!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Најмалку 15 повредени при напад со нож во метро во Техеран


Техеран, 15 јули, 2017 - 11:54 (META) 

Најмалку 15 луѓе се повредени откако маж почнал да напаѓа со нож во метро на станицата Реј во предградие на Техеран, јавија иранските медиуми.

Еден од повредените бил муслимански свештеник, а според извештаите, нападот почнал по кавга меѓу имамот и напаѓачот, за кого се вели дека бил психички нестабилен.

По нападот, патниците се судриле со напаѓачот, а полицијата била принудена да ги отвори вратите за да го уапси напаѓачот. Притоа било пукано во него и тој бил ранет, а потоа починал од повредите, вели заменик гувернерот на јужен Техеран.


Две туристки убиени од напаѓач со нож во Хургада


Хургада, 14 јули, 2017 - 20:49 (META) 

Две Германки, кои летувале во одморалиштето Хургада во Египет, станаа жртви на млад Египќанец, кој влегол во нивниот хотел пливајќи од блиската плажа, а потоа бодел со нож, јавуваат египетските медиуми, повикувајќи се на официјални претставници. Според извештаите, четворица други туристи се повредени во нападот.

Напаѓачот е уапсен, а мотивот за нападот сè уште е непознат. Двајца од четворицата ранети се од Полска, а една е Украинка. Иако првично беше пласирана информација за повредени српски државјани, Министерството за надворешни работи на Србија го негираше тоа.

Според неименуван египетски безбедносен претставник, напаѓачот планирал да избоде само странци.


Уапсен маж со нож кај британскиот парламент


Лондон, 16 јуни, 2017 - 13:04 (META) 

Зградата на британскиот парламент е блокирана, како и околината, а едно лице е уапсено, јавуваат светските медиуми.

Како што се наведува, уапсен е маж кој бил вооружен со нож, а „Би-би-си“ пренесува дека настанот не се поврзува со тероризам.

Вооружени припадници на полицијата патролираат по околните улици, зградата на парламентот е затворена, а вратите се заклучни.

„Маж на возраст од околу 30 години е уапсен и осомничен за поседување нож. Нема информации за повредени“, стои во соопштението на полицијата.


ОЈО-Скопје чека извештај од обдукцијата на телото на лекарката


Скопје, 11 мај, 2017 - 11:05 (META) 

ОЈО-Скопје го очекува од Институтот за судска медицина – Скопје извештајот за обдукцијата на телото на 53-годишната Ј.М.С, која завчера вечер била пронајдена мртва во сопствениот дом, соопштија од одделението за односи со јавноста при скопското обвинителство.

Штом обвинителството добие нови информации, ќе ги сподели со јавноста, порачаа од оваа институција.

Во рамки на истражната постапка, вчера беа вршени сослушувања, биле подигнати траги од местото на настанот, а беше побаран и видеоматеријал од безбедносните камери на објектите близу зградата во која живеела лекарката.


Кинез со ментални проблеми избодел 18 луѓе на улица


Чангчунг, 10 мај, 2017 - 12:04 (META) 

Вкупно 18 луѓе биле избодени со нож на улица во североисточниот кинески град Чангчунг, од страна на 50-годишен маж, за кого полицијата вели дека претходно бил хоспитализиран поради ментални проблеми.

Засега нема починати од овој напад, а сите избодени се во болница во Чангчунг. Полицијата од овој кинески град соопшти дека напаѓачот бил застрелан, а потоа уапсен и дека претходно бил во болница поради нарушување на менталното здравје.

Во последните неколку години, во Кина имаше неколку вакви напади, при кои напаѓачи со нож или со мачети напаѓаа минувачи. Изминатава година еден напаѓач повреди осум ученици пред основно училиште во еден град на северот на Кина.


Со нож нападнат адвокат во неговата канцеларија во центарот на Тетово


Тетово, 18 април, 2017 - 17:15 (META) 

Со нож бил нападнат 51-годишниот адвокат Бујар Сабриу. Нападот се случил во неговата адвокатска канцеларија, сместена на првиот кат од градскиот трговски центар во Тетово. Осомничен за нападот е 72-годишниот В.А.

– Осомничениот напаѓач околу 12 часот влегол во канцеларијата каде работел адвокатот. Меѓу нив првин почнала вербална расправија. Во еден момент напаѓачот извадил нож и го прободел адвокатот во прстот од левата рака, a потоа го удрил со столче. Адвокатот некако успеал да се извлече од канцеларијата и се упатил кон тетовскиот Oсновен суд, каде се сокрил. Додека бегал кон тетовскиот суд, напаѓачот трчал по него со ножот. Напаѓачот е приведен – изјави портпаролот на СВР Тетово, Марјан Јосифоски.

