Уапсени близнаци кои планирале бомбашки напад во Њујорк


Њујорк, 16 февруари, 2018 - 10:13 (META) 

Браќа близнаци се уапсени во нивниот стан во њујоршкиот квартот Бронкс со повеќе од десет килограми материјал за составување бомба во текот на претрес од страна на припадниците на Федералното биро за истраги и њујоршката полиција.

Дваесет и седумгодишните Кристијан и Тајлер Торо се уапсен со материјалот, од кој дел потекнува од производи за огномет за деца, изјави заменикот началник за разузнавачки и антиерористички операции, Џон Милер.

Полицијата, исто така, пронашла и дневник во кој се зборува за операцијата „Флеш“ и белешки, вклучително и онаа во којашто се истакнува дека браќата имаат намера да убиваат деца.

-Под полната Месечина, малечките ќе почувствуваат терор – изјави Милер цитирајќи ја белешката.
Истрагата започна по наводна закана со бомба од 4-ти декември во училиште во Харлем, додаде Милер.


„Гугенхајм“ не дава слика на Ван Гог за Белата Куќа, нуди шолја за тоалетот


Њујорк, 26 јануари, 2018 - 12:43 (META) 

Белата Куќа во септември годинава побарала од музејот Гугенхајм во Њујорк да и ја позајми сликата „Пејсаж со снег“ на Винсент Ван Гог, насликана во 1888 година, за со неа да го украси резиденцијалниот дел од Белата Куќа, во кој живеат претседателот на САД и првата дама, Доналд и Меланија Трамп.

Одговорот што стасал од Ненси Спектор, главниот кустос на „Гугенхајм“ бил дека тоа барање не може да биде задоволено ама затоа може да ја позајмат скулптурата „Америка“ за тоалетот. „Америка“ е тоалетна шолја, од 18-каратно злато, дело на уметникот Маурицио Кателан, која изминатава година беше „изложена“ во музејот, известува весникот „Вашингтон Пост“, кој тврди дека има копија од електронското писмо што Спектор го испратила до Белата Куќа.

Целосно функционалната златна тоалетна шолја, критичарите на уметноста ја оквалификуваа како сатира за преголемото богатство во САД. Изминатава година таа беше во тоалет на петтиот кат на музејската зграда, каде сите посетители можеа да ја користат како секоја друга тоалетна шолја.

Бидејќи изложбата по една година траење е завршена, шолјата е на располагање „доколку претседателот и првата дама се заинтересирани да ја инсталираат во Белата Куќа, напишала Спектор, која е критичар на Трамп.

„Уметникот би сакал да ја понуди на Белата Куќа како долготрајна позајмица. Шолјата, се разбира, е екстремно вредна и лесно оштетлива, но ќе ви ги дадеме сите инструкции за нејзино инсталирање и за одржување“, напишала Спектор во електронското писмо цитирано од „Вашингтон Пост“.


Исходот ќе зависи од подготвеноста за компромис на двете страни, вели Владата


Скопје, 18 јануари, 2018 - 11:05 (META) 

Владата на Република Македонија по преговорите во Њујорк со посредништво на Метју Нимиц порача дека посветена на решавање на спорот кој  Република Грција го има со уставното име на Република Македонија.  Во соопштението се вели дека се создаваат услови за напредок, но за да дојде до тоа мора да има подготвеност за компромис на двете страни.

„Активно се создаваат услови за придвижување на процесот напред, а исходот ќе зависи од подготвеноста за компромис на двете страни, имајќи ги предвид разликите. Остава добар впечаток обновената комуникација, која отвора простор за пријателски пристап и градење обострана доверба“, се вели во соопштението.

Владата порача дека по внимателна анализа на рамката што Нимиц ја презентирал пред преговарачите во Њујорк „согласно значењето на прашањето за државните интереси, ќе продолжи процесот за градење на што е можно поширок и поинклузивен став од страна на Република Македонија“.

Инаку, македонскиот преговарач Васко Наумовски вчера за Сител по средбата изјави дека предлозите изнесени од медијаторот Метју Нимиц се „далеку од достоинствено решение“.


За Наумовски предлозите на Нимиц се далеку од достоинствено решение


Њујорк, 17 јануари, 2018 - 22:05 (META) 

Македонскиот преговарач во разговорите за името под покровителство на ОН, Васко Наумовски, по последната рунда разговори во Њујорк изјави дека предлозите изнесени од медијаторот Метју Нимиц се „далеку од достоинствено решение“.

Според него, рамката за разговорите е дадена во Резолуцијата 817 на Советот за безбедност, а тоа е да се надмине разликата околу името.

– Нашата држава има име, тоа е Република Македонија, името што е во основата на нашиот идентитет. Исто така, денес во 2018 година никој не може да го негира постоењето на македонскиот народ и македонскиот јазик. Од страна на медијаторот денеска беа презентирани некои идеи за коишто сметам дека излегуваат од оваа рамка и дека се далеку од едно достоинствено решение, но, сепак, овие предлози ќе бидат презентирани пред државно-политичкиот врв и тој ќе може да заземе став по ова прашање – рече Наумовски во изјава за известувачот на телевизија Сител.

Наспроти оптимизот на медијаторот Нимиц по средбата, Наумовски за себе рече дека не е голем оптимист.

– Оптимизмот е секогаш корисен, но за да се биде голем оптимист треба да има основа за тоа. Имајќи предвид што се слушнавме како изјава од грчките официјални лица, се она што што беше презентирано во рамките на овие разговори, вклучително и ова денес, не ни дава простор да бидеме големи оптимисти – вели Наумовски.


