации, Ники Хејли, за „Си-ен-ен“.

– Ние сакавме да бидеме одговорни и да ги искористиме сите дипломатски средства за да го привлечеме нивното внимание. Ако тоа не успее, тогаш генералот Џејмс Матис (министер за одбрана на САД) ќе ги преземе работите во свои раце – вели Хејли.

Таа предупредува дека војна би значело уништување на Северна Кореја.

– Ако Северна Кореја продолжи со своето несовесно однесување и ако САД треба да се бранат себе и своите сојузници на секој начин, Северна Кореја ќе биде уништена. Сите го знаеме тоа, но никој од нас не го посакува – вели амбасадорката.

Советот за безбедност на ОН во понеделникот оваа недела усвои нов пакет санкции за Северна Кореја како одговор на шестиот и најголем нуклеарен тест на Пјонгјанг.

Американскиот претседател Доналд Трамп санкциите ги нарече „уште еден мал чекор“. Хејли вели дека тие се значајни, но се близу до границите на тоа што САД можат да го постигнат преку ОН.

– Исцрпевме речиси сè што Советот за безбедност засега може да направи – вели Хејли.


Кина бара од Вашингтон и од Пјонгјанг да се воздржат од запалива реторика и акции


Пекинг, 12 август, 2017 - 15:19 (META) 

Кинескиот претседател Кси Џинпинг денеска ги повика Вашингтон и Пјонгјанг да се воздржат од „запаливата реторика и акции“ кои можат да ги зголемат тензиите на Корејскиот полуостров, јавуваат светските медиумите.

Кси Џинпинг во телефонски разговор со американскиот претседател Доналд Трамп рекол дека Пекинг и Вашингтон се заинтересирани за запирање на нуклеарната програма на Северна Кореја.

„Релеватните страни мора да се воздржат и да избегнуваат зборови и дела кои водат кон засилување на тензиите на Корејскиот полуостров“, навел кинескиот претседател.

Трамп, како што јавуваат агенциите, барал од Кина да изврши притисок на Пјонјанг поради нуклеарната програма која би можела да биде насочена кон САД.

Кина е најголемиот трговски партнер и извор на помош на Северна Кореја, но кинеските официјални претставници тврдат дека не можат да ги натераат властите во Пјонгјанг да прекинат со нуклеарните и ракетни програми.

Американскиот претседател Доналд Трамп синоќа најавил дека ќе го прекине својот одмор во Њу Џерси и дека в понеделник ќе одржи прес-конференција во Вашингтон во врска со тензиите со Северна Кореја.


Русија: Амбициите на Северна Кореја се директна закана за Москва


Сингапур, 4 јуни, 2017 - 13:12 (META) 

Заменик-министерот за одбрана на Русија, Александар Фомин, денеска изјави дека амбициите на Северна Кореја во поглед на нуклеарните оружја се „директна закана“ за Русија, јавуваат светските агенции.

„Тоа не е само систем за противракетна одбрана, туку има конкретна цел. Затоа претставува вознемирувачка и директна закана за Русија. Наш принципиелен став е дека на тој начин се зголемува напнатоста во регионот“, рекол Фомин, зборувајќи на меѓународната конференција за безбедност што се одржува во Сингапур, на која учествуваат министри за одбрана и експерти од 39 земји.

Русија се граничи со Северна Кореја и еден од проектилите што ги тестира Северна Кореја падна во близина на руските територијални води. Сепак, ставот на Русија околу решевањето на проблемот со севернокорејската нуклеарна и ракетна програма се разликува од ставот на Соединетите Американски Држави и нивните сојузници.

Фомин истакнал дека „економските ограничувања треба да бидат средство за враќање на Пјонгјанг кон мирно решавање на спорот“.

На конференцијата учествува и министерот за одбрана на САД, Џејмс Матис.


Северна Кореја е непосредна воена закана, смета министерот за одбрана на САД


Сингапур, 3 јуни, 2017 - 12:01 (META) 

Северна Кореја забрзано развива ракета со нуклеарна боева глава која може да претставува закана за Соединетите Американски Држави и за други земји, изјави денеска американскиот министер за одбрана, Џејмс Матис, говорејќи на меѓународна конференција во Сингапур.