Адвокатот е во добра здравствена состојба, а по лекарската интервенција е пуштен на домашно лекување.

Полицијата и Основното јавно обвинителство Тетово извршиле увид и работат на целосно расветлување на случајот.

Неофицијално, според извори на „Мета“, инцидентот настанал како резултат на нерасчистени односи меѓу двајцата околу сопственоста на адвокатската канцеларија каде се случил нападот.


Едно лице убиено и три повредени при напад со нож во Ерусалим


Ерусалим, 14 април, 2017 - 14:35 (META) 

Британска туристка денеска е убиена во напад со нож извршен во ерусалимскиот стар град.

Жената повеќепати била избодена додека се возела со трамвај. Таа била веднаш хоспитализирана, но подоцна им подлегнала на раните.

Израелските медиуми јавуваат дека уште една трудна жена е повредена, како и еден маж.

Локалните медиуми јавуваат дека полицијата го уапсила осомничениот напаѓач. Израелските медиуми јавуваат дека уапсен е осомничениот напаѓач. Наводно станува збор за ментално болно лица од Источен Ерусалим, на возраст од 57 години.

Нападот се случи еден ден пред церемонијата Свет оган во Ерусалим, кога се очекува илјадници христијани да го посетат светиот град.


Во терористичкиот напад во Лондон има четворица загинати и 20 повредени


Лондон, 22 март, 2017 - 19:49 (META) 

Четири лица загинаа, а 20 се повредени во Лондон, при истрелите од огнено оружје пред британскиот парламент во Вестминстер, кои се случија денеска попладне.

Британската полиција овој напад го оквалификува како терористички.

Според пишувањата на британските медиуми, напаѓачот најпрво со автомобил се втурнал во група пешаци на мостот што води до парламентот, а потоа со нож прободел полицаец пред Вестминстер. Напаѓачот потоа бил застрелан од полицијата.

Поради инцидентот, парламентот беше затворен, а засега никој не ја презеде одговорноста за нападот.


Основното јавно обвинителство – Гостивар трага по напаѓачите на британски државјанин


Скопје, 22 март, 2017 - 19:15 (META) 

Британски велосипедист бил пресретнат и нападнат од три непознати лица, вчера на патот од одморалиштето Бунец кон Маврово, соопштија од Јавно обвинителство.

Надлежен јавен обвинител од Основното јавно обвинителство – Гостивар зел изјава од оштетениот и издал наредби за да се расветли настанот.

„Според исказот на оштетениот, лицата го врзале, го внеле во возилото и во исто време му ги одзеле платежните картички што ги поседувал. Искористувајќи момент кога бил сам со еден од напаѓачите, британскиот државјанин се ослободил и на напаѓачот му задал неколку удари со нож што го имал во себе. Откако избегал во блиската шума, преку социјалните мрежи ги алармирал родителите и пријателите. Тие се обратиле до британската полиција, која преку британската амбасада во Скопје ја известила полициската станица Гостивар, по што веднаш била иницирана потрага по велосипедистот. Оштетениот е пронајден во близина на каменоломот Пелагонија денеска, во раните утрински часови“, се вели во соопштението на Јавно обвинителство.

Како што велат оттаму, Oсновното јавно обвинителство – Гостивар координира интензивна потрага по напаѓачите.


Со нож нападнати двајца тетовци


Тетово, 20 март, 2017 - 12:39 (META) 

Двајца тетовци на возраст од 26 и од 30 години, ноќеска биле нападнати со нож, при што добиле повреди по вратот, грбот и на екстремитетите. Двајцата повредени, со возило на итна медицинска помош, биле пренесени во тетовската клиничка болница. Помладиот од нив, поради сериозноста на повредите, префрлен е во Клиничкиот центар во Скопје.

Осомничени за нападот се 34-годишен жител на Тетово и неговиот две години помлад брат. Двајцата се приведени и задржани во полициската станица во Тетово. Напаѓачите и повредените претходно физички се пресметале, а инцидентот се случил на улиците Браќа Миладинови и Благоја Тоска во Тетово.

Извршен е комплетен увид, пронајдени и подигнати се траги за вештачење, како и еден нож на расклопување.Се преземаат мерки и активности за целосно расчистување на случајот, по што ќе следува соодветен поднесок.