Новиот предлог на Нимиц е комбинација на старите идеи


Њујорк, 17 јануари, 2018 - 19:52 (META) 

Посредникот на ОН во разговорите за името, Метју Нимиц, денеска во седиштето на ОН, по средбата со македонскиот и грчкиот преговарач, Васко Наумовски и Адамантиос Василакис, најави дека на повидок е решение за спорот за името, со што ќе се стави крај на 27 годишниот спор меѓу Грција и Македонија.

– Имам големи надежи дека овој процес се движи во позитивна насока – рече Нимиц по завршувањето на разговорите со Наумовски и Василакис.

Посредникот на ОН во разговорите за името Метју Нимиц изјави дека на преговарачите им дал нов предлог, кој е всушност нова комбинација од неговите стари идеи и дека очекува тие со нивните влади да го разгледаат.

– Ова е процес што се одвива 25 години и тешко е да измислите нешто ново – рече посредникот.

Тој одби да ја коментира содржината на предлогот и рече дека во следните седмици ќе ги посети Скопје и Атина. Изрази надеж дека лидерите на опозициските партии во Грција и Македонија ќе бидат конструктивни.


Две лица повредени при пожарот во Кулата „Трамп“


Њујорк, 8 јануари, 2018 - 16:16 (META) 

Американските медиуми јавија дека две лица се повредени, од кои едното посериозно во пожарот што изби во Кулата „Трамп“ во Њујорк. Пожарот еден час го гаселе осумдесет пожарникари.

Медиумите јавуваат дека една пожарникарска екипа била на покривот на зградата додека њујоршката противпожарна бригада објави дека се работи за „помал пожар“, кој бил предизвикан од дефект на инсталацијата.

Ерик Трамп, синот на претседателот на САД, Доналд Трамп, на „Твитер“ изрази благодарност за пожарникарите за добрата работа која што ја завршиле.

Седиштето на империјата на актуелниот претседател на САД, Доналд Трамп е облакодер од 58 ката во самото срце на Менхетен и во него се наоѓаат и домовите на неколку членови на семејството на Трамп.

Освен луксузни станбени единици, ресторани и продавници, во кулата на Трамп има се наоѓаат и седиштата на многу компании, а претседателот на САД и неговиот тим во кулата формираа и штаб за време на изборната кампања.


Пожар во кулата на Трамп во Њујорк


Њујорк, 8 јануари, 2018 - 15:07 (META) 

Пожар изби на еден од последните катови на кулата „Трамп“ во Њујорк, јавуваат американските медиуми.

Њујоршката противпожарна бригада објави дека во прашање е „помал пожар“ за кој се верува дека е предизвикан од дефект на инсталацијата, а според првичните информации нема повредени.

Седиштето на империјата на актуелниот претседател на САД, Доналд Трамп е облакодер од 58 ката во самото срце на Менхетен и во него се наоѓаат и домовите на неколку членови на семејството на Трамп.

Освен луксузни станбени единици, ресторани и продавници, во кулата на Трамп има се наоѓаат и седиштата на многу компании, а претседателот на САД и неговиот тим во кулата формираа и штаб за време на изборната кампања.


Поплава на меѓународниот терминал на ЏФК во Њујорк, одложени повеќе летови


Њујорк, 8 јануари, 2018 - 11:30 (META) 

На аеродромот ЏФК во Њујорк се случила поплава во одделението за багаж при што поплавени биле багажите на патниците.

Неколку меѓународни летови од Терминалот 4 се одложени на неодредено.

Терминалот бил делумно евакуиран, откако голема количина вода се слеала низ ѕидот на терминалот.
Засега нема пријавно повредени, а се уште не е позната причината за истекувањето на водата.

Терминалот 4 е главен терминал за пристигнување на меѓународен воздушен сообраќај.


Пожар на имотот на Хилари и Бил Клинтон


Њујорк, 4 јануари, 2018 - 11:04 (META) 

Пожар избил на имотот на поранешниот претседател на САД, Бил Клинтон и неговата сопруга Хилари, која му беше противкандидат на актуелниот претседател Доналд Трамп.

Полицијата во 14.50 часот по локално време вчера, примила дојава за пожар на вториот кат на помалиот објект на имотот на Клинтон во Чапаква, во државата Њујорк, кој го користи Тајната служба.

Нема информација за повредени во пожарот, a полицијата го расветлува случајот.

 


Заев се обрати пред студентите на Универзитетот „Колумбија“ во Њујорк


Њујорк, 23 септември, 2017 - 16:04 (META) 

Премиерот Зоран Заев, придружуван од министерот на надворешни работи, Никола Димитров, и од министерот за дијаспора, Едмонд Адеми, беше почесен говорник на Универзитетот „Колумбија“, каде што во организација на УНДП и Швајцарската агенција за развој и соработка, имаше обраќање на тема „Свеж старт на Балканот: Демократско обновување и еколошко обновување на линија на одржливи развојни цели.“

„Новата Влада ја отвори Македонија во земја на можности за сите, за граѓаните, цивилното општество и граѓанскиот сектор, политичките партии, за заедно да ги постигнеме стратешките цели, економски развој и евроатлантски перспективи“, изјавил Заев.

На настанот присуствувале и говореле директори од Универзитетот „Колумбија“ и од УНДП во САД.

Со присуството на Универзитетот „Колумбија“ премиерот Зоран Заев и владината делегација ја заокружија официјалната посета во Њујорк и учеството на 72. Генерално собрание на Обединетите нации.