Министерот за одбрана на САД ја нарекол Северна Кореја „непосредна воена закана“, јавуваат светските агенции. Матис истакнал дека администрацијата на американскиот претседател Доналд Трамп е охрабрена од тоа што Кина повторно покажала посветеност на соработката со САД и со другите земји што би влијаело на тоа Пјонгјанг да ја напушти програмата за нуклеарно оружје.

Советот за безбедност на Обединетите нации (ОН) вчера усвои резолуција со која се воведуваат санкции против четири институции и 14 севернокорејски функционери, вклучувајќи го и функционерот за кого се верува дека е на чело на разузнавачките служби на земјата.

Текстот на документот што го предложија САД е усвоен едногласно, а резолуцијата ја поддржа и Кина.


Советот за безбедност на ОН се закани со нови санкции кон Пјонгјанг


Њујорк, 20 април, 2017 - 21:12 (META) 

Советот за безбедност на Обединетите нации вечерва ја усвои резолуцијата со која остро се осудуваат последните тестирања на ракети од страна на Северена Кореја и се закани со нови санкции кон Пјонгјанг, јавуваат светските агенции.

Со резолуцијата, која е усвоена едногласно, се осудува однесувањето и „илегалните активности“ на властите во Пјонгјанг, кои се повикуваат повеќе да не изведуваат нуклеарни проби и тестирањата на ракети, забранети со претходните резолуции на Советот за безбедност на ОН.

„Илегалните активности на Северна Кореја со нуклеарни и со балистички ракети во голема мера доведуваат до зголемување на тензиите во регионот и пошироко“, било наведено во резолуцијата.

Резолуцијата е усвоена по договор со Русија, која денеска демантираше дека го блокирала текстот, туку дека сакала во него да се вметне формулацијата „низ дијалог“, која претходно била исфрлена од документот на барање на САД.

Резолуцијата ја поддржала и Кина, која е сојузник на Северна Кореја.

Инаку, Пјонгјанг е под санкции на ОН од 2006 година.


Северна Кореја тестираше нов ракетен мотор


Пјонгјанг, 19 март, 2017 - 12:15 (META) 

Северна Кореја изврши тестирање на нов ракетен мотор во станицата за лансирање Тонгчанг-ри, јавиле севернокорејските државни медиуми, пренесуваат светските агенции.

Севернокорејскиот лидер Ким Џонг-ун по повод тестирањето изјавил дека тоа претставува „ново раѓање на ракетната индустрија на Северна Кореја“.

Државната новинска агенција на Северна Кореја, КЦНА, јавила дека со помош на моторот земјата ќе ги достигне капацитетите за лансирање сателити од светска класа. Агенцијата, во својот извештај, навела дека најверојатно е тестиран нов тип на мотор за ракета со долг домет.

Инаку, тестирањето на новиот ракетен мотор од страна на Пјонгјанг доаѓа за време на посетата на американскиот државен секретар Рекс Тилерсон на Кина, која е главен сојузник на Северна Кореја.

Вчера Тилерсон и неговиот домаќин, шефот на кинеската дипломатија, Ванг Ји, разговараа за севернокорејската нуклеарна и ракетна програма и како што изјавија на прес-конференцијата по средбата, се согласиле на заедничка соработка за да ја убедат Северна Кореја да го напушти сегашниот пат.

Тилерсон, во петокот, за време на посетата на Јужна Кореја, изјави дека на маса е можно да се најде и воен одговор од страна на САД, доколку Северна Кореја продолжи со заканите кон Сеул и кон Вашингтон.


САД: Честото воведување на економски санкиции го слабее доларот


Вашингтон, 31 март, 2016 - 13:26 (META) 

Американскиот секретар за финансии Џек Лу предупреди дека честото воведување на економски санкции може да доведе до слабеење на доларот на светскиот пазар и намалување на американското влијание во светот.

– Мора да бидеме свесни за фактот дека злоупотребата на санкциите може да ја ослаби нашата позиција на лидери на светската економија и да ја доведе во прашање ефикасноста на самите санкции – изјави Лу.

Техеран и шест светски сили САД, Русија, Кина, Велика Британија, Франција и Германија на 14 јули 2015 година постигнаа историски договор со кој на Иран му е ветено укинување на економски санкции во замена за ограничување на нуклеарната програма.