!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Советот за безбедност на ОН се закани со нови санкции кон Пјонгјанг


Њујорк, 20 април, 2017 - 21:12 (META) 

Советот за безбедност на Обединетите нации вечерва ја усвои резолуцијата со која остро се осудуваат последните тестирања на ракети од страна на Северена Кореја и се закани со нови санкции кон Пјонгјанг, јавуваат светските агенции.

Со резолуцијата, која е усвоена едногласно, се осудува однесувањето и „илегалните активности“ на властите во Пјонгјанг, кои се повикуваат повеќе да не изведуваат нуклеарни проби и тестирањата на ракети, забранети со претходните резолуции на Советот за безбедност на ОН.

„Илегалните активности на Северна Кореја со нуклеарни и со балистички ракети во голема мера доведуваат до зголемување на тензиите во регионот и пошироко“, било наведено во резолуцијата.

Резолуцијата е усвоена по договор со Русија, која денеска демантираше дека го блокирала текстот, туку дека сакала во него да се вметне формулацијата „низ дијалог“, која претходно била исфрлена од документот на барање на САД.

Резолуцијата ја поддржала и Кина, која е сојузник на Северна Кореја.

Инаку, Пјонгјанг е под санкции на ОН од 2006 година.


Северна Кореја тестираше нов ракетен мотор


Пјонгјанг, 19 март, 2017 - 12:15 (META) 

Северна Кореја изврши тестирање на нов ракетен мотор во станицата за лансирање Тонгчанг-ри, јавиле севернокорејските државни медиуми, пренесуваат светските агенции.

Севернокорејскиот лидер Ким Џонг-ун по повод тестирањето изјавил дека тоа претставува „ново раѓање на ракетната индустрија на Северна Кореја“.

Државната новинска агенција на Северна Кореја, КЦНА, јавила дека со помош на моторот земјата ќе ги достигне капацитетите за лансирање сателити од светска класа. Агенцијата, во својот извештај, навела дека најверојатно е тестиран нов тип на мотор за ракета со долг домет.

Инаку, тестирањето на новиот ракетен мотор од страна на Пјонгјанг доаѓа за време на посетата на американскиот државен секретар Рекс Тилерсон на Кина, која е главен сојузник на Северна Кореја.

Вчера Тилерсон и неговиот домаќин, шефот на кинеската дипломатија, Ванг Ји, разговараа за севернокорејската нуклеарна и ракетна програма и како што изјавија на прес-конференцијата по средбата, се согласиле на заедничка соработка за да ја убедат Северна Кореја да го напушти сегашниот пат.

Тилерсон, во петокот, за време на посетата на Јужна Кореја, изјави дека на маса е можно да се најде и воен одговор од страна на САД, доколку Северна Кореја продолжи со заканите кон Сеул и кон Вашингтон.


САД: Честото воведување на економски санкиции го слабее доларот


Вашингтон, 31 март, 2016 - 13:26 (META) 

Американскиот секретар за финансии Џек Лу предупреди дека честото воведување на економски санкции може да доведе до слабеење на доларот на светскиот пазар и намалување на американското влијание во светот.

– Мора да бидеме свесни за фактот дека злоупотребата на санкциите може да ја ослаби нашата позиција на лидери на светската економија и да ја доведе во прашање ефикасноста на самите санкции – изјави Лу.

Техеран и шест светски сили САД, Русија, Кина, Велика Британија, Франција и Германија на 14 јули 2015 година постигнаа историски договор со кој на Иран му е ветено укинување на економски санкции во замена за ограничување на нуклеарната програма.


ОН ја затвораат истрагата за Иран


Њујорк, 15 декември, 2015 - 20:40 (META) 

Одборот за нуклеарни прашања на Обединетите нации, составен од 35 земји-членки, денеска одлучи да ја затвори истрагата за тоа дали Иран се обидел да дојде до атомско оружје и одлучи да го поддржи меѓународниот договор со Техеран, соопштија неименувани дипломатски извори.

Речиси две недели откако Меѓународната агенција за атомска енергија (МААЕ) го поднесе извештајот во кој се наведува дека Иран има тајна програма за нуклеарно вооружување, одборот на ОН за нуклеарни прашања едногласно ја усвои резолуцијата со која официјално се затвора истрагата.

МААЕ, сепак, ќе продолжи да ја надгледува активноста на Иран, се наведува во текстот на резолуцијата.


Амано: Иран почна да ја редуцира нуклеарната активност


Женева, 26 ноември, 2015 - 14:09 (META) 

Шефот на Меѓународната агенција за атомска енергија (МААЕ), Јукио Амано, денеска изјави дека Иран почнал да ја редуцира својата нуклеарна активност, во согласност со договорот со шесте светски сили, но дека не може да гарантира дека земјата прави сè според договорот.

Говорејќи пред одборот на МААЕ, кој го сочинуваат претставници на 35 земји, Амано додаде дека не може да се утврди дека „целиот материјал во Иран е во согласност со мировните активности“.

Амано најави дека Техеран наскоро ќе им овозможи на пошироките власти на МААЕ да го надгледуваат спроведувањето на договорот.

Иран и шесте светски сили (САД, Русија, Кина, Велика Британија, Франција и Германија) на 14 јули во Виена постигнаа историски договор, со кој се ограничува иранската нуклеарна програма во замена за укинување на меѓународните санкции кон земјата.